‘Espíritu santohuanmi jundarircacuna’

1. ¿Pentecostés fiestapica imallatataj rurajcuna carca?

ACHCACUNAMI Jerusalenpica Pentecostés fiestata yuyaringapaj rijcuna carca.a Cada huatami cebadata ña tucui cosechashcamanta, trigo cosechata callaricushcamanta fiestata rurajcuna carca (Núm. 28:26). Chai fiestamanca Elam, Mesopotamia, Capadocia, el Ponto, Egipto, Roma shujtaj caru llajtacunamantapishmi gentecunaca shamujcuna carca.b Chai punllacunapimi Diospaj templopica cushni ricuricujpi Salmos 113-manta 118-cama levitacunaca cantajcuna carca (cai salmocunatami Hallel nishpa rijsijcuna carca).

2. ¿Huata 33 Pentecostés fiestapica imataj tucurca?

² Huata 33 Pentecostés fiestapica, 120 Jesusta catijcunami shuj huasipi tandanacushca carcacuna. Chaica nueve de la mañanami cashcanga. Jesusta catijcuna tandanacushca cajpimi ‘ñapish jahua pachamanta jatun huaira shamucujta uyarcacuna’ (Hech. 2:2). Chaimi ‘paicuna tiyacun huasipi jundarca. Chai qꞌuipami paicunaca uchilla, cꞌallu shina, lunyacuj ninacunata ricurcacuna. Chaicunaca chaupirishpami cada unopaj jahuapi tiyarirca’.c Espíritu santo paicunapi jundajpimi chꞌican chꞌican shimicunapi rimai callarircacuna. 120 Jesusta catijcuna canllaman llujshishpa “paicunapaj rimaipi” parlacujta uyashpaca chꞌican chꞌican llajtacunamanta shamuj runacunaca sorprendidosmi saquirircacuna (Hech. 2:1-6).

3. a) ¿Pentecostés fiestapi ima tucushcamantaca imatataj yachanchij? b) ¿Huata 33 Pentecostés fiestapi ima tucushcata yachanaca imamantataj importante can? c) ¿Gobiernopaj punta llavetaca Pedroca ima shinataj utilizarca?

³ Huata 33 Pentecostés fiestapica Jesusta catijcuna espíritu santohuan agllashca cajpimi punta congregacionca tiyai callarirca. Paicunaca Diospaj Israel llajtami tucurcacuna (Gál. 6:16). Shinallataj chai punllallatajmi Pedroca judiocunata, judiocuna yachachishcata catijcunamanca Diosmanta huillai callarirca. Chashnami Dios cushca ‘jahua pacha Gobiernopaj quimsa llavecunamanta’ paicunahuan punta llaveta utilizarca (Mat. 16:18, 19). Paicunaca alli huillaicunata, espíritu santotapish chasquina oportunidadtami chari tucurcacuna.d Tucuipi Diosta cazushpaca Diospaj Gobiernopi mandajcuna, sacerdotecuna cana oportunidadtapishmi charircacuna. Qꞌuipaca caishuj llavecunahuanmi samaritanocunapish, shujta llajtacunamanta gentecunapish chai bendicioncunata charichun Pedroca ayudarca (Apo. 5:9, 10). ¿Pentecostés fiestapi ima tucushcamantaca imatataj yachanchij?

“Tucuicunami chaillapitaj tandanacushca carcacuna” (Hechos 2:1-4)

4. ¿Huata 33-pi callarichishca congregación cunancama mirarishpa caticushcataca imamantataj ninchij?

⁴ Ña ricushca shinaca tutamanta lado jahua pisopi Diospaj espíritu santo 120 Jesusta catijcunata agllajpimi punta congregacionca tiyai callarirca (Hech. 2:1). Chai punlla manaraj tucurijpimi achcacunaca bautizarircacuna. Diospaj organizacionca chai tiempomanta cunancamami mirarishpa caticun. Cunan punllacunapica punta Jesusta catijcuna shinami testigo de Jehovacunaca ‘Diospaj Gobiernomanta alli huillaicunata tucui llajtacunapi causajcuna yachaj chayachun muyundij allpapi huillacuncuna. Chai qꞌuipami cai pachapaj ruraicunaca tucuringa’ (Mat. 24:14).

