Anton Petrus/Moment via Getty Images
RIJCHARISHCA SHINA CATISHUNCHIJ
¿Muyundij allpapica ñallachu jatun macanacui tiyanga? ¿Caimantaca Bibliaca imatataj nin?
Achca gentecunaca cai último 30 huatacunapica chꞌican chꞌican llajtacuna alli apanacui callaricujtami ricushcacuna. Shinapish cunan punllacunapi ima tucucushcata ricushpami mana chashna cashcata cuentata cushcacuna. Por ejemplo, huaquin noticiacunapica caitami uyashcanchij:
“Israelpish, Hizbulapish Líbano fronterapi macanacucushcamantami Gaza llajtapi macanacuicunaca mirashpa caticun” (Reuters, 6 de enero de 2024).
“Irán llajtaca cutin tigrami Occidentepi saquirij llajtacunahuan macanacusha nicun. Irantaca Chinapish, Rusiapishmi apoyai callarishcacuna. Iranmanta soldadocunaca chꞌcan chꞌican lugarcunapimi llaquichicuncuna. Shinallataj nucleares nishca armacunatami rurai callarishcacuna” (The New York Times, 7 de enero de 2024).
“Rusia llajtamanta soldadocunaca Ucrania llajtatami llaquichishpa caticun” (UN News, 11 de enero de 2024).
“China llajtapi cullqui mirarishcamanta, macanacungapaj ashtahuan allichirishca cashcamanta, Taiwán llajta tucuicunapaj rijsishca tucushcamanta, Pekín llajtapish Washington llajtahuan mana apanacui tucushcamantami jatun macanacui callari tucun” (The Japan Times, 9 enero de 2024).
Cai mundoca ratomi cambiarinlla. Chashna cambiaricushcamantaca, ¿jatun macanacui tiyangachu? Caimantaca, ¿Bibliaca imatataj nin?
Bibliaca ima tucuna cashcatami ña huillashca
Bibliapica maijanlla llajtacuna macanacuna cashcataca mana huillarcachu. Shinapish achca macanacui tiyashcamanta ‘cai allpapi sumaj causaita anchuchina’ cashcatami huillarca (Apocalipsis 6:4).
Daniel libropica tucuri punllacunapi poderta charij llajtacuna macanacugrishcatami huillan. Chai llajtacunaca achca poderta charishcata, ‘sumaj charinacunata’ o achca cullquita charishcata ricuchingapajmi macanacungacuna (Daniel 11:40, 42, 43).
Ñallami shuj jatun macanacui tiyanga
Bibliapica cai allpa mejoranapaj randica ashtahuan llaquipi urmagrishcatami parlan. Chaimantami Jesusca: “Chai punllacunaca jatun llaquimi canga. Cashna llaquica cai pacha tiyai callarimanta cunancama mana tiyashcachu” nishpa huillarca (Mateo 24:21). Chai ‘jatun llaqui punllaca’ Armagedón macanacuipimi tucuringa. Armagedonca ‘Tucui poderta charij Diospaj jatun macanacuimi’ can (Apocalipsis 16:14, 16).
Armagedón macanacuipica Diosca macanacuicuna tiyachun apoyaj gobiernocunatami tucuchinga. Chaipica gentecunata tucuchinapaj randica paicunatami quishpichinga. Shinapish ¿Armagedón macanacuica ima shinashi tranquilo causaita apamunga? Caimanta ashtahuan yachasha nishpaca cai catij yachaicunata liyi: