Caitami tapushcacuna
¿Proverbios 30:18, 19-ta quillcaj runaca “shuj soltero shuj solterahuan ishquindij puricushcatapish mana yachai tucunichu” nishpaca imatataj nisha nirca?
Proverbios 30:18, 19-pica: ‘Ñucaca quimsatami mashnata yuyashpapish, manataj yachai tucuni. Mana yachashcallataj shujhuancarin chuscupishmi. Huairata águila purishcatapish, c’aca quinricunapi culebracuna purishcatapish, mama cuchapi jatun barcocuna huambushcatapish, shuj soltero shuj solterahuan ishquindij puricushcatapish mana yachai tucunichu’ ninmi. Cai shimicunataca Bibliata yachajcunapish, achca gentecunapish mana intindi tucushcacunachu (Proverbios 30:18, 19).
Ñucanchijpish cai shimicunataca mana alli intindij carcanchijchu. Shuj soltero shuj solterahuan ishquindij puricushcata nishpaca mapa, mana alli ruraicunata ruracushcatami intindijcuna carcanchij. ¿Imamantataj chashna intindircanchij? Proverbios 30:15, 16-pica mana allicunamantami parlan. Shinallataj Proverbios 30:20-pica shuj huainayaj huarmimantami parlan. Cai versocunata ricushpami verso 19-pipish mana alli ruraicunamanta parlacushcata intindij carcanchij. “Shuj aguila jahuata volajpica pi mana ricui tucunchu. Shuj culebrapish rumicuna chaupipi cajpica pi mana ricui tucunchu. Shuj barcopish mama cucha chaupipi cajpica pi mana ricui tucunchu. Chashnallatajmi shuj runaca imatapish pacalla rurai tucun” nishpami yuyajcuna carcanchij. Chashna yuyashcamantami verso 19-pi parlaj runa shuj joven huarmita umashpa huainayasha nishcata intindijcuna carcanchij.
Shinapish cai shimicunata quillcajca mapa ruraicunamantaca mana parlacurcachu. Ashtahuanpish sumaj cosascunamantami parlacurca. Chaicunata ricushpami sorprendido saquirishcata nisha nicurca.
Hebreo rimaipi ñaupa quillcachishcacunapipish, shuj diccionariopipish: “Proverbios 30:18, 19 pica mana yachai tucushca cosascunamanta parlashpaca dimastij sumaj, alaja cosascunamantami parlacun” ninmi (Theological Lexicon of the Old Testament, de Ernst Jenni y Claus Westermann).
Universidad de Harvardpi trabajaj Crawford Howell Toy nishca profersopish chai versopi ima mana allicunamanta mana parlacushcatami nirca. Ashtahuanpish chai cosascuna sumaj, alaja cashcamanta parlacushcatami nirca.
Caicunata yachashcamantami cunanca Proverbios 30:18, 19-pi nishcacunataca alli intindinchij. Cai versocunapica mana yachai tucushca sumaj, alaja cosascunamantami parlacun. Shuj águila jahuata volacujta ricushpami sorprendidos saquirinchij. Shuj culebra chaquicunata mana charishpapish rumicuna chaupita rato callpajta ricushpami sorprendidos saquirinchij. Shuj barco yallitaj jatun cashpapish, llashaj cashpapish mama cucha chaupipi mana huashicushpa purijta ricushpami sorprendidos saquirinchij. Chai shinallatajmi shuj soltero shuj solterahuan enamorarishpa cushilla causajta ricushpaca dimastij sorprendidos saquirinchij.