2 Corintios
11 Ñuqaqa munaymanmi wakinpi mana yuyayniyuq kasqayta ama amirunaykichikta, ichaqa ñam aguantawachkankichikña kanpas. 2 Imaynam Dios anchata kuyasunkichik chaynam ñuqapas qamkunata kuyaykichik, ñuqaqa kikiypunim nirqaykichik Cristowan* casarakunaykichikpaq, paymanmi riqsichisqaykichik manaraq qariwan puñuq sipasta hina.+ 3 Imaynam culebra sakri* kaspan Evata pantarachirqa,+ chaynata qamkunapa yuyaynikichikta pipas pantarachinanmantam manchakuchkani, hinaptinmi manaña chuya sunquchu chaynataq chiqap rimaqñachu kawaqchik. Cristopa runanqa chuya sunqu hinaspa chiqap rimaqmi kanan.+ 4 Qamkunaqa chaskinkichikmi mana ñuqaykupa willasqayku huk Jesusmanta pipas willasuqnikichiktaqa, hinaspapas sapaq pensamientowanmi qamkunaqa aysachikuchkankichik, chayqa manam chaskisqaykichik pensamiento hinachu,+ chaskinkichiktaqmi yachasqaykichik sumaq willakuymanta hukta willasuptikichikpas. 5 Ñuqaqa manam ni imapipas menoschu kani chay allinpaq hapikuq apostolnikichikkunamantaqa.+ 6 Allin rimakuyta mana atispaypas yachayniyuqmi kani,+ chaytaqa tukuy imapimá allinta qawachirqaykichik.
7 Ñuqaqa kusikuywanmi Diosmanta sumaq willakuyta qamkunaman mana imallapaq willarqaykichik, humillakurqanim hatunchasqa kanaykichikpaq, ¿huchallikurunichu chayna ruwasqaywan?+ 8 Qamkunata yanapanaypaqmi suwakuchkaymanpas hina wakin iñiqmasinchikkunapa yanapakuyninta chaskirqani.+ 9 Qamkunawan kaptiy imaypas pisipuwaptinmi ichaqa mayqannikichiktapas umaykichiqta mana nanachirqanichu Macedoniamanta hamuq iñiqkuna pisipuwaqniykunata achkanpi quykuwasqanrayku.+ Tukuy atisqaytam ruwarqani qamkunata mana sasachanaypaq, chaytaqa hinallamá ruwasaq.+ 10 Ñuqaqa Cristo hinam chiqapmanta rimani, chaynapim kay alabakusqaymantaqa Acaya lawpipas mana upallasaqchu.+ 11 ¿Imanasqam chaytaqa ruwarqani? ¿Qamkunata mana kuyasqayraykuchu? Diosqa yachanmi qamkuna kuyasqaytaqa.
12 Kachkanmi alabakuq runakuna, paykunam ninku ñuqayku hina kasqankuta*. Chayraykum ruwasqaytaqa hinalla ruwasaq+ paykunata upallachinaypaq, chaynapi manaña alabakunankupaq. 13 Paykunaqa kanku llulla apostolkunam, hukkunatam pantachinku, chaymantapas Cristopa apostolnin kachkanmankupas hinaraqmi kanku.+ 14 Satanasqa kancharichkaq angelman rikchakunanpaqmi tukuyta ruwachkan, chayqa manamá admirakunapaqchu.+ 15 Chaynaqa, manataqmi admirakunapaqchu satanaspa serviqninkunapa allin serviqkunaman rikchakunankupaq tukuyta ruwasqankupas, ichaqa ruwasqankuman hinam mana allinpi tukunqaku.+
16 Kaqmantam nikichik: Amayá pipas nichunchu mana yuyayniyuq kasqaytaqa. Chayna kasqayta nispaykichikpas mana yuyayniyuqta hinayá chaskiykuwaychik, chaynapi tumpallatapas alabakunaypaq. 17 Kaytaqa rimachkani manam señorta qatipakuq runa hinachu, aswanqa kikillanpi hapipakuq hinaspa alabakuq mana yuyayniyuq runa hinam. 18 Achkallaña runakunam kay pachapi kaqkunamanta alabakuchkanku, hinaptinqa ñuqapas alabakusaqyá. 19 Qamkunaqa yachayniyuq kasqaykichikpaq hapikuspaykichikmi mana yuyayniyuq runakunata sumaqllataña aguantachkankichik. 20 Qamkunaqa aguantankichik llamkachikusuqnikichik runakunatam, imaykichiktapas dueñochakuqkunatam hinaspa tukuy imaykichikta qichusuqnikichikkunatam, aguantankichiktaqmi qamkunamanta aswan allinpaq hapikuq runakunatapas chaynataq uyaykichikpi laqichusuqnikichik runakunatapas.
