¿Imamantataj Jesuspaj shutipi mañana canchij?
DIOSTA mañanamantaca Jesusca cutin cutinmi yachachirca. Jesús causashca tiempocunapica religionmanta yachachijcunaca ‘ñan muyurincunapi shayarishpami mañajcuna carca’. ¿Imamantataj chashna mañajcuna carca? Gentecuna ricuchunllami chashna mañajcuna carca. Paicunata llaquishpa allitami ruracuncuna nichunmi munajcuna carca. Chaimantami paicunaca ‘cutin cutin chaillatataj’ nishpa mañajcuna carca. Chashna mañajpica Diosca uyangami nishpami yuyajcuna carca (Mateo 6:5-8). Pero Jesusca chashna mañanaca yanga cashcata, mana chashna mañana cashcatami yachachirca. Ashtahuanpish alli shungu gentecuna ima shina Diosta mañana cashcatami yachachirca.
Jesusca Diospaj shuti jatunyachishca cachun, paipaj Gobierno shamuchun, paipaj munaipish pajtarichunmi mañana canguichij nircami. Ñucanchij minishtishcacunamantapish Diosta mañanalla cashcatami yachachirca (Mateo 6:9-13; Lucas 11:2-4). Yayitu Dios ñucanchijta uyachunca cutin cutin mañana cashcata, paipi crina cashcata, humilde cana cashcatami Jesusca chꞌimbapuraicunahuan yachachirca (Lucas 11:5-13; 18:1-14). Pai imalla yachachishcacunataca paipaj causaihuanmi ricuchirca (Mateo 14:23; Marcos 1:35).
Jesús ima shina mañanata yachachishcaca paita catijcuna Diosta alli mañachunmi ayudarca. Jesús huañungapaj último tutapica mañanamanta shuj valishca yuyaitami intindichirca.
“Yaya Diosta ima shina mañanapimi shuj cambio tiyarca”
Jesús manaraj huañushpa último tutapica paipaj apostolcunatami tucui tuta animarca. Chai tutapica shuj mushuj yuyaitami yachachirca. Paica: “Ñucamari ñan cani, mana llullapish, causaiyujpish cani. Yayapajmanca pi mana paillatajca chayai tucunchu. Ñucami Yayapajman chayachij ñan cani” nircami. Shinallataj “Churimanta Yaya jatunyachishca cachunmi cancuna ñuca shutipi imata mañajpipish ñucaca cusha. Imata ñuca shutipi cancuna mañajpica ñucaca rurashallami” nircami. Ashtahuanpish “cunancamaca imata ñuca shutipi mana mañashcanguichijchu. Ñuca shutipi mañaichij chasquinguichijmi. Chashna rurashpami yallitaj cushilla canguichij” nircami (Juan 14:6, 13, 14; 16:24).
Jesuspaj shutipi Diosta mañanamanta parlashpaca shuj diccionariopica: “Yaya Diosta ima shina mañanapimi shuj cambio tiyarca” ninmi. Shinapish Jesusca ñuca shutipimi mañana canguichij nishca punllamantaca mana paita mañachun nicurcachu. Chaipaj randica Jesús Diospajman chayachij ñan cashcata ricuchingapajmi chashna nirca.
Jehová Diosca paita sirvijcunapaj mañashcacunataca siempremi uyashca (1 Samuel 1:9-19; Salmo 65:2). Por ejemplo, ñaupa punllacunapica Yaya Dios gentecunapaj mañashcacunata uyachunca Israel llajtaca paipajlla agllashca cashcatami intindina carcacuna. Salomón causashca punllacunapica Yaya Dios paicunapaj sacrificiocunata chasquichunca Diospaj huasipi sacrificiocunata cuna cashcatami intindina carcacuna (Deuteronomio 9:29; 2 Crónicas 6:32, 33). Pero Diosta chashna adoranaca cambiarcami. Apóstol Pabloca israelitacunaman cushca leymanta parlashpa, Diospaj huasipi sacrificiocunata ruranamanta parlashpaca: “Mandashcaca, qꞌuipata shamuna allicunata ricuchij llandu shinallami. Mana chai shamuna cashca shinatajchu” nishpami escribirca (Hebreos 10:1, 2). Apóstol Pablo nishca shinaca israelitacunapaj shuj llandu shinalla cashcaca cunanca pajtarinatajmi carca (Colosenses 2:17). Chai llandu shina caj mandashcacunaca Jesucristotami ricuchirca. Chaimantami Jesús huañushca qꞌuipa huata 33-mantaca Jehová Diospaj amigo cangapajca Moisesman cushca leyta cazunaca ña mana minishtirirca. Ashtahuanpish Jesucristopaj yachachishcacunatami cazuna carca (Juan 15:14-16; Gálatas 3:24, 25).
Tucui shuticunapaj jahuapimi shuj shuti tiyan
Jesuspaj shutipi Diosta mañashpaca paipajmanmi cꞌuchuyanchij. Jesusca achca poderta charij, Diospajman chayachij ñanmi can. Yayitu Dios ñucanchij mañashcacunata uyashpa cutichichunca paimi ayudan. ¿Jesusca ima shinataj ñucanchijta ayudan?
