2 Samuel

17 Aitofelmi Absalonta nirqa: “12.000 runakunata akllaruspayá Davidtawan runankunata kay tuta qatirusaq. 2 Pisipasqa hinaspa hukmanyasqa kachkaptinmi qunqaymanta mancharichisaq.+ Hinaptinmi llapallan runankuna ayqikuptin kamachiq Davidllataña wañurachisaq.+ 3 Chaymantam llapallan runakunata kutichimusqayki. Maskasqayki runa wañuruptinqa llapallan runakunam kutimunqaku. Hinaptinmi hawkayay kanqa”, nispa. 4 Aitofelpa chayna nisqanmi allin rikchakurqa Absalonpaq chaynataq Israelpi llapallan punta apaqkunapaqpas.

5 Chaywanpas Absalonqa nirqam: “Qayamuychik Arki kasta Husaita.+ Hinaspayá paypa imam nisqanta uyarisunchik”, nispa. 6 Chaymi Husaiqa Absalonpa kasqanman rirqa, hinaptinmi Absalon nirqa: “Aitofelmi kayta-wakta niwanku. ¿Kasunanchikchu nisqanta? Manachayqa qamyá niwayku imata ruwananchikpaq”, nispa. 7 Hinaptinmi Husaiqa Absalonta nirqa: “Aitofelpa kunan nisqanqa manam allinchu”, nispa.+

8 Husaiqa nirqaraqmi: “Qamqa allintam yachanki taytaykiwan runankunaqa kallpasapa kasqankuta.+ Paykunaqa uñanta wischuruq purun animal* hinam piñasqa kachkanku.+ Chaymantapas, taytaykiqa peleaq runam,+ manam runankunawan kuskaqa puñunmanchu. 9 Kunallanpas machaypich utaq chay-chaypich pakakuchkan.+ Sichum soldadoykikunata puntata David wañurachinqa, hinaptinqa chayta uyariqkunam ninqaku: ‘¡Absalonpa soldadonkunam wañurunku!’, nispanku. 10 Leon hina mana manchakuq+ qaripas manchakuymantam hukmanyarunqa. Llapallan Israel runakunam yachanku taytaykiqa kallpasapa kasqanta+ chaynataq runankunapas mana manchakuq kasqankuta. 11 Chaynaqa kaytam niki: Dan llaqtamanta Beer-seba llaqtakamayá+ Israel runakunata huñuruy lamar quchapa patanpi aquta hinaña,+ hinaspayá kikiki pusay peleanankupaq. 12 Pampaman sulla tiyachkaq hinam qunqaymanta chayarusunchik, hinaspam maypiña kaptinpas wañuchimusunchik. Manam Davidpas nitaq runankunapas lluptinqachu. Llapallankutam wañuchimusunchik. 13 May llaqtapi pakakuruptinpas Israel runam llapallanchik waskakunata apasunchik, hinaspam chaywan llaqtapa ruminkunatapas wayquman astarusunchik, manam chulla rumipas puchunqachu”, nispa.

14 Chaymi Absalonwan llapallan Israel runakuna nirqaku: “¡Aitofelpa nisqanmantapas aswan allinqa+ Arki kasta Husaipa nisqanmi!”, nispa. Chaynatam Jehova Diosqa Aitofelpa allin tantiasqanta yanqacharurqa,+ yanqacharurqaqa sasachakuyman Absalonta Jehova Dios churananpaqmi.+

15 Chaymantam Husaiqa sacerdote Sadocmanwan Abiatarman+ willarqa: “Absalonman hinaspa punta apaqkunamanmi kaynata-waknata Aitofel nirun. Ñuqañataqmi kayta-wakta nirqani. 16 Chaynaqa, Davidmanyá utqayman willachimuychik: ‘Amam kay tutaqa mayuta chimpana chunniqpiqa suyankichu. Mayutam chimpanayki, manachayqa qampas chaynataq llapallan runaykikunapas wañuchisqam kawaqchik’”, nispa.+

