NUMEROS

1 Egipto nacionmanta Israelpa mirayninkuna lluqsimusqankumanta iskay kaq watapim Jehova Diosqa Moisesta Sinai chunniqpi rimapayarqa,+ rimapayarqaqa carpanpim+ iskay kaq killapa punta kaq punchawninpi. Nirqam: 2 “Israelpa mirayninkuna pikuna hinaspa hayka kasqankutayá yupaspa listaychik.+ Qarikunata yupaspam listankichik pi abuelonku kasqanman hina hinaspa ayllukunapi kamachiqkunaman hina. 3 Chaytaqa tropa-tropata yupaspam Aaronwan kuska listanki 20 watankumanta hanayman,+ paykunaqa Israelpa mirayninkunapaq allin peleaqkunam kananku.

4 Sapa ayllumantam kamachiq huk runa+ yanapasunkichik. 5 Chay yanapasuqnikichik kamachiqkunaqa kaykunam: Ruben ayllumantam kanqa Sedeurpa churin Elizur,+ 6 Simeon ayllumantam kanqa Zurisadaipa churin Selumiel,+ 7 Juda ayllumantam kanqa Aminadabpa churin Nason,+ 8 Isacar ayllumantam kanqa Zuarpa churin Natanael,+ 9 Zabulon ayllunmantam kanqa Helonpa churin Eliab,+ 10 Joseypa churin Efrain+ ayllumantam kanqa Amiudpa churin Elisama, Joseypa huknin churin Manases ayllumantañataqmi kanqa Pedazurpa churin Gamaliel, 11 Benjamin ayllumantam kanqa Guideonipa churin Abidan,+ 12 Dan ayllumantam kanqa Amisadaipa churin Ayezer,+ 13 Aser ayllumantam kanqa Ocranpa churin Paguiel,+ 14 Gad ayllumantam kanqa Deuelpa churin Eliasaf,+ 15 Neftaliy ayllumantañataqmi kanqa Enanpa churin Aira.+ 16 Paykunam yanapasunaykichikpaq sapa ayllumanta akllasqakuna. Paykunaqa kanku ayllunkupi waranqantin runakunata kamachiqkunam”,+ nispa.

17 Hinaptinmi Moiseswan Aaronqa Diospa akllasqan runakunata qayachimurqaku. 18 Chaymantam iskay kaq killapa punta kaq punchawninpi lliw runakunata huñurqaku, huñurqakuqa 20 watayuqmanta hanayman+ qarikunata yupaspa listanankupaqmi. Chay qarikunaqa karqa sutinkuman hina, abuelonkuman hina hinaspa ayllukunapi kamachiqkunaman hinam. 19 Chaytaqa Jehova Diospa kamachisqanman hinam ruwarqaku. Chaynatam Moisesqa runakuna pikuna hinaspa hayka kasqankuta Sinai chunniqpi listarqa.+

20 Israelpa piwi* churin Rubenpa+ mirayninmantam listarqaku sutinkuman hina, abuelonkuman hina hinaspa ayllukunapi kamachiqkunaman hina. Peleay atiq sapa qarikunatam yuparqaku 20 watayuqmanta hanayman. 21 Hinaptinmi Ruben ayllumanta yupasqanku qarikuna karqa 46.500.

22 Simeonpa mirayninmantam+ listarqaku sutinkuman hina, abuelonkuman hina hinaspa ayllukunapi kamachiqkunaman hina. Peleay atiq sapa qarikunatam yuparqaku 20 watayuqmanta hanayman. 23 Hinaptinmi Simeon ayllumanta yupasqanku qarikunaqa karqa 59.300.

24 Gadpa mirayninmantam+ listarqaku sutinkuman hina, abuelonkuman hina hinaspa ayllukunapi kamachiqkunaman hina. Peleay atiq sapa qarikunatam yuparqaku 20 watayuqmanta hanayman. 25 Hinaptinmi Gad ayllumanta yupasqanku qarikunaqa karqa 45.650.

26 Judapa mirayninmantam+ listarqaku sutinkuman hina, abuelonkuman hina hinaspa ayllukunapi kamachiqkunaman hina. Peleay atiq sapa qarikunatam yuparqaku 20 watayuqmanta hanayman. 27 Hinaptinmi Juda ayllumanta yupasqanku qarikunaqa karqa 74.600.

28 Isacarpa mirayninmantam+ listarqaku sutinkuman hina, abuelonkuman hina hinaspa ayllukunapi kamachiqkunaman hina. Peleay atiq sapa qarikunatam yuparqaku 20 watayuqmanta hanayman. 29 Hinaptinmi Isacar ayllumanta yupasqanku qarikunaqa karqa 54.400.

30 Zabulonpa mirayninmantam+ listarqaku sutinkuman hina, abuelonkuman hina hinaspa ayllukunapi kamachiqkunaman hina. Peleay atiq sapa qarikunatam yuparqaku 20 watayuqmanta hanayman. 31 Hinaptinmi Zabulon ayllumanta yupasqanku qarikunaqa karqa 57.400.

32 Joseypa churin Efrainpa mirayninmantam+ listarqaku sutinkuman hina, abuelonkuman hina hinaspa ayllukunapi kamachiqkunaman hina. Peleay atiq sapa qarikunatam yuparqaku 20 watayuqmanta hanayman. 33 Hinaptinmi Efrain ayllumanta yupasqanku qarikunaqa karqa 40.500.

34 Joseypa huknin churin Manasespa mirayninmantam+ listarqaku sutinkuman hina, abuelonkuman hina hinaspa ayllukunapi kamachiqkunaman hina. Peleay atiq sapa qarikunatam yuparqaku 20 watayuqmanta hanayman. 35 Hinaptinmi Manases ayllumanta yupasqanku qarikunaqa karqa 32.200.

36 Benjaminpa mirayninmantam+ listarqaku sutinkuman hina, abuelonkuman hina hinaspa ayllukunapi kamachiqkunaman hina. Peleay atiq sapa qarikunatam yuparqaku 20 watayuqmanta hanayman. 37 Hinaptinmi Benjamin ayllumanta yupasqanku qarikunaqa karqa 35.400.

38 Danpa mirayninmantam+ listarqaku sutinkuman hina, abuelonkuman hina hinaspa ayllukunapi kamachiqkunaman hina. Peleay atiq sapa qarikunatam yuparqaku 20 watayuqmanta hanayman. 39 Hinaptinmi Dan ayllumanta yupasqanku qarikunaqa karqa 62.700.

40 Aserpa mirayninmantam+ listarqaku sutinkuman hina, abuelonkuman hina hinaspa ayllukunapi kamachiqkunaman hina. Peleay atiq sapa qarikunatam yuparqaku 20 watayuqmanta hanayman. 41 Hinaptinmi Aser ayllumanta yupasqanku qarikunaqa karqa 41.500.

42 Neftaliypa mirayninmantam+ listarqaku sutinkuman hina, abuelonkuman hina hinaspa ayllukunapi kamachiqkunaman hina. Peleay atiq sapa qarikunatam yuparqaku 20 watayuqmanta hanayman. 43 Hinaptinmi Neftaliy ayllumanta yupasqanku qarikunaqa karqa 53.400.

44 Paykunam karqaku Moisespa, Aaronpa hinaspa Israelpa mirayninmanta 12 kamachiqkunapa yupaspa listasqanku qarikuna, chay 12 runakunaqa karqaku ayllunkupi kamachiqkunam. 45 20 watayuqmanta hanayman peleay atiq qarikunaqa karqa ayllukunapi kamachiqkunaman hinam, 46 hinaptinmi llapallan qarikuna karqa 603.550.+

47 Leviy ayllum ichaqa+ mana wakin ayllukunawan kuskachu yupasqa karqa.+ 48 Jehova Diosqa Moisestam nirqa: 49 “Leviy ayllullatam amaqa yupankichu, paykunataqa amam Israelpa wakin mirayninkunata hinaqa yupankichu.+ 50 Aswanqa paykunatam churanki kamachikuyniykunata waqaychana carpayta* qawanankupaq,+ qawanankutaqmi chaypi servichikunapaq kaqkunatapas hinaspa tukuy imatapas.+ Chaymantapas paykunam carpayta tukuy imantinta apananku,+ hinaspapas carpaypim yanapakunanku+ hinaspa muyuriqninpi samananku.+ 51 Leviy ayllumanta kaqkunam astakuptikichikpas carpaytaqa paskananku,+ hina paykunataqmi sayachinankupas. Pipas mana kamachisqa kachkaspan* carpayman asuykuqqa wañuchisqam kanan.+

52 Israelpa mirayninkunaqa carpankutam sayachinanku maymi tupasqanpi. Sapa kimsa ayllukunam+ tropa-tropa rakisqa kananku, chaymi sapa runa carpanta sayachinan maymi tupasqanpi. 53 Leviy aylluqa kamachikuyniykunata waqaychana carpaypa muyuriqninpim carpankuta sayachinanku, chaynapi Israelpa mirayninkunapaq mana piñakunaypaq.+ Leviy ayllumá kamachikuyniykunata waqaychana carpaypi imapas kaqkunataqa qawananku”,+ nispa.

54 Hinaptinmi Israelpa mirayninkunaqa Moisesta Jehova Diospa kamachisqanman hina ruwarqaku.

2 Chaymantam Jehova Diosqa Moisestawan Aaronta nirqa: 2 “Israelpa mirayninkunaqa carpankutam sayachinanku maymi tupasqanpi, paykunaqa kananku ayllunkupi kamachiqkunapa señalninkupa* kasqanpim. Israelpa mirayninkunaqa carpaypa sapa lawninpim kimsa ayllupi rakinasqa kananku.+ Sapa runam carpankutaqa sayachinanku carpay lawman qawaqta, chaynatam sayachinanku carpaypa muyuriqninpi.

