YACHAI 02

Bibliapica cushilla causai tiyanatami huillan

Imprimishcapica cashnami

Gentecunaca achca problemacunatami charincuna. Chaimantami yallitaj sustarishca, llaquilla causancuna. ¿Canpish chashnachu sintirishcangui? Shuj ungüita charishcamanta o shuj familia huañushcamantachari llaquilla sintirishcangui. Chaimantachari ¿shuj punllaca cushilla causai tiyangachu? nishpa tapurishcangui. Bibliapimi cai tapuicunata cutichin.

1. ¿Bibliapica ima laya causai tiyanatataj huillan?

Bibliapica imamanta llaquicuna tiyashcata, chai llaquicuna ñalla tucurinatami huillan. Bibliapica Yaya Diosca: “Sumaj causaitami cugrini. Cancuna shuyacushcatatajmi cusha” ninmi (Jeremías 29:11, 12-ta liyipai). Cashna laya causaita shuyashpaca problemacunatami ahuantashun, cushillami causashun. Shamuj punllacunapicarin huiñai huiñaicamami causashun.

2. ¿Bibliapica shamuj punllacunapi imataj mana tiyanga nin?

Bibliapica: “Huañuipish, huacaipish, llaquipish, nanaipish ña mana ashtahuan tiyangachu” ninmi (Apocalipsis 21:4-ta liyipai). Cai verso nishca shinaca pobreza, mana alli ruraicuna, ungüicuna, huañuipish ña mana tiyangachu. Cai llaquicunamantami gentecunaca sufrincuna. Pero Bibliapica huiñai huiñaicama paraíso Allpapi cushilla causanatami huillan.

3. ¿Biblia nishcacuna pajtarinataca imamantataj seguros canchij?

Achca gentecunaca alli causanatami munancuna. Pero chashna causanataca mana seguros canchu. Shinapish Biblia nishcacunaca pajtaringatajmi. Biblia nishcacuna ‘chashnataj cashcata mana chashnataj cashcata yachangapaj Dios Quillcachishcacunataca punllantami alli ricujcuna cana canchij’ (Hechos 17:11). Bibliata yachashpami canllataj Biblia nishcacunapi crinata o mana crinata dicidingui.

ASHTAHUAN YACHAI

Bibliapica shamuj punllacunapi ima shina causai tiyanatami huillan. Caita yachanaca gentecunata ima shina ayudacushcata ricui.

Fotocuna: Cunan punllacunapi causai ima shina cashcata, shamuj punllapi causai ima shina canata chꞌimbapurai. Cai dibujocunaca repetidomi can.

4. Bibliapica huiñai huiñaicama llaquicuna illaj causanatami huillan

Imalla tucurinata, imalla tiyanata Bibliapi ricui. ¿Maijantaj ashtahuan pajtarichun munangui? ¿Imamantataj pajtarichun munangui?

Urapi tiyaj versocunata liyipai. Qꞌuipaca cai tapuicunatami yachashun:

¿Cai versocunaca canmanca shuj esperanzata cunchu? ¿Cambaj familiaman, amigocunamanpish esperanzata cunchu?

Cashna shina causacushcata yuyai

CAICUNAMI TUCURINGA:	CAICUNAMI TIYANGA:
Llaquicunapish yuyajyanapish huañuipish tucuringami (Isaías 25:8).	Cꞌuyashca familiacuna, amigocunami cai Allpapi causaringacuna. Paicunatami cutin ricushun (Juan 5:28, 29).
Tucui laya ungüicuna ña mana tiyangachu (Isaías 33:24; 35:5, 6).	Cutin jovenyashpami fuerzayuj cashun, alli saludtapish charishun (Job 33:25).
Mana alli ruraicuna tucuringami (Isaías 32:16, 17).	Achca micunami tiyanga, alaja huasita, cushichij trabajotami charishun (Salmo 72:16; Isaías 65:21, 22).
Macanacuicunamanta ña mana sufrishunchu (Salmo 46:9).	Sumajtami causashun (Salmo 37:11).
Llaquilla cana yuyaicunata ña mana charishunchu (Isaías 65:17).	Huiñai huiñaitami cushilla causashun (Salmo 37:29).

