1 Samuel

25 Punchawkuna risqanman hinam Samuel+ wañukurqa. Hinaptinmi llapallan Israel runakuna huñunakuruspanku waqarqaku. Samueltaqa pamparurqaku Rama llaqtapim+ wasinpa hichpanpi. Davidñataqmi Paran sutiyuq chunniqman pasakurqa.

2 Maon llaqtapim apu runa yacharqa*.+ Chay runapam Carmelo llaqtapi+ kapurqa 3.000 ovejankuna hinaspa 1.000 cabrankuna. Huk kutipim ovejankunata chaypi rutuchichkarqa. 3 Chay apu runaqa Calebpa miraynin+ Nabalmi karqa. Warminpa sutinñataqmi karqa Abigail. Abigailqa+ karqa kuyayllapaq hinaspa yachayniyuq warmim, qusan Nabalmi+ ichaqa karqa mana allinlla ruwaq nanay simi runa.+ 4 Davidmi chunniqpi kachkaspan yacharurqa ovejankunata Nabal rutuchisqanta. 5 Chaymi Davidqa chunka runankunata nirqa: “Carmelo llaqtatayá riychik, hinaspayá Nabalta nimuychik paymanta tapukusqayta. 6 Paytam ninkichik: ‘Davidmi nisunki: “Allinllayá qampas, aylluykikunapas hinaspa runaykikunapas kachun. 7 Ovejaykikuna rutuchisqaykitam yacharuni. Ñuqaykuqa Carmelo llaqtapim ovejaykikuna michiqkunata hawkalla kananpaq yanaparqaniku.+ Manamá pipas imankutapas qichurqachu. 8 Yachaykuyta munaspaqa tapuwaqmi runaykikunatapas, paykunam astawan willasunki. Runaykunataqa allinllata chaskiykuspayá imallatapas quykapamuway. Paykunaqa allin punchawpim hamuchkanku. Ñuqaqa churiki hinam kallani”’”, nispa.+

9 Chaymi Davidpa runankunaqa paypa lliw nisqanta Nabalman willarqaku. Willayta tukuruptinkum 10 Nabalqa Davidpa runankunata nirqa: “Jeseypa churin Davidqa, ¿pitaq kasunaypaqqa? Wakinkuna hinam qamkunaqa patronnikichikmanta lluptikuchkankichik.+ 11 ¿Imapaqtaq quyman tantata, yakuta hinaspa nakasqay aychataqa mana riqsisqay runakunamanqa? Tukuy chayqa ovejaykunata rutuqkunapaqmi”, nispa.

12 Chaymi runankunaqa kutispanku Nabalpa tukuy ima nisqanta Davidman willarqaku. 13 Willayta tukuruptillankum Davidqa runankunata kamachirqa: “¡Llapaykichikyá espadaykichikta hapiychik!”, nispa.+ Chaymi espadankuta wiqawninkuman hinakuykurqaku, hinakuykurqataqmi Davidpas. Paywanqa rirqaku yaqa 400 runankunam. 200 runankunañataqmi tukuy imankuta cuidanankupaq qiparqaku.

14 Nabalpa warmin Abigailmanmi hukkaqnin sirvienten willaykamurqa: “Davidmi chunniqmantaraq runankunata patronniyman kachamusqa allinlla kasqanta yachaykunanpaq. Payñataqmi tukuy imata nispan qaqchaparurqa.+ 15 Davidpa runankunaqa chunniqpi kaptiykuqa manam imanawarqakuchu, manataqmi imaykutapas pipas qichuwarqakuchu.+ 16 Ovejaykuta michiptiykum paykunaqa muralla hina imamantapas tuta-punchaw harkawaqku. 17 Qamyá tantiay imatapas ruwanaykipaq. Manachayqa patronniytawan wasinpi lliw kaqkunatam imatapas ruwaruwasun.+ Patronniy Nabalqa mana rimapayana mana allin runam”, nispa.+

18 Hinaptinmi Abigailqa+ chaylla asnokunaman churkuykurqa 200 tantata, iskay puyñu vinota, nakasqa pichqa ovejata, pichqa wayqa* trigo hamkata, uvas pasasmanta 100 tantata hinaspa llapisqa higosmanta 200 tantata.+ 19 Hinaspanmi Abigailqa runankunata nirqa: “Ñawpachkaychik, qipaykichiktam hamusaq”, nispa. Tukuy chay ruwasqanmantaqa manam qusan Nabalmanqa willarqachu.

20 Abigailqa asnopi sillakuykuspanmi urqumanta pakapan niqta urayninpaman richkarqa. Davidpas runankunapiwanmi Abigailpa lawman hamuchkarqa, hinaspam tuparurqaku. 21 Davidqa sunqunpim nichkarqa: “Chunniqpi kaspayqa tukuy imamantam imantapas chay runapataqa cuidarqani, manamá imallanpas chinkarqachu.+ Chaywanpas payqa mana allinwanmi kutirachiwan, yanqapaqmi kasqa yanapasqayqa.+ 22 Achikyamunankama lliw runankunata* mana wañurachiptiyqa chiqniwaqniykunatayá Dios castigachun”, nispa.

