2 Samuel

16 Davidmi muqumanta waklawniqman rirqa,+ chaypim Mefibosetpa+ sirvienten Ziba+ kachkasqa iskay sillakuna asnoyuq. Chay asnokunawanmi apamusqa 200 tantata, uvas pasasmanta 100 tantata, higosmantawan palmerapa rurunmanta 100 tantata chaynataq hatun puyñupi vinota.+ 2 Kamachiq Davidmi Zibata nirqa: “¿Imapaqtaq kaykunata apamurqanki?”, nispa. Zibañataqmi nirqa: “Asnokunaqa aylluykikuna sillakunanpaqmi, tantawan frutañataqmi runaykikunapaq, vinoñataqmi pisiparuspanku chunniqpi tomanankupaq”, nispa.+ 3 Hinaptinmi Davidñataq nirqa: “¿Maypitaq kachkan patronnikipa willkan Mefibosetqa?”, nispa.+ Zibañataqmi nirqa: “Payqa Jerusalen llaqtapim qiparamun, ninmi: ‘Israel runakunata kamachinaypaqmi abueloyta hina churawanqaku’”, nispa.+ 4 Chaymi Davidñataq Zibata nirqa: “Mefibosetpa tukuy imantam qanmanña quyki”, nispa.+ Hinaptinmi Zibaqa nirqa: “Kamachiqlláy, makillaykipim kani. Qam kusichiytam munallani”, nispa.+

5 Baurim llaqtaman kamachiq David chayaruptinmi Simeiqa+ Davidta ñakastin hamurqa. Payqa karqa Saulpa ayllunmi hinaspa Guerapa churinmi.+ 6 Simeiqa rumiwanmi chamqarqa Davidta, runankunata hinaspa waqtankunapi kaq kallpasapa soldadonkunata. 7 Simeiqa Davidtam ñakarqa: “¡Runamasinta wañuchiq mana allin runa, kaymanta pasaway! 8 Jehova Diosmi kutichipusuchkanki kamachiq kanaykipaq Saulpa ayllunta wañuchisqaykimanta. Chaymi Jehova Diosqa churiki Absalontaña kamachiq kananpaq churarun. ¡Runa wañuchiq kasqaykiraykum kunanqa astawan ñakarinki!”, nispa.+

9 Chaymi Davidta Zeruyapa+ wawan Abisai nirqa: “Kamachiqlláy, ¿pimá wak wañusqa allqu+ hina runaqa ñakasunaykipaqqa?+ Riruspayá kunkanta kuchuramusaq”, nispa.+ 10 Davidñataqmi nirqa: “Zeruyapa wawankuna, ¿qamkunatachu ñakasuchkankichik?+ Hinayá ñakawachun,+ Jehova Diosmi paytaqa nirqa:+ ‘¡Davidta ñakamuy!’, nispan. Dios kamachimuptinqa, ¿pitaq upallay ninman?”, nispa. 11 Chaymantam Abisaitawan runankunata David nirqa: “Kikiypa churiypuni wañurachiwayta munachkaptinqa,+ ¡astawanraqchiki Benjamin ayllumanta runaqa!+ Jehova Dios kamachimuptinqa, ¡hinayá ñakawachun! 12 Ichapas Jehova Diosqa ñakarisqayta qawamuchkan+ hinaspa Jehova Diosqa kay ñakawasqanmanta harkaykuwaspan bendeciykuwanman”, nispa.+ 13 Chaymantam Davidqa runankunapiwan ñanninta rirqa. Simeiñataqmi risqankupa hanayninta rirqa Davidta ñakastin,+ rumikunawan chuqamustin hinaspa allpawan maqchimustin.

14 Kamachiq Davidwan runankunaqa maymi risqankumanmi pisipasqallaña chayarurqaku, hinaspankum chaypi samarurqaku.

15 Absalonñataqmi Israel runakunapiwan Jerusalenman chayarurqaku. Absalonwanmi karqa Aitofelpas.+ 16 Davidpa amistadnin Arki kastamanta+ Husaimi+ Absalonpa kasqanman yaykuykuspan nirqa: “Kamachiqlláy, ¡unaytayá kawsakuy!+ ¡Unaytayá kawsakuy!”, nispan. 17 Chaynata niptinmi Absalonñataq Husaita nirqa: “¿Manachu Davidtaqa kuyarqanki*? ¿Imanasqataq paywanqa mana rirqankichu?”, nispa. 18 Hinaptinmi Husaiñataq nirqa: “Ñuqaqa yanapasaq Jehova Diospa hinaspa Israel runakunapa akllasqan kamachiqtam. Paywantaqmi qipakusaqpas. 19 Kaqmantam nini, ¿pitataq kasukusaq? ¿Manachu kuyasqay runapa churinta? Taytaykita kasukusqayman hinam qamtapas kasukusqayki”, nispa.+

20 Chaymantam Absalonqa Aitofelta nirqa: “Niwayá imata ruwananchikpaq”, nispa.+ 21 Hinaptinmi Aitofelñataq Absalonta nirqa: “Wasita* cuidanankupaq+ taytaykipa saqisqan sapaq warminkunawanyá puñukuy.+ Chaynapim Israelpi llapallan runakuna yachanqaku taytaykiwan chiqninakusqaykita. Yanapasuqniki runakunañataqmi kallpanchasqa tarikunqaku”, nispa. 22 Hinaptinmi Absalonpaq carpata ruwarapurqaku wasipa hawanpi.+ Chaypim Absalonqa Israelpi llapallan runakuna qawachkaptin+ taytanpa sapaq warminkunawan puñukurqa.+

23 Chay punchawkunapiqa, Aitofelpa+ nisqankunaqa kikin Diospa nisqan hinam karqa. Chaynamá karqa Davidpaqpas chaynataq Absalonpaqpas.