5. a) ¿Punta siglopi congregacionca ima shinataj ayudarca? b) ¿Cunanca ima shinataj ayudan?

⁵ Pentecostés fiestapi callarichishca congregacionca ungidocunatapish, ‘shujtaj ovejacunatapish’ espiritualmente sinchi cachunmi ayudarca (Juan 10:16). Pablopajca caishuj chaishujhuan espiritualmente sinchiyanami ashtahuan importante carca. Chaimantami Romapi causaj Jesusta catijcunataca: “Ñucaman Dios cushca bendicionhuan cancunatapish sinchiyachingapajmi cancunata ricunata munacuni. Ashtahuancarin tucuicuna ñucanchij crishcacunahuan caishuj chaishuj sinchiyachinacungapajmi cancunata ricusha nini” nircami (Rom. 1:11, 12).

6, 7. ¿Tucui llajtacunapi Jesús mingashca obrata pajtachingapajca imatataj ruracunchij?

⁶ Jesusta punta catijcuna shinallatajmi cunan punllacunapipish pai mandashcata rurana canchij. Jesusca paita catijcunataca: “Tucui llajtacunapi causaj gentecunapajman rishpa ñucata catijcuna tucuchun yachachigrichij. Paicunataca Yayapaj shutipi, Churipaj shutipi, espíritu santopaj shutipi bautizanguichij” nishpami mandarca (Mat. 28:19, 20).

⁷ Cunan punllacunapica testigo de Jehovacunaca Dios mingashcatami pajtachicunchij. Ima shinami Jesusta punta catijcunaca chꞌican chꞌican shimicunapi gentecunaman huillarcacuna. Chashnallatajmi cunan punllacunapipish Jesusta catijcunaca chꞌican chꞌican shimicunapi gentecunaman huillacunchij. Caita rurana mana fácil cajpipish 1.000 yalli shimicunapimi Bibliamanta achca publicacioncunata llujchinchij. Diospaj Gobiernomanta huillana, Jesusta catijcuna tucuchun ayudana obrapi participajcunaca cushillami sintirinchij. Testigo de Jehovacunaca ashallacuna cashpapish Jehová Diospaj shutimanta huillana privilegiotami charinchij.

8. ¿Congregacionpica ima bendicioncunatataj chasquinchij?

⁸ Sinchi punllacunapi causacushcamantami maipica Diospaj obrata cushicuihuan pajtachinaca mana jahualla can. Jehová Diosca muyundij allpapi tiyaj huauqui panicunahuanmi ñucanchijta ayudan. Pabloca hebreo shimita parlaj Jesusta catijcunataca: “Cꞌuyaita ashtahuan ricuchingapaj, alli ruraicunatapish rurangapaj caishujmanta chaishujmanta preocuparishunchij. Maijancuna tandanacuicunaman mana rina costumbreta charijpipish ñucanchijca tandanacunataca amataj saquishunchijchu. Ashtahuanpish caishuj chaishuj animanacushunchij. Diospaj punlla cꞌuchuyamucushcamantacarin tucui chaicunataca ashtahuan rurashunchij” nircami (Heb. 10:24, 25). Congregacionpi caishuj chaishujhuan animanacunaca Dios cushca regalomi. Chaimanta congregacionmantaca amataj caruyashunchij, tandanacuicunaman rinatapish amataj saquishunchij.

‘Cada uno paicunapaj rimaipi parlacujtami uyarcacuna’ (Hechos 2:5-13)

9, 10. ¿Huaquincunaca shujtaj shimita parlaj gentecunaman huillangapajca imatataj rurancuna?

⁹ Pentecostés fiestapimi casi tucui judiocunapish, judiocuna yachachishcata catijcunapish griego o hebreo shimita rimajcuna cashcanga. Cunanca Jesusta catijcuna ‘paicunapaj propio shimipi parlacujta uyashpaca achcatami’ cushicurcacuna (Hech. 2:6). Cunan punllacunapica Jesusta catijcunaca shuj milagromantaca chꞌican chꞌican shimicunapica ña mana rimanchijchu. Maijancunaca tucui laya gentecunaman huillangapajmi shujtaj shimicunata yachacuncuna. Chashnami shujtaj shimita parlaj congregacioncunapi sirvi tucuncuna. Huaquinpicarin caru llajtapi sirvinamanmi rishcacuna. Gentecunaca paicunapaj shimita yachangapaj esforzaricujta ricushpaca sorprendidosmi saquirincuna.