3 Intipa qispimunan lawpi utaq carpaypa punkun lawpi kaq ayllukunamantam Juda ayllu umalliq kanqa, chaylawpim kimsa ayllukuna carpankuta sayachinqaku. Juda ayllupi kamachiqqa Aminadabpa churin Nasonmi.+ 4 Juda ayllumantam peleaq rinankupaq yupasqa karqaku 74.600 qarikuna.+ 5 Juda ayllupa waqtanpim carpankuta sayachinqaku Isacar ayllu. Isacar ayllupi kamachiqqa Zuarpa churin Natanaelmi.+ 6 Isacar ayllumantam peleaq rinankupaq yupasqa karqaku 54.400 qarikuna.+ 7 Juda ayllupa huknin waqtanpiñataqmi carpanta sayachinqa Zabulon ayllu. Zabulon ayllupi kamachiqqa Helonpa churin Eliabmi.+ 8 Zabulon ayllumantam peleaq rinankupaq yupasqa karqaku 57.400 qarikuna.+

9 Juda aylluwan samaq ayllukunapi peleaq lliw qarikunam karqa 186.400. Paykunam lluqsinankupaq puntata carpankuta paskananku.+

10 Carpaypa alliq* lawninpi* kaq ayllukunamantam Ruben ayllu+ umalliq kanqa, chaylawpim kimsa ayllukuna carpankuta sayachinqaku. Ruben ayllupi kamachiqqa Sedeurpa churin Elizurmi.+ 11 Ruben ayllumantam peleaq rinankupaq yupasqa karqaku 46.500 qarikuna.+ 12 Ruben ayllupa waqtanpim carpanta sayachinqa Simeon ayllu. Simeon ayllupi kamachiqqa Zurisadaipa churin Selumielmi.+ 13 Simeon ayllumantam peleaq rinankupaq yupasqa karqaku 59.300 qarikuna.+ 14 Ruben ayllupa huknin waqtanpiñataqmi carpanta sayachinqa Gad ayllu. Gad ayllupi kamachiqqa Reuelpa churin Eliasafmi.+ 15 Gad ayllumantam peleaq rinankupaq yupasqa karqaku 45.650 qarikuna.+

16 Ruben aylluwan samaq ayllukunapi peleaq lliw qarikunam karqa 151.450. Paykunam carpankuta paskananku Juda ayllupa qipanta lluqsinankupaq.+

17 Carpayta+ astanaykichik kaptinqa Leviy ayllukunam wakin ayllukunapa chawpinta rinan.

Israelpa miraynin ayllukunaqa maypi samasqankuman hinam rinanku,+ sapa ayllum rinan rakinasqa kimsa ayllukunapa maypi kasqankuman hina.

18 Inti siqaykunan lawpi utaq carpaypa qipan lawpi kaq ayllukunamantam Efrain ayllu umalliq kanqa, chaylawpim kimsa ayllukuna carpankuta sayachinqaku. Efrain ayllupi kamachiqqa Amiudpa churin Elisamam.+ 19 Efrain ayllumantam peleaq rinankupaq yupasqa karqaku 40.500 qarikuna.+ 20 Efrain ayllupa waqtanpim carpanta sayachinqa Manases ayllu.+ Manases ayllupi kamachiqqa Pedazurpa churin Gamalielmi.+ 21 Manases ayllumantam peleaq rinankupaq yupasqa karqaku 32.200 qarikuna.+ 22 Efrain ayllupa huknin waqtanpiñataqmi carpanta sayachinqa Benjamin ayllu. Benjamin ayllupi kamachiqqa Guideonipa churin Abidanmi.+ 23 Benjamin ayllumantam peleaq rinankupaq yupasqa karqaku 35.400 qarikuna.+

24 Efrain aylluwan samaq ayllukunapi peleaq lliw qarikunam karqa 108.100. Paykunam carpankuta paskananku Ruben ayllupa qipanta lluqsinankupaq.+

25 Carpaypa ichuq* lawninpi* kaq ayllukunamantam Dan ayllu umalliq kanqa, chaylawpim kimsa ayllukuna carpankuta sayachinqaku. Dan ayllupi kamachiqqa Amisadaipa churin Ayezermi.+ 26 Dan ayllumantam peleaq rinankupaq yupasqa karqaku 62.700 qarikuna.+ 27 Dan ayllupa waqtanpim carpanta sayachinqa Aser ayllu. Aser ayllupi kamachiqqa Ocranpa churin Paguielmi.+ 28 Aser ayllumantam peleaq rinankupaq yupasqa karqaku 41.500 qarikuna.+ 29 Dan ayllupa huknin waqtanpiñataqmi carpanta sayachinqa Neftaliy ayllu. Neftaliy ayllupi kamachiqqa Enanpa churin Airam.+ 30 Neftaliy ayllumantam peleaq rinankupaq yupasqa karqaku 53.400 qarikuna.+

31 Dan aylluwan samaq ayllukunapi peleaq lliw qarikunam karqa 157.600. Paykunam carpankuta paskananku lliw ayllukunapa qipantaña lluqsinankupaq”,+ nispa.

32 Paykunam Israelpa mirayninmanta yupasqa karqaku ayllunkupi kamachiqkunaman hina, chaymi llapallan ayllumanta peleaq rinankupaq yupasqa karqaku 603.550 qarikuna.+ 33 Leviy aylluñataqmi Moisesta Jehova Dios kamachisqanman hina mana wakin ayllukuna hinachu+ yupasqa karqa.+ 34 Israelpa mirayninkunaqa Moisesta Jehova Diospa kamachisqanman hinam ruwarqaku. Paykunaqa sapakamam carpankuta sayachiqku rakinasqa kimsa ayllukunapa maypi kasqankuman hina,+ ayllukunapi kamachiqkunapa maypi kasqanman hina hinaspa pi abuelonku kasqanman hina, chayman hinataqmi carpankutapas paskaqku.+

3 Moisesta Sinai urqupi+ Jehova Diospa rimapayasqan punchawpim Moisespa hinaspa Aaronpa mirayninkuna kaykuna karqa. 2 Aaronpa churinkunam kaykuna karqa: Piwi kaq* Nadab, Abiu,+ Eleazar+ hinaspa Itamar.+ 3 Paykunaqa sacerdote* kanankupaqmi akllasqa karqaku.+ 4 Nadabwan Abiuñataqmi Sinai chunniqpi Jehova Diospaq qunanku kaqta* mana paypa kamachisqanman hinachu quntichirqaku, chaymi Jehova Dios qawachkaptin+ wañururqaku, paykunapaqa manam churinkupas karqachu. Eleazarwan+ Itamarmi+ ichaqa sacerdote kaspa hinalla yanapakurqaku taytanku Aaronwan kuska.

5 Chaymantam Jehova Diosqa Moisesta nirqa: 6 “Leviy ayllutam+ ninki sacerdote Aaronpa ñawpaqninman rinankupaq, paykunam yanapaqninkuna kanqaku.+ 7 Paykunaqa carpaypim Aaronta yanapanqaku hinaspa Israelpa mirayninkunapa rantinpi imakunatapas ruwanqaku. 8 Paykunaqa carpaypa tukuy imankunamantam nanachikunanku,+ hinaspapas carpaypim Israelpa mirayninkunapaq imakunatapas ruwananku.+ 9 Leviypa miraynintaqa Aaronman hinaspa churinkunamanmi pusanayki. Leviypa mirayninqa yanapakunankupaqmi Israelpa mirayninkunamanta sapaqchasqa kanku.+ 10 Aarontawan churinkunatam akllanayki sacerdote kanankupaq,+ pipas mana akllasqa kachkaspan* carpayman asuykuqqa wañuchisqam kanan”,+ nispa.

11 Jehova Diosqa Moisestaqa nirqataqmi: 12 “Ñuqaqa Israelpa mirayninkunapa piwi churinkunapa rantinpim Leviypa mirayninkunata ñuqapaq akllani.+ Chaymi Leviypa mirayninkunaqa ñuqapaqña kanqa. 13 Israelpa mirayninkunapi lliw piwi churikunaqa ñuqapaq sapaqchasqam,+ ñuqapaq sapaqchasqataqmi punta naceq animalkunapas.+ Egipto nacionpi lliw punta naceqkunata wañuchisqay punchawmi ñuqapaq sapaqcharqani.+ Chayraykum Leviy ayllukunaqa ñuqapaqña kanqa. Ñuqaqa Jehova Diosmi kani”, nispa.

14 Chaymantam Jehova Diosqa Sinai urqupi+ Moisesta kaqmanta rimapayaspan nirqa: 15 “Leviypa miraynintayá yupaspa listay ayllunkupi kamachiqkunaman hina hinaspa pi abuelonku kasqanman hina. Yupankiqa lliw qarikunatam huk killayuqmanta hanayman”,+ nispa. 16 Hinaptinmi Moisesqa Jehova Diospa kamachisqanman hina yupaspa qillqarqa. 17 Leviypa churinkunam karqa: Guerson, Koat hinaspa Merari.+

18 Guersonpa churinkunam ayllunkuman hina karqa: Libni hinaspa Simei.+

19 Koatpa churinkunam ayllunkuman hina karqa: Amram, Izar, Hebron hinaspa Uziel.+

20 Meraripa churinkunam ayllunkuman hina karqa: Mali+ hinaspa Musi.+

Paykunam karqa Leviypa ayllunkuna ayllunkupi kamachiqkunaman hina.

