Diospajman cꞌuchuyashpaca achcatami beneficiarishun

1, 2. a) ¿Shuj alli amigota charingapajca imatataj rurana canchij? b) ¿Cai yachaipica imatataj yachashun?

CAIPI yuyai. ¿Shuj alli amigota charingapajca imatataj rurarcangui? Seguramente paita alli rijsingapajca paihuanmi achca tiempota pasashcangui. Pai imata munashcata, pai imata mana munashcatapishmi alli rijsishcangui. Pai generoso, paciente, cꞌuyaj cashcata ricushpami canpish pai shina canata munarcangui. Paita alli rijsishcamantami achcata cꞌuyai callarircangui.

² Chashnallataj Diospaj alli amigos cangapajca tiempo y esfuerzomi minishtirin. Diospaj alli amigo canaca tucuimanta yalli valishcami can. Cai yachaipica Jehová Diospajman cꞌuchuyashpa ima beneficiocunata charigrishcatami yachashun. Qꞌuipaca Jehová Diospajman ashtahuan cꞌuchuyangapaj imata rurai tucushcatami yachashun.

3. ¿Diospajman cꞌuchuyashpa ima beneficiocunata charigrishcapi yuyashpaca ima munaitataj charishun? Shuj ejemplota churashpa intindichi.

³ Diospajman cꞌuchuyashpa ima beneficiocunata charina cashcapimi yuyana canchij. Chashnami Diospajman ashtahuan cꞌuchuyanata munashun (Salmo 63:​6-8). Caita yuyashun. Tucuicunami alli, sano micunata micuna cashcata, suficiente yacuta ubyana cashcata, ejerciciota rurana cashcata, alli samarina cashcatapish yachanchij. Pero ¿chaicunata rurana munaita charingapajca imapitaj yuyana canchij? Chaicunata rurashpa alli saludta charina cashcapimi yuyana canchij. Chashnallatajmi Diospajman ashtahuan cꞌuchuyana munaita charingapajca paipajman cꞌuchuyashpa ima beneficiocunata charina cashcapi yuyana canchij (Salmo 119:​27-30).

4. ¿Salmota quillcaj runaca ama desanimaringapaj imata rurana cashcatataj cuentata curca?

⁴ (Salmo 73:​28-ta liyipai). Levipaj familiamanta Salmo 73-ta quillcaj runaca achca huatacunatami Jehová Diosta tucui shunguhuan sirvij carca. Paica Diospaj templopimi instrumentocunata tocashpa sirvij carca. Shinapish chai runaca ama desanimado sintiringapajca Diospajman ashtahuan cꞌuchuyashpa catina cashcatami cuentata curca. Chaimantami shujtajcunapish Jehová Diospajman cꞌuchuyana alli cashcata yachachun munarca. Cunanca Jehová Dioshuan alli apanacushpa imalla beneficiocunata charigrishcata ricushun.

DIOSPAJMAN CꞌUCHUYASHPACA CUSHILLAMI CAUSANCHIJ

5. a) ¿Diospajman ashtahuan cꞌuchuyangapaj, ashtahuan cushilla causangapajca imatataj rurana canchij? b) ¿Diospaj consejocunata catinaca ñucanchijtaca ima shinataj benefician? (Proverbios 2:​6-16).

⁵ Diospajman ashtahuan cꞌuchuyangapaj, ashtahuan cushilla causangapajca paipaj consejocunatami cazuna canchij (Salmo 65:4). ¿Caitaca imamantataj ninchij? Bibliapi tiyaj Diospaj valishca consejocunata catishpaca mana alli amigocunamantami caruyashun, mana alli ruraicunapipish mana urmashunchu (Proverbios 2:​6-16-ta liyipai). Chaimantami Bibliapica: “Maijanpish cai alli yachaita yachashpa, alli yuyaita charijca cushicunmi” nin (Proverbios 3:13).

6. ¿Salmistaca imamantataj llaquilla sintirirca?

