1 Reyes
20 Siria nacionta kamachiq+ Ben-adadmi+ huñururqa llapallan soldadonkunata, huñururqataqmi 32 kamachiqkunatapas caballontinta hinaspa carretantinta. Paykunam Samaria llaqtata+ yaykunankupaq muyurirurqaku.+ 2 Chaymantam Ben-adadqa willakuqkunata kacharqa Israel nacionta kamachiq Acabman+ willamunankupaq: “Ben-adadmi nin: 3 ‘Ñuqapaqmi kanqa qurikipas, qullqikipas, kuyayllapaq warmikikunapas chaynataq churikikunapas’”, nispa. 4 Israelta kamachiq Acabñataqmi nirqa: “Taytáy, nisqaykiman hinam ñuqaqa makikipi kani, qampaqtaqmi tukuy imaykunapas kanqa”, nispa.+
5 Chaymantam willakuqkunaqa kaqmanta kutispanku Acabta nirqaku: “Ben-adadmi nin: ‘Ñuqam willachimurqayki: “Quwankim qurikita, qullqikita, warmikikunata chaynataq churikikunatapas”, nispay. 6 Ichaqa paqarin kay horatam yanapaqniykunata kachamusaq. Paykunam wasikiman hinaspa yanapaqnikikunapa wasinman yaykuspanku apakunqaku tukuy ima kapuqnikichikkunata’”, nispa.
7 Chaymi Acabqa Israelpi punta apaqkunata qayarachispan nirqa: “Uyariykuwaychik, chay Siriata kamachiqmi tukuy mana allinkunata ruwayta munawachkanchik. Niykuwanñam warmiykunata, churiykunata hinaspa quriytawan qullqiyta apakunanpaqpas. Ñuqañataqmi ‘allinmi’ niykurqani”, nispa. 8 Hinaptinmi llapallan punta apaqkunapiwan llapallan runakuna nirqaku: “Ama kasuychu. Amataq mañasusqaykitapas quychu”, nispa. 9 Chaymi Acabqa Ben-adadpa kachamusqan willakuqkunata nirqa: “Kamachiqniymanyá willamuychik: ‘Punta mañawasqaykitaqa qusqaykim, qipa mañawasqaykitam ichaqa mana’”, nispa. Hinaptinmi chay willakuqkunaqa imam nisqanta Ben-adadman willamurqaku.
10 Siriata kamachiq Ben-adadñataqmi Acabman willachimurqa: “Samaria llaqtatam qalaypaqta chinkachisaq, allpanpas soldadoykunamanqa manam huk aptayninkallapas haypanqachu. Mana chaynata ruwaptiyqa taytachakunayá castigawachun”, nispa. 11 Chaymi Acabqa nirqa: “Ben-adadman willamuychik: ‘Manaraq peleachkaspaykiqa amayá alabakuychu’”, nispa.+ 12 Chayta willaptinkuqa Ben-adadqa wakin kamachiqkunapiwanmi carpankupi tomakuchkarqaku. Acabpa nisqanta willaykuptinkum Ben-adadqa yanapaqninkunata nirqa: “¡Alistakuychik yaykunapaq!”, nispa. Chaymi alistakurqaku Samaria llaqtaman yaykunankupaq.
13 Hinaptinmi Israelta kamachiq Acabta+ Diosmanta willakuq runa* nirqa: “Jehova Diosmi nin: ‘¿Rikuchkankichu waknaña soldadokunata? Kunanmi makikiman churasaq, hinaptinmi yachanki Jehova Dios kasqayta’”, nispa.+ 14 Hinaptinmi Acabñataq nirqa: “¿Imaynatataq makiymanqa churanki?”, nispa. Chaymi Diosmanta willakuqñataq nirqa: “Jehova Diosmi nin: ‘Llaqtakunapi kamachiqkunapa yanapaqninkunawanmi’”, nispa. Acabñataqmi nirqa: “¿Pitaq qallarinqa peleaytaqa?”, nispa. Hinaptinmi Diosmanta willakuqñataq nirqa: “¡Qanmi!”, nispa.
