Bibliamanta yachangapaj mushuj ayuda

Enero de 2021-pimi Cuerpo Gobernanteca Bibliata yachachingapaj Huiñai huiñaita cushilla causaia nishca mushuj libro llujshishcata huillarca. ¿Chaita uyashpaca ima shinataj sintirircanchij? Canadamanta huauqui Matthewca: “¡Cushillami sintirircani! Discursocunata uyashpa, videocunata ricuchishpami imamanta cai mushuj librota rurashcata, maijan huauqui panicunata cai librohuan yachachichun agllashcata intindircani. Chaita intindishpami ashtahuan cushicurcani. Chai ratomi ñucapish cai mushuj librohuan shujtajcunata ña yachachisha nircani” nircami.

Huiñai huiñaita cushilla causai libroca Bibliamanta yachachingapaj shujtaj librocunamanta diferentemi can, pero mana yachachingapajllachu diferente can. Cai librota imprimishcata charicushpaca imapi ashtahuan diferente cashcatami ricui tucungui.

¿Mushuj libroca imapitaj chꞌican can?

Racu papelpi rurashcami. Cai libropica 600 yalli dibujocunami tucui laya colorta charin. Bibliamanta yachashunchij librohuan ricujpica 10 cutinhuan yallimi cai mushuj libropica dibujocuna tiyan. Ladocunamanpish achca espaciomi tiyan, mana tucui hojapichu escribishca o dibujashca can. Pero delgado papel cajpica dibujocunapish, letracunapish caishuj ladomanmi ashallapish ricurin. Chashna ama tucuchunmi Wallkillpi saquirij Departamento Internacional de Impresionpi (IPD) sirvij huauquicunaca chuscu laya papelcunapimi pruebata rurarcacuna. Comité de Redaccionpi sirvij huauquicunami cada pruebata alli ricurcacuna. Chashna ricushca qꞌuipami racujlla papelta agllarcacuna. Cai papelca ñucanchij publicacioncunata imprimina papelcunamanta 16​% yallimi valin. Chashna cajpipish Bibliamanta yachacujcuna Huiñai huiñaita cushilla causai librota liyicujpi caishuj ladoman tiyaj letracuna, dibujocuna ama molestachunmi chai papelta agllarcacuna.

Pastapish shujtaj layami can. Cai libropaj pastaca mana ñucanchij caishuj librocuna shinachu can, ashtahuanpish jahuataca plasticota laya shuj laminata churashcami can. Shujtaj librocunapaj pastaca achij nicujmi can. Pero cai mushuj libropaj pastaca mana achij nicuj canchu. Chaimantami pastapi tiyaj dibujocunaca ashtahuan alaja ricurin, ni mana utca maucayanchu. Mana achij nicuj pastata rurana materialcunaca pichca cutinhuan yallimi valin. Chashna cashcamantami tauca sucursalcunamanta huauquicunaca baratolla randingapaj tandalla trabajarcacuna.

¿Imamantataj cai librotaca achcata valij materialcunahuan rurarcacuna? Departamento Internacional de Impresionpi trabajaj shuj huauquica: “Cai librota alli utilizachunmi munanchij. Gentecuna mashna tiempota liyijpipish cai libro ama utca maucayachunmi munanchij” nircami. Brasil sucursal Imprentapi trabajaj huauqui Eduardoca: “Diospaj organizacionca shungumanta cushca cullquitaca allimi utilizan. Cai sumaj librotapish alli materialcunahuanmi rurashca, achca tiempota utilizajpipish mana utca maucayangachu. Chaimantami cushilla canchij” nircami.

¿COVID-19 ungüi tiyajpipish ima shinataj imprimircanchij?

Huiñai huiñaita cushilla causai librotaca marzo de 2021-pimi imprimi callarircanchij. ¿COVID-19 ungüi tiyashcamantaca ima jarcaicunahuantaj chꞌimbapurarcanchij? Betel huasicuna huichcashca cashcamantami Betelpi voluntariocuna shina sirvij huauqui panicunaca mana ayudai tucurcacuna, mushuj betelitacunatapish mana invitai tucurcanchij. Chaimantami imprentapica ashallacuna trabajacurcacuna. Cutin shujtaj imprentacunatacarin gobiernocuna mandashcamantami asha tiempota huichcarcanchij.

¿Chashna jarcaicuna ricurijpipish imatataj rurarcanchij? Imprentacunapi ña trabajai callarishpaca Betelmanta shujtaj departamentocunapi trabajaj huauqui panicunatami asha tiempota imprentapi trabajachun invitarcanchij. Departamento Internacional de Impresionpi sirvij huauqui Joelca: “Cai huauqui panicunaca mushuj trabajota ima laya ruranata yachashpami cushicushpa ayudarcacuna. Paicuna sinchita trabajashcamantami cai trabajotaca tucuchircanchij” ninmi.

Chꞌican chꞌican jarcaicuna ricurijpipish Huiñai huiñaita cushilla causai librotaca ñami achca millonta imprimishcanchij. Cai librota rurangapajca imprimingapaj planchata, pasta jahuapi churana laminata, papelta, tintata, pegata, shujtaj materialcunatapishmi minishtircanchij. Punta pichca quillacunallapimi imprimingapaj materialcunapica 2 millones yalli cullquita gastarcanchij. Materialcuna yallitaj caro cashcamantami congregacioncunapi huauqui panicuna minishtishcalla librocunata imprimishcanchij.

“Sumajta rurashcami”

¿Cai mushuj ayudata charishcamantaca Bibliamanta yachachijcunapish, yachacujcunapish ima shinataj sintirincuna? Australiamanta huauqui Pabloca: “Huiñai huiñaita cushilla causai libroca sumajmi can. Cai librohuan shujtajcunaman yachachishpaca cushillami sintirini. Cai sumaj libroca achij yuyaicunata, shunguman chayaj tapuicunata, videocunata, dibujocunata, shujtaj recuadrocunata, Bibliamanta yachacujcuna pajtachichunpish “Caita rurai” nishca partetami charin. Chashna alajata rurashca cashcamantami alli yachachij cangapaj ñucapish esforzarisha nini” ninmi.

Estados Unidosmanta Bibliamanta yachacuj shuj runaca: “Cai mushuj librota yachanataca achcatami munani. Dibujocunata ricushpami valishca yuyaicunataca intindi tucuni. Videocunapish ñuca shungumanmi chayan, cambiocunata rurachunpishmi ayudan” ninmi. Cai yachacujca semanapica ishqui cutinmi estudian, tucui tandanacuicunamanpishmi conectarin.

Huiñai huiñaita cushilla causai libroca chꞌican chꞌican shimicunapi impriminaca faltanrajmi. Cunancamaca Cuerpo Gobernanteca 710 shimicunapi imprimichunmi aprobashca. Cutin Bibliamanta yachashunchij libroca 370 shimicunallapimi llujshirca.

¿Cashna laya publicacioncunata rurangapajca maimantataj cullquitaca llujchinchij? Obra mundialman shungumanta cushca cullquihuanmi caitaca rurai tucunchij. Maijancunaca donate.jw.org. paginaman yaicushpami shungumanta cullquitaca cushpa ayudancuna. Chashna cushcamantami diosolopagui ninchij. Cancuna cushca cullquihuanmi Jehová Diosmanta yachasha nij gentecunata ayudangapaj, paicunapish huiñai huiñaita cushilla causachun Bibliamanta yachangapaj huaquin ayudacunata rurashcanchij (Salmo 22:26).