21 Guersonpa mirayninmi karqa Libni runakuna+ hinaspa Simei runakuna. Paykunam Guersonpa miraynin karqaku. 22 Guersonpa mirayninpi huk killayuqmanta hanayman yupasqa lliw qarikunam karqa 7.500.+ 23 Guersonpa mirayninqa inti siqaykunan lawpim utaq Diospa carpanpa qipan lawpim carpankuta sayachirqaku.+ 24 Guersonpa mirayninpi kamachiqmi karqa Laelpa churin Eliasaf. 25 Guersonpa mirayninmi Diospa carpanpi+ nanachikunanku karqa+ carpapa lliw qatankunamanta,+ carpapa punkunpi hatun cortinamanta,+ 26 patiopa muyuriqninpi hatun telakunamanta,+ carpayta hinaspa altarta* muyuriq chay telakunapa punkunpi kaq hatun cortinamanta,+ waskakunamanta hinaspa chaypi servichikuna kaqkunamanta.

27 Koatpa mirayninmi karqa Amram runakuna, Izar runakuna, Hebron runakuna hinaspa Uziel runakuna. Paykunam Koatpa miraynin karqaku.+ 28 Koatpa mirayninpi huk killayuqmanta hanayman yupasqa lliw qarikunam karqa 8.600. Paykunam nanachikurqaku Diospa carpanpi Chuya sutiyuq cuartomanta.+ 29 Koatpa mirayninqa Diospa carpanpa alliq* lawninpim* carpankuta sayachirqaku.+ 30 Koatpa mirayninpi kamachiqmi karqa Uzielpa+ churin Elizafan. 31 Paykunam nanachikurqaku baulmanta,+ mesamanta,+ candelabromanta,+ altarkunamanta,+ Chuya sutiyuq cuartopi serviciokunamanta,+ carpata rakiq hatun cortinamanta+ hinaspa chaypi servichikuna kaqkunamanta.+

32 Leviy ayllupi kamachiqmi karqa sacerdote Aaronpa churin Eleazar,+ payqa Diospa carpanpi nanachikuqkuna imakunatapas sumaqta ruwanankupaq kamachiqmi karqa.

33 Meraripa mirayninmi karqa Mali runakuna hinaspa Musi runakuna. Paykunam Meraripa miraynin karqaku.+ 34 Meraripa mirayninpi huk killayuqmanta hanayman yupasqa lliw qarikunam karqa 6.200.+ 35 Meraripa mirayninpi kamachiqmi karqa Abiailpa churin Zuriel. Meraripa mirayninqa Diospa carpanpa ichuq* lawninpim* carpankuta sayachirqaku.+ 36 Meraripa mirayninmi nanachikurqa carpapa lliw marconkunamanta,+ kaspinkunamanta,+ sayaq qirunkunamanta,+ tuquyuq tiyanankunamanta, chaypi servichikuna kaqkunamanta,+ chaypi yanapakuqkunapaq tukuy imamanta,+ 37 patiopa qirunkunamanta, qirukunapaq tuquyuq tiyanankunamanta,+ estacankunamanta hinaspa waskankunamanta.

38 Intipa qispimunan lawpi utaq Diospa carpanpa punkun lawpim Moises, Aaron hinaspa Aaronpa churinkuna carpankuta sayachirqaku. Paykunam Israelpa mirayninkunapa rantinpi nanachikurqaku Diospa carpanmanta. Pipas mana kamachisqa kachkaspan* Diospa carpanman asuykuqqa wañuchisqam kanan karqa.+

39 Leviypa mirayninkunata huk killayuqmanta hanayman Moiseswan Aaron yupaptinkum karqa 22.000. Yuparqakuqa Jehova Diospa kamachisqanman hinam pi abuelonku kasqanman hina.

40 Chaymantam Jehova Diosqa Moisesta nirqa: “Israelpa mirayninkunapa piwi churinkunatayá yupay, sutin-sutinyá huk killayuqmanta hanayman+ listay. 41 Leviy ayllutam ñuqapaq sapaqchanki Israelpa mirayninpi kaq lliw piwi churikunapa rantinpi.+ Israelpa mirayninkunapa punta naceq animalninpa rantinpipas sapaqchaytaqyá Leviy ayllupa animalninkutaña.+ Ñuqaqa Jehova Diosmi kani”, nispa. 42 Hinaptinmi Moisesqa Israelpa mirayninpi kaq lliw piwi churikunata yupaspa listarqa Jehova Diospa kamachisqanman hina. 43 Israelpa mirayninpi kaq sutin-sutin listasqa lliw piwi qari churikunam karqa 22.273.

44 Jehova Diosqa Moisestaqa nirqataqmi: 45 “Leviy ayllutayá sapaqchay Israelpa mirayninkunapa lliw piwi churinkupa rantinpi. Hinaspapas sapaqchayá Leviy ayllupa animalninta, chayqa kanan Israelpa mirayninkunapa animalninkupa rantinpim. Leviy ayllukunaqa ñuqapaqmi kanan. Ñuqaqa Jehova Diosmi kani. 46 Israelpa mirayninkunapa piwi churinkunaqa 273 qarikunawanmi Leviy ayllutaqa masyarun,+ chaymi chay masyaqkunapa rantinpi+ 47 sapa runamanta chaskinki 57 gramo* qullqita,+ chayqa llasanan carpaypi tantiasqa llasayman hinam. Chay carpaypi kaq llasayqa 11 gramo* masninmi.+ 48 Hinaspam chay qullqita qunki Aaronmanwan churinkunaman, chay qullqiqa Israelpa mirayninkunapa masyaq piwi churinkunapa chaninmi”, nispa. 49 Chaymi Moisesqa chaskirqa Leviy aylluta masyaq piwi churikunapa chanin qullqita. 50 Chay chaskisqanmi karqa 15 kilo parten* qullqi, chay qullqiqa llasarqa Diospa carpanpi tantiasqa llasayman hinam. 51 Hinaspanmi Moisesqa chay chaskisqan qullqita quykurqa Aaronman hinaspa churinkunaman, chaytaqa Jehova Diospa nisqanman hinam ruwarqa. Chaynata ruwananpaqmi Jehova Diosqa Moisesta kamachirqa.

4 Chaymantam Jehova Diosqa Moisestawan Aaronta nirqa: 2 “Leviy ayllumanta kaq Koatpa mirayninkunatayá+ pikuna hinaspa hayka kasqankuta yupaspa listaychik, listankichikqa pi abuelonku kasqanman hinam hinaspa ayllunkupi kamachiqkunaman hinam. 3 Pikuna hinaspa hayka kasqankutaqa listankichik 30+ watayuqmanta 50+ watankama kaqkunatam, paykunaqa kamachisqañam kachkanku carpaypi yanapakunankupaq.+

4 Koatpa mirayninkunaqa carpaypi ñuqapaq imapas sapaqchasqa kaqkunamantam nanachikunqaku.+ 5 Sapa kuti maymi kasqaykichikmanta huklawman astakuptikichikmi Aaronwan churinkuna carpayman yaykunqa, hinaspam rakiq hatun cortinata+ hurquspa chaywan baulta tapanqaku.+ 6 Taparuspankuñataqmi hawanman qatanqaku foca sutiyuq animalpa qaranwan, chaypa hawanmanñataqmi qatanqaku azul telawan. Chaymantam kaspinkunata ustuchinqaku baulta apanankupaq.+

7 Chaymantapas ñuqapaq sapaqchasqa tantata churana mesapim azul telata mastanqaku,+ hinaspam chaypa hawanman churanqaku platokunata, vasokunata, tazonkunata hinaspa Diosman quspa imapas tallina puyñukunata.+ Sapa kuti ñuqapaq sapaqchasqa tantapas hina chaypim kanan.+ 8 Tukuy chaykunatañataqmi qatanqaku puka telawan, hina hawanmanñataqmi tapanqaku foca animalpa qaranwan. Hinaspam kaspinkunata ustuchinqaku chay mesata apanankupaq.+ 9 Azul telawantaqmi tapanqaku candelabrota,+ mecherokunata,+ nina wañuchinakunata, sansa apanakunata+ hinaspa achki ratananpaq aceite apanakunatapas. 10 Candelabrotaqa tukuy imantintam foca sutiyuq animalpa qaranwan wankunqaku, hinaspam chakanapa* hawanman hinanqaku apanankupaq. 11 Chaymantapas incienso* kañana qurimanta altartam+ qatanqaku azul telawan, hawanmanñataqmi tapanqaku foca animalpa qaranwan. Hinaspam kaspinkunata ustuchinqaku chay baulta apanankupaq.+ 12 Carpaypi servichikuna kaqkunatañataqmi+ azul telaman hinaspanku foca animalpa qaranwan tapanqaku. Hinaspam chakanaman hinanqaku apanankupaq.

13 Chaymantapas altarpa uchpanta hurquspam+ qatanqaku morado qaytumanta ruwasqa telawan. 14 Hawanmanñataqmi churanqaku servichikunanku sansa apanakunata, trinchekunata, palakunata, tazonkunata hinaspa altarpi servichikuna kaqkunata.+ Chaypa hawanmanñataqmi qatanqaku foca animalpa qaranwan, hinaspam kaspinkunata ustuchinqaku chay altarta apanankupaq.+

15 Maymi kasqaykichikmanta huklawman astakunaykichikpaqqa Aaronwan churinkunam tukunankuña carpaypi tukuy ima tapayta.+ Chayñam Koatpa mirayninqa yaykunanku tukuy chayta apanankupaq,+ ichaqa manam tapasqapa ukunpi kaqkunataqa llachpanankuchu, manachayqa wañurunqakum.+ Chaykunatam Koatpa mirayninkunaqa carpaypi ruwanqaku.