15 Chaymantam Acabqa llaqtakunapi kamachiqkunapa yanapaqninkunata yuparachirqa, hinaptinmi kasqaku 232. Yuparachirqataqmi Israelpi llapallan qarikunatapas, hinaptinmi kasqaku 7.000. 16 Paykunaqa chawpi punchawtam lluqsirqaku. Lluqsirqakuqa Siriata kamachiq Ben-adad hinaspa yanapaqnin 32 kamachiqkuna carpankupi sinka kachkaptinkum. 17 Llaqtakunapi kamachiqkunapa yanapaqninkunam puntata lluqsirqaku. Chaymi Ben-adadqa runankunata kamachirqa ima pasasqanta qawamunankupaq. Hinaptinmi chay runakunañataq nirqaku: “Samaria runakunam lluqsimuchkanku”, nispa. 18 Chaymi Ben-adadñataq nirqa: “Peleaq utaq mana peleaq hamuptinkupas hapimuychik”, nispa. 19 Llaqtakunapi kamachiqkunapa yanapaqninkuna hinaspa paykunapa qipanta riq Israel soldadokunam llaqtamanta lluqsirurqaku, 20 hinaspam Siria soldadokunata wañurachirqaku. Hinaptinmi Siria soldadokuna ayqikuptinku+ Israel soldadokuna qatirqaku. Ben-adadñataqmi caballopi sillada lluptirurqa wakin soldadonkunapiwan. 21 Acabqa caballokunawan hinaspa carretakunawan peleaq hamuqkunata wañuchispanmi Siria soldadokunata pinqayman churarurqa.
22 Chaymantam Diosmanta willakuqqa+ Israelta kamachiq Acabta nirqa: “Kay hamuq watapa qallariynintam* Siriata kamachiqqa qanwan peleananpaq kaqmanta hamunqa.+ Chaynaqa, allintayá tantiay imata ruwanaykipaq”, nispa.+
23 Siriata kamachiq Ben-adadtam yanapaqninkuna nirqaku: “Israel runakunapa Diosninqa urqukunapim yachan*, chaymiki wañurachiwanchik. Pampapi peleaspaqa wañurachisunmi. 24 Chaypaqyá kamachiqkunapa+ rantinpi churaruy huk runakunata. 25 Hinaspayá ñawpaqta hina soldadoykikunata huñuy. Ñawpaqta hinataqyá huñuy caballokunatapas chaynataq carretakunatapas. Pampapi peleaspaqa wañuchisunchikpunim”, nispa. Chaymi Ben-adadqa paykunapa nisqanman hina ruwarqa.
26 Ben-adadqa wata qallariytam* llapallan Siria soldadokunata huñururqa. Hinaspam Afec llaqtaman+ rirqa Israel soldadokunawan peleananpaq. 27 Israel soldadokunapas huñunakururqakum, hinaspankum quqawchakuykuspanku peleaq lluqsirqaku. Paykunaqa Siria soldadokunapa chimpanpim carpankuta sayarachirqaku. Siria soldadokunaqa pampapas tapaykuqmi karqaku, Israel soldadokunam ichaqa iskay ataqu cabrakuna hinalla karqaku.+ 28 Chaymantam Diosmanta willakuqqa Israelta kamachiq Acabta nirqa: “Jehova Diosmi nin: ‘Siria runakunam ninku: “Jehova Diosqa urqupim yachan, manam pampapichu”, nispa. Chaymi kay achkallaña Siria soldadokunataqa makikiman churasaq,+ chaynapim yachankichik ñuqaqa Jehova Dios kasqayta’”, nispa.+
29 Siria soldadokunaqa Israel soldadokunawanmi chimpa-chimpa qanchis punchaw karqaku. Hinaspankuñam peleayta qallaykurqaku. Huk punchawllapim Israel soldadokunaqa 100.000 Siria soldadokunata wañurachirqaku. 30 Wakin Siria soldadokunaqa ayqikuspankum Afec llaqtaman+ yaykururqaku. Ichaqa llaqtapa pirqan tuñiykuptinmi wañururqaku 27.000 soldadokuna. Ben-adadpas ayqikuspanmi Afec llaqtaman yaykururqa, hinaspanmi wasi kuchupi pakakururqa.
