2 Reyes
7 Eliseom nirqa: “Uyariychik Jehova Diospa nisqanta. Jehova Diosmi nin: ‘Paqarin kay horam Samaria llaqtapa punkunpi* huk qullqillapaq* kanqa yaqa tawa kilo* harina. Chayna qullqichallapaqmi kanqa yaqa arroba* cebadapas’”, nispa.+ 2 Chaynata niptinmi kamachiqpa yanapaqninqa Diospa runan Eliseota nirqa: “Hanaq pachataña Jehova Dios kichaykuptinpas, ¿imaynataq chayqa kanman?”, nispa.+ Hinaptinmi Eliseo nirqa: “Kikikipunim chayna kasqantaqa rikunki,+ ichaqa manam imatapas mikunkichu”, nispa.+
3 Llaqtaman yaykunapim+ leprawan unquq tawa runakuna karqaku, paykunam ninakurqaku: “¿Imatataq kaypiqa ruwachkanchik wañuyta suyaspanchikqa? 4 Kayllapi qipakuspaqa wañurusunchikmi. Llaqtaman yaykuruspapas+ mikuymantam wañurusun. Chaynaqa Siria soldadokunapa kasqanmanyá hakuchik. Wañuchispaqa wañurachiwasunchiki, llakipayawaptinchikqa kawsasunchiki”, nispa. 5 Chaymi chay unquq runakunaqa tutaykuchkaptinña Siria soldadokunapa carpanman rirqaku. Chayaruptinkuqa manam pipas kasqachu.
6 Jehova Diosmi Siria soldadokunataqa uyarirachirqa achkallay-achka soldadokuna caballontin hinaspa carretantin hamuchkaqta hina.+ Chaymi ninakurqaku: “¡Israel nacionta kamachiqchiki Het runakunapa kamachiqninkunaman hinaspa Egipto nacionpa kamachiqninkunaman pagaramun, chaychiki runankuna wañuchiwananchikpaq hamuchkanku!”, nispa. 7 Chaynata nispankum tutaykuchkaqta ayqikurqaku. Chaymi saqirurqaku carpankuta, caballonkuta hinaspa asnonkuta. Mana wañunankuraykum carpankutapas imam kaqllata saqiruspanku ayqikurqaku.
8 Carpakunapa kasqanman chayaruspankum lepra unquyniyuq runakunaqa huknin carpaman yaykuruspanku saksanankukama mikurqaku. Hinaspam qullqita, qurita chaynataq pachata apakuspanku pakarurqaku. Kutispankum huk carpamanpas yaykururqaku, hinaspam tukuy imatapas apaspanku pakarurqaku.
9 Chaymantam ninakurqaku: “Kay ruwasqanchikqa manam allinchu. ¡Kunanqa kusikunapaq punchawmi! Chaynaqa kutispanchikyá willakamusun kay allin willakuyta. Achikyamunankama mana willakuptinchikqa runakunaqa imatapas ruwaruwasunmi. Kutispanchikyá kamachiqpa runankunaman willamusunchik”, nispa. 10 Chaymi chayaruspanku llaqtapa punkun cuidaqkunata nirqaku: “Siria soldadokunapa carpanmanmi yaykururqaniku, ichaqa manam pipas kanchu. Caballokunawan asnokunallam watarayachkan. Carpakunapas hina kaqllam kachkan”, nispa. 11 Willaykuptinkum punku cuidaqkunapas qaparispa willakurqaku, hinaptinmi kamachiqpa yanapaqninkunapas yacharurqaku.
12 Kamachiqqa tuta hatariruspanmi yanapaqninkunata nirqa: “Siria runakunapa imam tantiasqanta willasqaykichik. Paykunaqa yachankum yarqaymanta kasqanchikta,+ chaymi carpankumanta lluqsiruspanku pakakurunku. Nichkankum: ‘Llaqtamanta lluqsimuptinkum hapirusunchik, hinaspam llaqtaman yaykurusunchik’”, nispa.+ 13 Hinaptinmi huknin yanapaqnin nirqa: “Yachananchikpaqyá qawaramuchunku. Kay llaqtapi puchuq caballokunamantayá pichqata hapiykuspa wakin runakuna riruchunku. Paykunapas ñuqanchik hinam hinaspa llaqtamasinchikkuna hinam wañunqaku”, nispa. 14 Chaymi caballokunata iskay carretaman watarurqaku Siria soldadokunapa carpanman rinankupaq. Hinaptinmi kamachiqqa nirqa: “Qawaramuychikyá”, nispa. 15 Jordan mayukamam Siria soldadokunata maskastin rirqaku. Hinaspam ñanpi tarirurqaku pachakunatawan tukuy imata, chaykunataqa Siria soldadokunam ayqikuspanku wichirachirqaku. Chay kachasqan runakunaqa kutimuspankum kamachiqman willarqaku.
16 Hinaptinmi Israel runakunaqa Siria soldadokunapa carpanman rispanku yaykururqaku tukuy imata maskachakuq. Chaymi Jehova Diospa nisqanman hina huk qullqillapaq karqa yaqa tawa kilo harina. Chayna qullqillapaqmi karqa yaqa arroba cebadapas.+ 17 Chay punchawkunapim kamachiqqa yanapaqninta punku cuidaq kananpaq churarurqa. Ichaqa runakunam tanqanakuspa lluqsispanku wañunankama saruparurqaku. Chayqa karqa kamachiqwan tupasqanpi Diospa runan Eliseopa nisqanman hinam. 18 Eliseoqa kamachiqmanmi nirqaña: “Paqarin kay horatam Samaria llaqtapa punkunpi huk qullqillapaq kanqa yaqa tawa kilo harina. Chayna qullqillapaqtaqmi kanqa yaqa arroba cebadapas”, nispa. Tukuy chaykunamá karqa Diospa runan Eliseopa nisqanman hina.+ 19 Kamachiqpa yanapaqninñataqmi Diospa runan Eliseota nirqa: “Hanaq pachataña Jehova Dios kichaykuptinpas, ¿imaynataq chayqa kanman?”, nispa. Hinaptinmi Eliseo nirqa: “Kikikipunim chayna kasqantaqa rikunki, ichaqa manam imatapas mikunkichu”, nispa. 20 Eliseopa nisqanman hinam kamachiqpa yanapaqnintaqa runakuna tanqanakuspa lluqsispanku wañunankama saruparurqaku.