16 Sacerdote Aaronpa churin Eleazarmi+ nanachikunan achki ratachina aceitemanta,+ kañana miski asnaq inciensomanta*,+ kawsaykunamanta qusqanku kaqkunamanta hinaspa miski asnaq aceitemanta.+ Eleazarmi nanachikunan carpaymanta hinaspa carpay ukupi tukuy ima kaqkunamanta”, nispa.

17 Jehova Diosqa Moisestawan Aaronta hinalla rimapayaspanmi nirqa: 18 “Amam Leviy ayllumantaqa chinkarachinkichikchu Koatpa miraynintaqa.+ 19 Qamkunaqa sumaqtam imam ruwanankuta kamachinaykichik, chaynapi imapas ñuqapaq sapaqchasqa kaqkunaman asuykuspa ama wañurunankupaq.+ Aaronwan churinkunam Koatpa mirayninkunata sapakamata ninanku carpayman yaykuspa ima ruwanankuta hinaspa ima apanankuta. 20 Koatpa mirayninkuna carpayman yaykuspaqa manam qawanankuchu imapas ñuqapaq sapaqchasqa kaqkunataqa, qawaruspankuqa wañurunqakum”, nispa.+

21 Chaymantam Jehova Diosqa Moisesta nirqa: 22 “Guersonpa mirayninkunatayá+ pikuna hinaspa hayka kasqankuta yupaspa listay, listankiqa pi abuelonku kasqanman hinam hinaspa ayllukunapi kamachiqkunaman hinam. 23 Pikuna hinaspa hayka kasqankutaqa listankichik 30 watayuqmanta 50 watayuqkamam, paykunaqa kamachisqañam kachkanku carpaypi yanapakunankupaq. 24 Guersonpa mirayninkunam nanachikunanku+ 25 carpay qatana hatun mantelkunamanta,+ hatun mantadakunamanta, qatana qarakunamanta hinaspa foca animalpa qarankunamanta,+ carpaypa punkunpi kaq hatun cortinamanta,+ 26 patiopa muyuriqninpi hatun telakunamanta,+ carpayta hinaspa altarta muyuriq chay telakunapa punkunpi kaq hatun cortinamanta,+ waskakunamanta hinaspa chaypi servichikuna tukuy imamanta. Chaykunamantam paykunaqa nanachikunanku. 27 Aaronwan churinkunam nanachikunanku Guersonpa mirayninkunapa lliw ruwanankumanta chaynataq apananku kaqkunamantapas.+ Qamkunam ninkichik ima apanankuta, hinaptinmi chay nisqaykichikta paykuna ruwananku. 28 Chaykunatam Guersonpa mirayninkunaqa carpaypi ruwanqaku.+ Paykunaqa sacerdote Aaronpa churin Itamarpa kamachisqantam ruwananku.+

29 Chaymantapas Meraripa mirayninkunatam+ pikuna hinaspa hayka kasqankuta yupaspa listanki, listankiqa pi abuelonku kasqanman hinam hinaspa ayllukunapi kamachiqkunaman hinam. 30 Pikuna hinaspa hayka kasqankutaqa listanki 30 watayuqmanta 50 watayuqkamam, paykunaqa kamachisqañam kachkanku carpaypi yanapakunankupaq. 31 Meraripa mirayninkunapa carpaypi kaqta apananku kaqkunaqa kaykunam:+ Carpaypa marconkuna,+ kaspinkuna,+ qirunkuna,+ tuquyuq tiyanankuna,+ 32 patiopa muyuriqninpi qirukuna,+ tuquyuq tiyanankuna,+ estacankuna,+ waskankuna hinaspa chaypi servichikuna tukuy imakuna. Qamkunam sapakamata ninkichik imakuna apanankuta. 33 Chaykunam Meraripa mirayninkunapa+ carpaypi ñuqapaq imapas ruwayninkuqa. Paykunaqa sacerdote Aaronpa churin Itamarpa+ kamachisqantam ruwananku”, nispa.

34 Chaymi Moisesqa, Aaronqa hinaspa Israelpa mirayninpi kamachiqkunaqa+ Koatpa mirayninkuna hayka hinaspa pikuna kasqankuta yupaspa listarqaku,+ listarqakuqa pi abuelonku kasqanman hinam hinaspa ayllukunapi kamachiqkunaman hinam. 35 Pikuna hinaspa hayka kasqankutaqa listarqaku 30 watayuqmanta 50 watayuqkamam, paykunaqa kamachisqañam kachkanku carpaypi yanapakunankupaq.+ 36 Pi abuelonku kasqanman hina listasqanku lliw qarikunam karqa 2.750.+ 37 Paykunam karqaku Koatpa mirayninpa pikuna hinaspa hayka kasqankuta yupaspa listasqanku, paykunaqa Diospa carpanpi yanapakuqkunam kanku. Moiseswan Aaronqa listarqaku Moisesta Jehova Diospa kamachisqanman hinam.+

38 Chaymantapas Guersonpa mirayninkunatam+ pikuna hinaspa hayka kasqankuta yupaspa listarqaku, listarqakuqa pi abuelonku kasqanman hinam hinaspa ayllukunapi kamachiqkunaman hinam. 39 Pikuna hinaspa hayka kasqankutaqa listarqaku 30 watayuqmanta 50 watayuqkamam, paykunaqa kamachisqañam karqaku Diospa carpanpi yanapakunankupaq. 40 Pi abuelonku kasqanman hina hinaspa ayllukunapi kamachiqkunaman hina listasqanku qarikunam karqa 6.630.+ 41 Paykunam karqaku Guersonpa mirayninpa pikuna hinaspa hayka kasqankuta yupaspa listasqanku, paykunaqa Diospa carpanpi yanapakuqkunam kanku. Moisesqa hinaspa Aaronqa listarqaku Moisesta Jehova Diospa kamachisqanman hinam.+

42 Chaymantapas Meraripa mirayninkunatam pikuna hinaspa hayka kasqankuta yupaspa listarqaku, listarqakuqa pi abuelonku kasqanman hinam hinaspa ayllukunapi kamachiqkunaman hinam. 43 Pikuna hinaspa hayka kasqankutaqa listarqaku 30 watayuqmanta 50 watayuqkamam, paykunaqa kamachisqañam karqaku Diospa carpanpi yanapakunankupaq.+ 44 Pi abuelonku kasqanman hina listasqanku qarikunam karqa 3.200.+ 45 Paykunam karqaku Guersonpa mirayninpa pikuna hinaspa hayka kasqankuta yupaspa listasqanku. Moiseswan Aaronqa listarqaku Moisesta Jehova Diospa kamachisqanman hinam.+

46 Chaynatam Moisesqa, Aaronqa hinaspa Israelpa mirayninpi kamachiqkunaqa Leviy ayllupi pikuna hinaspa hayka kasqankuta listarqaku, listarqakuqa pi abuelonku kasqanman hinam hinaspa ayllukunapi kamachiqkunaman hinam. 47 Paykunaqa karqaku 30 watayuqmanta 50 watayuqkamam, paykunaqa kamachisqam karqaku Diospa carpanpi yanapakunankupaq hinaspa imakunatapas apanankupaq.+ 48 Pikuna hinaspa hayka kasqankuta yupaspa listasqanku lliw qarikunam karqa 8.580.+ 49 Paykunam karqaku Moisesta Jehova Diospa kamachisqanman hina yupaspa listasqanku runakuna, paykunaqa kamachisqam karqaku ima ruwanankupaqpas hinaspa ima apanankupaqpas. Arí, chaynam karqa Moisesta Jehova Diospa kamachisqanman hina.

5 Jehova Diosqa kaqmantam Moisesta nirqa: 2 “Israelpa mirayninkunatayá kamachiy haykam leprawan unquqkunata,+ qari kayninmanta utaq warmi kayninmanta imapas lluqsiqwan unquqkunata+ hinaspa wañusqata llachparusqankurayku qachachasqa hina* kaqkunata+ maymi kasqaykichikmanta huklawman lluqsichinankupaq. 3 Lluqsichinaykichikmi qariña utaq warmiña kaptinpas. Chaynapi wakiqnikichik ñuqapaq qachachasqa hina ama kanaykichikpaq,+ ñuqaqa qamkunawanmi kachkani”,+ nispa. 4 Hinaptinmi Jehova Diospa kamachisqanman hina Israelpa mirayninkunaqa chayna runakunata maymi kasqankumanta huklawman lluqsichirqaku.

5 Jehova Diosqa Moisestam nirqa: 6 “Israelpa mirayninkunatayá niy: ‘Pi qaripas utaq pi warmipas ñuqa Jehova Diospa kamachisqayta mana kasukuspan runamasinta imatapas ruwaruqqa huchayuqmi kanqa.+ 7 Chaymi huchanta willakunan+ hinaspa imapas ruwasqanmanta runamasinman sayachipunan, chaymantapas sayachipusqanmanmi pichqaman rakisqa kaqpa huknintawanraq yapanan.+ 8 Sichu chay runamasin wañukuptinqa hinaspa ayllunpas* chaskinanpaq mana kaptinqa ñuqa Jehova Diosmanmi quwanan. Hinaptinmi chay quwasqanqa sacerdotepaq kanqa, hina paypaqtaqmi kanqa chay runapa huchan pampachasqa kananpaq qusqan carneropas.+

9 Israelpa mirayninkunapa sacerdoteman apamuspa imapas quwasqankuqa+ sacerdotepaqmi kanqa.+ 10 Sacerdoteman apamuspa Israelpa mirayninkunapa imapas quwasqankuqa sacerdotepaqmi hinalla kanqa’”, nispa.