⁶ Huaquinpica Diosta sirvijcunapishmi llaquiri tucunchij. Salmo 73-ta quillcaj runapi yuyashun. Paica millai gentecuna, jatun tucushcacuna, Diosta mana cazuj gentecuna cullquiyuj cashcata, alli saludta charishcata, mana sufrishcata ricushpami dimastij llaquirirca. Chaimantami paicunataca envidiai callarirca. Ashtahuancarin “Yayitu Diostapish yangamantami sirvicuni” nishpami yuyai callarirca (Salmo 73:​3-7, 12). Chai runaca: “Alli yuyarijpica, ñuca shungutaca yangallami chuyayachishcani. Ñuca maquicunata mana mapayachishcapish yangallami” nishpami dimastij llaquirirca (Salmo 73:13).

7. ¿Ama llaquilla sintiringapajca imatataj rurana canchij? (Página 1-pi tiyaj fotomantapish parlai).

⁷ Salmistaca ama llaquilla sintiringapajmi Diospaj huasiman yaicushpa Yayitu Dios yachachishcacunata yuyarirca (Salmo 73:​17-19). Shinallataj ¿ñucanchijca llaquilla sintirishpaca imatataj rurana canchij? Ñucanchijcunaca Jehová Diostami ñucanchijta ayudachun mañana canchij. Paica ñucanchij alli amigo cashcamantami ñucanchij ima shina sintirishcataca alli yachan. Chaimantami paica ñucanchij llaquilla sintirijpica paipaj Shimihuan, huauqui panicunahuan ñucanchijta sinchiyachin, ñucanchijta cushichin. Chashnami ñaupajman catingapaj fuerzasta charishun (Salmo 94:19).a

DIOSPAJMAN CꞌUCHUYASHPACA CUNAN PUNLLACUNAPIPISH, SHAMUJ PUNLLACUNAPIPISH ALLI CAUSAITAMI CHARISHUN

8. ¿Diospajman cꞌuchuyashpaca ima laya causaitataj charishun?

⁸ Diospajman cꞌuchuyashpaca cunanmantapachami alli causaita charishun. Shamuj punllacunapicarin pai cusha nishcacuna ima shina pajtarijtami ricushun (Jeremías 29:11). Cai ishqui beneficiocunamanta ashtahuan yachashun.

9. ¿Imacunata yachashpa, imata rurashpataj alli causaita charinchij?

⁹ Jehová Diospajman cꞌuchuyashcamantami alli causaita charinchij. Pero achca gentecunaca Dios tiyajta mana crishcamantami “¿imapajtaj causanchij?, ¿shuj punllaca chingarishunchu?” nishpa achcata preocuparincuna. Cutin ñucanchijca Bibliata estudiashcamantami Jehová Dios tiyashcata, pai allicunata cuj cashcata yachanchij (Hebreos 11:6). Jehová Diosca ñucanchijtaca paita sirvina munaihuanmi rurashca. Chaimantami paita sirvishpaca alli causaita charinchij (Deuteronomio 10:​12, 13).

10. Salmo 37:​29-pi nishca shinaca ¿Diosta sirvijcunaca ima bendicioncunatataj chasquingacuna?

¹⁰ Achca gentecunaca shamuj punllapi Dios alli causaita apamunata mana yachancunachu. Chaimantami huahuacunata huiñachingapaj, mayoryashpa cullquita charingapajpish trabajanallapi ocuparincuna. Shinapish Diosta sirvijcunaca pai cusha nishcacuna pajtarina cashcapimi crinchij (Salmo 25:​3-5; 1 Timoteo 6:17). Diosca mana llulla, ñucanchij amigomi can. Chaimi Paraíso Allpapicarin ñucanchijmanca sumaj bendicioncunata cunga. Paita huiñai huiñaita sirvichunpishmi saquinga (Salmo 37:​29-ta liyipai).

11. a) ¿Diospajman cꞌuchuyashpaca ima shujtaj beneficiotataj charinchij? b) ¿Diospajman cꞌuchuyajpica paica ima shinataj sintiringa?

¹¹ Diospajman cꞌuchuyashpaca shujtaj beneficiotami charinchij. Por ejemplo, ñucanchijcuna ñucanchij juchamanta arrepintirijpica Jehová Diosca ñucanchijta perdonangapajmi listo can (Isaías 1:18). Yayitu Dios ñucanchijta perdonashcamantami shungupipish, yuyaipipish tranquilo sintirinchij (Salmo 32:​1-5). Shinallataj Diospajman cꞌuchuyajpica paica achcatami cushicun. Chaimantami ñucanchijpish achcata cushicunchij (Proverbios 23:15). Canpish Diospaj amigo cashcamantami de seguro achca bendicioncunata chasquishcangui. Shinapish ¿Diospajman ashtahuan cꞌuchuyashpa catingapajca imatataj rurana canchij?

