Yaya mamacunapaj

Yaya mamacunaca cancunapaj huahuacuna Jehová Diosta cꞌuyachun, paiman mingarichunmi munanguichij. Pero, ¿bautizarichunca ima shinataj ayudai tucunguichij? ¿Paicuna ña bautizari tucushcataca ima shinataj yachanguichij?

Jesusca paita catijcunataca, ‘tucui cai pachata richij, ñuca yachacujcunata ruraichij, bautizaichij’ nishpami mandarca (Mat. 28:19). Bautizaringapajca puntaca Jesusta catijmi tucuna can. Shinapish Jesusta catij tucungapajca mana pai yachachishcacunata crishpallachu saquirina can. Ashtahuanpish tucui pai mandashcacunatami cazuna can. Chaicunataca jovencunapishmi pajtachi tucuncuna.

Dios mandashcacunataca cancunaraj cazushpami cancunapaj huahuacunamanpish yachachirana canguichij (Deut. 6:6-9). Bibliapi yachachishcacunata intindichun, Bibliapi tiyaj consejocunata catishpa alli decisioncunata agllachunca Huiñai huiñaita cushilla causai librohuan yachachichij. Imata yachashcatapish shujtajcunaman parlachun yachachichij (1 Ped. 3:15). Huahuacunaca cꞌuyaihuan yachachijpimi bautizarishpa Diosta ashtahuan sirvisha ningacuna. Huahuacunata ayudanataca amataj saquinguichij. Shinapish paicunallatajmi Bibliamanta estudianata, familiahuan Diosta adoranata, tandanacuicunaman rinata, congregacionpi alli amigocunata charinata yachana can.

Proverbios 20:11-pica: “Huambraraj cashpapish chuya, alli shungu cashcataca pai rurashcapi ricunallami” ninmi. ¿Huahuacunaca imata rurashpataj ña bautizari tucushcata ricuchin?

Bibliapica Jesusca 12 huatacunata charishpaca yaya mamata cazujmi carca ninmi (Luc. 2:51). Bautizarisha nij huahuapish yaya mamata cazunami can (Hech. 5:29; Col. 3:20). Yaya mamacuna, cancunapaj huahuacunaca imapi pandaringami. Shinapish Jesuspaj ejemplota catingapaj, cazuj huahuacuna cashcata ricuchingapajmi esforzarina can.

Huahuacuna jovencunaca Bibliamanta ashtahuan yachana munaitami charina can (Luc. 2:46). Yaya mamacuna, ¿cancunapaj huahuacunaca tandanacuicunaman rinata, chaipi participanata munancunachu? ¿Bibliata cada punlla liyinata, alli estudianata munancunachu? (Sal. 122:1; Mat. 4:4).

Huahuacunaca bautizaringapajca Diospaj Gobiernotami puntapi churana can (Mat. 6:33, NWT). Shinallataj Diosmanta huillana cashcatami yuyaipi charina can. Ima laya, maipi huillana cajpipish chaitami rurana can. Profesorcunamanpish compañerocunamanpish mana pingashpami testigo de Jehová cashcata huillana can. Jesús shina causashunchij huillashunchij tandanacuipajpish allimi prepararina can.

Amigocunata, musicacunata, peliculacunata, televisionpi o Internetpi imata ricunata, computadorapi o celularpi imata pugllanatapish alli agllashpami Dios munashca shina causacushcata ricuchina can (Prov. 13:20; 1 Cor. 15:33, QC, 1989).

Yaya mamacuna ayudajpimi achca huahuacunaca Diosmanta yachashpa bautizarishcacuna. Cancunapaj huahuacuna bautizarichun ayudashcamantaca Jehová Diosca achcatami bendicianga.

Bautizarigrijcunapaj

Bibliata estudiashpami Diosta ashtahuan rijsishcangui, pai imata rurasha nishcatapish tucui shunguhuan crishcangui. Manaraj bautizarishpapish Jehová Diosmanta ña huillacushcamanta, congregacionpi huauqui panicunahuan sirvicushcamantami shungumanta felicitanchij (Juan 17:3; Heb. 11:6).

