Jeremías
36 Josiaspaj churi rey Jehoiaquim Judá llajtata chuscu huatacunata mandacujpimi Jehová Diosca Jeremiasman cai shimicunata nirca: 2 “Shuj rollota japishpa Israelpaj contra, Judapaj contra, tucui llajtacunapaj contra ñuca imalla nishca shimicunata quillcai. Josías mandacui punllacunapi canhuan punta cutin parlashcamanta cunancama tucui ñuca nishca shimicunata quillcai. 3 Judamanta gentecunaca paicunaman ñuca cachagrishca tucui llaquicunata uyashpaca paicunapaj mana alli ñanta saquingacunapishchari. Chaimi paicunapaj pandarishcatapish, paicunapaj juchatapish perdonaiman” nircami.
4 Chai qꞌuipami Jeremiasca Neriaspaj churi Baructa cayashpaca Jehová Dios nishca tucui shimicunata dictarca. Chaimi Barucca shuj rollopi* quillcarca. 5 Jeremiasca Baructaca cashna nishpami mandarca: “Ñucaca Jehová Diospaj huasimanca mana yaicui tucunichu. 6 Chaimantami Jehová Dios nishca shimicunata ñuca dictashcataca can yaicushpa rollomanta sinchita liyina cangui. Chaitaca shuj ayuno punllapimi gentecuna uyachun Jehová Diospaj huasipi liyina cangui. Judapi tiyaj llajtacunamanta shamuj tucui gentecunamanpishmi liyishpa uyachina cangui. 7 Jehová Diosca jatunta colerashpa, yallitaj pꞌiñarishpami cai pueblotaca castigasha nishca. Shinapish paicuna rogarishcaca Jehová Diospajman chayangapishchari. Paicunapaj mana alli ñanmanta tigraringacunapishchari” nircami.
8 Chaimi Neriaspaj churi Barucca profeta Jeremías tucui imalla mandashcata rurarca. Paica Jehová Diospaj huasipimi rollopi* quillcashca Jehová Dios nishca shimicunata sinchita liyirca.
9 Josiaspaj churi rey Jehoiaquim Judá llajtata pichca* huatacunata mandacujpimi noveno quillapi Jerusalenmanta tucui gentecunatapish, Judapi tiyaj llajtacunamanta Jerusalenman shamuj tucui gentecunatapish Jehová Diospaj ñaupajpi ayunachun mandarcacuna. 10 Barucca rollopi quillcashca Jeremiaspaj shimicunatami Jehová Diospaj huasipi sinchita liyirca. Quillcaj runa Safanpaj churi Guemariaspaj cuartopimi* tucui gentecuna uyacujpi liyirca. Chai cuartoca jahua patiopi, Jehová Diospaj huasiman yaicuna mushuj pungu cꞌuchullapimi carca.
11 Rollopi quillcashca Jehová Dios nishca tucui shimicunata Safanpaj nieto, Guemariaspaj churi Micaya uyashpaca 12 reypaj huasipi* caj secretariopaj cuartomanmi uriyarca. Tucui mandajcunami* chaipi tiyacurcacuna: secretario Elisamá, Semayapaj churi Delayá, Acborpaj churi Elnatán, Safanpaj churi Guemarías, Hananiaspaj churi Sedequías, tucui caishuj mandajcunapishmi chaipi tiyacurcacuna. 13 Micayaca pai uyashca tucui shimicunatami paicunaman huillarca. Chai shimicunataca Barucmi tucui gentecuna uyacujpi rollomanta liyishca carca.
14 Chai qꞌuipami tucui mandajcunaca Jehudí runataca Barucpajman cacharcacuna. Jehudica Netaniaspaj churimi carca. Netaniasca Selemiaspaj churimi carca. Selemiasca Cusipaj churimi carca. Jehudí runataca Barucman: “Gentecunaman liyishpa uyachishca rollota apashpa shamui” nichunmi cacharcacuna. Chaimi Neriaspaj churi Barucca rollota japishpa paicuna maipi cashcaman rirca. 15 Paicunaca: “Tiyaripai, ñucanchijman liyishpa uyachi” nircacunami. Chaimi Barucca paicunaman liyishpa uyachirca.
