Cantar de los Cantares
6 Jerusalenpi warmikunañataqmi nirqa: “Yaw, llapallan warmikunamanta kuyayllapaq sipas,
¿maytaq kuyay-yanaykiqa?
¿May ñannintataq ripukurqa?
Maskaramusunchikyá”, nispa.
2 Sipasñataqmi nirqa: “Kuyay-yanayqa huertanmanmi pasakun,
miski asnaq sachakunapa kasqan huertanmanmi pasakun,
ovejankunata* michiqmi pasakun,
amanqay waytakunata pallaqmi pasakun.+
3 Kuyasqay yanayqa ñuqallapaqmi, ñuqapas payllapaqmi kani.+
4 Kamachiqñataqmi nirqa: “Yaw sunqu suwa,+ Tirza llaqta+ hinam kuyayllapaq kanki,
Jerusalen llaqta hinam munayllapaqña kanki.+
Peleanankupaq huñunasqa runakunaman hinam qanmanqa asuykamuyta mana atikichu.+
5 Amañayá qawallawaychu,
ñawichaykikunam sunquyta suwawan.+
Chukchachaykipas Galaadpi urqukunamanta
uraykamuq cabrakuna hinam.+
6 Kiruchaykikunapas bañachisqankumanta
chayllaraq lluqsiq ovejakuna hinam.
Kiruchaykikunaqa ovejakunapa wachakusqan parisnintin
chitachakuna hinam llapallan kachkan.
7 Uya tapakusqayki ukupim uyachaykipas
iskayman partisqa granada hina kachkan.
8 Warmiykuna 60 kapuwaptinpas,
sapaq warmiykuna 80 kapuwaptinpas,
achkallay-achka sipaskuna kapuwaptinpas+
9 qamllam urpichayqa kanki,+ qamllam kuyayllapaq* urpichayqa kanki.
Qamqa mamaykipa sapallan wawanmi kanki,
qamqa mamaykipa ancha-ancha kuyasqan wawanmi kanki.
Qanmantam sipaskunapas ninku: ‘Payllapas kachwan’, nispa.
Kamachiqpa warminkunawan sapaq warminkunapas qawaykususpaykim alabasunki.
10 Paykunam ninakunku: ‘¿Piñataq chay achikyaq hinaña achkiriqqa?
¿Piñataq chay puqusqa killa hina kuyayllapaqñaqa?
¿Piñataq chay inti hina suma-sumaqllaña achkiriqqa?
¿Piñataq chay peleanankupaq huñunasqa runakuna hina mana asuykuy atinaqa?’”, nispa.+
11 Sipasñataqmi nirqa:
“Nogalkunapa kasqan huertamanmi+ uraykurqani
‘wayqupi sachakuna ikllirunñachus*’ nispay,
‘uvaskunawan granadakuna sisarunñachus’ nispay.
12 Mana musyakuchkaqtam
sunquypa munasqan aparuwasqa
llaqtayta kamachiqpa carretankunapa kasqanman”, nispa.
13 Kamachiqñataqmi nirqa: “Yaw sulamita*,
kutikamuy, kutikamuy.
Qawaykuytam munachkaykiku”, nispa.
Sipasñataqmi nirqa: “¿Imaynanpitaq ñuqallaytaqa qawaykuwayta munankichik?”, nispa.+
Kamachiqñataqmi nirqa: “Qamqa kanki iskay hawaqpi* tusuq runakuna hinam”, nispa.