2 Corintios
10 Cristo*+ llampu sunqu hinaspa allin runa kasqanraykum ñuqa Pablo qamkunata rimapayamuykichik. Wakiqnikichikpaqsi qamkunawan kaspayqa mana imapaschu kani,+ qamkunamanta karupi kaspayñataqsi qari-qarillaña kani.+ 2 Arí, wakinkum ninku runakunapa piensasqanman hinalla kawsasqaykuta. Chayna kaptinpas ñuqaqa munani qamkunawan kaspay manchakuq kaytam, chaynapi chayna niqkunata mana qaqchanaypaq. 3 Kay pachapi runakunawan kawsaspapas ñuqaykuqa manam paykuna hinachu peleanankupaq servichikusqanku kaqkunawan peleachkaniku. 4 Peleanaykupaq kaqkunaqa manam runakunapa servichikusqan kaqkunachu,+ aswanqa Diospa ancha atiyniyuq quwasqanku kaqkunam.+ Chaynapi alli-allin takyasqa pirqakuna hina tukuy ima yachachikuykunata chinkachinapaq*. 5 Ñuqaykuqa tuñichichkaq hinam pantay yachachikuykunata pasaypaqta chinkachichkaniku, chinkachichkanikutaqmi Diosmanta runakuna yachanankupaq ima harkaqninkutapas,+ runakunapa imaymana piensasqankutapas presochachkanikum Cristotaña kasukunankupaq. 6 Ñuqaykuqa listom kachkaniku tukuy imapi kasukuq kasqaykichikta qawachiptikichik imapipas mana kasukuq runakunata correginaykupaq.+
7 Qamkunaqa imatapas hawallanta qawaspam “allinmi” utaq “manam allinchu” ninkichik. Pipas Cristopaña kasqanta kikillan piensaqqa kaqmanta yachachun ñuqaykupas pay hina Cristopa kasqaykuta. 8 Señorqa kamachiwarqaku manam hukmanyachinaykupaqchu,+ aswanqa qamkunata kallpanchanaykupaqmi, chayna kamachisqa kasqaykumanta alabakuspaypas manam pinqaypichu kayman. 9 Ñuqaqa manam munanichu cartaykunawan qamkuna manchachiytaqa. 10 Wakinmi ninku: “Cartankunapiqa riman chaylla kasukunapaq hinaraqmi hinaspa manchakunapaq hinaraqmi. Kaypi kaspanmi ichaqa iqu-iqullaña, wañuruchkaq hinañam rimanpas”, nispa. 11 Chayna niq runaqa yachachunkuyá cartaykupi rimasqaykuman hina chaypi kaspaykupas ruwanaykuta.+ 12 Ñuqaykuqa manam munanikuchu kikillankumanta alabakuq wakin runakuna hina kaytaqa nitaq paykunawan tupachikuytaqa.+ Paykunaqa kikinkupa nisqankuman hinallam imayna kasqankuta qawakunku, kikinkupurallataqmi tupachikunkupas, chayta ruwaspankum paykunaqa mana yuyayniyuq kachkanku.+
13 Ñuqaykuqa manam alabakusaqkuchu mana ruwasqaykumantaqa, alabakusaqkuqa maypi llamkanaykupaq Diospa quwasqanku lawpi* ruwasqallaykumantam, chay llamkanaykupaq lawpim qamkunapas kachkankichik.+ 14 Qamkunaman hamuspaykuqa willakunaykupaq kamachiwasqankumanta huklawmanqa manam rirqanikuchu, llamkanayku lawpimiki qamkunapas kachkankichik, ñuqaykuqa Cristomanta sumaq willakuytam puntata qamkunaman apamurqaykiku.+ 15 Alabakunikuqa maypi willakunaykupaq kamachisqa lawpi ruwasqallaykumantam, manam hukkunapa llamkasqankumantachu. Ñuqaykuqa munachkaniku Diospi astawan hapipakunaykichiktam, chaynapi ruwasqayku astawan yapakunanpaq, hinaptinmi ñuqaykuqa astawanraq llamkasaqku. 16 Chaynapi qamkunapa kasqaykichik llaqtakunamantapas aswan karu llaqtakunapiraq utaq mana pipa willakusqan llaqtakunapiraq sumaq willakuymanta willakunaykupaq, chaynapi hukkunapa ruwasqankumanta mana alabakunaykupaq. 17 “Pipas alabakuspaqa Jehova* Diosmantayá alabakuchun”.+ 18 Jehova* Diosqa chaskin hatunchasqan runatam,+ manam kikillan hatunchakuq runatachu.+