1 Corintios
10 Ñuqaqa wawqi-panillaykuna kayta yachanaykichiktam munani: Ñawpaq abuelonchikkunaqa llapallankum puyupa llantusqan karqaku,+ llapallankutaqmi lamar quchatapas chimparqaku.+ 2 Llapallankum puyu llantuptin lamar quchanta chimpaspanku Moisesta qatipakunankupaq bautizasqa karqaku. 3 Llapallankutaqmi Diospa qusqan mikuytapas mikurqaku,+ 4 llapallankutaqmi Diospa qusqan yakutapas tomarqaku.+ Paykunaqa tomarqaku Diospa qusqan hatun rumimantam, chay hatun rumiqa hichpallankupim karqa, hinaspapas chay hatun rumiqa Cristom* karqa.+ 5 Ichaqa yaqa llapallankutam Diosqa mana chaskirqachu, paykunaqa chunniqpim wañururqaku.+
6 Tukuy kaykunaqa yachananchikpaqmi karqa, chaynapi paykuna hina mana allin kaqkunata mana munapayananchikpaq.+ 7 Amayá wakinkuna hinaqa taytacha-mamacha yupaychaqqa kasunchu, qillqasqam kachkan: “Chaymantam llapallanku mikurqaku hinaspa tomarqaku, hinaspañataqmi hatarispanku tususpa kusirikurqaku”, niq.+ 8 Amataqyá wakinkunapa huchapakusqankuman* hinaqa huchapakusunchu, huchapakusqankuraykum paykunamanta huk punchawlla wañururqaku 23.000 runakuna.+ 9 Amataqyá wakiqnin hinaqa Jehova* Diostapas pruebamanqa churasunchu,+ chaymi culebrapa kachusqan wañurqaku.+ 10 Amataqyá wakinkuna hinaqa hukkunamanta rimaqqa kasunchu,+ wakinkunam chayna karqaku, chayraykum paykunataqa angel wañurachirqa.+ 11 Tukuy chaykunam paykunata pasarqa yachachiwananchikpaq,+ hinaspam qillqasqa karqa kay tiempokunapa* tukupayninpi kawsaqkuna willasqa kananchikpaq.
12 Chaynaqa, pipas allin kasqanta* piensaqqa cuidakuchunyá, yanqataq ima mana allinmanpas wichiykunman.+ 13 Tentacionpi tarikusqaykichikqa manam wakin runakunapa tarikusqan tentacionmanta hukchu.+ Diosqa rimasqanman hinam ruwan, chaymi payqa mana saqisunkichikchu mana aguantay atinaykichikkama sasachakuypi kanaykichiktaqa,+ aswanqa chayna hatun sasachakuypi kaptikichikqa yanapasunkichikmi imatapas ruwanaykichikpaq hinaspa aguantanaykichikpaq.+
14 Chayraykuyá kuyasqallaykuna karunchakuychik taytacha-mamacha yupaychaymantaqa.+ 15 Yuyayniyuq runakunata hinam rimapayachkaykichik, kikikichikyá yachaychik rimasqay chiqap utaq mana chiqap kasqanta. 16 Vinoyuq vasopaq Diosta mañakusqanchikqa, ¿manachu Jesucristopa yawarninwan tupan?+ Partisqanchik tantapas, ¿manachu Cristopa cuerponwan tupan?+ 17 Tantaqa chullallam, ñuqanchikqa achkallaña kaspapas huk cuerpollam kanchik,+ chaynaqa kanchik huk tantallamanta llapallanchik mikusqanchikraykum.
18 Yuyariychik Israel runakunata. Qusqanku ofrendata altarpi mikuqkunaqa, ¿manachu yaqa Dioswanpas mikuchkanmanku hina karqaku?+ 19 Hinaptinqa, ¿ima nichkanitaq? ¿Taytacha-mamachapas hinaspa chaykunaman qusqa kaqkunapas aswan allin kasqantachu nichkani? 20 Manam chaytachu nichkaniqa, aswanqa kaytam: Huklaw nacionniyuqkuna animalkunata wañuchispa ofrendata quspankuqa demoniokunamanmi quchkanku, manam Diosmanchu.+ Ñuqaqa manam munanichu demoniokunawan hukllawakunaykichiktaqa.+ 21 Qamkunaqa manam Jehova* Diospa vasonmanta tomachkaspaqa demoniokunapa vasonmantaqa tomawaqchikchu, manataqmi “Jehova* Diospa mesanmanta”+ mikuchkaspapas demoniokunapa mesanmantaqa mikuwaqchikchu. 22 Icha, ¿“Jehova* Diostachu piñachiyta munachkanchik”?+ Ñuqanchikqa manam Diosmanta aswan kallpayuqchu kanchik ¿aw?
23 Tukuy imatam ruwachwan, ichaqa manam tukuy imachu yanapawanchik. Tukuy imatam ruwachwan, ichaqa manam tukuy imachu kallpanchawanchik.+ 24 Sapakamayá maskachun wakinkunapa allinninta, amayá kikillanpa allinnintachu.+
25 Mercadopi ima aycha rantikusqankutapas* ama imatapas tapukuspayá mikuychik, chaynapi concienciaykichik hawka kananpaq. 26 “Jehova* Diospamiki kay pachapas hinaspa kay pachapi tukuy ima kaqkunapas”.+ 27 Sichu Diospi mana iñiq runa mikunaykichikpaq wasinman rinaykichikpaq nisuptikichik “arí” nispaykichikqa ama imatapas tapukuspayá mikuychik lliw qususqaykichikta, chaynapi concienciaykichik hawka kananpaq. 28 Ichaqa sichu pipas nisunkichik “kay aychaqa taytacha-mamachakunaman qusqa aycham” nispa hinaptinqa, ama mikuychikchu willasuqnikichik runarayku hinaspa chay runapa conciencian hawka kananrayku.+ 29 Kaywanqa manam qamkunapa concienciaykichikmantachu rimachkani, aswanqa chay runapa conciencianmantam. Imapas munasqayta ruwanaypaq tantiakuyta atispaypas manam munasqaytachu ruwani hukkuna sunqunkupi ama rimakuwananpaq*.+ 30 Diosman graciasta quspay mikuchkaptiypas, ¿allinchu kanman ñuqapa contraypi mana allinta rimaptinku mikuyniyqa?+
31 Chayraykuyá mikuspaykichikpas, tomaspaykichikpas utaq imataña ruwaspaykichikpas llapallanta ruwaychik Dios hatunchasqa kananpaq.+ 32 Amayá huchallichiychikchu judiokunatapas, mana judio* kaqkunatapas nitaq Diospi iñiqkunatapas.+ 33 Ñuqapas tukuy imapim llapa runakunata kusichiyta munachkani, ñuqaqa manam kikiypa allinnillaytachu maskani aswanqa hukkunapa allinnintam,+ chaynapi paykuna salvakunankupaq.+