Josuey
18 Israelpa mirayninkunaqa ñam allpataqa hapikuykurqakuña,+ chaymi llapallanku Silo llaqtapi+ huñunakuspanku Diospa carpanta chaypi sayachirqaku.+ 2 Chaywanpas Israelpa mirayninkunamantaqa qanchis ayllukunaraqmi tupaqninku allpataqa manaraq chaskirqakuchu. 3 Chaymi Josueyqa Israelpa mirayninkunata nirqa: “¿Haykapikamataq suyankichik ñawpaq abueloykichikkunapa yupaychasqan Jehova Diospa qususqaykichik allpata hapikunaykichikpaq?+ 4 Sapa ayllumantayá kimsa qarikunata pusamuychik. Paykunatam kamachisaq chay allpata qawamuspanku maymanta maykama mapata ruwamunankupaq, chaynapi sapa aylluman rakisqa kananpaq. Chayta ruwaruspankum ñuqaman kutimunqaku. 5 Paykunaqa qanchismanmi allpataqa rakinanku.+ Juda ayllupa allpanqa hina uray* lawpim kanqa,+ Joseypa mirayninkunapa allpanñataqmi hina hanay* lawpi.+ 6 Qamkunaqa chay allpa qanchisman imayna rakisqa kanantayá papelpi churamuychik. Hinaspayá chay ruwasqaykichikta apamuwaychik Jehova Diosninchikpa qayllanpi sorteanaypaq.+ 7 Leviy ayllum ichaqa mana qamkuna hinachu allpataqa chaskinqa,+ paykunapa herencianqa Jehova Diospa sacerdotenkuna kaymi.+ Gad aylluqa, Ruben aylluqa hinaspa Manasespa wakin ayllunqa+ Jehova Dios yupaychaq Moisesmantam allpankuta chaskirqakuña, chayqa kachkan Jordan mayupa inti qispimunan lawpim”, nispa.
8 Hinaptinmi mapata ruwamunankupaq riq qarikunata rinankupaqña kachkaptinku Josuey nirqa: “Rispayá chay allpata qawamuspa mapata ruwamuychik maymanta maykama kasqanta, hinaspa kay Silo llaqtaman kutimuychik Jehova Diosninchikpa qayllanpi sorteanaypaq”, nispa.+ 9 Paykunañataqmi rispanku chay allpa qanchisman imayna rakisqa kananta papelpi qillqamurqaku, chaytaqa ruwarqaku hayka llaqta kasqanman hinam. Tukuruspankuñataqmi huk libropi qillqaspanku Silo llaqtapi Josueypa kasqanman kutirqaku. 10 Hinaptinmi Josueyqa Jehova Diospa qayllanpi Silo llaqtapi paykunapaq sortearqa.+ Chaypim payqa allpata manaraq chaskiq Israelpa mirayninkunaman tupasqanman hina qurqa.+
11 Chay sorteopim Benjamin aylluqa allpanta chaskirqa haykam kasqankuman hina. Chaskisqanku allpaqa tuparurqa Judapa mirayninkunapa+ allpanwan tupanakuqmanta Joseypa mirayninkunapa+ allpanwan tupanakuqkamam. 12 Benjamin ayllupa hanay lawman allpankuqa Jordan mayumanta qallarispam Jerico llaqtapa+ waqtankama karqa, chaymantam intipa siqaykunan law urquntakama pasaspan Bet-aven lawpi chunniqkama chayarqa.+ 13 Chaymantam Luz utaq Betel llaqtapa+ urayninta Atarot-addar llaqtaman chayarqa,+ chaymanqa uraypi kaq Bet-horonpa uray lawninpi+ kaq urquntam chayarqa. 14 Chay Bet-horon lawpi kaq urqumantam uray lawman rispa Kiryat-baal utaq Kiryat-jearim llaqtakama+ chayarqa, chay llaqtaqa Juda ayllupa hukkaqnin llaqtanmi karqa. Chayqa karqa intipa siqaykunan lawman allpankum.
15 Uray lawman allpankuqa qallarirqa Kiryat-jearim llaqtapa patanmantam, hinaspam intipa siqaykunan lawman rirqa, chayninta rispam Neftoa pukyuman+ chayarqa. 16 Chaymantam Refaim pampapa+ hanayninpi kaq urqupa sikinta rispa Hinon wayqu+ lawman rirqa, hinaspam Jebus runakunapa+ uray waqtanpi kaq Hinon wayqunta rispa En-roguel+ lawman chayarqa. 17 Chaymantam hanay lawman rispa En-semes pukyunta Adumim wichaypa+ chimpanpi Guelilot lawman chayarqa, chaynintam rirqa Rubenpa churin Boanpa+ ruminkama.+ 18 Chaymantam Araba pampapa chimpan qichqanta rispa Araba pampaman chayarqa. 19 Hinaspam rirqa Bet-hogla+ lawpi hanay qatanta, chaymantam chayarqa Kachi quchawan*+ Jordan mayu tupanakuqkama, chayqa karqa quchapa ñawchirayasqanmi. Chaykamam karqa alliq* lawman allpankuqa. 20 Intipa qispimunan lawmanñataqmi Jordan mayupi tukurqa. Tukuy chaylawninkunatam muyurirqa Benjaminpa mirayninkunapa hayka ayllu kasqankuman hina chaskisqanku allpankuqa.
21 Benjamin ayllupa haykam kasqankuman hina chaskisqanku llaqtakunaqa kaykunam karqa: Jerico, Bet-hogla, Emec-keziz, 22 Bet-araba,+ Zemaraim, Betel,+ 23 Avim, Para, Ofra, 24 Kefar-amoni, Ofni hinaspa Gueba.+ Llapallanmi karqa 12 llaqtakuna, karqataqmi llaqtachankunapas.
25 Karqataqmi Gabaon,+ Rama, Beerot, 26 Mizpe, Kefira, Mozaa, 27 Rekem, Irpeel, Tarala, 28 Zelah,+ Ha-elef, Jebus runakunapa llaqtan Jerusalen,+ Guibea+ hinaspa Kiryat. Llapallanmi karqa 14 llaqtakuna, karqataqmi llaqtachankunapas.
Chaynam karqa Benjaminpa mirayninkunapa hayka ayllu kasqankuman hina chaskisqanku allpankuqa.