2 Reyes
18 Israel nacionta kimsa wataña Elapa churin Hosea+ kamachichkaptinmi kamachiq Acazpa+ churin Ezequias+ Juda nacionta kamachiyta qallaykurqa. 2 Ezequiasqa 25 watanpim kamachiyta qallaykurqa Jerusalen llaqtamanta. Payqa 29 watam kamachirqa. Mamanmi karqa Zacariaspa churin Abi*.+ 3 Ezequiasqa ñawpaq abuelon David hinam+ Jehova Diospa munasqanman hina allin kaqkunata ruwarqa.+ 4 Ezequiasmi yupaychana patakunata chinkarachirqa,+ ñutuparurqataqmi sayachisqa suytu rumikunatapas,+ kuchururqataqmi sayachisqanku kullutapas. Moisespa ruwasqan broncemanta culebratapas ñutuparurqam.+ Israel runakunaqa chay culebrata yupaychaspankum animalta kañaspa qusnichipuqku, hinaspam sutichaqku Neustan* nispa. 5 Ezequiasqa Israelpa yupaychasqan Jehova Diospim hapipakurqa.+ Manam pay hinaqa Juda nacionpi kamachiqkunaqa karqachu ñawpaqtapas nitaq qipatapas. 6 Ezequiasqa Jehova Diosman sunqu kaspanmi tukuy imapi kasukurqa.+ Moisesman Jehova Diospa qusqan kamachikuykunatapas kasukurqam. 7 Ezequiastaqa Jehova Diosmi yanaparqa, chaymi imatapas yachaywan ruwaq. Payqa Asiriata kamachiqtaqa manañam kasukurqachu, manañataqmi impuestotapas qurqachu.+ 8 Filistea runakunatapas+ munaychakururqam Gaza llaqtakama, munaychakururqataqmi muyuriqninpi llaqtakunatapas. Chay munaychakusqan llaqtakunam karqa qawananku torrekunapa kasqanmanta murallayuq llaqtakunakama*.
9 Ezequiasmi Juda nacionta tawa wataña kamachichkarqa. Elapa churin Hoseañataqmi+ Israel nacionta Samaria llaqtamanta qanchis wataña kamachichkarqa. Hinaptinmi Asiriata kamachiq Salmanasarqa Samaria llaqtata munaychakunanpaq chawpicharurqa.+ 10 Yaqa kimsa watamantam munaychakururqa.+ Munaychakuptinqa suqta watañam Ezequiasqa kamachichkarqa, Hoseañataqmi Israel nacionta isqun wataña kamachichkarqa. 11 Kamachiq Salmanasarqa Israel runakunata presocharuspanmi Asiria nacionman pusarqa.+ Hinaptinmi yacharqaku* Hala llaqtapi, Gozan mayupa waqtan Habor llaqtapi hinaspa Media nacionpa llaqtankunapi.+ 12 Tukuy chaykunaqa Israel runakunataqa pasarqa Jehova Diosninkuta mana kasukusqankuraykum. Paykunaqa qunqarurqakum Dioswan contrato* ruwasqankutapas. Manamá kasukurqakuchu nitaq uyarirqakuchu Jehova Diospa yupaychaqnin Moisespa kamachisqantapas.+
13 Kamachiq Ezequias 14 wataña kamachichkaptinmi Asiria+ nacionta kamachiq Senaquerib Juda nacionpi murallayuq llapallan llaqtakunata munaychakururqa.+ 14 Lakis llaqtapi Senaquerib kachkaptinmi Ezequias willachimurqa: “Ñuqam huchayuq kani. Kutikuyá, tukuy ima mañawasqaykitam qusqayki”, nispa. Hinaptinmi kamachiq Senaqueribqa Juda nacionta kamachiq Ezequiasmanta mañakurqa 10.260 kilo* qullqita hinaspa 1.026 kilo* qurita. 15 Chaymi Ezequiasqa Jehova Diospa wasinpi hinaspa kikinpa wasinpi llapallan qullqita quykurqa.+ 16 Chay punchawkunam Ezequiasqa Jehova Diospa wasinpa* punkunkunata hurqurachirqa.+ Hinaspanmi Asiria nacionta kamachiq Senaqueribman quykurqa. Chay punkukunaqa kikin Ezequiaspa quriwan llusichisqanmi karqa.+
17 Chaymantam Asiria nacionta kamachiqqa Ezequiasman+ Lakis+ llaqtamanta kacharqa soldadokunapa kamachiqninta*, ancha riqsisqa runanta* hinaspa vino haywaq soldadonta*. Paykunawantaqmi rirqa achka soldadokunapas. Jerusalen llaqtaman chayaruspankum hanay law pozoman yaykumuq yarqapa waqtanpi sayarurqaku. Chay pozoqa kachkan pachata taqsaq runapa chakranman riq ñanpim.+ 18 Kamachiq Ezequias lluqsimunanpaq qayaptinkum lluqsiramurqa: Kamachiqpa wasinmanta nanachikuq Hilkiaspa churin Eliakim,+ kamachiqpa secretarion Sebna+ hinaspa tukuy ima kasqanmanta qillqaq Asafpa churin Joa.