Shuj ungushca huahuaca cunanca sano cashcamantami paipaj mamata ugllaricun.

Shuj mayorlla runaca cunanca joven cashcamantami legumbrecunata carretillapi apacun.

5. Biblia huillashcacunaca cushi causaitami cun

Achca gentecunaca problemacuna tiyashcamantami desanimarincuna o hasta pꞌiñarincuna. Huaquincunaca alli causangapajmi tucuita rurancuna. Pero maijancunaca Bibliata yachashpami alli causancuna. Paicunamanta ashtahuan yachai. VIDEOTA ricui. Qꞌuipaca cai catij tapuicunatami yachashun:

VIDEO: Tucuicuna igual cachunmi munarcani (4:07)

Fotocuna: “Tucuicuna igual cachunmi munarcani” nishca videopaj huaquin partecuna. 1. Rafika shuti huarmica paipaj llajtallamantataj gentecunahuanmi huambra cashpa algodón yuracunata cosechacun. 2 Rafika shuti huarmica testigo de Jehovacunapaj asambleaman rishpaca shujtaj raza gentecunapura apanacuj cashcata ricushpami contenta can.

¿Videopi ricurij panica imamantataj preocuparishca carca?
Cai panica tucuicuna igual cangapaj allichisha nishpapish mana pudircachu. Pero ¿Bibliata yachashpaca ima shinataj sintirirca?

Shamuj punllacunapi llaquicuna ña mana tiyana cashcata yachashpaca ima problema ricurijpipish ahuantashunmi, ña mana tanto desanimarishunchu. Proverbios 17:22 y Romanos 12:12-ta liyipai. Qꞌuipaca cai catij tapuicunatami yachashun:

¿Shamuj punllapi sumaj causai tiyanata yachashpaca cunan alli causai tucushcata cringuichu? ¿Imamantataj chashna cringui?

HUAQUINCUNACA: “Bibliapica shuj sumaj causai tiyanatami huillan. Chaica alajami. Pero mana ciertochu can” nincunami.

¿Gentecuna nishca cierto cashcata o mana cierto cashcataca imamantataj canllataj alli yachana cangui?

YUYARISHUNCHIJ

Bibliapica shamuj punllapi cushilla causai tiyanatami huillan. Chaita yachashpami shuj sumaj esperanzata charinchij y alli causanchij.

Yuyaringapaj tapuicuna

¿Imamantataj gentecunaca shuj sumaj esperanzata charinata minishtincuna?
¿Bibliapica shamuj punllacunapi ima pajtarinatataj huillan?
¿Sumaj causai tiyanata yachanaca ima shinataj ñucanchijta ayudan?

Caita ima hora tucuchishcata anotai:

Caita rurai

Sumaj causai tiyanamanta cambaj familiahuan ashtahuan yachasha nishpaca cai yachaipi tiyaj versocunata liyi.

Imata rurasha nishcata escribi:

Imata rurasha nishcata escribi

CAICUNATAPISH RICUI

Shamuj punllapi sumaj causai tiyanata yachashpaca tucui laya llaquicunatami ahuantashun.

“¿Pitaj esperanzata cui tucun?” (Rijchari, 22 de abril de 2004)

Huaquincunaca ungushca cashpapish shamuj punllacunapi sumaj causai tiyanata yachashpa ima shina ñaupajman catishcata yachai.

“¿Ungüicunata ahuantangapajca Bibliapi tiyaj consejocunaca ima shinataj ayudan?” (jw.org paginapi ricui)

Cai videota ricucushpaca paraíso Allpapi cambaj familiahuan cushilla causacushcata yuyai.

Paraisopi cashcata yuyashunchij (3:37)

Cai mundopaj causaita cambiasha nij runa Bibliapi shuj sumaj esperanza tiyanata yachashpaca imata rurashcata liyi.

“Cai mundota cambiana yuyaicunataca ña mana charinichu” (Huillaj, 1 de julio de 2013)