23 Davidta rikuruspanmi Abigailqa asnomanta uraykuspan qunqurakuykuspa kumuykurqa. 24 Abigailqa Davidpa ñawpaqninpi qunqurakuykuspanmi nirqa: “Taytalláy, ñuqapam huchayqa. Ama hina kaspayá rimasqayta uyariykuway. 25 Taytalláy, amayá kasuychu qusay Nabalpa* imapas nisqantaqa.+ Payqa mana umayuq upa runam. Paytaqa sutinpas chaynataq rikchayninpas riqsinmi. Ñuqaqa manam rikurqanichu kachamusqayki runakunataqa. 26 Taytalláy, qam uyarichkaptikim Jehova Diospa sutinpi niki, Jehova Diosmi harkasuchkanki+ yanqamanta runakunata wañuchispayki huchayuq kanaykimanta.+ Chiqnisuqnikikunaqa hinaspa mana allin ruwayta munasuqnikikunaqa Nabal hinayá kachunku. 27 Qampaqwan runaykikunapaq apamusqaytayá chaskiykullaway.+ 28 Taytalláy, pampachaykullaway imawanpas piñarachiptiyqa. Ñuqaqa manam iskayrayanichu qampas hinaspa miraynikikunapas wiñaypaq+ kamachinaykichikpaq Jehova Dios yanapasunaykichiktaqa. Qamqa Jehova Diospa runankunata peleaypi yanapaqmi kanki.+ Kunankamaqa manam ima mana allintapas ruwarqankichu.+ 29 Taytalláy, pipas wañuchiyta munasuspayki qatikachasuptikiqa Jehova Diosmi quri-qullqita wayqapi waqaychachkaq hina waqaychasunki. Chiqnisuqniki runakunataqa warakachkaq hinam karuncharachinqa. 30 Israel runakunapa kamachiqnin kanaykipaq Jehova Dios nisusqaykiman hina ruwaptinqa,+ 31 manam imamantapas ñakakunkichu nitaq llakikunkichu. Runakunata yanqamanta mana wañuchiynikiqa allinpunim.+ Taytalláy, Jehova Dios bendecisuptikimá yuyarillawanki”, nispa.

32 Hinaptinmi Davidqa Abigailta nirqa: “¡Israelpa yupaychasqan Jehova Diosyá hatunchasqa kachun! ¡Paymi ñuqawan tupaykunaykipaq kay punchaw kachamusurqanki! 33 ¡Diosyá bendecisunki yachayniyuq kasqaykimanta! Kunanmi harkaykuwanki yanqamanta runakunata wañuchispay huchayuq kanaymanta. Chayraykuyá Dios yanapasunki.+ 34 Israelpa yupaychasqan Jehova Diospa sutinpim nini, ñuqawan rimanaykipaq chaylla mana hamuptikiqa+ Nabalpa wasinpi llapallan qarikunatam wañurachiyman karqa.+ Diosmi harkaykuwan qamta mana imanarunaypaq”, nispa.+ 35 Hinaspam Davidqa Abigailpa apamusqanta chaskiykuspan nirqa: “Hawkallayá wasikiman kutikuy. Niwasqaykiman hinam ruwasaq”, nispa.

36 Chaymantam Abigailqa wasinman kutikurqa. Wasinpim Nabalqa kamachiq runakuna hinaraq tomakuspa kusirikuchkasqa. Llumpay sinka kasqanraykum Abigailqa mana imatapas willarqachu paqarintinkama. 37 Paqarintinta Nabal mallaqyaruptinmi Abigailqa lliwta willaykurqa. Hinaptinmi sunqun hukmanyaruptin Nabalqa rumi hina mana kuyuriq rikurirurqa. 38 Chaymanta yaqa chunka punchawllamantam Nabaltaqa Jehova Dios wañurachirqa.

39 Nabal wañurusqanta David yacharuspanmi nirqa: “¡Jehova Diosyá hatunchasqa kachun! Nabalmi pinqayman churawarqa,+ Jehova Diosmi ichaqa yanapaykuwarqa.+ Mana allin ruwanaymantam harkaykuwarqa.+ Nabaltañataqmi mana allin ruwasqanmanta mana allinwan kutirachin”, nispa. Chaymantam Davidqa Abigailman willachimurqa paywan casarakunanpaq. 40 Davidpa runankunaqa Carmelo llaqtaman chayaruspankum Abigailta nirqaku: “Davidmi kachamuwarqaku qanwan casarakuyta munaspan”, nispa. 41 Hinaptinmi Abigailqa qunqurakuykuspan kumuykurqa, hinaspam nirqa: “Davidpa makinmanmi churakullani runankunapa chakinta mayllanaypaq”, nispa.+ 42 Abigailqa+ chayllam asnonman sillakuykuspan Davidpa runankunawan rirqa. Abigailpa pichqa sirvientankunañataqmi chakiwan qatirqaku. Chaymantam Abigailqa Davidwan casarakurqa.

43 Davidqa casarasqañam karqa Jezreel llaqtayuq+ Ainoanwan.+ Chaymi iskayninkuña Davidpa warmin karqaku.+

44 Saulqa churin Micaltam+ Davidpa warmin kachkaptinpas Paltiwanña+ casararachirqa. Paltiqa karqa Galim llaqtayuq Laispa churinmi.