31 Chaymantam Ben-adadta yanapaqninkuna nirqaku: “Uyarirqanikum Israelta kamachiqkunaqa llakipayakuq* kasqankuta. Ama hina kaspayá, Israelta kamachiqman rirusaqku qachqa pachata wiqawniykuman watakuruspa hinaspa waskata umaykuman watakuruspa. Ichapas mana wañuchisunkimanchu”, nispa.+ 32 Chaymi qachqa pachata wiqawninkuman watakuruspanku hinaspa waskata umankuman watakuruspanku rirqaku kamachiq Acabman, hinaspam nirqaku: “Ben-adadmi nisunki: ‘Amayá wañurachillawachunchu’”, nispa. Acabñataqmi nirqa: “¿Kawsachkanraqchu? Payqa wawqiy hinam”, nispa. 33 Chaymi paykunaqa Acabpa nisqanta allinpaq hapispanku chaylla nirqaku: “Arí, Ben-adadqa wawqiki hinam”, nispanku. Hinaptinmi Acabñataq nirqa: “Pusaramuwaychik”, nispa. Chaymi Ben-adadqa Acabpa kasqanman rirqa, hinaptinmi Acabñataq carretaman qispiykachirqa.
34 Chaymantam Siriata kamachiq Ben-adadqa Acabta nirqa: “Taytaykimanta taytaypa qichusqan llaqtakunatam kutichipusqayki. Samaria llaqtapi taytaypa ruwasqanta hinayá qampas Damasco llaqtapi mercadokunata kichakamuy”, nispa.
Acabñataqmi nirqa: “Chayna kananpaq rimanakuptinchikqa pasakunaykipaqmi saqiykusqayki”, nispa.
Chaymi rimaruptinku saqiykurqa pasakunanpaq.
35 Chaymantam Jehova Dios kamachiptin Diosmanta willakuq runaqa*+ puriqmasinta nirqa: “Ama hina kaspayá maqaparuway”, nispa. Ichaqa manam munarqachu. 36 Hinaptinmi nirqa: “Jehova Diospa nisqanta mana kasukusqaykiraykum kaymanta pasakuptillayki leon wañurachisunki”, nispa. Chay runa pasakuptinmi leon wañurachirqa.
37 Diosmanta willakuqqa huk runawanpas tuparurqam, hinaspanmi paytapas nirqa: “Ama hina kaspayá maqaparuway”, nispa. Chay runañataqmi quyuy-quyuy kanankama maqaparurqa.
38 Chaymantam Diosmanta willakuqqa pasakuspan kamachiq Acabta ñanpa waqtanpi suyarqa. Mana riqsichikunanpaqmi latapawan ñawinta tapakururqa. 39 Kamachiq Acab chayninta pasachkaptinmi Diosmanta willakuqqa qayakurqa: “Taytalláy, peleaqkunapa chawpinmanmi yaykururqani, hinaptinmi huk soldado huk runata pusaramuspan niwarqa: ‘Kay runata cuiday ama lluptinanpaq. Lluptirusuptikiqa qanmi wañunki,+ manachayñataqmi 34 kilo masnin* qullqita paganki’, nispa. 40 Kayman-wakman purichkanaykamam chay runaqa pasakusqa”, nispa. Chaymi kamachiq Acabñataq nirqa: “Kikikim willakurunki ima pasasunaykimanta”, nispa. 41 Hinaptinmi Diosmanta willakuqqa ñawin tapakusqan latapata hurqukururqa, chaymi Acabqa riqsirurqa Diosmanta willakuq runa+ kasqanta. 42 Hinaptinmi Diosmanta willakuq runaqa Acabta nirqa: “Jehova Diosmi nin: ‘Wañunanpaq nisqay runata pasakunanpaq saqiykusqaykiraykum+ paypa rantinpi wañunki,+ runaykikunañataqmi wañunqa runankunapa rantinpi’”, nispa.+ 43 Chaymi Israelta kamachiq Acabqa Samaria+ llaqtapi wasinman kutikurqa hukmanyasqallaña hinaspa piñallaña.