Jeremias
15 Jehova Diosmi niwarqa: “Moisesña utaq Samuelña kay runakunarayku hamuwaptinpas+ kay runakunataqa manam yanapaymanchu. Ñawpaqniymantayá qarquy, pasakuchunkuyá. 2 ‘Maymantaq risaqku’ nisuptikiqa niyá ‘Jehova Diosmi nin:
“¡Unquywan wañunanpaq kaqqa unquywanyá wañuchun!
¡Espadawan wañunanpaq kaqqa espadawanyá wañuchun!+
¡Yarqaymanta wañunanpaq kaqqa yarqaymantayá wañuchun!
¡Huklawman apasqa kananpaq kaqqa huklawmanyá apasqa kachun!”’, nispa.+
3 Jehova Diosmi nin: ‘Tawa ñakariykunatam* chayachimusqaykichik.+ Hinaptinmi espadawan wañuchisqa kankichik, allqukunam wañuptikichik pampanta aysasunkichik, alton pawaqkunam wañuptikichik mikusunkichik, purun animalkunam wañuptikichik tisapasunkichik.+ 4 Juda llaqtata kamachiq Ezequiaspa churin Manases Jerusalenpi tukuy imata ruwasqanraykum+ kay allpa pachapi llapallan nacionkuna imam pasasusqaykichikta qawaspa manchakunqaku.+
5 Jerusalen llaqta, ¿pitaq llakipayasunki?
¿Pitaq kuyapayasunki?
¿Pitaq qanman hamuykuspan “allinllachu” nisunki?’, nispa.
6 Jehova Diosmi nin: ‘Qamqa saqiruwankim’, nispa.+
Qipanchakuwasqaykiraykum castigaspay chinkachisqayki.+
Amiruniñam llakipayaytaqa.
7 Llaqtapa punkunpim hurkitawan wayrachisqaykichik.
Mana churiyuqtam saqisqaykichik.+
Runaykunatam chinkachisaq,
paykunaqa manam munankuchu mana allin ñanninku saqiytaqa.+
8 Lamar quchapa patanpi aqukunamanta aswan achkam viudakunaqa qipanqa.
Chawpi punchawtam wañuchiqta kachasaq, paykunamanmi kachasaq, mamakunamanmi kachasaq, musukunamanmi kachasaq.
Qunqayllamantam mana ima ruwakuytapas atinqakuchu, manchakuymantam kanqaku.
9 Qanchis wawayuq warmim desmayachkan,
manañam samatyaytapas atinchu.
Achkillaraq kachkaptinmi payqa tutayaypiña kachkan,
chayraykum pinqaypi kachkan, mana kaqpaqta hinam qawanku*’.
Jehova Diosmi nin: ‘Paykunamanta puchuqkunatapas chiqniqninkunapa makinmanmi churasaq,
hinaptinmi wañuchinqaku’, nispa.+
10 ¡Kuyay-mamalláy, imapaqraq wachakuwarqanki!+
Sapa kutim ñuqapa contraypi kanku, ñuqataqa llapa runakunam tukuyta niwan.
Ñuqaqa manam qurqanichu imatapas mañakuwaptinkuqa, manataqmi ñuqapas imatapas paykunamantaqa mañakurqanichu,
chaywanpas paykunaqa llapallanmi ñakawan.
11 Jehova Diosmi niwarqa: “Qamtaqa yanapasqaykipunim,
chiqnisuqnikikunapa makinpi kaptikiqa ñuqam qamta harkanaypaq sayarimusaqpuni,
chaytam ñuqaqa qamrayku ruwasaq sasachakuy punchawpi hinaspa ñakariy punchawpi.
12 ¿Yaqachu pipas norte law allpamanta kaq fierrota pakirunman?
¿Yaqachu pipas bronceta pakirunman?
13 Tukuy imaykitawan quri-qullqikitam mana imallapaq paykunapa makinman churasaq,+
chaytaqa ruwasaq llapallan allpaykikunapi huchata ruwasqaykiraykum.
14 Chiqnisuqnikichikkunapa makinmanmi churasqaykichik
mana riqsisqaykichik allpaman apasunaykichikpaq.+
Piñakuyniymi ruparusunaykichikpaqña kaq ninata hina ratarachin,
chaymi piñakuyniyqa ruparusunaykichikpaq hinaña kachkan”, nispa.+
15 Jehova Dioslláy, qamqa yachankiñam.
Amayá qunqaruwaychu, uyariykullawayá.
Chiqniqniykunatayá imatapas ruwaruy.+
Mana chaylla piñakuq kasqaykiraykuyá wañunaytaqa ama saqirullawaychu.
Dioslláy, qamrayku tukuy imata nichikusqaytaqa amayá qunqaruychu.+
16 Angelkunata kamachiq Jehova Dioslláy, nisqaykikunata uyarispaymi sunquypi waqaycharqani*,+
palabraykikunawanmi ancha-anchata kusikurqani, sunqullaypas tiyaykurqam,
ñuqaqa sutikimantam rimani.
17 Kusikuyllapi kaqkunawanqa manam hukllawakunichu, paykunawan kuskaqa manam kusikunichu.+
Makikipi kasqayraykum ñuqaqa mana piwanpas hukllawakunichu,
qamqa tuku-tukuyta willakunaypaqmi niykuwanki.+
18 ¿Imaynanpitaq nanayniyqa mana samanchu? ¿Imaynanpitaq unquyniyqa mana hampiy atina?
Manam allinyanichu.
¿Chaki pukyu* hinachu ñuqapaq kanki?
¿Mana hapipakunapaq hinachu ñuqapaq kanki?
19 Jehova Diosmi chayrayku nichkan:
“Kutirikamuwaptikiqa kaqmantam hatarichisqayki,
hinaptinmi ñawpaqniypi kanki.
Mana allin kaqmanta allin kaqta sapaqchaspaykiqa
ñuqamanta willakuqmi kanki.
Paykunaqa qanmanmi kutimunqaku,
qanmi ichaqa paykunamanqa mana kutinkichu”, nispa.
20 Jehova Diosmi nin: “Kay runakunapaqmi kanki broncemanta hatun muralla hina.+
Paykunaqa qanwanmi peleanqaku,
ichaqa manam vencesunkichu,+
ñuqaqa yanapanaypaqmi qanwan kachkani, chaymanta libranaypaqmi qanwan kachkani”, nispa.
21 “Mana allin runakunapa makinmantam librasqayki,
pasaypaq mana allin ruwaq runakunapa makinmantam librasqayki”.