11 Jehova Diosqa Moiseswan hinalla rimaspanmi nirqa: 12 “Israelpa mirayninkunatayá niy: ‘Sichu pipapas warmin mana allinpi purispa 13 huchapakuruptinqa,+ hinaptin qusanñataq chayta mana yachanmanchu pipas mana rikusqanrayku nitaq huchapakuchkaqta mana tarisqanrayku, 14 hinaspa chayta musyaspan warminta celosaptinqa, huchapakusqanta* utaq mana huchapakusqanta yachananpaqmi 15 sacerdoteman warminta pusanan. Pusananqa cebadamanta iskay mati* harinata apaspanmi. Ichaqa manam chay harinamanqa tallinanchu aceitetaqa, nitaqmi churananchu sachapa miski asnaq wiqintapas*. Chay harinaqa warminta celosaspan qusqanmi, chaynapi warmin huchayuq utaq mana huchayuq kasqanta yachakunanpaq.

16 Hinaptinmi sacerdoteqa ñuqa Jehova Diospa qayllayman+ chay warmita asuykachimunan. 17 Hinaspam allpa mankaman chuyay-chuyay yakuta huntachinan, hinaspañataqmi carpaypi kaq ñutu allpata asllata huqarispan chay yakuman hinaykunan. 18 Hinaspanmi chay warmita ñuqa Jehova Diospa qayllayman asuykachimunan. Chaymantam warmipa chukchanta kacharispan maki pampanman churanan qusanpa apamusqan harinata, chay harinaqa qusan celosaspan ñuqapa ima nisqayta yachananpaq apamusqanmi.+ Sacerdotepa makinpiñataqmi kanan sasachakuy apamuq qatqi yaku.+

19 Chaymantam sacerdoteqa warmi rimananpaq ninan: “Sasachakuyta apamuq kay qatqi yakuqa manam imanasunkichu qusaykiwan casarasqa kachkaspayki hukwan mana kakuptikiqa,+ hinaspa mana allinpi mana puriptikiqa. 20 Qusaykiwan casarasqa kachkaspayki mana allinpi purispa hukwan kakuptikim+ ichaqa...”, nispa. 21 Hinaspapas sacerdoteqa chay warmi sasachakuypi kananpaqmi ninqaraq: “Hukwan kakuptikiqa Jehova Diosyá Israelpa mirayninkunapa pinqananta ruwasunki, chaymantapas Jehova Diosyá qulluqta ruwasunki*, wiksaykipas punkichunyá. 22 Sasachakuykunata apamuq kay yakuyá chunchulnikiman yaykuspa wiksaykita punkichichun, hinaptinyá qulluqña kay”, nispa. Hinaptinmi warmiñataq ninan: “¡Chaynayá kachun*! ¡Chaynayá kachun!”, nispa.

23 Chaymantam sacerdoteqa chay sasachakuykunata qillqanan huk libropi, hinaspam qillqasqanta chinkachinanpaq chay qatqi yakuwan mayllanan. 24 Hinaspañataqmi sasachakuyta apamuq chay qatqi yakuta warmiman tomachinan, hinaptinmi chay warmiqa tomaruspan nanaywan kanqa. 25 Chaymantam sacerdoteqa warmipa makinpi kasqanmanta hapinan qusanpa apamusqan harinata,+ hinaspam ñuqa Jehova Diospaq ñawpaqmanwan qipaman kuyuchinan. Chaymantañataqmi altarman apaspan 26 chay harinamanta huk aptiyta altarpi kañanan,+ hinaspañam chay qatqi yakutaqa warmiman tomachinan. 27 Hinaptinmi chay warmi hukwan kakuspanqa sasachakuy apamuq chay yakuta tomaruspan nanaywan kanqa, wiksan punkinqa hinaspa qulluqña kanqa. Chaynapim chay warmiqa Israelpa mirayninkunapa pinqanan kanqa. 28 Chay warmi hukwan mana kakuptinmi ichaqa mana ima sasachakuypipas kanqachu, aswanqa wiksayakuptinmi wawankunapas kanqa.

29 Chay kamachikuyman hinam allichankichik qusan warminta celosaptinqa,+ celosanmanmi mana allinpi puriptin utaq hukwan kakuptin, 30 utaq hukwan kakusqanta musyaspan. Chayna kaptinqa warmintam ñuqa Jehova Diosman pusamunan, hinaptinmi sacerdoteqa tukuy chay kamachikuyman hina allichanan. 31 Chay warmipa qusanqa mana huchayuqmi kanqa, warminmi ichaqa huchapakuruspanqa huchayuq kanqa’”, nispa.

6 Jehova Diosqa Moiseswan hinalla rimaspanmi nirqa: 2 “Israelpa mirayninkunatayá niy: ‘Pi qaripas utaq pi warmipas ñuqa Jehova Diospaq kikinmanta sapaqchasqa* kaspanqa,+ 3 manam mallinanchu vinotaqa nitaq imapas sinkachikuq kaqkunataqa. Manataqmi mallinanchu puchquchisqa vinotaqa, imapas chayman rikchakuqtaqa nitaq uvas yakutapas.+ Manataqmi mikunanchu chayraq pallasqa uvastaqa nitaq chakichisqa uvastapas. 4 Ñuqapaq sapaqchasqa kachkaspanqa manam mikunanchu llullu uvastapas, uvaspa qarantapas nitaq uvasmanta ima ruwasqatapas.

5 Ñuqapaq sapaqchasqa kasqan punchawkunapiqa manam chukchantaqa rutuchikunanchu.+ Ñuqa Jehova Diospaq sapaqchasqa kasqan punchawkuna tukunankamam chukchanta wiñachinan, chay chukchanmi riqsichinqa ñuqapaq sapaqchasqa kasqanta. 6 Ñuqa Jehova Diospaq sapaqchasqa kachkaspanqa manam wañusqa runamanqa asuykunanchu. 7 Manam asuykunanchu tayta-mamanña, wawqi-paninña utaq turi-ñañanña kaptinpas, manam millakuypaqqa rikurirunanchu+ ñuqapaq sapaqchasqa kaspan chukchanta wiñachisqanrayku.

8 Ñuqa Jehova Diospaq sapaqchasqa kasqan punchawkuna tukunankamam chuya kanan. 9 Sapaqchasqa runapa waqtanpi pipas qunqaymanta wañukuptinqa+ chay sapaqchasqa runam ñuqapaq millakuypaq rikurirun*. Chaymi qanchis punchawmanta ñuqapaq chuyaña* kasqanta niptinku chukchanta kachiy-kachiyta rutukunan.+ 10 Pusaq kaq punchawpiñataqmi sacerdoteman apanan iskay kullkuta utaq iskay mallqu palomata, chaytaqa apanan carpaypa ñawpaqninmanmi. 11 Hinaptinmi sacerdoteñataq huknin ofrendata hucharayku quwanan, huknintañataqmi kañapuwanan. Chaynapi ñuqapaq sapaqchasqa kaq runapa huchan pampachasqa kananpaq.+ Chaymantañataqmi chukchanta kaqmanta wiñachikuspan ñuqapaq chuya kanan*, 12 hinaspam ñuqa Jehova Diospaq huktawan kikinmanta sapaqchasqa kanan. Chaymantam pantarusqanrayku pusamunan yaqa watayuq carnerota. Ñuqapaq millakuypaq rikurirusqanraykum ichaqa ñawpaqta sapaqchasqa kasqanqa manaña yupasqachu kanqa.

13 Chaymantapas ñuqapaq sapaqchasqa kasqan punchaw tukuruptinqa+ carpay punkumanmi rinan. 14 Hinaspam ñuqa Jehova Diospaq apamunan kañasqa kananpaq yaqa watayuq malta carnerota,+ apamunantaqmi hucharayku yaqa watayuq ovejatapas+ chaynataq ñuqawan hawkalla kasqanrayku huk carnerotapas.+ Chaykunaqa kanan sanom. 15 Canastapiñataqmi apamunan harinamanta ruwasqa aceitewan chapusqa uchkuyuq ruyru tantata, hinaspapas apamunanmi aceitewan llusisqa llaspa tantata. Chaykunaqa kanan mana levadurawan ruwasqam. Apamunantaqmi kawsaykunamanta ofrendatapas+ hinaspa ñuqapaq tallina vinotapas.+ 16 Hinaptinmi sacerdoteñataq ñuqa Jehova Diosman quwanqa hucharayku carnerota, kañapuwanqataqmi kañanapaq kaq ovejatapas. 17 Chaymantapas ñuqa Jehova Diosmanmi quwanqa ñuqawan hawkalla kasqanrayku runapa qusqan huknin carnerota, chaytaqa quwanan canastapi kaq mana levadurawan ruwasqa uchkuyuq ruyru tantantintam, kawsaykunamanta qusqan ofrendantintam+ hinaspa tallina vinontintam.

18 Chaymantam ñuqapaq sapaqchasqa kaq runañataq carpay punkupi chukchanta kachiy-kachiyta rutukunan,+ hinaspam wiñachisqan chukchanta ninapi kañanqa. Kañanqaqa ñuqawan hawkalla kasqanrayku carnerota kañasqanku ninapim. 19 Sacerdoteñataqmi ñuqapaq sapaqchasqa kaq runapa maki pampanman churanqa carneropa yanusqa rikranta,+ mana levadurawan ruwasqa uchkuyuq huk ruyru tantata hinaspa mana levadurawan ruwasqa llaspalla huk tantata. Chaytaqa ruwanan chukchan kachiy-kachiy rutusqa kaptinñam. 20 Hinaspanmi ñawpaqman qipaman ñuqa Jehova Diospaq kuyuchinan.+ Chay carneropa rikranqa sacerdotepaqmi sapaqchasqa kanan qasqunwan piernan hina.+ Chayñam ñuqapaq sapaqchasqa kaq runaqa vinota tomanman.

