JESÚS SHINA CAUSASHUNCHIJ

Jesús shina causashunchij huillashunchij tandanacuipaj mushuj yachaicuna

Enero de 2018-mantaca Jesús shina causashunchij huillashunchij tandanacuipica Traducción del Nuevo Mundo de las Santas Escrituras (nwtsty) edición de estudio nishcapi tiyaj huaquin notacunamanta, dibujocunamanta, videocunamantami yachacushun. Cai edición de estudio nishcaca Internetpimi ricurin. Ñucanchij shimipica manaraj tiyanchu. Pero, cai yachaicunaca tandanacuipaj allichiringapajmi alli can. Ashtahuanpish caicunata yachashpaca Jehová Diospajmanmi ashtahuan cꞌuchuyashun.

YACHANGAPAJ NOTACUNA

Cai notacunapica gentecunapaj causaimanta, llajtacuna maipi saquirishcata, huaquin shimicuna imata nisha nishcatapishmi yachachin.

Mateo 12:20

Cushnicuj mecha: Ñaupa punllacunapica mecherocunaca barrohuan rurashcami carca. Mecha japirichunca olivo aceitehuanmi mecheropi jundachij carca. Aceite mechata catijpimi ninaca mana huañuj carca. Nina ñalla huañugricujpi o ña huañushca cajpica mechamantaca cushni llujshishpami catij carca. Chaitami griego rimaipica “cushnicuj mecha” nin. Jesusmanta parlashpami profeta Isaiasca: “Huañunalla cushnicuj mechatapish mana huañuchingachu” nircami (Isaías 42:3). ¿Chai shimicunaca imatataj yachachin? Jesusca llaquij cashcamantami humilde, llaquichishca gentecunataca esperanzata cushpa cushichina carca.

Mateo 26:13

Chashnatajmi canga: Hebreo rimaimanta amén shimitaca griego rimaipica amén nijcunallatajmi. Cai shimica “chashna cachun”o “seguro” nisha ninmi. Jesusca pai nishcacuna o shuj profecía mana llulla cashcata ricuchingapajmi “chashnatajmi canga” nij carca. Cai shimicunaca Mateo, Marcos, Lucas, Juan librocunallapimi ricurin. Huaquinpica Jesusca paipaj nishcacuna importante cashcata ricuchingapajmi hebreopica “amén amén” nij carca. Chai shimicunataca Juan libropica “chashnatajmi canga” nishpami traducishcacuna (Jn 1:51).

DIBUJOCUNA, VIDEOCUNA

Bibliapi tiyashca shujtaj yuyaicunamantami fotocunahuan, dibujocunahuan, videocunahuan ashtahuan yachachin.

Betfagé, Olivocuna tiyan urcu, Jerusalén

Cai videopica Jerusalenman chayaj ñantami ricuchin. Chai ñanca Bibliapi parlashca Betfagé (Betfagué) pueblomanta Olivocuna tiyan urcu jahuacamami rin. Betfagé maipimi carca, cunanca et-Tur llajtami can. Betaniaca Olivocuna tiyan urcu lado quingripimi carca. Chaica Betfagé alli ladopimi saquirij carca. Jesuspish paita catijcunapish Jerusalenman ricushpaca Betaniapimi saquirijcuna carca. Chaipimi Jesusca Marta, María, Lazaropaj huasipi saquirij cashca canga (Mt 21:17; Mr 11:11; Lu 21:37; Jn 11:1). Chai huasimanta Jerusalenman ricushpaca Jesusca cai videopi ricurij ñantami purij cashcanga. Betania saquirij pushtupica cunan punllaca el-Ázariyeh (El Éizariya) shuti pueblomi can. Árabe rimaipica cai pueblopaj shutica “Lazaropaj Pushtu” nisha ninmi. 9 de nisán huata 33-pica Jerusalenman ringapajmi Jesusca Olivocuna tiyan urcuta shuj burropi cruzarca. Paica Betfagemantami rishca canga.

Betaniamanta Betfagecama apaj ñan
Betfagé (Betfagué)
Olivocuna tiyan urcu
Cedrón pugru pamba
Templo tiyashca pushtu

Talón tullu chaquipi shuj clavomi cruzashca

Cai fotopica talón tullu chaquipi shuj fierro clavo cruzashcatami ricunchij. Clavoca 11.5 centimetrocunatami charin. Cai fotopi tiyaj tulluca shuj copiallami can. Propio tullutaca 1968 huatapimi Jerusalén janaj ladopi japircacuna. Chai tullutaca shuj rumi cajapimi tarircacuna. Shuj runapaj aicha ismushpa ña tucurishca qꞌuipami tullucunataca chai cajapi churashcacuna carca. ¿Caicunaca imatataj ricuchin? Romanocuna causashca punllacunapica huaquin gentecunata huañuchingapajca caspipi huarcushpa clavajcunachari carca. Jesusta caspipi huarcushpaca cai laya clavocunahuanmi clavashca canga. Shinallataj shuj runata caspipi huarcushpa huañuchijpipish pambana jutcupimi churajcuna cashcanga (Mt 27:35).