¿JEHOVÁ DIOSPAJMAN ASHTAHUAN CꞌUCHUYANGAPAJCA IMATATAJ RURANA CANCHIJ?

12. ¿Jehová Diospajman ashtahuan cꞌuchuyashpa catingapajca imatataj rurana cangui?

¹² Canca ñachari bautizarishca cangui. Chaimi Jehová Diosmanta, Jesusmantapish achcata yachashcangui. Cambaj juchacunamanta arrepintirishpa, Diospi feta charishcatapishmi ricuchishcangui. Paita tucuipi cazungapajpishmi esforzarishcangui. Chaicunata pajtachishcamantami Jehová Diospaj cꞌuchullapi cangui. Pero chaicunata ruranataca manataj saquinachu cangui. Chashnami Jehová Diospajman ashtahuan ashtahuan cꞌuchuyashpa catingui (Colosenses 2:6).

13. ¿Jehová Diospajman ashtahuan cꞌuchuyangapajca ima quimsa yuyaicunatataj pajtachina canchij?

¹³ Jehová Diospajman ashtahuan cꞌuchuyangapajca cai quimsa ruraicunatami pajtachina canchij: 1) Ñucanchij yachashcallahuanca mana saquirinachu canchij. Ashtahuanpish Bibliata liyishpa, estudiashpami catina canchij. Shinallataj pai imata rurachun munashcatami alli intindina canchij. Pai mandashca shina causangapajpishmi esforzarina canchij (Efesios 5:​15-17). 2) Jehová Dios ñucanchijta cꞌuyashcamanta imacunallata rurashcataca cutin cutinmi yuyarina canchij. Chashpami ñucanchij feta sinchiyachishpa catishun. 3) Jehová Dios millanayachishca ruraicunatapish ñucanchijca millanayachinami canchij. Shinallataj mana allita ruraj gentecunahuanpish mana tandanachu canchij (Salmo 1:1; 101:3).

14. ¿Punllanta imacunata rurashpataj Jehová Diosta cushichi tucunchij? (1 Corintios 10:31; fotocunamantapish parlapai).

¹⁴ (1 Corintios 10:​31-ta liyipai). Jehová Diospajman ashtahuan cꞌuchuyangapajca paita cushichina yuyaillami causana canchij. Por ejemplo, huillanaman llujshishpa, tandanacuicunaman rishpaca paitami cushichinchij. Shinapish punllanta imata ruracushpapish Dios imata munashcata rurashpami paita cushichina canchij. Por ejemplo, Jehová Diosca shujtajcunahuan honrados cachun, carajcuna, cujcuna cachunmi munan (2 Corintios 8:21; 9:7). Shinallataj imata ruracushpapish ñucanchij causaita cuidachunmi munan. Chaimantami ñucanchij saludta cuidangapajca mana yallitaj micuna canchij, mana yallitaj tragota ubyana canchij. Shujtaj ruraicunata rurashpapishmi ñucanchij saludta cuidana canchij. Chashna uchilla ruraicunapi Jehová Diosta cushichingapaj esforzarishpaca paipajmanmi ashtahuan cꞌuchuyashpa catishun. Paica ñucanchijtapishmi ashtahuan cꞌuyashpa catinga (Lucas 16:10).

15. ¿Jehová Diosca shujtajcunata ima shina tratachuntaj munan?

¹⁵ Jehová Diosca allita rurajcunata, mana allita rurajcunatapish allimi tratan (Mateo 5:45). Paica paita sirvijcunapish shujtajcunata alli tratajcuna cachunmi munan. Tito 3:​2-pica Jehová Diosca ‘pitapish mana allita ama rimachun, shujtajcunahuan ama pꞌiñanacuchun, tucui gentecunahuan siempre manso shungu cachunmi’ mandan. Caicunata pajtachingapajca shujtaj religionta charijcunata yalli cashcataca mana yuyanachu canchij (2 Timoteo 2:​23-25). Shujtajcunata siempre alli tratashpaca Jehová Diospajmanmi ashtahuan cꞌuchuyai tucushun.

