2 Samuel
12 Jehova Diosmi Natanta+ kamachirqa Davidman rinanpaq. Chayaruspanmi Natanqa Davidta+ nirqa: “Huk llaqtapim iskay runakuna karqaku, hukninmi karqa apu, hukninñataqmi wakcha. 2 Apu runapam karqa achkallaña ovejankuna hinaspa vacankuna.+ 3 Wakcha runapañataqmi karqa rantisqan chullachalla ovejachan.+ Chay ovejachanmi paywan chaynataq churinkunawan wiñarqa, kikinpa mikunanmanta mikuspa, tomanan vasomanta tomaspa. Warmi churin hinam marqayllanpi puñuqpas. 4 Huk punchawmi apu runapa wasinman huk runa chayarurqa. Chay runaman mikuchinanpaqmi apu runaqa wakcha runapa ovejachanta nakaruspan yanururqa. Manam kikinpa ovejantaqa nitaq vacantaqa nakayta munarqachu”, nispa.+
5 Chayta willaykuptinmi Davidqa chay apu runapaq llumpayta piñakururqa, hinaspam Natanta nirqa: “¡Kawsaq Jehova Diospa sutinpim nini,+ chayna runaqa wañunanpunim! 6 Hinaspapas mana llakipayaspa ruwasqanraykum chay runaqa ovejachanmanta sayachipunan tawa ovejakunata”, nispa.+
7 Hinaptinmi Natanqa Davidta nirqa: “¡Chay runaqa qanmi kanki! Israelpa yupaychasqan Jehova Diosmi nisunki: ‘Ñuqam akllarqayki Israel runakunata kamachinaykipaq.+ Waqaycharqaykitaqmi Saul mana wañuchisunaykipaqpas.+ 8 Saulpa warminkunata+ hinaspa tukuy imankunatam qurqayki.+ Churarqaykitaqmi Juda aylluta hinaspa wakin Israel ayllukunata kamachinaykipaqpas.+ Manamá chayllachu, aswanqa tukuy imataraqmi qampaq ruwayta munarqani.+ 9 ¿Imanasqataq ñuqa Jehova Diospa nisqayta mana kasukuspayki mana allinta ruwarunki? ¡Het kasta Uriastam wañurachinki!+ Qam kamachiptikim Uriastaqa Ammon runakuna peleaspa wañurachirqaku.+ Chaymantapas warminwanmi casarakurunki.+ 10 Uriaspa warminta hapikuykusqaykiwanmi qipancharuwanki. Chayraykum aylluyki ñakarinqa’, nispa.+ 11 Jehova Diosqa nisunkitaqmi: ‘Sasachakuykunam kanqa aylluykipi.+ Qawachkaptikim warmikikunata qichuspay hukman qusaq.+ Hinaptinmi chay runaqa punchawpipuni warmikikunawan puñukunqa.+ 12 Qamqa pakallapim huchata ruwarqanki,+ ñuqam ichaqa imam nisqayta ruwasaq Israel lliw runapa yachasqanta hinaspa punchawpipuni’”, nispa.
13 Chaymi Davidqa Natanta nirqa: “Huchata ruwasqaywanmi Jehova Diosta qipancharuni”, nispa.+ Hinaptinmi Natan nirqa: “Manam wañunkichu,+ Jehova Diosqa pampachaykusunkim.+ 14 Chaywanpas, Jehova Diosta qipanchasqaykiraykum naceq churikiqa wañunqapuni”, nispa.
15 Chaynata niruspanmi Natanqa wasinman kutikurqa.
Jehova Diosmi Uriaspa warminpi Davidpa churintaqa unqurachirqa. 16 Chaymi Davidqa churin mana wañunanpaq Diosta mañakurqa. Hinaspam wasinpi wichqakuruspan mana mikusqa sapa tuta pampapi chutarayaq.+ 17 Hinaptinmi wasinpi unay wataña kaq runankuna asuykuspanku Davidta hatarichirqaku, Davidñataqmi mana munarqachu hatariytapas nitaq paykunawan mikuytapas. 18 Wawaqa qanchis punchawllapim wañukurqa. Chay wawa wañusqanmantam Davidman willayta runankuna manchakurqaku. Chaymi ninakurqaku: “Wawa kawsachkaptinpas manam uyariyta munawarqanchikchu. Chaynaqa, ¿ima nispataq wawapa wañukusqanmantaqa willasunchik? Imatapas ruwakurunqachiki”, nispa.