17 Jonatanwan+ Aimaazqa+ En-roguel+ pozo chaypim suyachkarqaku. Pipas mana rikurunanpaqmi Jerusalen llaqtamanqa mana yaykurqakuchu. Chaymi paykunamanqa huk warmi* willaykamurqa, hinaptinmi paykunañataq kamachiq Davidman willaq rirqaku. 18 Paykunatam huk musu rikururqa, hinaspam Absalonman willaykurqa. Chaymi Jonatanwan Aimaazqa utqayman rispanku Baurim llaqtapi+ huk runapa wasinman chayarurqaku. Hinaspankum chay runapa pationpi kaq pozopi pakakururqaku. 19 Chay runapa warminñataqmi pozopa hawanman telata mastaruspan kawsayta masarurqa. Manam pipas chaypi kasqankutaqa yacharqachu. 20 Absalonpa runankunam chay warmipa wasinman chayaruspanku nirqaku: “¿Maypitaq kachkan Aimaazwan Jonatan?”, nispa. Warmiñataqmi nirqa: “Mayu lawmanmi pasakunku”, nispan.+ Chay runakunañataqmi mana tarimuspanku Jerusalenman kutikamurqaku.

21 Absalonpa runankuna pasakuptinkum Aimaazwan Jonatanqa pozomanta lluqsiruspanku kamachiq Davidman willaq rirqaku. Nirqakum: “Aitofelmi qamkunata wañuchisunaykichikpaq kayta-wakta nirun. Chaynaqa, utqaymanyá mayuta chimpaychik”, nispa.+ 22 Chaymi Davidwan runankunaqa Jordan mayuta chimparqaku. Achikyaqpaqqa llapankuñam chimparurqaku.

23 Aitofelñataqmi nisqanta mana kasukuptinku asnonman sillakuykuspan llaqtanman ripukurqa.+ Chaymantam ayllunman tukuy imanta rakirurqa,+ hinaspanmi tiqukuruspan wañururqa.+ Paytaqa pamparurqaku ñawpaq abuelonkunapa pampakusqanpim.

24 Maanaim llaqtamanmi Davidqa pasarqa.+ Absalonñataqmi Israel runakunapiwan Jordan mayuta chimparurqaku. 25 Absalonmi soldadokunapa kamachiqnin Joabpa+ rantinpi Amasa+ sutiyuq runataña churarurqa. Amasapa taytanmi karqa Itra sutiyuq Israel runa. Mamanñataqmi karqa Naaspa churin Abigail.+ Abigailpa ñañanmi karqa Zeruya. Zeruyaqa karqa Joabpa mamanmi. 26 Absalonwan Israel runakunañataqmi Galaad lawpi samarurqaku.+

27 Davidmi Maanaim llaqtaman chayarurqa. Chaypi kachkaptinmi hamurqaku Sobi, Makir hinaspa Barzilai. Sobiqa karqa Ammon runakunapa Raba llaqtanpi+ yachaq* Naaspa churinmi. Makirñataqmi+ karqa Lo-debar llaqtayuq Amielpa churin. Barzilaiñataqmi+ karqa Galaad lawpi Roguelim llaqtamanta. 28 Sobi, Makir hinaspa Barzilaimi apamurqaku camakunata, tazonkunata hinaspa allpa mankakunata. Apamurqakutaqmi trigotapas, cebadatapas, harinatapas, habastapas, lentejatapas chaynataq hamkasqa kawsaykunatapas. 29 Chaymantapas apakurqakum mielta, lluklluta, quesota hinaspa ovejakunata. Tukuy chaykunataqa apamurqaku Davidwan runankuna mikunankupaqmi.+ Apamurqakuqa: “Kay chunniqpi runakunaqa mikuymanta, yakumanta hinaspa pisipasqam kachkanku”, nispankum.+