1 Samuel
7 Chaymi Kiryat-jearim llaqtayuq Israel runakunaqa rispanku Jehova Diospa baulninta aparqaku. Hinaspam muqupi yachaq* Abinadabpa wasinman aparqaku.+ Chaymantam Abinadabpa churin Eleazarta akllarqaku Jehova Diospa baulninta cuidananpaq.
2 Kiryat-jearim llaqtapim Diospa baulninqa 20 wata karqa. Israel runakunam huchankumanta wanakuspanku* Jehova Dios maskayta qallaykurqaku.+ 3 Chaymi Samuelqa Israel runakunata nirqa: “Jehova Diosman tukuy sunquykichikwan kutirikuyta munaspaykichikqa,+ wischuychik taytachaykichikkunata+ hinaspa Astoret mamachaykichikkunata.+ Hinaspayá tukuy sunquykichikwan Jehova Diosta yupaychaychik.+ Hinaptinqa Filistea runakunapa makinmantam librasunkichik”, nispa.+ 4 Chaymi Israel runakunaqa Baal taytachankuta chaynataq Astoret mamachankuta wischurqaku, hinaspankum Jehova Diosllataña yupaycharqaku.+
5 Samuelqa nirqataqmi: “Huñumuychik llapallan Israel runakunata Mizpa llaqtaman,+ hinaptinmi qamkunapaq Jehova Diosta mañapusqaykichik”, nispa.+ 6 Chaymi Mizpa llaqtapi Israel runakunaqa huñunakurqaku. Chaypim yakuta hurquspanku Jehova Diospaq tallirqaku, hinaspam chay punchawqa ayunarqaku.+ Huchankuta riqsikuspankum nirqaku: “Jehova Diospa qayllanpim huchallikurunchik”, nispa.+ Chaymantam Samuelqa Mizpa llaqtapi Israel runakunapa jueznin kayta qallaykurqa.+
7 Israel runakuna Mizpa llaqtapi huñunakusqankuta yacharuspankum Filistea runakunapa kamachiqninkunaqa+ peleaq rirqaku. Chayta yacharuspankum Israel runakunaqa mancharikurqaku. 8 Chaymi Samuelta nirqaku: “Hinallayá Jehova Diosta mañapuwayku yanapawanankupaq+ hinaspa Filistea runakunapa makinmanta librawanankupaq”, nispa. 9 Hinaptinmi Samuelqa malta carnerochata nakaruspan Jehova Diospaq lliwta kañapurqa.+ Hinaspam Jehova Diosta mañakurqa Israel runakunata yanapananpaq, chaymi Jehova Diosqa uyariykurqa.+ 10 Diospaq malta carnerochata Samuel kañapunankamaqa Filistea runakunaqa hamuchkarqakuñam Israel runakunawan peleanankupaq. Ichaqa chay punchawmi Jehova Diosqa Filistea runakunapa hawanman rayokunata mancharikuypaqta tuqyachimurqa,+ hinaptinmi paykunaqa muspaypi hinaña tarikurqaku.+ Chaymi Israel runakunamanta ayqikurqaku.+ 11 Hinaptinmi Israel runakunaqa Mizpa llaqtamanta lluqsispanku Filistea runakunata wañuchistin qatirqaku Bet-car lawkama. 12 Chaymantam Samuelqa Mizpa llaqtamanta Jesana llaqtaman rina ñanpi rumita sayachirqa,+ hinaspam suticharqa Ebenezerwan*. Chaynataqa suticharqa “kunankamaqa Jehova Diosmi yanapawachkanchik” nispanmi.+ 13 Chaynatam Israel runakunaqa Filistea runakunata munaychakururqaku. Manañam yapamantaqa Israel runakunawan peleaqqa rirqakuñachu.+ Samuelpa wañukunan punchawkamam Jehova Diosqa Filistea runakunata ñakarichirqa.+ 14 Ecron llaqtamanta Gat llaqtakama Filistea runakunapa qichusqanku llaqtakunatapas Israel runakunaqa kutichikurqakum. Chay llaqtakunapa muyuriqninpi allpatapas kutichikurqakum.
Israel runakunaqa Amorreo runakunawanqa hawkallam kawsakurqaku.+
15 Samuelqa hinallam Israel runakunapa jueznin karqa wañukunan punchawkama.+ 16 Sapa watam Samuelqa Betel llaqtaman,+ Guilgal llaqtaman+ hinaspa Mizpa llaqtaman riq.+ Chay llaqtakunaman rispanmi Israel runakunapa jueznin karqa. 17 Chaymantañataqmi Rama llaqtapi wasinman kutiq,+ chaypipas Israel runakunapa juezninmi karqa. Chay llaqtapim Jehova Diospaq altarta ruwapurqa.+