Familiacuna cushilla causangapajca ¿imatataj rurana can?

1. ¿Imamantataj leypi mandashca shina cazarana can?

Bibliapi tiyaj alli huillaicunaca “cushi Dios” Jehovamantami shamun (1 Timoteo 1:​11, NM). Paica familiacuna cushilla causachunmi munan. Jehovami cazaranataca callarichirca. Diosta cazusha nijcunaca, leypi mandashcata cazushpami cazarashcataca autoridadcunapaj ñaupajpi quillcachina can. Leypi mandashca shina cazaranaca huahuacunapish, cusa huarmipish cushilla, alli causachunmi ayudan. Lucas 2:​1, 4, 5-ta, Biblia en Quichua Chimborazo, 2010-pi rezapai.

Shuj cꞌari shuj huarmi cazarashpaca, huañungacama cushilla causachunmi Diosca munan. Cusa huarmipuralla cꞌuyanacuchunmi Diosca munan (Hebreos 13:4). Diosca cusata o huarmita shitachun o divorciarichunca mana munanchu (Malaquías 2:​16). Shinapish cusa o huarmi huainayashca cajllapimi, shitashpa o divorciarishpa shujtajhuan cazarachun Diosca saquin. Mateo 19:​3-6, 9-ta rezapai.

2. Cusa huarmica ¿ima shinataj causana can?

Jehová Diosca cꞌarita huarmitaca paicunapura ayudanacushpa causachunmi rurarca (Génesis 2:18). Cusaca familiapaj uma cashcamantami familiata mantinina, Diosmantapish yachachina can. Huarmita cꞌuyashcamantaca imapipish ayudanami can. Cusa huarmica paicunapura cꞌuyanacushpami respetota ricuchina can. Ishquindij juchayujcuna cashcamantami, cushilla causangapajca perdonanata yachana can. Efesios 4:​31, 32; 5:​22-​25, 33; 1 Pedro 3:7-ta rezapai.

3. Llaquicunata charishpaca ¿cusa huarmica chꞌicanyanachu can?

Cusa huarmi llaquicunata charishpaca, ishquindijmantami cꞌuyaihuan parlanacuna can (1 Corintios 13:​4, 5). Llaquicuna ricurijpi cusa huarmi chꞌicanyachunca Bibliaca mana mandanchu. 1 Corintios 7:​10-​13-ta rezapai.

4. Diosca ¿imatataj huahuacunapaj munan?

Huahuacuna cushilla causachunmi Diosca munan. Chaimantami cushilla causangapaj imata ruranata yachachin. Shinallataj yaya mama yachashcata, yaya mamapaj experienciamanta yachachunmi munan (Colosenses 3:​20, NM). Diosca paita servishcamanta, paipaj Churitapish cazushcamanta huahuacuna cushilla causachunmi munan. Eclesiastés 11:9–​12:1; Mateo 19:​13-​15; 21:​15, 16-ta rezapai.

5. Huahuacuna cushilla causachunca ¿imatataj yaya mamacunaca rurana can?

Yaya mamaca maipi causanata, micunata, churanatami huahuacunaman cuna can (1 Timoteo 5:8). Shinallataj Diosta cꞌuyanata, ‘Diospaj Shimitami’ huahuacunaman yachachina can (Efesios 6:4, Biblia en Quichua Cañar, 2010). Chashna rurajpica huahuacunaca alli yuyaicunatami charinga. Yaya mama Diosta cꞌuyajta ricushpaca, huahuacunapish Diosta cꞌuyangami. Deuteronomio 6:​4-7; Proverbios 22:6-ta rezapai.

Alli ruraicunamanta cushichichun, allimi rurashcangui nichunmi huahuacunaca minishtin. Huaquinpica jatun llaquicunapi ama urmachunmi huahuacunata cunana o rimana canchij (Proverbios 22:15). Shinapish mana maipish cachun rimanachu canchij. Colosenses 3:​21-ta rezapai.

Yaya mamacunata, huahuacunata ayudangapajca testigo de Jehovacunaca Bibliamanta yachachij tauca librocunatami llujshichishca. Salmo 19:​7, 11-ta rezapai.