Filipenses
4 Chaynaqa kuyasqay wawqi-panillaykuna, nimusqayman hinayá señorninchik servisqaykichikpi allinta takyaychik,+ qamkunataqa kuyaykichikmi, llakikuykichikmi, qamkunaqa anchatam kusichiwankichik, qamkunaqa chaskisqay premio* hinam kankichik.+
2 Iñiqmasinchik Evodiatawan Sintiquetam ruegakamuni señorninchikta servisqankupi iskayninku hukllata piensanankupaq.+ 3 Qamtapas llamkaqmasilláy, valekuykim chay paninchikkunata hinalla yanapaykunaykipaq. Paykunapas ñuqawan kuskam kallpanchakurqaku sumaq willakuymanta willakuypi, Clementewan hinaspa wakin llamkaqmasiykunawan kuskam chayta ruwarqaku. Paykunapa sutinqa Diospa libronpim* qillqasqa kachkan, chay libropiqa kawsanankupaq kaqkunapa sutinmi qillqasqa kachkan.+
4 Señorninchikraykuyá tukuy tiempo kusikuychik. Huktawanraqmi nikichik: “¡Kusikuychikyá!”, nispay.+ 5 Llapallan runakunayá yachachunku ama hikutakuqllaña kasqaykichikta*.+ Señorqa hichpallanchikpim* kachkan. 6 Amayá imamantapas llumpaytaqa llakikuychikchu,+ aswanqa imaña kaptinpas Diostayá yanapaykusunaykichikpaq niychik mañakuspaykichik, ruegakuspaykichik+ hinaspa agradecekuspaykichik, 7 hinaptinqa Diospa hawkayayninmi+ sunquykichiktawan+ yuyaynikichikta mana allinkunamanta harkanqa Jesucristota qatikusqaykichikrayku, chay hawkayayqa runapa mana entiendey atinanmi.
8 Chaynaqa wawqi-panillaykuna, hinallayá piensaychik imapas chiqap kaqkunapi, imapas ancha allin kaqkunapi, imapas allin ruway kaqkunapi, imapas chuya kaqkunapi, imapas kuyanapaq kaqkunapi, imapas respetana kaqkunapi, imapas allin kaqkunapi chaynataq imapas alabaykunapaq kaqkunapi.+ 9 Qamkunaqa ñuqamantam tukuyta yacharqankichik, uyarirqankichik hinaspa rikurqankichik.+ Yachachisqaytapas chaskirqankichikmi, chaykunatayá ruwaychik, hinaptinqa hawkayaypi kaq hinaspa hawkayay qukuq Diosmi qamkunawan kanqa.
10 Señorpim ancha-anchata kusikuni ñuqamanta huktawan preocupakusqaykichikmanta.+ Qamkunaqa ñamá ñuqamantaqa preocupakurqankichikña, ichaqa manam atirqankichikchu ima ruwaytapas. 11 Kaytaqa nichkani manam imaypas pisipuwasqanraykuchu, ñuqaqa imayna tarikuspaypas imapas kapuqllaywan kawsakuytam yacharuni.+ 12 Ñuqaqa yachanim wakcha kaytapas+ chaynataq llapa imayuq kaytapas. Imaynaña tarikuspaypas ñuqaqa yacharunim saksasqa kaytapas hinaspa yarqaymanta kaytapas, yacharunitaqmi tukuy imayuq kaytapas chaynataq mana imayuq kaytapas. 13 Dios kallpata quwaptinmi tukuy imata ruwanaypaq kallpayuq kani.+
14 Chaywanpas qamkunaqa allintapunim ruwarqankichik sasachakuyniykunapi yanapaykuwaspaykichikqa. 15 Filipos llaqtayuqkuna, yachasqaykichikpi hinapas sumaq willakuymanta chayllaraq yacharusqaykichik qipamanqa chaynataq Macedonia lawmanta ripukuptiyqa, manam maylawpi iñiqkunapas yanapawarqachu, aswanqa qamkunallam yanapasqaymantaqa yanapaykullawarqankichik.+ 16 Qamkunaqa Tesalonica llaqtapi kachkaptiypas pisipuwaqniytam apachimuwarqankichik, ichaqa manam huk kutillatachu, aswanqa iskay kutitam. 17 Maskachkaniqa manam imatapas chaskikuytachu, aswanqa achkataraq allin kaqkunata ruwasqaykichikrayku bendecisqa kanaykichiktam. 18 Ñuqapaqqa ima pisipuwaqniymantapas aswanraqmi kapuwachkan. Iñiqmasinchik Epafroditowan+ apachimuwasqaykichikwanmi manaña imaypas pisinñachu. Chay apachimuwasqaykichikqa Diosninchiktam anchata kusichin, chayqa Diospaqqa imapas qusqankuta kañapuptinku miskillaña asnariq+ hinam. 19 Hinaptinqa tukuy kapuqniyuq kuyasqay Diosmi tukuy ima pisipususqaykichikta+ qamkunamanpas Jesucristontakama qusunkichik. 20 Dios taytanchikyá wiña-wiñaypaq hatunchasqa kachun. Chaynayá kachun*.
21 Jesucristopa qatiqnin Diospa runankunatayá llapallanta saludaykapuwaychik. Ñuqawan kaq iñiqkunapas saludamusunkichikmi. 22 Diospa llapallan runankunam saludamusunkichik, aswanraqmi Roma nacionta kamachiqpa* wasinpi+ kaqkunaqa.
23 Señorninchik Jesucristopa ancha kuyakuyninyá* qamkunawan kachun Diospa munasqanman hina piensasqaykichikrayku.