Jeremias
16 Jehova Diosmi kaqmanta rimapayawaspan niwarqa: 2 “Kay allpapiqa amayá warmitaqa maskakuychu, amataqyá churiyuqpas kaychu. 3 Kay allpapi tayta-mamakunatawan churi-wawakunatam Jehova Dios nin: 4 ‘Unquywanmi wañunqaku,+ wañuqkunamantaqa manam pipas waqanqachu, manataqmi pampanqakuchu. Animalpa wanun hinam pampapi kanqaku.+ Espadawan wañuchisqam kanqaku, yarqaymantam wañunqaku.+ Alton pawaqkunawan purun animalkunam aychankuta mikunqa’, nispa.
5 Jehova Diosmi niwarqa:
‘Amam yaykunkichu wañukuqpa wasinpi mikupakuqqa,
amam chayman rispaqa waqaysinkichu, amataqmi llakiysinkichu’, nispa.+
Jehova Diosmi nirqa: ‘Ñuqam kay runakuna manaña hawka kanankupaq tukuyta ruwaruni.
Paykunataqa manañam kuyaniñachu*, manañam llakipayaniñachu.+
6 Hatun-uchuymi kay allpapi wañunqaku.
Paykunataqa manam pipas pampanqachu,
paykunamantaqa manataqmi pipas waqanqachu,
manañam pipas aychantaqa kuchukunqachu, manañam pipas chukchantaqa kachiy-kachiytaqa rutukunqachu*.
7 Manañam pipas mikuytaqa ruwanqachu
wañukuqkunamanta waqaqkunapa sunqunta tiyaykachinanpaqqa.
Manañam pipas tomanankupaq vasotaqa qunqañachu
tayta-mamankumanta waqaqkunapa sunqunta tiyaykachinanpaqqa.
8 Fiesta wasimanqa amam yaykunkichu,
paykunawanqa amam mikunkichu nitaq tomankichu’, nispa.
9 Angelkunata kamachiq Jehova Diosmi nin, Israelpa Diosninmi nin: ‘Qamkuna kawsachkaptikichikraqmi hinaspa qamkuna qawachkaptikichikraqmi kay kasqaykichik allpapiqa manaña uyarikunqachu kusikuymanta qapariyqa. Manañataqmi uyarikunqachu casarakuq qaripawan casarakuq warmipa rimasqanpas’, nispa.+
10 Chay runakunaman kay nisqaykunata niptikim paykunañataq nisunki: ‘¿Imaynanpitaq Jehova Diosqa kay sasachakuykunata apamuwanqaku? ¿Imapitaq pantaruniku? ¿Imapitaq huchallikuruniku Jehova Diosniyku kaykunata apamuwanankupaqqa?’, nispa.+ 11 Qamñataqmi ninki: ‘Jehova Diosmi nin: “Kaykunaqa taytaykichikkuna saqiruwasqanraykum+ hinaspa qunqurakuspa yupaychasqanku taytacha-mamachakunata mana saqisqankuraykum.+ Tukuy chaykunatam ruwarqaku ñuqata qunqaruwaspanku hinaspa kamachikuyniyta mana kasukuspanku.+ 12 Ñawpaq abueloykichikkunamanta astawan mana allinkunataraqmi qamkunaqa ruwachkankichik,+ kasukuwanaykichikmantaqa mana uyarikuspam munasqaykichikta ruwachkankichik.+ 13 Mana kasukusqaykichikraykum qarqusqaykichik mana riqsisqaykichik allpaman, ñawpaq abueloykichikkunapa mana riqsisqan allpaman.+ Chaypim tuta-punchaw taytacha-mamachata yupaychankichik,+ ñuqaqa manam yanapasqaykichikchu”’, nispa.
14 Jehova Diosmi nin: ‘Hamuchkanmi punchawkuna Israel runakunata “¡Egipto allpamanta hurqumuqpa sutinpiyá, Jehova Diospa sutinpiyá!” nispa manaña ninaykichikpaq.+ 15 Qamkunaqa chayta ninaykichikmantaqa kaynatañam ninkichik: “¡Jehova Diospa sutinpim nin, payqa Israel runakunatam norte law allpamanta kutirachimun, chiqichisqan runakunatam tukuy hinastinmanta kutirachimun!”, nispa. Allpankumanmi kutichimusaq, ñawpaq abuelonkuman qusqay allpamanmi kutichimusaq’, nispa.+
16 Jehova Diosmi nin: ‘Challwa hapiqkunatam qayachisaq,
hinaptinmi paykunaqa challwachkaq hina hapisunkichik.
Chaymantam purun animal hapiqkunata qayachisaq,
hinaptinmi urqukunapi, muqukunapi,
rumi uchkukunapi hapisunkichik.
17 Ñuqaqa paykunapa tukuy ima ruwasqantam rikuchkani.
Ñuqamantaqa manam pakakuyta atinmankuchu,
pantasqankutapas ñuqaqa rikuchkanim.
18 Puntataqa pantasqankuman hina chaynataq huchankuman hinam pagapusaq,+
paykunaqa millakuypaq taytacha-mamachankuwanmi* allpayta millakuypaqta ruwarunku,
herenciaytam millakuypaq kaqwan manaña rikuyta ruwarunku’”, nispa.+
19 Jehova Dioslláy, qanmi kanki kallpa quwaqniyqa, qamqa kanki pakakunay pirqa hinam,
ñakariy punchawpi amparakunaymi kanki,+
allpa pachapa cantonmantam nacionkuna qanman hamunqa,
hinaspam ninqaku: “Ñawpaq abuelonchikqa taytanku hinam taytacha-mamachata yupaycharqaku,
yanqakunatam chaskirqaku, mana imapaq valeq kaqkunatam chaskirqaku”, nispa.+
20 Runapa ruwasqan taytacha-mamachakunaqa manam Dioschu.+
Chaynaqa, ¿yaqachu pipas yupaychananpaq taytacha-mamachakunata ruwanmanraq?
21 “Kunanmi yachanqaku,
yachanqakum kallpayuq hinaspa atiyniyuq kasqayta,
yachanqakutaqmi ñuqapa sutiyqa Jehova kasqantapas”.