1 Samuel
26 Chaymanta qipatam Zif llaqtayuq runakunaqa+ Guibea llaqtaman+ rispanku Saulman willarqaku: “Davidqa Jesimon chunniqpa chimpan Hakila muqupim pakakuchkan”, nispa.+ 2 Hinaptinmi Saulqa Israel runakunamanta allin peleaq 3.000 soldadokunawan Davidta maskaq rirqaku, rirqakuqa Zif llaqtapi chunniqmanmi.+ 3 Saulqa carpantam sayarachirqa ñanpa waqtanpi Hakila muqupi, chayqa karqa Jesimon chunniqpa chimpanpim. Davidñataqmi chunniqpi yachachkarqa*, chaypi kachkaspanmi uyarirurqa Saulqa maskaqnin hamusqanta. 4 Chaymi Davidqa Saul hamusqanta allinta yachaykunanpaq runankunata kamachirqa qawaq rinankupaq. 5 Chaymantam Davidqa Saulpa samasqan lawman rirqa. Chaypim Saultaqa rikururqa carpakunapa chawpinpi puñuchkaqta. Chaypitaqmi puñuchkasqa soldadonkunata kamachiq Abnerpas,+ payqa karqa Nerpa churinmi. Llapallan soldadonkunapas muyuriqninpim puñuchkasqaku. 6 Hinaptinmi Davidqa Abisaita+ hinaspa Het kasta+ Aimelecta nirqa: “¿Mayqannikichiktaq riysiwankichik Saulpa carpanman?”, nispa. Hinaptinmi Abisai nirqa: “Ñuqawan hakuchik”, nispa. Abisaiqa karqa Zeruyapa+ wawan hinaspa Joabpa wawqinmi. 7 Hinaptinmi Davidwan Abisaiqa tutallan Saulpa carpanman yaykururqaku. Chaypim Saulta tariykurqaku puñukuchkaqta, lanzanpas sawnanpa waqtanpim tiparayachkasqa. Saulpa muyuriqninpiñataqmi puñuchkasqa soldadonkunapas chaynataq Abnerpas.
8 Hinaptinmi Abisaiqa Davidta nirqa: “Diosmi chiqnisuqniki runata makikiman churaykun.+ Taytáy, kunanyá lanzawan pampaman pasanarachisaq. Payqa huk tuksiyllawanmi wañurunqa”, nispa. 9 Davidmi ichaqa Abisaita nirqa: “Ama chaytaqa ruwaychu. Pipas Jehova Diospa akllasqan runata ima mana allintapas ruwaqqa+ huchayuqmi kanqa”, nispa.+ 10 Davidqa nirqataqmi: “Jehova Diospa sutinpim niki, Saultaqa kikin Jehova Diosmi wañuchinqa+ utaqmi lliw runakuna hina wañunqa+ utaqmi peleachkaspan wañunqa.+ 11 Jehova Diospaqqa manamá allinchu kanman ima mana allintapas ruwaruyqa. Chaynaqa, ¡manamá haykapipas Jehova Diospa akllasqan runataqa ima mana allintapas ruwasaqchu!+ Chayraykuyá sawnanpi lanzanta hinaspa yaku aysakunta aparikuspalla hakuchik”, nispa. 12 Chaymantam Davidqa Saulpa sawnanpi lanzanta hinaspa yaku aysakunta aparikuspan pasakurqa. Manamá pipas rikurqachu+ nitaq musyarqachu. Llapallankum puñukuchkarqaku. Jehova Diosmi paykunataqa miski-miskita puñurachirqa. 13 Chaymanta pasakuspanmi Davidqa paykunapa karu chimpan muquman qispirurqa.
14 Chay muqumantam Davidqa soldadokunata hinaspa Abnerta+ kallpawan nirqa: “¡Abner, uyariway!”, nispa. Hinaptinmi Abnerñataq nirqa: “¿Pitaq qamqa kanki? Kamachiqtam churmichachkanki”, nispa. 15 Hinaptinmi Davidqa Abnerta nirqa: “¿Manachu qamqa kanki Israel runakunamantapas aswan qari-qari runa? Chaynaqa, ¿imanasqamá kamachiqnikitaqa mana allintachu cuidarqanki? Huk soldadom carpanman yaykuramurqa wañurachinanpaq.+ 16 Manamá allintachu cuidarqanki. Jehova Diospa sutinpim nikichik, qamkunaqa wañunaykichikmi Jehova Diospa akllasqan runata+ mana cuidasqaykichikrayku. ¡Kunanyá maskay! ¿Maypitaq kachkan kamachiqpa lanzan hinaspa sawnanpi kaq yaku aysakun?”, nispa.+
17 Saulñataqmi Davidpa qayakamusqanta uyariruspan nirqa: “¿Churilláy Davidchu kachkanki?”, nispa.+ Davidñataqmi nirqa: “Arí kamachiqlláy, Davidmi kani”, nispa. 18 Davidqa nirqaraqmi: “Taytalláy, ¿imanasqataq qatikachawachkanki?+ ¿Ima mana allintataq ruwarullani? ¿Imataq huchallay?+ 19 Kamachiqlláy, uyariykullaway. Sichum qatikachawasqayki Jehova Diosmanta kaptinqa, paymanmi kawsaykunamanta ofrendata qusaq chaskiykuwananpaq. Sichum runallamanta kaptinqa,+ chay runakunayá Jehova Diospa qayllanpi ñakasqa kachun. Paykunaqa Jehova Diospa runankuna ukumantam qarquruwan.+ Chayqa karqa ‘¡pasaway, taytacha-mamachakunata yupaychamuy!’ niy hinaraqmi. 20 Chaynaqa, amayá munaychu Jehova Diospa runankunamanta karupi wañurunaytaqa. Israel runakunapa kamachiqnin taytalláy, urqukunapi yututa qatikachachkaq hinaraqmi maskawachkanki piki hinalla kachkaptiypas”, nispa.+
21 Chaymi Saulqa nirqa: “Huchallikurunim.+ Kutikamuy churilláy David, manañam qatikachasqaykiñachu.+ Ñuqaqa mana yuyayniyuq hinam pasaypaqta pantaruni. Makikipiña kachkaptiypas manam wañurachiwarqankichu”, nispa. 22 Davidñataqmi nirqa: “Kaypim kachkan lanzaykiqa, hukkaqnin runaykiyá hamuspa apachun. 23 Qamqa Jehova Diospa akllasqan runam kanki. Chaymi Jehova Diosña makiyman churaykamuchkaptinpas mana imanarqaykichu. Chaynaqa, Jehova Diosyá sapakamaman kutichipuwasun allin ruwasqanchikman hina+ chaynataq allin sunquyuq kasqanchikman hina.+ 24 Imaynam ñuqapas wañuchisunaykimanta harkaykurqayki, chaynayá ñuqatapas Jehova Dios tukuy mana allinmanta harkaykuwachun”, nispa.+ 25 Chaynata niptinmi Saulñataq nirqa: “Diosyá bendecisunki churilláy David. Qampaqa ima ruwasqaykipas allinmi qispinqa”, nispa.+ Chaymantam Davidqa pasakurqa, Saulñataqmi wasinman kutikurqa.+