Bautizarigrijcunapaj último yuyaicuna

Bautismocunataca jatun tandanacuicunapimi ruranchij. Bautizarigrijcunapaj conferencia tucurishca qꞌuipaca, conferenciata cuj huauquimi bautizarigrijcunataca shayarishpa cai ishqui tapuicunata sinchita cutichichun mañan:

1. ¿Jesús canmanta huañushcata crishpa, cambaj juchacunamanta arrepintirishpa, Jehová Diosman mingarishcanguichu?

2. ¿Bautizarishpaca testigo de Jehová tucushcata, Jehová Diospaj pueblopi yaicushcataca allichu intindingui?

Bautizarigrijcuna ari nishpaca Jesús paicunamanta huañushcata crishcatami ricuchincuna. Shinallataj tucui shunguhuan Jehová Diosta sirvisha nishcatami tucuicunaman ricuchincuna (Rom. 10:9, 10). Pero, paicuna ari ningapajca Diosta mañashpami cai tapuicunapi alli yuyanaraj cashcacuna.

¿Jehová Diosman mingarishpaca “tucui ñuca causaipimi canllata adorasha, cambaj munaitami rurasha” nishpachu mañashcangui?

¿Ciertochu ña bautizarisha ningui?

¿Bautizaringapajca ima ropatataj churarina cangui? (1 Tim. 2:9, 10; Juan 15:19; Filip. 1:10).

Bautizaringapajca pinganayaj ropataca mana churarinachu cangui. Shinallataj lliqui, mapa, aliriyacuj ropata, letracunata o dibujocunata charij ropatapish mana churarinachu cangui. Chashnami Yaya Diosta alli sirvij cashcata ricuchingui.

¿Bautizacujpica imatataj mana rurana cangui? (Luc. 3:21, 22).

Bautizaricushpaca Jesús imata rurashcatami catina cangui. Jesusta bautizacujpica paica imata mana rurarcachu. Cunan punllacunapipish bautizacujpica mana yacupi nadana, mana pugllanachu cangui. Shinallataj chistecunata rurashpa mana asiricunachu cangui. Shuj premiota ganashca shinaca mana sintirinachu cangui. Bautizarishcamanta cushilla cashpapish tranquilomi cana cangui.

¿Jehová Diosta tucui shunguhuan sirvingapajca imamantataj tandanacuicunaman mana faltana cangui?

¿Bautizarishca qꞌuipaca imamantataj Bibliata estudiangapaj, huillangapajpish shuj horariota charina cangui?

ANCIANOCUNAPAJ

Shuj publicador bautizarisha nishpa huillajpica páginas 12 al 49-pi tiyaj tapuicunata analizachunmi mañana can. Shinallataj “Bautizarigrijcunapaj” nishca parteta liyichunmi mañana can. Chaipica ancianocunahuan tandanacushpa cai folletota pascashpa, imata anotashcata ricushpa parlanalla cashcatami ricuchin. Ancianocunahuan manaraj parlashpaca, bautizarisha nijcunaca cai tapuicunata shujtajcunahuan repasanataca mana minishtinchu.

Shuj publicador bautizarisha nishpaca ancianocunata pushaj huauquimanmi huillana can. Chai qꞌuipaca publicadorca “Bautizarisha nijcunapaj tapuicuna” nishca partetami liyina can. Cutin ancianocunata pushaj huauquica publicadortaca Diospaj munaita rurasha nishpa “¿ñachu Jehová Diosman mingarishcangui?” nishpami tapuna can. Publicador chaita rurashca cajpica ancianocunata pushaj huauquica “Bautizarisha nijcunapaj tapuicuna” parte 1 y 2-ta publicadorhuan analizachunmi ishqui ancianocunaman mingana can. Cai tapuicunata rurangapajca shuj jatun tandanacui tiyanga nishpa huillangacamaca mana shuyanachu can.

Tapuicunapaj cada partetaca shuj horasllapimi repasashpa tucuchina can. Pero ashtahuan tiempota minishtishpaca, ashtahuan tiempopi ruranallami can. Ancianopish publicadorpish tapuicunata utca tucuchinataca mana sustarinachu can. Cada parteta repasacushpaca Diosta mañashpami callarina, tucuchina can. Ancianocunaca tapuicunata rurangapajca utcami publicadorhuan tandanacuna can.

Tauca publicadorcunata tandachishpa tapuicunata ruranapaj randica cada unohuan ruranami alli can. Chashnami ancianocunaca cada publicador Biblia yachachishcacunata alli intindishcata o mana alli intindishcata yachai tucungacuna. Shinallataj publicadorcuna bautizari tucushcata o mana bautizari tucushcatami yachai tucungacuna. Publicadorcunapish mana pingashpami parlai tucunga. Cazarashcacunataca ishquindijta tandachishpami tapuicunata rurai tucuncuna.

