Diosta rijsishpami paipajman cꞌuchuyashun
Ñucanchijta ruraj Diosca tucui poderta charishpapish cꞌuyaj, llaquij Diosmi can. Paica ñucanchijcuna paita rijsichun, paipaj amigo cachunmi munan (Juan 17:3; Santiago 4:8). Chaimantami paimanta achca cosascunata huillashca.
Ñucanchijta ruraj Diosca shuj shutitami charin
“Cambaj shuti Jehová cashcata gentecuna yachachun. Canllami tucui cai allpata Jatun mandaj cangui” (SALMO 83:18, NWT ).
Bibliapica Jehová Dioslla shujlla Dios cashcata, jahua pachapi, cai Allpapi tucui imalla tiyajcunata pai huiñachishcata, causaita cushcatami yachachin. Chaimantami paillata adorachun miricin (Apocalipsis 4:11).
Jehová Diosca cꞌuyaj Diosmi can
“Diosca cꞌuyajmari” (1 JUAN 4:8).
Jehová Diosca Bibliahuan, tucui pai huiñachishca cosascunahuanmi pai ima shina cashcata ñucanchijman yachachishca. Yaya Diosca tucuimanta yallica cꞌuyajmi can. Pai tucui imata rurashpapish cꞌuyaihuanmi ruran. Jehová Diosta ashtahuan rijsishpaca ashtahuanmi paita cꞌuyashun.
Jehová Diosca perdonajmi can
‘Quiquinca perdonaj Diosmi cangui’ (NEHEMÍAS 9:17).
Jehová Diosca ñucanchijcuna juchayuj cashcataca allimi yachan. Chaimantami paica siempre perdonanata munan. Perdonahuai nishpa mañajpi, mana alli ruraicunata saquingapaj esforzarijpica paica perdonangami. Ñaupaman ñucanchijcuna imapi pandarishcacunata yuyarishpa mana llaquichingachu (Salmo 103:12, 13).
Jehová Diosca paita mañachunmi munan
‘Mandaj Diosca, paita tucui shunguhuan mañajcunata ayudangapaj cꞌuchullapimi. Llaquipi cashpa caparishpa huillajpica uyanmi’ (SALMO 145:18, 19, QC, 1989).
Jehová Diosca huaquin costumbrecunata catishpa o huaquin ritualcunata rurashpa, santocunata utilizashpa paita adorachunca mana munanchu. Paica shuj cꞌuyaj yaya paipaj huahuata uyaj shinami ñucanchij mañashcacunataca uyan.