1 Tesalonicenses
4 Chaynaqa wawqi-panillaykuna, qamkunatam yachachirqaykiku Diospa munasqanman hina imayna kawsanaykichikpaq,+ chaynatamá qamkunaqa kawsachkankichik. Ñuqaykuqa señor Jesuspa sutinpim ruegakuspa mañakuykiku aswanraq chaynata kawsakunaykichikpaq. 2 Qamkunaqa yachankichikmi señor Jesuspa sutinpi kamachikuykuna qusqaykutaqa.
3 Diosqa munan chuya kanaykichiktam+ hinaspa mana huchapakunaykichiktam*.+ 4 Aychaykichikpa mana allin munayninwanqa amayá aysachikuychikchu,+ chaynapi chuya kanaykichikpaq+ hinaspa Diospa chaskisqan kanaykichikpaq. 5 Amayá Diosta mana riqsiq huklaw nacionniyuq runakuna hinaqa+ qariwan utaq warmiwan puñuy munapayaywanqa aysachikuychikchu.+ 6 Amataqyá pipas iñiqmasintaqa mana allintaqa ruwachunchu nitaq contranpiqa imatapas ruwachunchu, Jehova* Diosqa tukuy chay mana allin ruwaykunamantam castiganqa. Ñam chaykunamantaqa willarqaykikuña, hinaspapas chunkay-chunkaytam nirqaykikuña. 7 Diosqa manam millakuypaq kaqkunata ruwananchikpaqchu qayawarqanchik, aswanqa chuya kananchikpaqmi.+ 8 Kay kamachikuykuna mana kasukuqqa manam runatachu qipanchachkan, aswanqa atiynin* qusuqnikichik+ Diostam.+
9 Wawqi-panintin hina kuyanakuymantaqa+ manañam necesitankichikchu qillqamunaykutaqa, qamkunaqa imayna kuyanakunaykichikpaq Diospa yachachisqanmi kankichik.+ 10 Chaynatapunim ruwachkankichik Macedonia lawpi llapallan iñiqkunawan, chaywanpas wawqi-panillaykuna kallpanchaykikum aswan mastaraq kuyanakunaykichikpaq. 11 Kallpanchakuychikyá hawkalla kawsakunaykichikpaq,+ amataqyá runapa vidanmanqa chapukuychikchu,+ chaymantapas imayna kamachisqaykuman hinayá anchata llamkaychik,+ 12 chaynapi Diosta mana riqsiq runakunapa respetasqan kawsakunaykichikpaq+ chaynataq imaykichikpas mana pisipusunaykichikpaq.
13 Wawqi-panillaykuna, munachkanikutaqmi wañuqkunata ima pasananmanta yachanaykichiktapas,+ chaynapi chaymanta mana yachaqkuna hina ama llakisqa kanaykichikpaq.+ 14 Sichu ñuqanchik creenchik Jesuspa wañukusqanpi hinaspa kawsarimusqanpi,+ hinaspaqa manam iskayrayananchikchu Jesuspa qatiqnin kachkaspa wañukuqkunata Jesuswan kuska kananpaq Dios kawsarichimunanmantaqa.+ 15 Kaykunataqa nikiku Jehova* Diospa palabranman hinam, señorninchik chayaramuspan kaypi kanan* tiempokama kawsaqkunaqa manam imaraykupas wañuqkunataqa ñawpasunchu. 16 Kikin señorpunim hanaq pachamanta uraykamunqa kamachiqpa qapariyninwan, angelkunata kamachiqpa+ qayakuyninwan hinaspa Diospa cornetillanta hapiykuspa, hinaptinmi Cristowan* huklla kaspa wañuqkuna puntata kawsarimunqaku.+ 17 Chaymantañataqmi ñuqanchik manaraq wañuqkunaqa paykunawan kuska puyukunapa+ kasqanman huqarisqa kasunchik señorwan+ altopi tupananchikpaq, hinaspam señorwan kuska wiñaypaq kasunchik.+ 18 Chaynaqa, ama qunqaspayá kay palabrakunawan kallpanchanakuychik.