1 Cronicas
21 Satanasmi* Israel runakunapa contranpi churakunanpaq hatarirurqa, hinaspam Davidta kallpancharqa Israel runakuna hayka kasqanta yupananpaq.+ 2 Chaymi Davidqa Joabtawan+ llaqtapi kamachiqkunata nirqa: “Israel runakunatayá Beer-seba llaqtamanta Dan llaqtakama yuparamuychik,+ hinaspayá willamuwaychik hayka kasqanta”, nispa. 3 Joabñataqmi Davidta nirqa: “Jehova Diosyá runakunataqa 100 kuti mastaraq mirachichun. Kamachiqlláy, ¿manachu paykunaqa kanku qampa runaykikuna? ¿Imapaqtaq yupachiyta munachkanki? ¿Israel runakunata huchallichinaykipaq?”, nispa.
4 Chaywanpas kamachiq Davidqa manam uyariyta munarqachu Joabpa nisqantaqa. Chaymi Joabqa Israelpi puriramuspan Jerusalen llaqtaman kutimurqa.+ 5 Hinaspanmi Joabqa kamachiq Davidman willarqa hayka runakuna kasqanta. Israelpi lliw ayllumantam karqaku 1.100.000 soldadokuna espadayuqkama. Juda ayllumantañataqmi karqa 470.000 soldadokuna espadayuqkama.+ 6 Leviy ayllutawan Benjamin ayllutam ichaqa mana yuparqachu,+ kamachiq Davidpa nisqan Joabpaq mana allin rikchakusqanrayku.+
7 Davidpa yupachisqanqa manam allinchu karqa Diospaqqa, chaymi Israel runakunata castigarqa. 8 Hinaptinmi Davidqa Diosta nirqa: “Kay ruwasqaywanmi llumpayta huchallikuruni.+ Dioslláy, huchaymantayá pampachaykullaway,+ mana umayuq hinam ruwarullani”, nispa.+ 9 Davidpa runan Gadmi karqa musquypi hina* qawaq. Paytam Jehova Dios rimapayarqa:+ 10 “Davidtayá nimuy: ‘Jehova Diosmi nin: “Kimsamantayá mayqintapas akllakuy”’”, nispa. 11 Hinaptinmi Gadqa Davidta nimurqa: “Jehova Diosmi nin: ‘Mayqantataq akllakunki, 12 kimsa wata muchuy* kanantachu,+ chiqnisuqnikikuna peleaspa kimsa killa munaychakusunaykitachu,+ icha kimsa punchaw unquywan Jehova Diospa castigasqan kaytachu.+ Unquywanmi Jehova Diospa angelnin Israel nacionpi runakunata wañuchinqa’, nispa.+ Chaynaqa, allinta tantiaspaykiyá niway kamachimuwaqniyman willamunaypaq”, nispa. 13 Hinaptinmi Davidqa Gadta nirqa: “Kayqa llumpay llakikuypaqmi, Jehova Diospa makinman wichiymi aswan allinqa runakunapa makinman wichiymantaqa,+ Diosqa ancha llakipayakuqmi”, nispa.+
14 Hinaptinmi Jehova Diosqa Israel runakunata unquywan hapirachirqa.+ Chay unquywanmi 70.000 runakuna wañururqa.+ 15 Chaymantapas, Diosqa angelnintam kamachirqa Jerusalen llaqtata chinkarachinanpaq. Ichaqa chinkachinanpaq kachkaptinmi Jehova Diosqa runakunamanta llakipayarikuspan+ chay wañuchiq angelta nirqa: “¡Chayllataña!+ Amaña makikita haywarayayñachu”, nispa. Jehova Diospa angelninqa Ornan sutiyuq runapa iranpa hichpanpim kachkarqa.+ Ornanqa karqa Jebus runam.+
16 Davidqa hanaq pachata qawarispanmi rikururqa Jehova Diospa angelninta Jerusalen llaqta lawman espadanwan haywarayachkaqta.+ Chaymi Davidwan punta apaqkunaqa qachqa pachayuqkama+ qunqurakuykuspanku kumuykurqaku.+ 17 Davidmi Diosta nirqa: “¿Manachu ñuqa kamachirqani runakuna yupasqa kanankupaqqa? Ñuqam huchallikurullani. Ñuqam pantarullani.+ Kay runakunaqa*, ¿imatataq ruwarunku? Jehova Dioslláy, ñuqatawan taytaypa ayllunkunatayá castigawaykuqa, amayá runaykikunataqa castigaychu”, nispa.+
18 Chaymantam Jehova Diospa angelninqa Gadta+ kamachirqa Davidman rinanpaq. Chaynapi Ornanpa iranman David rispan Jehova Diospaq altarta pirqapamunanpaq.+ 19 Chaymi Davidqa Jehova Diospa sutinpi Gadpa nisqanman hina iraman rirqa. 20 Ornanqa trigotam irakuchkarqa. Payqa muyuriykuspanmi angelta rikururqa, tawan churinkunañataqmi pakakururqaku. 21 Ornanpa kasqanman David chayaruptinmi Ornanqa rikuramuspan iramanta lluqsiykamurqa, hinaspanmi Davidpa ñawpaqninpi qunqurakuykuspan kumuykurqa. 22 Hinaptinmi Davidqa Ornanta nirqa: “Jehova Diospaq altarta ruwanaypaqyá irayuq chakraykita rantikuruway*, chaynapi unquy chinkananpaq. Haykam mañawasqaykitam pagasqayki”, nispa.+ 23 Ornanñataqmi Davidta nirqa: “Kamachiqlláy, kayqaya iraqa tantiasqaykita ruwanaykipaq. Kayqaya torokunapas nakaspa Diospaq kañapunaykipaq, trillana kullupas+ yantapaq chaynataq trigopas ofrendapaq. Lliwtam quyki”, nispa.
24 Kamachiq Davidñataqmi Ornanta nirqa: “Amayá quyllaqa-quwaychu, rantisqaykim. Manam Jehova Diosniypaqqa kañapuymanchu mana qullqiypa chanintaqa”, nispa.+ 25 Chaymi Davidqa yaqa qanchis kilo* qurita chakramanta quykurqa. 26 Chaypim Davidqa Jehova Diospaq altarta ruwapurqa+ hinaspam animalta nakaspan kañapurqa. Nakapurqataqmi Dioswan hawkalla kasqanrayku sapaq animalkunatapas. Hinaspam Jehova Diosta mañakurqa, hinaptinmi Diosñataq uyariykuspan altarpa hawanman hanaq pachamanta ninata kachaykamurqa.+ 27 Chaymantam Jehova Diosqa angelta+ kamachirqa espadanta maymi kasqanman kutiykachinanpaq. 28 Davidqa Ornanpa iranpi mañakusqanta Jehova Dios uyariykuptinmi hinalla chaypi kañapurqa. 29 Chunniqpi Moisespa ruwachisqan Jehova Diospa carpanqa Gabaon muqupim chay punchawkunapiqa kachkarqa, chaypitaqmi kachkarqa altarpas.+ 30 Davidqa manam chay Gabaon muqutaqa rirqachu Diosta tapuqqa, manchakurqam Jehova Diospa angelnin wañurachinanmanta.