Jehová Diosca jucha illaj Diosmi can. Cutin ñucanchijca tucuicunami juchayujcuna huacharinchij. Chaimantami Yaya Diosman ima sacrificiota cushpapish ñucanchij juchacunataca mana anchuchi tucunchij. Diospaj amigo canatapish mana valinchij (Romanos 3:20, 24; Hebreos 1:3, 4). Shinapish Jesusmi ñucanchij juchacunamanta paipaj jucha illaj causaita curca (Romanos 5:12, 18, 19). Paipaj causaita cushcamantami Jehová Diospaj ñaupajpi alli ricuri tucunchij. Chaimi Jesús ñucanchijmanta huañushcapi crishpa, paipaj shutipi mañashpaca Jehová Dioshuan mana manchashpa parlai tucunchij (Efesios 3:11, 12).
Jesuspaj shutipi mañashpaca pai imalla rurashcapimi tucui shunguhuan crishcata ricuchinchij: 1) Paica ‘Diospaj malta Ovejami can’. Pai huañushcamantami ñucanchij juchacunataca anchuchi tucun. 2) Paica jahua pachapi causarishpa ‘curacunapaj jatun curami’ tucurca. Jatun cura cashcamantami achca bendicioncunata cunga. 3) Jesusllami Diospajman “chayachij ñan” can. Paipaj shutipi mañashpami Yaya Diospajman cꞌuchuyai tucunchij (Juan 1:29; 14:6; Hebreos 4:14, 15).
Jesuspaj shutipi mañashpaca paitami jatunyachinchij. Jehová Diosmi chaita rurachun munan. Filipenses 2:10, 11-pica: “Tucuicuna Jesuspaj shutipi cungurichunmi chai shutitaca curca. Dios Yaya sumajyarichunca tucui cꞌallucunami Jesucristotaca Mandajmi nishpa huillangacuna” ninmi. Ashtahuanpish Jehová Dios paipaj Churita cushcamantami Jesuspaj shutipi mañashpaca Diosta ashtahuan jatunyachinchij (Juan 3:16).
“Jesuspaj shutipi cutin cutin mañana cashpapish shungumantami mañana canchij”.
Bibliapica Jesustaca huaquin shuticunahuan, huaquin titulocunahuanmi pai imallata ruracushcata intindichin. Chai shuticunamanta o titulocunamanta yachashpami Jesús imallata rurashcata, imallata ruracujta, shamuj punllacunapipish imallata ruranata yachanchij (“Jesús rurashcata ricuchij shuticuna” ricui). Shinaca Yaya Diosmi Jesusmanca ‘tucui shuticunapaj jahuapi shuj jatun shutita cushca’.a Shinallataj ‘jahua pachapi, cai pachapipish tucuita mandachunmi’ autoridadta curca (Filipenses 2:9; Mateo 28:18).
Cutin cutin chaillatataj nishpa ama mañashunchijchu
Jehová Dios ñucanchij mañaicunata uyachunca Jesuspaj shutipimi mañana canchij (Juan 14:13, 14). Pero Jesuspaj shutipi mañacushpaca mana nina cashcallamantachu nina canchij. Ashtahuanpish imata nisha nishcapimi yuyana canchij. ¿Imamanta?
Caipi yuyai: Shuj empresamanta canman shuj cartata cachashpaca “¿allillachu cangui?” nishpami escribin. Chai empresaca chashna escribishpapish mana canpi shungumanta preocuparishcatachu ricuchin. Paicunaca chashna saludana cashcallamantami escribincuna. Ñucanchijca mana chai empresa layachu cana canchij. Jesuspaj shutipi mañacushpaca paipaj shutitaca mana nina cashcallamantachu nina canchij. Ashtahuanpish Jesuspaj shutipi cutin cutin mañana cashpapish shungumantami mañana canchij. Chashna mañanami valishca can (1 Tesalonicenses 5:17; Salmo 119:145).
¿Jesuspaj shutipi shungumanta mañangapajca imatataj rurana canchij? Jesusca cꞌuyaj, llaquij, mana utca pꞌiñarij cashcapi yuyashun. Shinallataj pai ñucanchijmanta imallata ruracushcapi, imallata ruragrishcapipish yuyashun. Ñucanchij mañaicunapipish Jehová Dios paipaj Churita cushcamanta pagui nishpa alabashunchij. Chashna rurashpami cai catij shimicunapi tucui shunguhuan crishun. Jesusca: ‘Tucui imatapish ñuca shutipi Yayata mañajpica, paica cungallami’ nircami (Juan 16:23).
a Diccionario expositivo de palabras del Antiguo y del Nuevo Testamento exhaustivo de W. E. Vine nishca shinaca “shuti” shimi griego rimaipica “ima shina cashcata, autoridadta charishcata, ima puesto charishcata, poderta charishcata, alli cashcatami” nisha nin.