2021 huatapi llaquicunata charij huauqui panicunatami ayudarcanchij

Año de servicio 2021 huatapajca,a COVID-19 ungüimantami mundo enteropi achca llaquicuna tiyarca. Shinapish, “Pandemia punllacunapimi mundo enteromanta huauqui panicunata ayudacushcanchij” nishca temapica achca cullquihuanb, 950 yalli Comité de Socorro nishcacunahuan ayudashcatapishmi nin.

COVID-19 ungüihuan ñucanchij huauqui panicuna chꞌimbapuracujpipish shujtaj llaquicunapishmi llaquichirca. 200 yalli llaquicuna tiyashcamantami Cuerpo Gobernantemanta Comité de Coordinadorespi sirvij huauquicunaca 8 millones cullquihuan ayudangapaj aprobarcacuna. Shinallataj COVID-19 ungüimanta llaquicunata charij huauqui panicunatapishmi ayudashpa catircacuna. Ishqui llajtacunapi llaquita apacuj huauqui panicunata ayudangapaj shungumanta cushca cullquita ima shina utilizacushcata yachashun.

Nyiragongo urcu tugyarca

22 de mayo 2021 huatapimi República Democrática del Congopica Nyiragongo urcu tugyai callarirca. Chai urcu tugyashpa lava siquiyashpaca huasicunata, escuelacunata, yacucuna tandashca jatun tanquecunatapishmi taparca. Lavallaca mana llaquichircachu. Ashtahuanpish urcumanta llujshishca mapa polvopishmi achca punllacunata Goma llajtataca llaquichirca. Shinallataj achca allpa chujchuipishmi tiyarca. Chaimantami autoridadcunaca chai llajtamanta casi tucuicuna llujshichun mandarca. Chaimi achca huaranga gentecunaca Ruanda llajta lindero cꞌuchuta rishpa chai llajtamanta llujshircacuna.

Cai achca gentecunapurapica 5.000 Testigocunapishmi carca. Huaquincunapaj huasicunataca urcu tugyajpimi chingachirca. Cutin shujtajcunapaj huasicunataca paicuna rishca huashami shuhuarcacuna. Ruanda llajtamanta, República Democrática del Congo llajtamanta Comité de Socorrocunaca shujlla shina tandanacushpami ashtahuan ayudacunata curcacuna. Shuj Comité de Socorro ima rurashcatami Congo llajtapi saquirij sucursalmanta huauquicunaca parlarca: “Paicunaca chai llajtapi achca llaquicuna tiyai horas, autoridadcunapish chaimanta llujshinata manaraj imata nijpimi ña paicunaca micunata, yacuta, churanata, cobijacunata curca” ninmi. Llaquicunamanta llujshi rishpaca shujtaj llajtapimi 2.000 yalli huauqui panicuna tandanacurcacuna. Chaipimi shuj Comité de Socorromanta huauquicunaca carpacunata churarca, mascarillacunata curca, COVID-19 ungüimanta, cólera ungüimantapish ima shina cuidarinata yachachirca.

Quimsa quillapajca ñucanchij huauquicunaca arroztapish 6 toneladas yallita, sara cutatapish 6 tonelas yallita, aceitetapish 8.000 litros yallita, yacutapish 8.000 litros yallitami curcacuna. Sucursalpi sirvij huauquicunaca shujtaj llajtamanta micunacunata randishpa yalli cullquita gastanapaj randica chai llajtallapitaj tiyaj micunacunatami achcata randircacuna.

Urcu tugyajpimi shuj panica paipaj mushuj huasita chingachirca. Chaimi paipish, paipaj familiapish llaquilla, desanimados sintirircanchij nirca. Chai llaqui horaspimi ima minishtirishcata, Yayitu Diosta sirvishpa catingapaj animotapish chasquircacuna. Paica: “Jehová Dios ayudajpimi minishtishcacunata charircanchij. Cai tucui llaquicunahuanpish mana ñucanchijlla cashcata yachashpami ahuantai tucurcanchij” nircami.

Venezuela llajtaca cullqui illajmi

Venezuela llajtapica achca huatacunatami autoridadcunaca cullquita mana alli administarcacuna. Chaimi ñucanchij huauqui panicunapish micuna illaimanta, mana alli ruraicuna ashtahuan mirarishcamanta llaquita aparcacuna. Shinapish Jehová Diospaj organizacionca paicunata mana saquishcachu.

Pasaj año de serviciopica ñucanchij huauqui panicuna micunata, jabonta charichunca 1.5 millones cullquitami gastarcanchij. Venezuela sucursalmanta huauquicunaca: “Cada quillami cai llajtapi tiyaj tucui ladocunamanca 130 toneladas micunata cachanchij. Chai qꞌuipaca minishticuj huauqui panicunapaj chayachunmi ricuranchij. Chaicunata ruranaca mana jahuallachu can” nincunami. Shinallataj cai huauquicunaca mana rato dañarij micunacunatami cachancuna. Cosecha punllacunapica asha baratollami can. Chaimi achcata randincuna. “Chaicunata cachangapajpish baratollata mashcashpami cachanchij” nincunami.

Shuj Comité de Socorropi sirvij Leonel shuti huauquica cashna ayudanataca achcatami munan. Paica: “Cai Comitecunapaj ayudaca valishcami can. Caipi sinchita trabajacushcamanta, minishticuj huauqui panicunata ayudangapaj ocupado cashcamantami ñuca huarmisita COVID-19 ungüihuan huañujpipish chai llaquita ahuantai tucurcani. Shinallataj ñucallatajmi ricurcani Jehová Diosca pai nishca shina paipaj pueblota mana saquishcata” nircami.

Cutin caishuj huauquica shuj Comité de Socorropimi ayudaj carca. Paica: “Cunanca ñucallatajmi chai ayudataca minishtircani. Paicunaca ima faltashcacunallataca mana curcacunachu. Ashtahuanpish ñucaman, ñuca huarmimanpish tranquilo sintirichun, animota cushpami tucuipi cuidarcacuna” ninmi.

Huaquin llaquicunaca mana yuyashcapimi ricurin. Shinapish Jehová Diospaj organizacionca obra mundialpi shungumanta cushca cullquita charishpami llaquita charij huauqui panicunaman ima minishtirishcacunata siempre cushpa ayudashca. Ima shina cullquita cunataca donate.jw.org paginapimi ricui tucungui. Shungumanta cucushcamantami diosolopagui ninchij.