2 Samuel

19 Joabmanmi willaykurqaku: “Kamachiq Davidmi churin Absalon wañukuptin waqachkan”, nispanku.+ 2 Llapallan soldadokunam uyarirurqaku kamachiq David churinmanta llakisqallaña kasqanta. Chaymi chay punchaw kusikunankumantaqa llakisqa karqaku. 3 Soldadokunaqa peleasqankumanta ayqikamuspa pinqakuywan kutimuchkaq hinam llaqtaman upallalla yaykumurqaku.+ 4 Kamachiq Davidñataqmi uyanta tapakuruspan qaparirqa: “¡Churilláy Absalon! ¡Churilláy Absalon, churilláy!”, nispan.+

5 Hinaptinmi Joabqa kamachiq Davidpa kasqan wasiman yaykuruspan nirqa: “Kunanmi runaykikunata pinqayman churarunki. Paykunaqa wañuymantam harkasurqanki qamta, churikikunata,+ warmikikunata hinaspa sapaq warmikikunata.+ 6 Qamqa kuyasuqniki runakunatam chiqninki, chiqnisuqniki runakunatañataqmi kuyanki. Qamtaqa manam imapas qukusunkichu churasqayki kamachiqkunapas chaynataq runaykikunapas. Kusikuwaqchá karqa lliw wañuruptiyku Absalonlla kawsaptinpas. 7 Hawaman lluqsispaykiyá runaykikunata kallpanchamuy. Manachayqa llapallan runaykikunam pasakunqa, hinaptinmi kay tutaqa sapallayki qiparunki. Chaytaqa Jehova Diospa sutinpim niki. Chayqa musu kasqaykimanta kunankama mana allinkuna pasasusqaykimantapas aswan mana allinraqmi karunman”, nispa. 8 Chaymi kamachiq Davidqa rispan llaqtapa punkunpi tiyarqa. Hinaptinmi llapallan runakunaman willamurqaku: “Kamachiq Davidmi llaqtapa punkunpi tiyachkan”, nispa. Chaymi llapallan runakuna Davidman asuykurqaku.

Absalonta yanapaq Israel runakunaqa sapakamam wasinkuman ripukurqakuña.+ 9 Israelpa miraynin llapallan ayllukunam atipanakurqaku, hinaspam nirqaku: “Kamachiq Davidqa chiqniwaqninchik runakunamantam libraykuwarqanchik,+ librawarqanchiktaqmi Filistea runakunapa makinmantapas. Ichaqa churin Absalonmanta lluptikuspanmi Davidqa kay llaqtamanta pasakurqa.+ 10 Chaymantapas, kamachiwananchikpaq akllasqanchik+ Absalonmi peleasqanpi wañurun.+ Chaynaqa, ¿imanasqataq mana imatapas ruwanchikchu kamachiq Davidta kutichimunanchikpaqqa?”, nispanku.

11 Hinaptinmi kamachiq Davidqa sacerdote Sadocmanwan+ Abiatarman+ willachimurqa: “Juda ayllupi punta apaqkunamanyá+ nimuychik: ‘Israel runakunapa rimasqantam karupi kachkaspaypas ñuqa David uyariruni. ¿Imatataq qamkunaqa suyachkankichik wasiyman mana kutichiwaspaykichik? 12 Qamkunaqa aylluymi kankichik. ¿Imatataq suyachkankichik mana kutichiwaspaykichik?’, nispa. 13 Amasatañataqyá+ nimuychik: ‘¿Manachu qanwanqa ayllu kanchik? Kunanmantaqa qamñam Joabpa rantinpi soldadokunapa kamachiqnin kanki. Mana churaptiyqa Diosyá castigawachun’”, nispa.+

14 Chayna nisqanwanmi Juda ayllu runakunaqa mana iskayrayaspanku Davidman willachimurqaku: “Kutikamuyá llapallan runaykikunapiwan”, nispa.

