1 Samuel
24 Filistea runakunawan peleasqanmanta Saul kutiramuptinmi willaykurqaku: “Davidqa En-guedi chunniqpim kachkan”, nispa.+
2 Chaymi Saulqa Israel runakunamanta 3.000 allin peleaq soldadokunawan Davidta hinaspa runankunata maskaq rirqa. Maskarqakuqa purun cabrakunapa purinan qaqakunapim. 3 Hinaspam Saulqa richkaspan chayarurqa rumiwan pirqasqa ovejakunapa kanchanman. Chaypim karqa huk machay, chaymanmi Saulqa ispakuq yaykururqa. Davidwan runankunañataqmi chay machaypa uku kuchunpiraq tiyachkarqaku.+ 4 Davidtam runankuna nirqaku: “Jehova Diosmi chiqnisuqniki runata makikiman churaykun,+ munasqaykitayá ruwaruy”, nispa. Chaymi Davidqa Saulpa pachanpa patanta kuchururqa mana musyachikuspalla. 5 Chay pachanpa patanta kuchusqanmantam Davidqa hukmanyasqa tarikurqa.+ 6 Chaymi Davidqa runankunata nirqa: “Jehova Diospaqqa manamá allinchu kay ruwasqayqa, Saulqa Jehova Diospa akllasqan runam. Manamá Jehova Diosqa munanmanchu akllasqan runata imatapas ruwanaytaqa”, nispa.+ 7 Chaynata nispanmi Davidqa runankunata harkarurqa Saulta wañurachinankumanta. Saulñataqmi machaymanta lluqsiruspan pasakurqa.
8 Chaymantam Davidqa machaymanta lluqsiruspan Saulta qayarqa: “¡Kamachiqlláy Saul!”, nispa.+ Qipanta Saul qawarimuptinmi Davidqa qunqurakuykuspa pampakama kumuykurqa. 9 Hinaspam Saulta nirqa: “¿Imanasqataq kasunki ‘Davidqa chiqnisunkim’ nisuqniki runakunataqa?+ 10 Qawasqaykiman hinam Jehova Diosqa machaypi kachkaptiy qamtaqa makiyman churaykuwarqa. Wañurachiy niwachkaptinkum+ qamta llakipayaspay nirqani: ‘Manam paytaqa wañuchiymanchu, payqa Jehova Diospa akllasqan runam’, nispay.+ 11 Taytáy, qaway pachaykipa patan kuchusqayta. Kuchuchkaspayqa wañurachikimanmi karqa. Kunanqa sumaqtam yachanki mana wañurachiy munasqayta hinaspa mana qipanchasqayta. Ñuqaqa manam imanarqaykichu,+ qanmi ichaqa wañuchiwanaykipaq qatikachawachkanki.+ 12 Jehova Diosyá juezninchik kachun.+ Ñuqaqa manam ima mana allintapas ruwayta munaykichu.+ Jehova Diosyá imatapas ruwasunki ñakarichiwasqaykimanta.+ 13 Ñawpaqmantaraqmi kan kayna rimay: ‘Mana allin runakunaqa mana allintam ruwan’, niq. Chaymi ñuqaqa mana imatapas ruwasqaykichu. 14 Chaynaqa kamachiqlláy, ¿pita maskaqtaq hamurqanki? ¿Pitataq qatikachachkanki? Ñuqaqa kani wañusqa allqu hinallam hinaspa piki hinallam.+ 15 Jehova Diosyá juezninchik kaspa tantiasqanman hina ruwachun.+ Payqa tantiasqanman hina ruwaspanmi qanmanta libraykuwanqa”, nispa.
16 David rimayta tukuruptinmi Saulqa nirqa: “¿Churilláy Davidchu kachkanki?”, nispa.+ Hinaspanmi Saulqa waqakuyta qallaykurqa. 17 Chaymantam Davidta nirqa: “Qamqa ñuqamantapas aswan allin ruwaqmi kanki, qamqa manam ima mana allintapas ruwawarqankichu. Ñuqam ichaqa mana allinta ruwaruyki.+ 18 Kunanmi yacharuni llakipayaykuwasqaykita, qamqa manam wañuchiwarqankichu makikiman Jehova Dios churaykuwachkaptinpas.+ 19 ¿Pitaq chiqniqnin runata tarichkaspan mana imananmanchu? Jehova Diosyá llakipayawasqaykimanta yanapasunki.+ 20 Kunanqa allintapunim yachani Israel runakunapa kamachiqnin kanaykita+ chaynataq unay kamachinaykitapas. 21 Kunanyá Jehova Diospa sutinpi niykuway+ wañukuptiy mirayniykunata ama wañuchinaykipaq. Niwaytaqyá taytaypa ayllunmanta sutiyta ama chinkachinaykipaqpas”, nispa.+ 22 Chaymi Davidqa jurarqa, hinaptinmi Saulqa wasinman kutikurqa,+ Davidñataqmi runankunawan pakakuq pasakurqa.+