¹⁰ Christine shuti panica siete Testigocunahuanmi gujarati shimita yachai callarirca. Shuj punllaca gujarati shimita parlaj paipaj compañerahuanmi tuparca. Chaimi gujarati shimipi paitaca saludarca. Paipaj propio shimipi saludajta uyashpaca paipaj compañeraca: “¿Imamantataj gujarati shimita yachacungui?” nishpami tapurca. Chaimi Cristineca Diosmanta huillarca. Chai huashaca paipaj compañeraca: “Cancuna shina shujtaj religioncunaca mana tiyanchu. Cancunapaj mensajeca importantemari cana can. Chaimantami cashna laya sinchi shimita yachachunca cancunata animan” nircami.

11. ¿Huillangapajca jw.org paginataca ima shinataj utilizai tucunchij?

¹¹ Mana tucuicuna mushuj shimita yachangapaj habilidadcunata charinchijchu. Shinapish shujtaj shimita parlaj gentecunaman Diospaj Gobiernomanta alli huillaita huillangapajca allichirishcami cana canchij. ¿Ima shina? JW.ORG paginatami utilizai tucunchij. Cai paginaca videocunata, publicacioncunatami 1.000 yalli shimicunapi charin. Por ejemplo, shuj panica Micronesia llajtamanta shamushca huarmimanmi “¿Imamantataj Bibliamanta yachana canchij?” nishca videota yapés shimipi ricuchirca. Chai huarmica videota ricui callarishpaca mancharishpami: “Caica ñuca propio shimimi cai videopi ricurij runaca ñucanchij islapi ima shinami rimarinchij, chashnallatajmi rimaricun” nircami. Chai huashaca: “JW.ORG paginapi yapés shimipi tucui ima llujshishcatami ricusha” nircami.

“Pedroca shayarirca” (Hechos 2:14-37)

12. a) ¿Profeta Joelca Pentecostés punllapica ima tucunataj huillarca? b) ¿Jesusta punta catijcunaca imamantataj Joel nishca pajtarichun shuyacurcacuna?

¹² Pedroca shayarishpami tucui chaipi caj gentecunaman chꞌican chꞌican shimipi rimanaca Diospaj podermantami shamun nishpa yachachirca (Hech. 2:14). Shinallataj profeta Joelca “ñuca espiritutaca tucuicunapimi churasha” nishcata Dios ima shina pajtachishcatami intindichirca (Joel 2:28). Jesús manaraj jahua pachaman rishpaca paita catijcunataca: ‘Ñucallataj ñuca Yayata mañajpi paica cancunaman espíritu santotami cunga’ nircami (Juan 14:16, 17). Chaimantami Jesusta punta catijcunaca Joel nishca pajtarichun shuyacurcacuna.

13, 14. a) ¿Pedroca ima shinataj judiocunamanca yachachirca? b) ¿Ima shinataj Pedropaj ejemplota cati tucunchij?

¹³ Pedroca cashna nishpami tucuchirca: “Israel llajtapi causajcunalla caitami alli yachana canguichij. Jesustaca Diosmi Cristo cachun, ñucanchij Amito cachunpish churashca. Paitami cancunaca caspipi clavashpa huañuchircanguichij” (Hech. 2:36). Jesusta huañuchijpi Pedrota uyaj gentecunamantaca ashacunallami chaipi cashca carca. Pero judiocuna Jesusta huañuchishcamantami paicunapish responsables carcacuna. ¿Pedroca imamantataj judiocunata cashna nirca? Pedroca paicunata juzganataca mana munarcachu. Chaipaj randica judiocuna shungumanta arrepintirichunmi munarca. Chaimantami respetohuan parlarca. Pedro judiocunata chashna rimashcamantaca, ¿paicunaca resentirishca saquirircacunachu? Mana. Ashtahuanpish ‘paicunapaj shungupica yallitaj llaquirishpami’: “¿Imatataj rurana canchij?” nishpa tapurcacuna. Pedro respetohuan parlashcamantami achcacuna arrepintirichun ayudarca (Hech. 2:37).