19 Chaymi vino haywaq soldado paykunata nirqa: “Ezequiasmanyá nimuychik: ‘Asiria nacionta kamachiq ancha riqsisqa Senaqueribmi nin: “¿Imanasqataq hawkalla kachkankichik?+ 20 Qanmi nichkanki: ‘Ñuqaqa yachanim imayna peleaytapas, achkam soldadoykunapas’, nispa. Chay nisqaykiqa yanqam. ¿Piman hapipakuspaykichiktaq qipanchawachkankichik?+ 21 ¿Pakisqa suqus hina Egiptopichu hapipakuchkanki?+ Pakisqa suqusqa hapipakuqnintam qillpan. Chay pakisqa suqus hinallam Egiptota kamachiqpas* chaynataq paypi hapipakuqkunapas. 22 ‘Jehova Diosniykupim ñuqaykuqa hapipakuniku’+ niwaptikichikpas, payqa manam yanapasunkichikchu. Ezequiasmi nisurqankichik Diosnikichikpa altarninkunatawan yupaychana patakunata chinkarachinaykichikpaq,+ chaynapi Jerusalen runakunawan lliw Juda nacionpi runakuna Jerusalenpi kaq altarpa ñawpaqllanpi Diosta yupaychanankupaq”’, nispa.+ 23 Asiria nacionta kamachiqwanyá contratota ruway. 2.000 caballokunata quptiy yaqachus sillakuqkunata llapanpaq tarirunki.+ 24 Egiptopa carretankunapiwan silladankunapi hapipakuspaykipas, ¿yaqachu venceruwaq kamachiqniypa mana valeq yanapaqnillantapas? 25 Chaymantapas, ¿manachu Jehova Dios kamachimuwarqa? Jehova Diosmi nimuwarqa: ‘Chay nacionman rispaykiyá tuñichimuy’”, nispa.
26 Chaynata niptinmi Sebnaqa,+ Joaqa hinaspa Hilkiaspa churin Eliakimqa vino haywaq soldadota+ nirqaku: “Taytáy, ama hina kaspayá arameo* rimaypi+ rimapayawayku, chay rimaytapas yachanikum. Amayá Juda runakunapa rimayninpiqa rimapayawaykuchu, pirqapa hawanmantam uyarimuchkanku”, nispa.+ 27 Chaynata niptinkum vino haywaq soldadoqa nirqa: “Kamachiqniyqa manam qamkunamanwan kamachiqnillaykichikman ninaypaqchu kachamuwarqa. Pirqapa hawanpi kaqkunamanwan ninaypaqmi kachamuwarqaqa. Paykunaqa qamkunawan kuskam hatun ispayninkuta mikunqaku hinaspa yaku ispayninkuta tomanqaku”, nispa.
28 Hinaptinmi vino haywaq soldadoqa Juda runakunapa rimayninpi kallpawan nirqa: “¡Asiriata kamachiq ancha riqsisqa Senaqueribpa nisqanta uyariychik!+ 29 Kamachiqmi nin: ‘Amayá Ezequiaspa nisqantaqa uyariychikchu. Payqa manam ñuqamantaqa harkayta atisunkichikmanchu.+ 30 Ezequiasqa Jehova Diospi hapipakunaykichikpaqmi nisuchkankichik: “Jehova Diosmi yanapawasunchik. Kay llaqtataqa manam Asiriata kamachiqqa munaychakunqachu”, nispa.+ Chayna nisqanqa yanqam. 31 Amayá Ezequiastaqa uyariychikchu. Asiriata kamachiqmi nichkan: “Ñuqawan amaña peleaspayá makiyman churakuychik. Chaynapim kikikichikpa uvasnikichiktawan higosnikichikta mikunkichik. Kikikichikpa pozoykichikmantam yakutapas tomankichik 32 hamuspay kay allpaykichik hina allpaman pusanaykama.+ Chay allpapiqa wiñanmi trigopas, cebadapas chaynataq uvaspas, chaykunamantam ruwankichik tantatawan vinota. Chay allpapiqa kachkantaqmi aceitunaspas chaynataq mielpas. Chaynaqa, manam wañunkichikchu. Amayá Ezequiastaqa uyariychikchu. ‘Jehova Diosmi yanapawasunchik’ nisusqaykichikqa yanqam. 33 ¿Yaqachu mayqin naciontapas taytacha-mamachan Asiriata kamachiqmanta harkaykurqa? 34 ¿Maytaq Hamatpawan+ Arpadpa taytacha-mamachankuna? ¿Maytaq Sefarvaim+ runakunapa, Hena runakunapa, Iva runakunapa taytacha-mamachankuna? ¿Yaqachu ñuqamanta chay taytacha-mamachakunaqa Samariata harkaykurqa?+ 35 ¿Mayqin naciontataq taytachan utaq mamachan ñuqamanta harkaykurqa? Chaynaqa, ¿yaqachu Jehova Diosqa Jerusalen llaqtata ñuqamanta harkaykunman?”’”, nispa.+
36 Chaynata niptinpas runakunaqa manam imatapas nirqakuchu. Kamachiq Ezequiasmi paykunataqa nirqaña: “Amam imatapas ninkichikchu”, nispa.+ 37 Pachanku llikchisqakamam Ezequiaspa kasqanman kutirqaku kamachiqpa wasinmanta nanachikuq Hilkiaspa churin Eliakim, kamachiqpa secretarion Sebna chaynataq tukuy ima pasasqanmanta qillqaq Asafpa churin Joa, hinaspam vino haywaq soldadopa nisqanta willarqaku.