YACHAI 03
Biblia nishcacunapimi confiai tucungui
Bibliapica Yaya Dios imalla rurasha nishcatami huillan. Achca consejocunapishmi tiyan. Canca chaita yachanatachari munangui. Pero alli analizashpachari crisha ningui. ¿Biblia ñaupa tiempopi quillcashca cajpipish chaipi confianaca allichu canga? ¿Cunan punllacunapish, shamuj punllacunapish Biblia yachachishcacuna ayudai tucushcata cringuichu? Achcacunami chaita crincuna. Bibliapi imata nishcataca canllataj ricui.
1. ¿Bibliapi parlashca gentecunaca ciertotajchu causarca?
Bibliapica imata huillashpaca verdadtami huillan (Eclesiastés 12:10). Por ejemplo, Bibliapi parlashca gentecunaca de verdadmi causarcacuna (Lucas 1:3; 3:1, 2-ta liyipai). Historiamanta parlaj gentecuna, ñaupa tiempopi imalla tiyajta investigajcunaca Bibliapi parlashca fechacuna, gentecuna, lugarcuna, ima ruraicunapish cierto cashcatami ricushcacuna.
2. ¿Biblia ñaupa tiempopi quillcashca cashpapish chaipi confiai tucunchijchu?
Bibliapica ñaupa tiempomantami huaquin cosascuna ima shina cashcata ña huillarca. Por ejemplo, cienciamanta parlashpaca huaquincunaca Bibliapi imata nishcataca mana crircacunachu. Pero cunanca cientificocunaca Biblia nishcacuna cierto cashcatami ricushcacuna. Biblia nishcacunaca ‘huiñai huiñaipajmi chashnataj canga’ (Salmo 111:8).
3. ¿Bibliapi nishcacuna mana pandarij cashcataca imamantataj crinchij?
Bibliapica profeciacunaa ‘pajtarinata o imalla pajtarina cashcatami huillacun’ (Isaías 46:10). Bibliapi ima nishcacunaca mana pandarinchu. Por ejemplo, cunan punllacunapi causai ima shina cana cashcatami ña huillarca. Cai yachaipica Bibliapi nishcacuna ña pajtarishcatami yachashun.
ASHTAHUAN YACHAI
Bibliapi cienciamanta parlashpapish mana pandarishcata ricui. Bibliapi tiyaj profeciacunatapish yachai.
4. Cientificocunaca Biblia mana pandarishcatami ricushca
Ñaupa tiempoca achca gentecunaca cai Allpa imapi huarcushca cashcatami yuyarcacuna. VIDEOTA ricui.
Casi 3.500 huatacuna huashaman Job libropi ima nishcata ricui. Job 26:7-ta liyipai. Qꞌuipaca cai catij tapuitami yachashun:
¿Cai Allpa pacha ‘imapi mana huarcushca cashcata yachashpaca’ imamantataj mancharinchij?
Yacu tiyashpa catichunca imalla tucuj cashcatami 200 huatacuna huashaman alli yachaj chayashcacuna. Pero casi 3.500 huatacuna huashaman Bibliapi ima nishcata ricushun. Job 36:27, 28-ta liyipai. Qꞌuipaca cai tapuicunatami yachashun:
¿Yacu ima shina tiyashpa catishcata yachashpaca imamantataj mancharinchij?
¿Cai versocunata liyishpaca Biblia nishcacuna verdad cashcata cringuichu?
5. Bibliapica imalla tucuna cashcatami huillarca
Isaías 44:27–manta 45:2-cama liyipai. Qꞌuipaca cai catij tapuitami yachashun:
¿Babilonia llajta manaraj tucuchishca cajpi 200 huatacuna huashaman Bibliapica imatataj huillarca?
Bibliapica Persia llajtata mandaj Ciromi paipaj soldadocunahuan Babilonia llajtata tucuchinata huillarca. Caitaca Jesús manaraj huacharijpi (J.m.h) 539 huatapimi pasarca. Chai llajta muyundijpi yacu tiyashcamantami chaiman pi mana yaicui tucurca. Pero Ciropish paipaj soldadocunapish yacu uriyachunmi shuj larcata rurarcacuna. Babiloniapaj pungucunapish pascashca saquirishcamantami mana macanacushpa yaicurcacuna. Chashnami chai llajtata tucuchircacuna. Chai punllamanta cunancamaca casi 2.500 huatami pasashca. Cunanca rumi montonllami can. Caitaca Bibliapi ricushun.
Isaías 13:19, 20-ta liyipai. Qꞌuipaca cai catij tapuitami yachashun:
¿Cai versopi tiyaj shimicunaca ima shinataj pajtarirca?
Irak llajtapi saquirij ñaupa Babilonia llajtaca rumi montonmi can.
6. Cunan punllacunapi imalla pajtaricushcataca ñami Bibliapica huillacurca
Bibliapica tucuri punllacunapi causacushcatami huillan (2 Timoteo 3:1). Tucuri punllacunapi imalla tucuna cashcata Bibliapi ricui.
Mateo 24:6, 7-ta liyipai. Qꞌuipaca cai catij tapuitami yachashun:
¿Cai versopi nishca shinaca tucuri punllacunapi causaica ima shinataj can?
2 Timoteo 3:1-5-ta liyipai. Qꞌuipaca cai catij tapuicunatami yachashun:
¿Cai versopi nishca shinaca tucuri punllacunapi causaj gentecunaca ima shinataj can?
¿Cai versopi nishca shimicuna maijan pajtaricushcatataj ricushcangui?
HUAQUINCUNACA: “Biblia huillashcacunaca yanga parlollami can” nincunami.
¿Canca Biblia nishcacuna pajtarina cashcataca imamantataj cringui?
YUYARISHUNCHIJ
Historiamanta parlajcuna, cientificocuna, profeciacunapish Bibliapi verdadta huillacushcatami ricuchin.
Yuyaringapaj tapuicuna
¿Bibliapi parlashca gentecunaca ciertotajchu causarca?
¿Cientificocunaca Biblia verdadta huillacushcataca ima shinataj yachaj chayashca?
¿Biblia nishcacuna pajtarina cashcataca cringuichu? ¿Imamantataj cringui o imamantataj mana cringui?
CAICUNATAPISH RICUI
¿Cienciamanta parlashpaca Bibliaca pandarinchu?
“¿Cienciamanta parlashpaca Bibliaca pandarinchu?” (jw.org paginapi ricui)
¿‘Tucuri punllacunamantaca’ Bibliaca imatataj yachachin?
“Bibliapi huillashcacunami pajtaricun” (Huillaj, 1 de mayo de 2011)
Grecia llajtata mandajmanta profecía ima shina pajtarishcata Bibliapi ricui.
‘Profetacunaman quillcachishca’ shimicunaca sinchiyachinmi (5:22)
Diospi mana crij runa, Bibliapi profeciacunata yachashpa paipaj yuyaita ima shina cambiashcata yachai.
a Profeciacunaca Dios huillashcacunami can. Chaicunaca qꞌuipa punllacunapimi pajtaringa.