¹⁴ Ñucanchijpish huillacushpaca gentecunapaj shungumanmi chayasha ninchij. Paicuna Bibliamanta panda yuyaicunata charijpipish imapi pandarishcataca mana ricuchisha ninchijchu. Chaipaj randica imapi de acuerdo cashcatami parlai tucunchij. Qꞌuipaca alli yuyashpami Bibliapi ima nishcata ricuchi tucushun. Chashna yachachingapaj esforzarijpica alli shunguta charij gentecunami Bibliamanta uyasha ningacuna.

“Bautizarichij” (Hechos 2:38-47)

15. a) ¿Pedroca imatataj nirca? b) ¿Pedrota uyashpaca gentecunaca imatataj rurarcacuna? c) ¿Imamantataj achca gentecunaca chai punllallataj bautizaringapaj listos carcacuna?

¹⁵ Huata 33 Pentecostés fiestapica, Pedroca judiocunata, judiocuna yachachishcacunata catijcunatapish cashnami nirca: “Arrepintirichij, cancunapaj juchacunata perdonachunca Jesucristopaj shutipi bautizarichij” (Hech. 2:38). Pedro ima nishcata uyashpaca casi 3.000 gentecunami bautizarirca. Jerusalén ladollapi saquirij yacucunapimi bautizarishcangacuna.e Caica Bibliata recienlla estudiajcuna o Diosta sirvij familiapi huiñashcacuna manaraj listos cashpa, ¿bautizarina cashcatachu nisha nin? Mana chaita nisha ninchu. Pentecostés fiestapi bautizarij judiocunapish, judiocuna yachachishcata catijcunapish ñami Dios Quillcachishcacunataca alli yachajcuna carca. Pentecostés fiestata yuyaringapajpish achcatami purijcuna carca. Shinallataj Dios agllashca llajtapish, Diosta alli sirvijcuna cashcatapishmi ricuchircacuna. Pero Jesús imamanta Allpaman shamushcata intindinallatami minishtircacuna. Chaita intindishpaca bautizaringapajmi listos carcacuna. Ña bautizarishpaca Jesusta catijcuna tucushpami Jehová Diosta sirvishpa catircacuna.

16. ¿Jesusta punta catijcunaca generosos cashcata ricuchingapajca imatataj rurarcacuna?

¹⁶ Chai grupopi cajcunaca Jehovapaj bendiciontami charircacuna. Hechos 2:44, 45-pica: “Jesusta mushuj catijcunaca tucuicunami paicuna imalla charishcataca caishuj chaishuj convidanacujcuna carca. Paicunapaj allpacunata tucui imalla charishcacunatapish cꞌatushpami tandashca cullquitaca minishtijcunaman chaupishpa cuj carcacuna” ninmi.f Cunan tiempopi Diosta sirvijcunapish paicuna shinami cꞌuyaj, generosos cana canchij.

17. ¿Bautizaringapajca imallatataj rurana canchij?

¹⁷ Cunan punllacunapica, ¿Diosman mingarishpa bautizarisha nijcunaca imatataj rurana canchij? Puntapica Bibliamantami alli yachana canchij (Juan 17:3). Qꞌuipaca juchacunamanta shungumanta arrepintirishpami feta charishcata ricuchina canchij (Hech. 3:19). Shinallataj mana alli ruraicunata huashaman saquishpa, alli ruraicunahuan Diosta cazushpami causana canchij (Rom. 12:2; Efe. 4:23, 24). Ultimotaca Jehová Diostami: “Canllatami tucui causaipi sirvisha nini” nishpa mañana canchij. Chai qꞌuipami bautizari tucunchij (Mat. 16:24; 1 Ped. 3:21).

18. ¿Bautizarishpaca ima oportunidadtataj charingui?

¹⁸ ¿Canca ñachu Jesusta catishpa, Diosman mingarishpa bautizarishcangui? Chashna rurashpaca Diospaj Gobiernomanta huillana, Diospaj munaita rurana oportunidadtami charingui. Chaipimi Jehová Diosca canmanca punta Jesusta catijcunaman shina paipaj espíritu santota cunga.