YACHAI 59
Catirashpa llaquichijpipish ahuantai tucunguimi
Tucuicunami jarcaicunata charinchij. Huaquinpicarin ñucanchijta catirashpami llaquichincuna. ¿Chai tucujpica mancharinachu canchij?
1. ¿Ñucanchijta catirashpa llaquichijpica imamantataj mana mancharina canchij?
Bibliapica: “Cristo Jesusta catijcuna shina Diosta tucui shunguhuan adorashpa causasha nijcunataca tucuicunatami catirashpa llaquichingacuna” ninmi (2 Timoteo 3:12, NWT). Jesusca Satanaspaj mundopaj ladoca mana carcachu. Chaimantami paitaca llaquichircacuna. Ñucanchijpish Satanaspaj mundopaj ladoca mana canchijchu. Chaimantami cai mundopaj gobiernocuna, religioncuna ñucanchijta catirashpa llaquichijpica mana mancharina canchij (Juan 15:18, 19).
2. ¿Manaraj ñucanchijta catirashpa llaquichijpica imatataj rurana canchij?
Ñucanchijca Jehová Diospimi tucui shunguta churana canchij. Chaipajca cada punllami paita mañana canchij, Bibliatapish liyina canchij. Shinallataj tandanacuicunaman rinataca mana saquinachu canchij. Chashnami gentecuna o cambaj propio familia catirashpa llaquichijpi ahuantangapaj fuerzasta charingui. Contracunaca apóstol Pablotaca achca cutinmi catirashpa llaquichircacuna. Shinapish Pabloca: ‘Jehová Diosca ñucata ayudajmi. Mana manchanichu’ nishpami quillcarca (Hebreos 13:6).
Gentecunaman predicanataca mana saquinachu canchij. Chashnami Jehová Diospi tucui shunguta churanata yachashun, pitapish mana manchashun (Proverbios 29:25). Gobiernocuna Diospaj Shimimanta ama huillachun jarcajpipish mana manchaita charishcamantami predicashpa catishun (1 Tesalonicenses 2:2).
3. ¿Catirashpa llaquichijpipish ahuantanaca imamantataj alli can?
Catirashpa llaquichichunca mana munanchijchu. Pero chai llaquicunata ahuantajpica ñucanchij feca ashtahuanmi sinchi tucun. Ñucanchij propio fuerzahuan llaquicunata ña mana ahuantai tucujpica Jehová Diosca ayudanmi. Chaita ricushpaca paimanmi ashtahuan cꞌuchuyanchij (Santiago 1:2-4-ta liyipai). Llaquicunata apacujpica Jehová Diospishmi llaquirin. Shinapish mana shaicushpa ñaupajman catijpica paica cushillami sintirin. Bibliapica: “Allita rurashcamanta llaquicunata ahuantajpimi Diosca achcata cushicun” ninmi (1 Pedro 2:20, NWT). Jehová Diosca paita tucui shunguhuan sirvijcunaman, ahuantajcunamanca Paraíso Allpapimi huiñai causaita cushpa bendicianga. Chaipica Diospaj contracunaca ña mana tiyangachu (Mateo 24:13).
ASHTAHUAN YACHAI
Catirashpa llaquichijpipish Jehová Diosta alli sirvishpa catingapaj imata ruranata, ahuantashcamanta ima bendicioncunata charinatami ricushun.
4. Familiacuna jarcajpipish ahuantai tucunguimi
Jesusca huaquin familiacunaca Diostaca mana adorachunchu saquingacuna nircami. Mateo 10:34-36-ta liyipai. Qꞌuipaca cai catij tapuitami yachashun:
¿Huaquincuna Diosta sirvinata decidijpica paipaj familiaca imatataj ni tucun?
Huaquin gentecunaca cai llaquicunatami chꞌimbapurashcacuna. VIDEOTA ricui. Qꞌuipaca cai catij tapuitami yachashun:
¿Shuj familia o shuj amigo Jehová Diosta ama sirvishpa catichun jarcasha nijpica canca imatataj ruranguiman?
Salmo 27:10 y Marcos 10:29, 30-ta liyipai. Cada versota liyishca qꞌuipaca cai catij tapuitami yachashun:
¿Familiacuna o amigocuna llaquichijpica cai versoca ima shinataj cantaca ayudai tucun?
5. Catirashpa llaquichijpipish Jehová Diosta adoranataca ama saquingui
Gentecuna jarcaicunata churajpipish mana manchashpami Jehová Diosta sirvina cangui. VIDEOTA ricui. Qꞌuipaca cai catij tapuitami yachashun:
¿Ama manchaita charingapajca cai videoca cantaca ima shinataj ayudan?
Hechos 5:27-29 y Hebreos 10:24, 25-ta liyipai. Cada versota liyishca qꞌuipaca cai catij tapuitami yachashun:
¿Autoridadcuna huillanata o tandanacunata jarcajpipish imamantataj Jehovata sirvishpa catinaca importante can?
6. Jehová Diosmi ahuantachun ayudanga
Shujtaj llajtamanta caj, chꞌican chꞌican huatacunata charij testigo de Jehovacunaca paicunata llaquichijpipish Jehová Diosta sirvishpami catishcacuna. ¿Chaitaca ima shinataj rurashcacuna? VIDEOTA ricui. Qꞌuipaca cai catij tapuitami yachashun:
¿Catirashpa llaquichijpipish paicunataca imataj ayudarca?
Romanos 8:35, 37-39-ta liyipai; Filipenses 4:13-ta liyipai, NWT. Cada versota liyishca qꞌuipaca cai catij tapuitami yachashun:
¿Llaquicunata ahuantachunca cai versoca ima shinataj cantaca ayudan?
Mateo 5:10-12-ta liyipai. Qꞌuipaca cai catij tapuitami yachashun:
¿Catirashpa llaquichijpipish imamantataj cushilla cai tucungui?
Achca testigo de Jehovacunami paicunata catirashpa llaquichijpipish ahuantashpa ñaupajman catishcacuna. Canpish chaita rurai pudinguimi.
HUAQUINCUNACA: “Ñucata catirashpa llaquichijpica manataj ahuantai tucushachu” nincunami.
¿Cashna nijcunata animangapajca ima versocunatataj ricuchinguiman?
YUYARISHUNCHIJ
Catirashpa llaquichijpipish Jehová Diosta sirvishcamantami paipaj ñaupajpica valishca canchij. Paipaj ayudallahuanmi ahuantai tucunchij.
Yuyaringapaj tapuicuna
¿Diosta sirvijcunata catirashpa llaquichijpica imamantataj mana mancharina canchij?
¿Manaraj llaquichijpi ahuantangapajca imatataj rurana cangui?
¿Catirashpa llaquichijpipish Jehová Diosta sirvishpa cati tucushcataca imamantataj seguro cangui?
CAICUNATAPISH RICUI
Shuj joven huauqui Jehová Diosta sirvishcamanta prezupi cajpi Jehová Dios ima shina ayudashcata ricui.
¿Shuj cusa huarmi paicunata catirashpa llaquichijpipish Jehová Diosta sirvishpa catichunca imataj ayudarca?
Catirashpa llaquichijpipish mana manchashpa chꞌimbapuranata yachai.
“Sinchi punllacunapaj allichirishunchij” (Huillaj, julio de 2019)
¿Familiacuna llaquichijpica imatataj rurana canchij? ¿Diostapish sirvishpa catingapaj, familiahuanpish tranquilo causangapajca imatataj rurana canchij?
“Jarcaicuna tiyajpipish Diosta sirvishpa catishunchij” (Huillaj, octubre de 2017)