Shuj huarmi bautizarisha nijpica, ancianocunaca shujtajcuna paicunata ricunalla puestopimi tandanacuna can. Shinapish shujtajcunaca paicuna parlanacushcataca mana uyanachu can. Tapuicunata ruraj ancianoca shujtaj ancianohuan o siervo ministerialhuan rinata minishtishpaca rinallami can. Siervo ministerialhuan ringapajca cai catij parrafopi tiyaj yuyaicunatami repasana can.

Ashalla ancianocuna tiyaj congregacioncunapica, “Jesusta catijcunapaj crishcacuna” (parte 1) nishca tapuicunataca alli yuyaiyuj siervo ministerialcuna rurachun minganallami can. Cutin “Jesusta catijcunapaj causai” (parte 2) nishca tapuicunataca ancianocunallami rurana can. Tapuicunata rurangapaj congregacionpi ancianocuna, siervo ministerialcuna mana tiyajpica superintendente de circuito huauquimanmi huillana can. Chai huauquimi shujtaj congregacionpi tiyaj huauquicunata ayudachun mañai tucun.

Bautizarisha nijcuna menor de edad cajpica paicunapaj Testigo yaya mamami chaipi cana can. Yaya mamacuna mana chaipi cai tucujpica ishqui ancianocunami tapuicunata rurana can. Cutin shuj siervo ministerialhuan tapuicunata rurana tucujpica parte 1-llatami rurana can.

Bautizarisha nijcunaca Biblia yachachishcacunatami alli intindina can. Shinallataj Jehová Diospaj organizacionta respetashcata, Bibliamanta yachana valishca cashcatami ricuchina can. Pero, Biblia yachachishcacunata publicador mana alli intindishcata ricushpaca, qꞌuipaman bautizarichunmi pi ayudachun ancianocunaca ricuna can. Maijan publicadorca predicana munaita charishcata, Diospaj organización nishcacunata cazushcata ricuchingapajca ashtahuan tiempotachari minishtinga. Shuj publicador ña bautizari tucushcata o manaraj bautizari tucushcata ricungapajca ancianocunami cada tapuita mashna tiempopi ruranata ricuna can. Pero tucui tapuicunatami rurana can.

Parte 2 tapuicunata tucuchishca qꞌuipami ancianocunaca tandanacuna can. Tandanacuipica cada publicador ima shina cashcata, maicama intindishcata, shujtaj yuyaicunatapish yuyarishpami bautizari tucushcata o mana bautizari tucushcata parlanacuna can. Tucuimanta yallica, Biblia yachachishcacunata intindichun, Jehová Diosta tucui shunguhuan cꞌuyachunmi munanchij. Ancianocuna, cancuna ayudajpimi bautizarigrijcunaca shujtaj gentecunaman Diosmanta huillangapaj allichirishca cangacuna.

Qꞌuipaca tapuicunata ruraj shuj o ishqui ancianocunami bautizari tucushcata o mana bautizari tucushcata huillangapaj publicadorhuan tandanacuna can. Publicador bautizari tucujpica “Bautizarigrijcunapaj último yuyaicuna” (páginas 51 a 53) nishca partetami paihuan repasana can. Huiñai huiñaita cushilla causai librota manaraj tucuchishca cajpica, bautizarishca qꞌuipa yachashpa catichunmi mañana can. Ancianocunaca bautizarishca fecha, datocunaca congregacionpaj registropimi anotashca saquiringa nishpami publicadorman huillana can. Shinallataj chai datocunaca testigo de Jehovacunapaj organizacionpi Diospaj obrata rurashpa muyundij Allpapi participacushcatami ricuchin. Bautizarishca qꞌuipa sumaj asignacioncunata chasquigrishcata, congregacionmanta animota chasquigrishcatami ricuchin nishpami huillana can. Ancianocunaca Testigocunapaj datocunataca jw.org paginapi, Huaquichishca Datocuna partepi nishca shina paipaj datocunata utilizai tucushcatami huillana can. Cai tandanacuitaca 10 minutos o menospimi rurana can.

Bautizarishca qꞌuipa shuj huata pajtajpica ishqui ancianocunami mushuj huauquihuan o mushuj panihuan tandanacushpa ñaupajman catichun animana can. Shuj ancianoca mushuj huauquipaj o mushuj panipaj superintendente de grupomi cana can. Pero chai huauqui o pani menor de edad cajpica paicunapaj Testigo yaya mamami chaipi cana can. Chai tandanacuipica Diosta ashtahuan sirvina munaita charichunmi cꞌuyaihuan ancianocunaca ayudana can. Shinallataj Bibliata paillataj estudianata, familiahuan Diosta adoranata, Bibliata tucui punllacuna liyinata ama saquichunmi animana can. Chashnallataj tandanacuicunaman ama faltachun, predicanaman tucui semanacuna llujshichunmi animana can (Efes. 5:15, 16). Huiñai huiñaita cushilla causai librota manaraj tucuchishca cajpica shuj publicador yachachichunmi ancianocunaca ricuna can. Mushuj huauquita o mushuj panitaca shungumantami felicitana can. Imata ashtahuan rurachun animana o consejana cajpica shuj o ishqui yuyaicunallata ninami suficiente canga.