19 Runankunapa upallalla rimanakusqankuta qawaspanmi Davidqa cuentata qukururqa wawa wañukusqanmanta. Chaymi Davidqa paykunata nirqa: “¿Wañukunchu wawa?”, nispa. Runankunañataqmi nirqaku: “Wañukunmi”, nispanku. 20 Hinaptinmi Davidqa pampapi chutarayasqanmanta hatarirurqa. Chaymantam mayllakurqa, aceitewan hinakurqa+ hinaspa pachantapas hukwan churakurqa, hinaspanmi Jehova Diospa carpanman rirqa+ yupaychananpaq. Chaymantam wasinman kutispan mikuyta mañakurqa, chaymi quykuptinku mikurqa. 21 Runankunam nirqaku: “¿Imamá kay ruwasqaykiqa? Wawa kawsaptinraqqa waqaspaykim mikuytapas mana munarqankichu. Wawa wañuruptinmi ichaqa hatariruspayki mikurunkiraq”, nispa. 22 Chaymi Davidñataq nirqa: “Wawa kawsaptinraqqa piensarqani: ‘Ichapas Jehova Diosqa llakipayaykuwaspan wawa wañunanta mana munanmanchu’, nispaymi.+ Chaymi waqaspay mana mikurqanichu.+ 23 Kunan wawa wañukuptinqa, ¿imapaqñataq mikuymanta ñakariyman? ¿Mana mikuptiychu wawa kawsariramunqa?+ Manañam churiy kawsarichiytaqa atiymanchu,+ ñuqachá aswanqa haykapipas pay hina wañukusaq”, nispa.+
24 Chaymantam Davidqa warmin Bat-sebaman+ asuykurqa sunqunta tiyaykachiq. Davidqa kaqmantam warminwan puñurqa, chaymi wachakurqa qari wawata. Chay wawapa sutinmi karqa Salomon*.+ Salomontaqa Jehova Diosmi anchata kuyarqa.+ 25 Chayna kuyasqanraykum Jehova Diosqa Natanta+ nirqa Jedidiaswan* Salomonta sutichanankupaq.
26 Joabqa hinallam Raba llaqtayuq+ Ammon runakunawan+ peleachkarqa. Hinaspam kamachiqpa yachanan wasita munaychakururqa.+ 27 Chaymi Joabqa willakuqkunata Davidman kacharqa: “Raba llaqtayuqkunawan peleaspaymi+ yakupa kakunan llaqtata munaychakuruni. 28 Qamñataqyá wakin soldadokunata huñuy, hinaspaykiyá Raba llaqtayuqkunawan peleaspayki llaqtata munaychakamuy. Ama ñuqalla chaytapas munaychakuspay riqsisqa kanaypaq”, nispa nimunankupaq.
29 Chaymi Davidqa soldadokunawan rispanku Raba llaqtayuqkunawan pelearqaku, hinaspankum chay llaqtata munaychakururqaku. 30 Paykunaqa Malcam taytachapa umanpi coronata hurquruspankum Davidpa umanman hinarqaku. Chay coronaqa karqa 34 kilo masnin* quripa llasayninmi hinaspa sumaq llipipipiq rumiyuqkunam. Davidqa apakurqataqmi chay llaqtapa tukuy imantapas.+ 31 Chaymantapas Davidqa chay llaqtapi runakunatam pusakurqa rumi kuchuypi llamkanankupaq, hachakunawan hinaspa fierromanta herramientakunawan llamkanankupaq chaynataq ladrillokunata ruwanankupaq. Chaynatam munaychakurqa Ammon runakunapa llapallan llaqtanta. Chaymantam Davidqa llapallan soldadonkunapiwan Jerusalenman kutirqaku.