21 Chaymantapas ñuqapaq sapaqchasqa kaq runa+ aswan mastaraq ñuqa Jehova Diosman quwayta munaspanqa, atispanqa quwanmanmi. Ichaqa kamachikuyman hinam ruwanan. Tukuy chaykunam sapaqchasqa kaq runapaq kamachisqay’”, nispa.

22 Chaymantam Jehova Diosqa Moisesta nirqa: 23 “Aarontawan churinkunatayá niy: ‘Israelpa mirayninkunataqa bendecinaykichik+ kaynata nispam:

24 “Jehova Diosyá bendecisunkichik+ hinaspa imamantapas harkaykusunkichik.

25 Jehova Diosyá kuyapayasunkichik.+

26 Jehova Diosyá llakipayasunkichik hinaspa hawkallata kawsachisunkichik”’, nispa.+

27 Paykunaqa sutiytam rimananku, chaynapi Israelpa mirayninkunata+ bendecinaypaq”,+ nispa.

7 Moisesqa Diospa carpanta sayachiyta tukuruspanmi+ carpataqa tukuy imantinta+ Diospaq sapaqcharqa.+ Sapaqcharqataqmi altartapas tukuy imantinta. Tukuy chaykunata Diospaq sapaqchayta tukuruptinmi,+ 2 Israel ayllukunapi kamachiqkuna+ kapuqninkuta Diospaq qurqaku. Chay kamachiqkunam Moisesta yanaparqaku Israelpa mirayninkunata yupaypi. 3 Paykunam kapuqninkuta Jehova Diospaq aparqaku. Chay apasqankum karqa suqta carretakuna hinaspa 12 torokuna. Sapa kamachiqmi qurqa huk torota, sapa iskay kamachiqñataqmi qurqa huk carretata. 4 Hinaptinmi Jehova Diosqa Moisesta nirqa: 5 “Chay apamusqankutaqa carpaypi Leviy ayllukuna servichikunanpaqyá chaskiy. Hinaspayá sapakamaman quy llamkasqankupi servichikunankupaq”, nispa.

6 Chaymi Moisesqa apamusqankuta chaskiykuspan Leviy ayllupi kaqkunaman quykurqa. 7 Guersonpa churinkunamanmi qurqa iskay carretakunata hinaspa tawa torokunata, chaynatam qurqa llamkasqankupi servichikunankupaq.+ 8 Meraripa churinkunamanñataqmi qurqa tawa carretata hinaspa pusaq torokunata, chaynatam qurqa llamkasqankupi servichikunankupaq. Llamkarqakuqa Aaronpa churin Itamarpa kamachisqanmi.+ 9 Koatpa churinkunamanmi ichaqa mana imatapas qurqachu Diospa carpanpi yanapakusqankurayku,+ paykunam yanapakurqaku Diospa carpanpi kaqkunata hombronkupi apaspanku.+

10 Chay kamachiqkunaqa huktawanmi kapuqninkutaqa aparqaku altarta Diospaq sapaqchaptinku.+ Chay qusqankuta altarpa kasqanman apaptinkum 11 Jehova Diosqa Moisesta nirqa: “Altar sapaqchasqa kananpaq apamusqantam sapa punchaw huk kamachiqlla quwanan”, nispa.

12 Punta kaq punchawpim qurqa Aminadabpa churin Nason,+ payqa karqa Juda ayllumantam. 13 Paymi qurqa kilo parten* qullqimanta ruwasqa platota hinaspa yaqa kilo* qullqimanta ruwasqa tazonta, chay qullqiqa llasarqa carpapi tantiasqa llasayman hinam.+ Chaykunataqa qurqa aceitewan chapusqa harinayuqtam,+ chayqa karqa kawsaykunamanta qusqan ofrendam. 14 Nasonqa qurqataqmi 114 gramo* qurimanta ruwasqa vasotapas, chay vasoqa karqa quntichinapaq inciensoyuqmi*. 15 Chaymantapas qurqam malta torota, carnerota, kañasqa kananpaq manaraq watayuq carnerota,+ 16 hucharayku chivochata,+ 17 Dioswan hawkalla kasqanrayku+ iskay torota, pichqa carnerota, pichqa chivota hinaspa watayuq pichqa malta carnerokunata. Chaykunam karqa Aminadabpa churin Nasonpa qusqankuna.+

18 Iskay kaq punchawpim qurqa Zuarpa churin Natanael,+ payqa karqa Isacar ayllumantam. 19 Paymi qurqa kilo parten qullqimanta ruwasqa platota hinaspa yaqa kilo qullqimanta ruwasqa tazonta, chay qullqiqa llasarqa carpapi tantiasqa llasayman hinam.+ Chaykunataqa qurqa aceitewan chapusqa harinayuqtam,+ chayqa karqa kawsaykunamanta qusqan ofrendam. 20 Natanaelqa qurqataqmi 114 gramo qurimanta ruwasqa vasotapas, chay vasoqa karqa quntichinapaq inciensoyuqmi. 21 Chaymantapas qurqam malta torota, carnerota, kañasqa kananpaq manaraq watayuq carnerota,+ 22 hucharayku chivochata,+ 23 Dioswan hawkalla kasqanrayku+ iskay torota, pichqa carnerota, pichqa chivota hinaspa watayuq pichqa malta carnerokunata. Chaykunam karqa Zuarpa churin Natanaelpa qusqankuna.

24 Kimsa kaq punchawpim qurqa Helonpa churin Eliab,+ payqa karqa Zabulon ayllumantam. 25 Paymi qurqa kilo parten qullqimanta ruwasqa platota hinaspa yaqa kilo qullqimanta ruwasqa tazonta, chay qullqiqa llasarqa carpapi tantiasqa llasayman hinam.+ Chaykunataqa qurqa aceitewan chapusqa harinayuqtam,+ chayqa karqa kawsaykunamanta qusqan ofrendam. 26 Eliabqa qurqataqmi 114 gramo qurimanta ruwasqa vasotapas, chay vasoqa karqa quntichinapaq inciensoyuqmi. 27 Chaymantapas qurqam malta torota, carnerota, kañasqa kananpaq manaraq watayuq carnerota,+ 28 hucharayku chivochata,+ 29 Dioswan hawkalla kasqanrayku+ iskay torota, pichqa carnerota, pichqa chivota hinaspa watayuq pichqa malta carnerokunata. Chaykunam karqa Helonpa churin Eliabpa+ qusqankuna.

30 Tawa kaq punchawpim qurqa Sedeurpa churin Elizur,+ payqa karqa Ruben ayllumantam. 31 Paymi qurqa kilo parten qullqimanta ruwasqa platota hinaspa yaqa kilo qullqimanta ruwasqa tazonta, chay qullqiqa llasarqa carpapi tantiasqa llasayman hinam.+ Chaykunataqa qurqa aceitewan chapusqa harinayuqtam,+ chayqa karqa kawsaykunamanta qusqan ofrendam. 32 Elizurqa qurqataqmi 114 gramo qurimanta ruwasqa vasotapas, chay vasoqa karqa quntichinapaq inciensoyuqmi. 33 Chaymantapas qurqam malta torota, carnerota, kañasqa kananpaq manaraq watayuq carnerota,+ 34 hucharayku chivochata,+ 35 Dioswan hawkalla kasqanrayku+ iskay torota, pichqa carnerota, pichqa chivota hinaspa watayuq pichqa malta carnerokunata. Chaykunam karqa Sedeurpa churin Elizurpa+ qusqankuna.

36 Pichqa kaq punchawpim qurqa Zurisadaipa churin Selumiel,+ payqa karqa Simeon ayllumantam. 37 Paymi qurqa kilo parten qullqimanta ruwasqa platota hinaspa yaqa kilo qullqimanta ruwasqa tazonta, chay qullqiqa llasarqa carpapi tantiasqa llasayman hinam.+ Chaykunataqa qurqa aceitewan chapusqa harinayuqtam,+ chayqa karqa kawsaykunamanta qusqan ofrendam. 38 Selumielqa qurqataqmi 114 gramo qurimanta ruwasqa vasotapas, chay vasoqa karqa quntichinapaq inciensoyuqmi. 39 Chaymantapas qurqam malta torota, carnerota, kañasqa kananpaq manaraq watayuq carnerota,+ 40 hucharayku chivochata,+ 41 Dioswan hawkalla kasqanrayku+ iskay torota, pichqa carnerota, pichqa chivota hinaspa watayuq pichqa malta carnerokunata. Chaykunam karqa Zurisadaipa churin Selumielpa+ qusqankuna.

42 Suqta kaq punchawpim qurqa Deuelpa churin Eliasaf,+ payqa karqa Gad ayllumantam. 43 Paymi qurqa kilo parten qullqimanta ruwasqa platota hinaspa yaqa kilo qullqimanta ruwasqa tazonta, chay qullqiqa llasarqa carpapi tantiasqa llasayman hinam.+ Chaykunataqa qurqa aceitewan chapusqa harinayuqtam,+ chayqa karqa kawsaykunamanta qusqan ofrendam. 44 Eliasafqa qurqataqmi 114 gramo qurimanta ruwasqa vasotapas, chay vasoqa karqa quntichinapaq inciensoyuqmi. 45 Chaymantapas qurqam malta torota, carnerota, kañasqa kananpaq manaraq watayuq carnerota,+ 46 hucharayku chivochata,+ 47 Dioswan hawkalla kasqanrayku+ iskay torota, pichqa carnerota, pichqa chivota hinaspa watayuq pichqa malta carnerokunata. Chaykunam karqa Deuelpa churin Eliasafpa+ qusqankuna.

