1 Cronicas

20 Joabmi+ achkallaña soldadokunapiwan Ammon runakunapa allpanman yaykururqa. Chayqa karqa wata qallariytam* utaq kamachiqkuna peleaq lluqsinanku punchawkunapim. Joabqa Raba llaqtatam chawpicharurqa,+ Davidñataqmi Jerusalenllapi qiparqa.+ Joabqa Raba llaqtata yaykuruspanmi tuñiparachirqa.+ 2 Chaymantam Davidqa Malcam taytachapa umanpi coronata hurqururqa. Chay coronaqa karqa 34 kilo masnin* quripa llasayninmi hinaspa sumaq llipipipiq rumiyuqkunam. Chay coronatam Davidpa umanman churarqaku. Davidqa apakurqataqmi chay llaqtapa tukuy imantapas.+ 3 Chaymantapas Davidqa chay llaqtapi runakunatam pusakurqa rumi kuchuypi llamkachinanpaq,+ hachakunawan hinaspa fierromanta herramientakunawan llamkachinanpaq. Chaynatam munaychakurqa Ammon runakunapa llapallan llaqtanta. Chaymantam Davidqa llapallan soldadonkunapiwan Jerusalenman kutirqaku.

4 Chaymanta qipatam kaqmanta Filistea runakunaqa Israel runakunawan Guezer lawpi pelearqaku. Hinaptinmi Israel runakuna munaychakururqaku. Chaypim Sipaita wañurachirqa Husa llaqtayuq Sibecai.+ Sipaiqa karqa Refaim runakunapa mirayninmi.+

5 Kaqmantam pelearqaku. Chaypim Jairpa churin Elanan wañurachirqa Goliatpa wawqin+ Lamita. Goliatqa karqa Gat llaqtayuqmi. Lamipa lanzanqa karqa telarpa qirun hinam.+

6 Kaqmantam pelearqaku Gat llaqtapiña.+ Chay llaqtapim karqa hatunkaray runa.+ Paypa makinkunam karqa suqta dedoyuqkama, chaynallataqmi chakinkunapas karqa. Llapan dedonkunam karqa 24. Chay runapas karqa Refaim runakunapa mirayninmi.+ 7 Chay hatunkaray runaqa Israel runakunamantam asikuq,+ chaymi Simeapa+ churin Jonatan wañurachirqa. Simeaqa karqa Davidpa wawqinmi.

8 Chay runakunam karqaku Refaim runakunapa mirayninkuna.+ Paykunaqa Gat llaqtapim+ yacharqaku. Paykunatam Davidwan runankuna wañurachirqaku.