Ñaupaca shujtaj religionmantachari carcangui. Mana cashpaca shuj religionta charinataca manachari munarcangui. Shinallataj manachari Dios munashca shina causacurcangui. Shinapish Diosta rijsishcamantami cambaj juchacunamanta arrepintirishpa ñaupa causaita saquishcangui. Chashnami Dios mandashcata cazusha nishcata ricuchishcangui (Hech. 3:19).

Can joven cashpaca “huahuamanta pacha” Jehová Diosta rijsishpa, jatun juchacunapi mana urmashpa, Dios munashca shinachari causacungui (2 Tim. 3:15). Chaimantami shujtajcuna mana allita rurachun nijpipish chaicunataca mana rurashcangui. Shinallataj Diosta alli adorangapaj imata rurana cashcatami ricuchishcangui. Manaraj bautizarishpapish cambaj crishcacunatami ña huillacungui. Chashnami Diospi tucui shunguhuan crishcata ricuchingui.

Uchillapi o jatunpi Jehová Diosta rijsishca cashpapish ñachari paiman mingarishpa bautizarinata yuyacungui. Pero, ¿ima shinataj Diosman mingarinchij? Shuj mañaita rurashpami, “ñuca tucui causaipimi canta sirvisha” nishpa Diosman mingarinchij (Mat. 16:24). Qꞌuipaca Diosman mingarishcata ricuchingapajmi bautizarinchij (Mat. 28:19, 20). Jehová Diosman mingarishpa, bautizarishpaca testigo de Jehová tucushcatami ricuchinchij. ¡Testigo de Jehová canaca shuj jatun bendicionmi can!

Bibliapica Jesús bautizarishca qꞌuipaca ‘Diablo pandachisha nichunmi Taita Diospaj espirituca, shitashca pambaman Jesustaca pusharca’ ninmi (Mat. 4:1). Bibliapi yachashca shinaca canpish llaquicunatami charingui. Ashtahuantajca bautizarishca qꞌuipami Jesús shina llaquicunata charingui (Juan 15:20). Cambaj familiachari jarcashpa llaquichisha ninga. Mana cashpaca escuelapi o trabajopi compañerocuna, o ñaupa amigocunachari canta chanzata rurangacuna (Mat. 10:36). Jesusca: “Ñucata caticushcamantapish, alli huillaimantapish paipaj huasita, huauquicunata, panicunata, yaya mamata, huarmita, huahuacunata, allpacunatapish saquishpaca, ñucata caticushcamanta catirashpa llaquichicujpipish, cunan punllacunapi chasquinataca patsaj cutinhuanmi huasicunata, huauquicunata, panicunata, mamacunata, huahuacunata, allpacunatapish chasquinga. Shinallataj shamuj punllapicarin, huiñai causaitami chasquinga” nircami (Mar. 10:29, 30). Cai shimicunataca amataj cungaringui. Ima llaquicunata charishpapish Jehová Diosta cazunataca amataj saquingui. Paimantaca amataj caruyangui.

Bautizarisha nishpaca cambaj congregacionpi ancianocunata pushaj huauquihuan (coordinador del cuerpo de ancianos huauquihuan) parlai. Chai qꞌuipami ancianocunaca canhuan tandanacushpa bautizarisha nijcunapaj tapuicunata rurashpa can ña bautizari tucushcata o manaraj bautizari tucushcata ricungacuna. Chai tapuicunataca canllatajmi repasashpa callari tucungui.

Tapuicunata repasacushpaca tucui versocunata liyishpa chaicunata alli yuyari. Imata mana alli intindishpaca, canta yachachijta o shujtaj ancianotami ayudachun mañai tucungui. Imata anotasha nishpaca cai folletollapitaj o shujtaj hojapimi can intindishcata anotai tucungui. Ancianocuna ña tapuicunata ruracujpica can imata anotashcataca ricunallami cangui.

Can intindishcataca ashalla shimicunapimi cutichinalla cangui. Tapuicunata cutichingapajca shuj o ishqui versocunamanta parlanallami cangui.

Biblia imata yachachishcata manaraj alli intindijpica ancianocunallatajmi canta pi ayudachun ricunga. Chashnami Biblia ima yachachishcata alli intindishpa qꞌuipaman bautizari tucungui.

[Ancianocunapaj: Bautizarisha nijcunahuan tandanacushpa imata rurana cashcata yachangapajca página 54-manta 59-cama ricuichij].