15 Kamachiq Davidmi kutispan Jordan mayuman chayarurqa. Juda ayllu runakunañataqmi Guilgal llaqtakama rirqaku,+ chaynapi Jordan mayuta chimpachimunankupaq. 16 Guerapa churin Simeimi+ Juda ayllu runakunapiwan utqayman rirqa Davidwan tupaykunanpaq. Simeiqa karqa Benjamin ayllupi Baurim llaqtamantam. 17 Payqa Benjamin ayllumanta 1.000 runakunapiwanmi rirqa. Rirqataqmi Saulpa sirvienten Zibapas+ 15 churinkunapiwan chaynataq 20 runankunapiwan. Zibaqa Jordan mayumanmi chayarurqa kamachiq Davidmantapas puntataraq. 18 Zibaqa mayutam chimparurqa*, chaynapi kamachiq Davidpa ayllunta mayu chimpachiypi yanapamunanpaq hinaspa Davidta imapipas yanapananpaq. Mayuta David chimpananpaq kachkaptinmi Guerapa churin Simeiqa ñawpaqninpi qunqurakuykurqa. 19 Hinaspanmi kamachiq Davidta nirqa: “Kamachiqlláy, Jerusalen llaqtamanta lluqsimuptiki imapas mana allin ruwasqaymantaqa pampachaykuwaspaykiyá qunqaruyña.+ Amayá chaytaqa kaqpaqpas hapiychu. 20 Taytáy, chay mana allin ruwasqaytaqa riqsikunim. Chayraykum Joseypa lliw ayllunkunamantapas puntataraq hamurqani qanwan tupaykuq”, nispa.

21 Chaymi Zeruyapa+ wawan Abisai+ nirqa: “¿Manachu Simeiqa wañuchisqa kanan Jehova Diospa akllasqan kamachiqta ñakasqanmanta?”, nispa.+ 22 Davidñataqmi nirqa: “Zeruyapa wawankuna,+ ¿qamkunatachu ñakasurqankichik? ¿Imanasqataq mana munasqayta ruwayta munankichik? Ñuqaqa manam iskayrayanichu kaqmanta Israel llaqtapi kamachiq kanaymantaqa. Chaynaqa, manam kunanqa pipas wañunanchu”, nispa. 23 Chaymantam kamachiq Davidqa Simeita nirqa: “Manapunim wañunkichu”, nispa.+

24 Saulpa willkan Mefibosetpas+ kamachiq Davidta chaskiqmi rirqa. Payqa David pasakusqanmanta Jerusalen llaqtaman hawkalla kutisqan punchawkamam mana chakintapas mayllakurqachu, manataqmi barbantapas kaptakurqachu nitaq pachantapas taqsakurqachu. 25 Kamachiq Davidta chaskinanpaq Jerusalen llaqtaman* chayaruptinmi Davidqa nirqa: “Mefiboset, ¿imanasqataq mana ñuqawanchu rirqanki?”, nispa. 26 Mefibosetñataqmi nirqa: “Kamachiqlláy, yachankim wiqru* kasqaytaqa.+ Ñuqam sirvienteyta nirqani: ‘Asnotayá karunaykapuway sillakuykuspa kamachiqwan rinaypaq’, nispay. Payñataqmi llullakuruwarqa.+ 27 Kamachiqlláy, payqa ñuqamantam llullakunata willasurqanki.+ Chaywanpas, qamqa kanki Diospa angelnin hina yachayniyuqmi. Chaynaqa, tantiasqaykitayá ruway. 28 Kamachiqlláy, taytaypa lliw ayllunkunata wañuchiwanaykiku kachkaptinpas, ñuqataqa qanwan kuska sapa punchaw mikunaypaqmi niwarqanki.+ Chaynaqa, ¿imataraqtaq mañakuykiman quwanaykipaq?”, nispa.