48 Qanchis kaq punchawpim qurqa Amiudpa churin Elisama,+ payqa karqa Efrain ayllumantam. 49 Paymi qurqa kilo parten qullqimanta ruwasqa platota hinaspa yaqa kilo qullqimanta ruwasqa tazonta, chay qullqiqa llasarqa carpapi tantiasqa llasayman hinam.+ Chaykunataqa qurqa aceitewan chapusqa harinayuqtam,+ chayqa karqa kawsaykunamanta qusqan ofrendam. 50 Elisamaqa qurqataqmi 114 gramo qurimanta ruwasqa vasotapas, chay vasoqa karqa quntichinapaq inciensoyuqmi. 51 Chaymantapas qurqam malta torota, carnerota, kañasqa kananpaq manaraq watayuq carnerota,+ 52 hucharayku chivochata,+ 53 Dioswan hawkalla kasqanrayku+ iskay torota, pichqa carnerota, pichqa chivota hinaspa watayuq pichqa malta carnerokunata. Chaykunam karqa Amiudpa churin Elisamapa+ qusqankuna.

54 Pusaq kaq punchawpim qurqa Pedazurpa churin Gamaliel,+ payqa karqa Manases ayllumantam. 55 Paymi qurqa kilo parten qullqimanta ruwasqa platota hinaspa yaqa kilo qullqimanta ruwasqa tazonta, chay qullqiqa llasarqa carpapi tantiasqa llasayman hinam.+ Chaykunataqa qurqa aceitewan chapusqa harinayuqtam,+ chayqa karqa kawsaykunamanta qusqan ofrendam. 56 Gamalielqa qurqataqmi 114 gramo qurimanta ruwasqa vasotapas, chay vasoqa karqa quntichinapaq inciensoyuqmi. 57 Chaymantapas qurqam malta torota, carnerota, kañasqa kananpaq manaraq watayuq carnerota,+ 58 hucharayku chivochata,+ 59 Dioswan hawkalla kasqanrayku+ iskay torota, pichqa carnerota, pichqa chivota hinaspa watayuq pichqa malta carnerokunata. Chaykunam karqa Pedazurpa churin Gamalielpa+ qusqankuna.

60 Isqun kaq punchawpim qurqa Guideonipa churin Abidan,+ payqa karqa Benjamin ayllumantam.+ 61 Paymi qurqa kilo parten qullqimanta ruwasqa platota hinaspa yaqa kilo qullqimanta ruwasqa tazonta, chay qullqiqa llasarqa carpapi tantiasqa llasayman hinam.+ Chaykunataqa qurqa aceitewan chapusqa harinayuqtam,+ chayqa karqa kawsaykunamanta qusqan ofrendam. 62 Abidanqa qurqataqmi 114 gramo qurimanta ruwasqa vasotapas, chay vasoqa karqa quntichinapaq inciensoyuqmi. 63 Chaymantapas qurqam malta torota, carnerota, kañasqa kananpaq manaraq watayuq carnerota,+ 64 hucharayku chivochata,+ 65 Dioswan hawkalla kasqanrayku+ iskay torota, pichqa carnerota, pichqa chivota hinaspa watayuq pichqa malta carnerokunata. Chaykunam karqa Guideonipa churin Abidanpa+ qusqankuna.

66 Chunka kaq punchawpim qurqa Amisadaipa churin Ayezer,+ payqa karqa Dan ayllumantam. 67 Paymi qurqa kilo parten qullqimanta ruwasqa platota hinaspa yaqa kilo qullqimanta ruwasqa tazonta, chay qullqiqa llasarqa carpapi tantiasqa llasayman hinam.+ Chaykunataqa qurqa aceitewan chapusqa harinayuqtam,+ chayqa karqa kawsaykunamanta qusqan ofrendam. 68 Ayezerqa qurqataqmi 114 gramo qurimanta ruwasqa vasotapas, chay vasoqa karqa quntichinapaq inciensoyuqmi. 69 Chaymantapas qurqam malta torota, carnerota, kañasqa kananpaq manaraq watayuq carnerota,+ 70 hucharayku chivochata,+ 71 Dioswan hawkalla kasqanrayku+ iskay torota, pichqa carnerota, pichqa chivota hinaspa watayuq pichqa malta carnerokunata. Chaykunam karqa Amisadaipa churin Ayezerpa+ qusqankuna.

72 11 kaq punchawpim qurqa Ocranpa churin Paguiel,+ payqa karqa Aser ayllumantam. 73 Paymi qurqa kilo parten qullqimanta ruwasqa platota hinaspa yaqa kilo qullqimanta ruwasqa tazonta, chay qullqiqa llasarqa carpapi tantiasqa llasayman hinam.+ Chaykunataqa qurqa aceitewan chapusqa harinayuqtam,+ chayqa karqa kawsaykunamanta qusqan ofrendam. 74 Paguielqa qurqataqmi 114 gramo qurimanta ruwasqa vasotapas, chay vasoqa karqa quntichinapaq inciensoyuqmi. 75 Chaymantapas qurqam malta torota, carnerota, kañasqa kananpaq manaraq watayuq carnerota,+ 76 hucharayku chivochata,+ 77 Dioswan hawkalla kasqanrayku+ iskay torota, pichqa carnerota, pichqa chivota hinaspa watayuq pichqa malta carnerokunata. Chaykunam karqa Ocranpa churin Paguielpa+ qusqankuna.

78 12 kaq punchawpim qurqa Enanpa churin Aira,+ payqa karqa Neftaliy ayllumantam. 79 Paymi qurqa kilo parten qullqimanta ruwasqa platota hinaspa yaqa kilo qullqimanta ruwasqa tazonta, chay qullqiqa llasarqa carpapi tantiasqa llasayman hinam.+ Chaykunataqa qurqa aceitewan chapusqa harinayuqtam,+ chayqa karqa kawsaykunamanta qusqan ofrendam. 80 Airaqa qurqataqmi 114 gramo qurimanta ruwasqa vasotapas, chay vasoqa karqa quntichinapaq inciensoyuqmi. 81 Chaymantapas qurqam malta torota, carnerota, kañasqa kananpaq manaraq watayuq carnerota,+ 82 hucharayku chivochata,+ 83 Dioswan hawkalla kasqanrayku+ iskay torota, pichqa carnerota, pichqa chivota hinaspa watayuq pichqa malta carnerokunata. Chaykunam karqa Enanpa churin Airapa+ qusqankuna.

84 Chaykunatam Israel aylluta kamachiqkuna qurqaku altarta Diospaq sapaqchaptinku.+ Chay qusqankum karqa: Qullqimanta ruwasqa 12 plato, qullqimanta ruwasqa 12 tazon hinaspa qurimanta ruwasqa 12 vaso.+ 85 Sapa platom llasarqa kilo partenta, sapa tazonñataqmi llasarqa yaqa kilota. Llapanmi llasarqa yaqa kimsa arrobata* carpapi tantiasqa llasayman hina.+ 86 Qurqakutaqmi quntichinapaq inciensoyuq qurimanta 12 vasotapas, sapa vasom llasarqa 114 gramota. Chaymi llapanñataq llasarqa kilo masninta*. Chay quriqa llasarqa carpapi tantiasqa llasayman hinam. 87 Diospaq kañapunankupaqmi qurqaku 12 torokunata, 12 carnerokunata hinaspa 12 malta carnerokunata watayuqtakama, chaywan kuskatataqmi qurqaku kawsaykunamanta kaqtapas, qurqakutaqmi hucharayku 12 chivochakunatapas. 88 Ñuqa Dioswan hawkalla kasqankurayku lliw qusqankum karqa 24 torokuna, 60 carnerokuna, 60 chivokuna hinaspa watayuq 60 malta carnerokuna. Chaykunatam qurqaku altarta Diospaq sapaqchasqanku punchaw.+

89 Moisesqa Diospa carpanman yaykuspanmi Dioswan rimaq,+ baulpa hawanpi iskay querubin angelkunapa+ kasqanmantam Diosqa Moisesta rimapayaq.+

8 Jehova Diosmi Moisesta nirqa: 2 “Aarontayá niy: ‘Candelabropa qanchis mecheronkunata ratachiptikiqa ñawpaqnin lawtam achkinan’”, nispa.+ 3 Chaymi Aaronqa candelabropa+ mecheronkunata ratachirqa Jehova Diospa kamachisqanman hina. 4 Candelabroqa qurimanta ruwasqam karqa, qirunwan waytankunapas martillowan takaspa ruwasqam karqa.+ Chaytaqa ruwarqaku Moisesman Jehova Diospa qawachisqanman hinam.+

