Isaias
47 Babilonia llaqta,
uraykuspaykiyá pampapi tiyay.+
Caldea runakunapa llaqtan,
pampapiyá tiyay,+ kamachinapaq tiyanapa mana kasqanpiyá tiyay,
runakunaqa manañam nisunkiñachu “waytawan maqchispa uywasqa” nispaqa.
2 Tunawta hapispayki harinata ñutuy-ñutuyta kutay.
Uyayki tapakunaykitapas hurqukuy.
Ukunchakunayki walikitayá hurqukuy.
Mayukunatayá chimpay.
3 Qalallam kanki.
Pinqaynikim qawakunqa.
Imam ruwasqaykiman hinam ruwasqayki,+ manam pipas harkaytaqa atiwanqachu*.
4 “Angelkunata kamachiq Jehova Dioswan sutichasqam librawaqninchikqa*,
payqa Israelpa chuya Diosninmi”.+
5 Caldea runakunapa llaqtan,+
chaypiyá upallalla tiyay, tutayaymanyá yaykuy.
Manañam pipas nisunkiñachu “nacionkunata kamachiq warmi” nispaqa.+
6 Llaqtaypi runakunawanmi piñasqa kachkani.+
Qanmi ichaqa mana llakipayarqankichu.+
Yuyaqkunamanpas llasaq qipitam churkururqanki.+
7 Qanmi nirqanki: “Ñuqaqa wiñaypaq kamachiq warmim kani, arí wiñaypaqmi kamachisaq”, nispa.+
Tukuy ima kaqkunatapas mana kaqpaqta hinam hapirqanki,
manam tantiarqankichu kaykuna imayna kananmantaqa.
8 Aychapa munasqanman hina kawsakuq, uyariy.+
Hawka tiyakuq, uyariy. “Ñuqallam kani,
ñuqa hinaqa manam pipas kanchu.+
Ñuqaqa manam viudayasaqchu.
Wawaykunaqa manam haykapipas wañunqachu” nispa sunqunpi rimapakuq, uyariy.+
9 Qampaqa huk punchawllapim wawaykikuna wañunqa,+
huk punchawllapim viuda qipanki.
10 Mana allin ruwasqaykipim hapipakurqanki.
Nirqankim: “Manam pipas rikuwanchu”, nispa.
Yachayniyuqpaqwan yuyayniyuqpaq hapikusqaykim pantayman aparusunki,
sunquykipipas nichkankim: “Ñuqallam kani, ñuqa hinaqa manam pipas kanchu”, nispa.
11 Qanmanqa ñakariymi chayamusunki,
layqa ruwaqllaña kasqaykipas manam harkasunkichu chay ñakariymantaqa.
Sasachakuymi chayamusunki, manam chaymanta ayqiytaqa atinkichu.
Mana haykapipas qawasqaykim qunqayllamanta chayamusunki.+
12 Qamqa sipas kasqaykimanta ruwasqaykikunatayá hinalla ruway,+
hinallayá layqakunata ruway.
Ichapas allinnikipaq imallatapas ruwawaq.
Ichapas runakunata manchachiwaq.
13 Consejasuqnikikunata tapukuytapas amirunkiñam.
Hamuspankuyá yanapasunki,
hanaq pachapi kaqkunata yupaychaqkunayá* yanapasunki,
lucerokunata qawaqkunayá yanapasunki,+
llullu killata qawaspa ima kananmanta niqkunayá ima pasasunaykimanta willasunki.
14 Paykunaqa paja hinam kanku.
Paykunataqa ninam rupanqa.
Ninamantaqa manam ayqiyta atinqakuchu.
Nina sansaqa manam qunikunapaqchu kanqa,
kayqa manam waqtanpi tiyaykuspa qunikunapaqchu kanqa.
15 Layqa ruwaq runaykikunaqa muspaypi hinam ayqinqaku,
sipas kasqaykimanta tukuy imata ruwaqmasikikunaqa
muspaypi hinam ayqinqaku.
Manam pipas kanqachu yanapasunaykipaqqa.+