29 Kamachiq Davidñataqmi nirqa: “Amaña imatapas niwaychu. Zibawanyá chakrakunata rakinakamuy”, nispa.+ 30 Hinaptinmi Mefibosetñataq nirqa: “Llapa chakrakunaqa Zibapaqñayá kachun. Ñuqaqa wasikiman allinlla kutimusqaykimantam kusisqa kachkani”, nispa.

31 Barzilaiñataqmi+ Galaad lawpi Roguelim llaqtamanta rirqa Jordan mayukama Davidta riysinanpaq. 32 Barzilaiqa karqa 80 watanpiñam. Payqa apu-apu kasqanraykum Maanaim llaqtapi David kachkaptin mikuykunata qurqa.+ 33 Kamachiq Davidmi Barzilaita nirqa: “Jordan mayutayá chimpasunchik. Jerusalen llaqtapiqa ñuqam mikunaykita qusqayki”, nispa.+ 34 Barzilaimi ichaqa nirqa: “Ñuqaqa manam unay watatañachu kawsasaq. ¿Imamanñataq Jerusalen llaqtamanqa qanwan riyman? 35 Ñuqaqa 80 wataypiñam kachkani.+ Ñuqaqa manañam allin utaq mana allin kasqantapas yachaniñachu. Manañam musyaniñachu ima mikuy kasqantapas nitaq ima yaku kasqantapas. Manañam qaripa utaq warmipa takisqantapas allintaqa uyariniñachu.+ Kamachiqlláy, yanqañam ñuqaqa sasachaykiman. 36 Ñuqaqa kay Jordan mayukama hamuysisqaywanmi kusisqaña tarikuni. ¿Pimá ñuqaqa kani tukuy chaykunata quwanaykipaqqa? 37 Kutikuspayá llaqtaypi wañukamusaq. Chaypim tayta-mamaypas pampakurqa.+ Kayqaya kaypi kachkan Kimam.+ Paywanyá mayuta chimpaspa riychik. Paypaqyá imapas tantiasqaykita ruway”, nispa.

38 Chaymi kamachiq Davidqa nirqa: “Chaynaqa, Kimamyá ñuqawan chimpachun. Paypaq imapas munasqaykitam ruwasaq. Ruwasaqtaqmi paypaq imakunam mañawasqaykitapas”, nispa. 39 Chaymantam llapallan runakuna Jordan mayuta chimparqaku. Kamachiq Davidñataqmi chimpananpaq kachkaspanña Barzilaita muchaykuspan+ bendeciykurqa. Chaymi Barzilaiqa wasinman kutikurqa. 40 Davidqa Kimanwan kuskam mayuta chimparqa Guilgal lawman.+ Chimpaysirqataqmi Juda ayllumanta llapallan runakunapas hinaspa wakin Israel runakunapas.+

41 Llapallan Israel runakunam kamachiq Davidta nirqaku: “¿Imanasqataq mana willaykuwaspanku Juda ayllumanta kastamasiyku Jordan mayuta chimpachimusurqanki qamta, aylluykikunata chaynataq llapallan runaykikunatapas?”, nispanku.+ 42 Chaymi Juda ayllumanta kaqkunañataq Israel runakunata nirqaku: “Kamachiq Davidqa aylluykum.+ ¿Imanasqataq piñakunkichik? ¿Icha kamachiqpatachu imantapas mikukuruniku utaq paymantachu imatapas chaskikuruniku?”, nispa.

43 Israel runakunañataqmi Juda ayllu runakunata nirqaku: “Chunka ayllum ñuqaykuqa kaniku. Chayraykum ñuqayku puntataqa tantianayku kamachiq Davidwan imata ruwanaykupaqpas. ¿Imanasqataq mana kaqpaqpas hinataqa hapiwankiku? ¿Manachu kamachiq Davidtaqa ñuqayku puntata kutichimunayku karqa?”, nispa. Chaywanpas, Juda ayllumanta runakunam aswan nanay simiwan rimarqaku Israel runakunamantaqa.