16 Rollopi imallata nishcata uyashpaca caishuj chaishujmi mancharinacushpa ricunacurcacuna. Paicunaca Baructaca: “Rollopi imalla nishcataca reymanmi tucuita huillana canchij” nircacunami. 17 Shinallataj Baructaca: “Tucui cai shimicunata ima shina quillcashcata huillapai. ¿Jeremiaschu canmanca dictarca?” nircacunami. 18 Chaimi Barucca paicunamanca: “Tucui cai shimicunataca paimi ñucaman dictarca. Chaimi ñucaca tintahuan cai rollopi quillcarcani” nirca. 19 Cutin mandajcunaca Baructaca: “Richij, cancuna maipi cashcata pi ama yachachunca canpish, Jeremiaspish miticugrichij” nircacunami.
20 Chai qꞌuipaca patiopimi reyta ricunaman rircacuna. Rollotaca secretario Elisamapaj cuartopimi huaquichircacuna. Reymanca tucui imalla uyashcatami huillarcacuna.
21 Chaimi reyca Jehudí runataca rollota apanaman cacharca. Jehudica secretario Elisamapaj cuartomanta rollota apamushpami rey uyacujpi, reypaj cꞌuchupi shayacuj tucui mandajcunapish uyacujpi liyi callarirca. 22 Reyca noveno quillapimi* tamya punllacunapi saquirina huasipi ninata japichishca brasero chꞌimbapurapi tiyacurca. 23 Jehudí runa rollomanta quimsa o chuscu parteta cada liyishcatami reyca secretariopaj cuchillohuan chai parteta cuchushpa braseropi rupacuj ninapi shitaj carca. Tucui rollota ninapi rupachingacamami chashna rurarca. 24 Tucui chai shimicunata uyashpaca reypish, paita sirvijcunamanta shuj sirvijllapish mana mancharcachu. Paicunapaj churanacunatapish mana lliquirircacunachu. 25 Elnatán, Delayá, Guemarías runacuna rollota ama rupachichun reyta rogarijpipish paica mana cazurcachu. 26 Ashtahuanpish reyca reypaj churi Jerahmeelta, Azrielpaj churi Serayata, Abdeelpaj churi Selemiastaca secretario Baructapish, profeta Jeremiastapish japichunmi mandarca. Pero Jehová Diosmi paicunataca pacallata charicurca.
27 Secretario Barucman Jeremías dictashca shimicunata quillcashca rollota rey rupachishca qꞌuipami Jehová Diosca cutinllataj Jeremiasmanca cashna nirca: 28 “Shujtaj rollota japishpa punta rollopi quillcashca shimicunallatataj chaipi quillcai. Punta rollotaca Judá llajtata mandaj rey Jehoiaquimmi rupachirca. 29 Judá llajtata mandaj rey Jehoiaquimmanca caitami nina cangui: ‘Jehová Diosca caitami nin: “Canmi cai rollotaca rupachircangui. Chaita rurashca qꞌuipaca: ‘¿Imamantataj Babiloniamanta reyca shamungatajmi, paica cai llajtatami llaquichinga, cai llajtataca gentecuna illajta, animalcuna illajtami saquinga nishpa quillcashcanguiyari?’ nircanguimi. 30 Chaimantami Jehová Diosca Judá llajtata mandaj rey Jehoiaquimmantaca caita nin: ‘Paipaj huahua huahuacunamantaca Davidpaj jatun tiyarinapica pi mana tiyaringachu. Paipaj huañushca cuerpopish punllaca rupaipi, tutaca chiripimi shitashca siricunga. 31 Pai pandarishcamantaca paitapish, paipaj huahua huahuacunatapish, paita sirvijcunatapishmi juzgasha. Paicunamanpish, Jerusalenpi causajcunamanpish, Judá llajtamanta runacunamanpishmi ñuca huillashca tucui cai llaquita cachasha. Paicunaca ñucataca mana uyasha nircacunachu’”’” nircami.
32 Chai qꞌuipami Jeremiasca shujtaj rollota japishpa Neriaspaj churi secretario Barucman curca. Barucca Jeremías dictashcatami quillcashpa catirca. Paica Judá llajtata mandaj rey Jehoiaquim ninapi rupachishca rollopi quillcashca tucui shimicunatami quillcarca. Shinallataj chai laya ashtahuan shujtaj shimicunatami mirachirca.