21 Pinqaypaqmi kaykuna nisqayqa, wakiqnikichikqa manchakuq kasqaykutaraqmi piensankichik kamachiq kasqaykuman hina mana ruwanaykuta piensaspa.
Sichu wakin runakuna mana pinqakuspa imatapas ruwasqankumanta alabakunku, hinaptinqa ñuqapas runakunapaq mana yuyayniyuq kachkaspaypas mana pinqakuspaymi alabakusaq. 22 Paykunaqa, ¿Hebreo kastachu kanku? Ñuqapas Hebreo kastam kani.+ ¿Israel kastachu kanku? Ñuqapas Israel kastam kani. ¿Abrahanpa mirayninchu kanku? Ñuqapas Abrahanpa mirayninmi kani.+ 23 ¿Cristopa serviqninchu kanku? Loco hinaraqmi nikichik: Ñuqaqa paykunamanta aswanraqmi Cristopa serviqnin kani. Ñuqaqa aswanraqmi llamkarqani,+ paykunamantaqa aswan achka kutitam carcelpipas karqani,+ achka kutitaqmi maqasqapas karqani, achka kutitaqmi wañuypa patanpipas tarikurqani.+ 24 Pichqa kutitam judiokuna waqtapawarqa 39 kutikama.+ 25 Kimsa kutitam kaspiwan waqtapasqa karqani,+ huk kutitam rumiwan chuqapasqa karqani,+ botepas kimsa kutitam viajachkaptiy yakuman chinkaykurqa,+ huk punchaw huk tutanñataqmi lamar qucha ukupi karqani, 26 achka kutitam viajarqani, hinaspam hatun sasachakuykunapi* karqani suwakunamanta, kastaykunamanta+ hinaspa huklaw nacionniyuqkunamanta.+ Hatun sasachakuypitaqmi karqani mayukunapipas, llaqtakunapipas,+ chunniqkunapipas, lamar quchapipas chaynataq wawqi-paninchiktukuqkunamantapas. 27 Anchatam llamkarqani, anchatam kallpanchakurqani, achka kutipim mana puñusqa karqani,+ yarqaymantawan yakumantam karqani,+ achka kutipitaqmi mana mikusqa karqani, chiripi hinaspa pachaymantapas ususqam karqani.+
28 Tukuy kaykuna pasawachkaptinpas sapa punchawmi maypipas huñunakuq llapallan iñiqmasinchikkunamanta llakipa intusqan* kachkani.+ 29 Ñuqaqa llakikunim yanapana kaqkunamanta*, chaynallataqmi sunquypipas rabiawan kani pipas hukkunata Diosmanta karunchaptin*.
30 Alabakunay kaptinqa mana kallpayuq kasqaymantam alabakusaq. 31 Señor Jesuspa taytan wiñaypaq hatunchana Diosmi mana llullakusqaytaqa yachan. 32 Aretas sutiyuq kamachiqta serviq gobernadormi Damasco llaqtapi presochawananpaq chay llaqtata cuidachirqa, 33 ichaqa chay llaqtapa murallanpa+ ventanantam canastapi uraykachiwarqaku, hinaptinmi gobernadorpa makinmanta lluptikurqani.