LLAQUILLA SINTIRISHPAPISH DIOSPAJMANMI CꞌUCHUYAI TUCUNCHIJ

16. ¿Salmo 73-ta quillcaj runaca pandarishcamantaca ima shinataj sintirirca?

¹⁶ ¿Maipica Jehová Dios canmanta carupi cashcata, canta mana cꞌuyashcatachu yuyashcangui? Salmo 73-ta quillcaj runapi yuyai. Paica pandarishcamantami achcata llaquirirca. Chaimantami Jehová Diostaca: ‘Ashallamantamari ñuca chaquicunaca mana lluchcarin. Ñuca alma jatunta llaquirijpica, ñuca shunguca tꞌujyacuj shinami tucurca. Ñucaca imata mana entendij chꞌahuanmi carcani. Quiquinpaj ñaupajpica shuj animal shinamari carcani’ nirca (Salmo 73:​2, 21, 22). Chashna yuyashcamantami chai runaca Jehová Dios paita mana cꞌuyashcata, mana perdonagrishcata yuyashcanga.

17. a) ¿Salmo 73-ta quillcaj runaca paipaj yuyaita cambiangapajca imatataj rurarca? b) ¿Paipaj ejemplomantaca imatataj yachanchij? (Fotocunamantapish parlapai).

¹⁷ Chai runaca Jehová paita mana cꞌuyashcata yuyashpapish chai yuyaita ratomi cambiarca. Chaipajca Jehová Diospajman ashtahuan cꞌuchuyangapajmi esforzarirca. Paica Jehová Diostaca: “Ñucaca punllantami quiquinhuan carcani. Quiquinmari ñuca alli maquimanta pushahuarcangui. Ñucataca quiquin cunashcahuanmari pushahuarcangui. Qꞌuipataca quiquin sumaj cashcapimari chasquihuangui” nircami (Salmo 73:​23, 24). Ñucanchijpish “Jehová Dios ñucata mana cꞌuyanchu” nishpa yuyashpaca chai yuyaita ratomi cambiana canchij. Chaipajca Jehová Diospajmanmi ashtahuan cꞌuchuyana canchij. Paica ñucanchij ‘shungu samarina rumimi’ can (Salmo 73:26; 94:18). Cutin ¿jatun juchata rurashpa, Jehová Diosmanta caruyashpaca imatataj rurana canchij? Paipajman cutin cꞌuchuyangapajmi esforzarina canchij. Paica ñucanchijta perdonangapajmi listo can (Salmo 86:5; 103:​13, 14).

HUIÑAI HUIÑAICAMA JEHOVÁ DIOSPAJMAN CꞌUCHUYASHPA CATISHUNCHIJ

18. ¿Huiñai huiñaicama imacunatataj yachashpa catishun?

¹⁸ Romanos 11:​33-pica: ‘¡Diosca tucui imatapish yachajmi, paipaj alli yachaipish yallitaj jatunmari! ¿Pai imata rurashcatapish pitaj tucuita yachai tucungari?’ ninmi. Cai versopi nishca shinaca ñucanchijcunaca huiñai huiñaicamami Jehová Diosmanta mushuj yachaicunata yachashpa catishun. Chaicunata yachashpami Jehová Diospajman cꞌuchuyashpa catishun.

19. ¿Jehová Diospajman cꞌuchuyashpa catishpaca imacunatataj chasquishun?

¹⁹ Salmo 79:​13-pica: “Ñucanchijca quiquinpajcunami canchij. Quiquinpaj michina pambacunapi micuj ovejacunami canchij. Quiquintaca huiñaitami alabacushunlla” ninmi. Caipi nishca shinaca Jehová Diospajmanmi huiñai huiñaicama cꞌuchuyashpa catina canchij. Chashnami mana tucuripaj sumaj bendicioncunata charishun. Chaimanta Salmo 73-ta quillcaj runa shina nishunchij. Paica: “Ñuca aichapish ñuca shungupish urmarinmari. Shina cajpipish ñuca shungu samarina rumica Jatun Diosmari. Huiñaipaj ñuca charinaca Jatun Diosmari” nircami (Salmo 73:26).