5 Jehova Diosqa Moisestam kaqmanta nirqa: 6 “Leviy ayllutayá ñuqapaq sapaqchay.+ 7 Sapaqchapuwankiqa huchanku pampachasqa kananpaq yakuta challaspam, ninkitaqmi cuerponkupi pelonkuta qatqakunankupaqpas* hinaspa pachankuta taqsakunankupaqpas.+ 8 Chaymantam malta torota pusamunqaku,+ apamunqakutaqmi aceitewan chapusqa harinatapas.+ Qamñataqmi hucharayku kañasqa kananpaq huk malta torota pusamunki.+ 9 Hinaspaykim carpay punkuman Leviy aylluta huñunki, huñunkitaqmi Israelpa lliw mirayninkunatapas.+ 10 Leviy aylluta ñuqa Jehova Diospaq huñuruptikim Israelpa mirayninkunaqa Leviy ayllupa umanman makinkuta churanqaku.+ 11 Hinaptinmi Aaronqa paykunata ninqa ñawpaqman qipaman ñuqa Jehova Diospaq kuyunankupaq.+ Chaynaqa kanqa Israelpa mirayninkunapa rantinpi ñuqa Jehova Diospaq sapaqchasqa kasqankuraykum.+

12 Chaymantam Leviy aylluqa torokunapa umanman makinkuta churanqaku.+ Hinaptinmi huknin torota hucharayku quwanqaku, hukninñataqmi ñuqa Jehova Diospaq kañasqa kanqa Leviy ayllu runakunapa huchanku pampachasqa kananpaq.+ 13 Chaymantam Leviy aylluta ninki Aaronpawan churinkunapa qayllanpi ñawpaqman qipaman kuyunankupaq, chaytaqa ñuqa Jehova Diospaqmi ruwanqaku. 14 Leviy ayllutam Israelpa mirayninkunamanta rakinki, hinaptinmi Leviy aylluqa ñuqapaq kanqa.+ 15 Chayñam Leviy aylluqa carpaypi llamkanqaku. Chaynatam paykunataqa ñuqapaq sapaqchanki. 16 Paykunaqariki Israelpa mirayninkunapi piwi* churikunapa rantinpim ñuqapaq sapaqchasqa kanku.+ 17 Israelpa mirayninkunapi piwi churikunaqa hinaspa punta naceq animalkunaqa ñuqapam.+ Paykunataqa ñuqam sapaqcharqani Egipto nacionpi punta naceqkunata wañuchispay.+ 18 Kunanqa Leviy aylluñam paykunapa rantinpi ñuqapaq kanqa. 19 Israelpa mirayninpa rantinpim Leviy aylluqa Aaronta hinaspa churinkunata yanapanqaku, paykunam Israelpa mirayninpa huchanku pampachasqa kananpaq carpaypi yanapakunqaku.+ Chaynapi Israelpa mirayninkuna carpayman asuykuptinku mana ima sasachakuypas kananpaq”, nispa.+

20 Jehova Diospa chayna kamachisqanman hinam Moiseswan Aaronqa hinaspa Israelpa mirayninkunaqa Leviy aylluta sapaqcharqaku. 21 Chaymi Leviy ayllumanta kaqkunaqa pachankuta taqsakuspa Diospaq sapaqchasqa karqaku.+ Chaymantam Aaronqa paykunata nirqa ñawpaqman qipaman Jehova Diospaq kuyunankupaq,+ hinaspam huchanku pampachasqa kananpaq yanaparqa.+ 22 Chaymantam Leviy aylluqa Aaronta hinaspa churinkunata Diospa carpanpi tukuy imapi yanaparqaku. Chaynaqa karqa Jehova Diospa kamachisqanman hinam.

23 Jehova Diosqa kaqmantam Moisesta nirqa: 24 “Leviy ayllumanta kaqkunaqa 25 watankumanta hanaymanmi carpaypi yanapakunqaku, 25 50 watankumanta hanaymanmi ichaqa manaña. 26 Paykunaqa manañam carpaypi imapas ruwanankutaqa ruwanqakuñachu, aswanqa carpaypi yanapakuqkunallatañam yanapanqaku. Chayna kananpaqmi Leviy aylluta kamachinki”,+ nispa.

9 Egipto nacionmanta Israelpa mirayninkunapa lluqsimusqanku iskay kaq watapa punta kaq killanpim Jehova Diosqa Moisesta Sinai chunniqpi+ nirqa: 2 “Israelpa mirayninkunaqa kamachisqay punchawpim+ pascuata yuyarinanku.+ 3 Kay killapa 14 kaq punchawninpim inti siqaykuyta ruwananku. Chaytaqa pascua punchawpaq kamachikuykunaman hinam ruwananku”, nispa.+

4 Hinaptinmi Moisesqa Israelpa mirayninkunata nirqa pascuata ruwanankupaq. 5 Chaymi paykunaqa chay killapa 14 punchawninpi inti siqaykuyta pascuata ruwarqaku. Paykunaqa Sinai chunniqpim chaytaqa ruwarqaku Moisesta Jehova Dios kamachisqanman hina.

6 Wañusqa runata llachparusqankuraykum wakin runakunañataq pascua ruwayta mana atirqakuchu.+ Chaymi Moisesmanwan Aaronman rispanku+ nirqaku: 7 “Wañusqatam llachparuniku, ¿atiymankuchu wakinku hina Jehova Diospaq pascua ruwayta?”, nispa.+ 8 Hinaptinmi Moisesñataq nirqa: “Suyaykuwaychik, Jehova Diostayá tapuramusaq”, nispa.+

9 Hinaptinmi Jehova Diosqa Moisesta nirqa: 10 “Israelpa mirayninkunatayá niy: ‘Qamkunamanta utaq miraynikichikmanta pipas wañusqata llachparuspa ñuqapaq qachachasqa hina* kaspanpas+ ruwananmi ñuqa Jehova Diospaq pascuataqa, ruwanantaqmi mayman illaq runapas. 11 Chaytaqa ruwananku qatiqnin killapa+ 14 kaq punchawninpi inti siqaykuytam. Mikunankutaqmi mana levadurayuq tantatapas hinaspa qatqi qurakunatapas.+ 12 Manam paqarintinpaqqa imapas puchunanchu,+ manataqmi carneropa tulluntaqa pakinaykichikchu.+ Kamachisqayman hinam chaykunataqa ruwanaykichik. 13 Pipas wañusqata mana llachpachkaspa hinaspa huklawta mana richkaspa pascuata mana ruwaqmi ichaqa wañuchisqa kanqa.+ Ñuqa Jehova Diospa kamachisqay punchawpi mana ruwasqanraykum wañuchisqa kanqa.

14 Huklaw llaqtayuqpas qamkunawan kuskam pascuataqa ruwanan,+ chaytaqa ñuqa Jehova Diospa kamachisqayman hinam ruwanan.+ Kamachisqayqa chaynallam qamkunapaqpas hinaspa huklaw llaqtayuqkunapaqpas’”, nispa.+

15 Diospa carpanta sayachisqanku punchawmi+ carpapa hawanman puyu tiyaykurqa, tutaykuqmanta achikyanankamañataqmi+ kamachikuykunata waqaychana carpapa* hawanpi nina hina puyu karqa. 16 Chaynam karqa sapa punchaw hinaspa sapa tuta.+ 17 Diospa carpanpa hawanmanta puyu huqarikuyta qallaykuptinmi Israelpa mirayninkunaqa astakuyta qallaykuqku,+ puyu sayaruptinñataqmi Israelpa mirayninkunaqa carpankuta sayachiqku.+ 18 Jehova Diospa kamachisqanman hinam astakuqku, Jehova Diospa kamachisqanman hinataqmi maypipas samaqku.+ Diospa carpanpa hawanpi puyu hinalla sayaptinqa paykunapas hinallapim kaqku. 19 Diospa carpanpa hawanpi puyu achka punchaw kaptinqa Israelpa mirayninkunaqa Jehova Diosta kasukuspankum hinallapi kaqku.+ 20 Wakinpiqa achka punchawmi puyuqa Diospa carpanpa hawanpi kaq. Paykunaqa Jehova Diospa kamachisqanman hinam astakuqku, Jehova Diospa kamachisqanman hinataqmi maypipas samaqku. 21 Wakinpim puyuqa tutaykuqmanta achikyaqkamalla sayaq. Achikyaruptin puyu huqarikuyta qallaykuptinñataqmi kaqmanta astakuqku. Punchaw utaq tuta kaptinpas puyu huqarikuptinqa astakuqkum.+ 22 Diospa carpanpa hawanpi chay puyu iskay punchaw, huk killa utaq unay kaptinqa Israelpa mirayninkunaqa hinallapim kaqku. Puyu huqarikuptinñataqmi astakuyta qallaykuqku. 23 Jehova Diospa kamachisqanman hinam samaqku, Jehova Diospa kamachisqanman hinataqmi astakuqkupas. Chaynatam Jehova Diospa kamachisqanta kasukurqaku, kasukurqakuqa Moiseswan Jehova Diospa kamachisqantam.

10 Jehova Diosmi Moisesta nirqa: 2 “Qullqimantayá iskay cornetillata ruway,+ chaytaqa martillowan takaspam ruwanki. Chayqa kanqa Israelpa mirayninkunata huñunaykipaqmi hinaspa samasqankumanta lluqsichinaykipaqmi. 3 Chay iskaynin cornetillata pukuptinkum lliw runakuna huñunakamunqaku carpaypa punkunman.+ 4 Hukllanta pukuptinkuñataqmi 1.000 runakunata kamachiqkunalla huñunakamunqaku.+

5 Lluqsinankupaqñataqmi tipi-tipita cornetillata waqachinanku, hinaptimi intipa qispimunan lawpi kaq+ kimsa ayllukuna samasqankumanta lluqsiyta qallarinqaku. 6 Kaqmanta tipi-tipita waqachiptinkuñataqmi carpaypa alliq* lawninpi* kaq+ kimsa ayllukuna lluqsiyta qallarinqaku. Chayna tipi-tipita waqachiptinkum carpapa sapa lawninpi kaq kimsa ayllukuna lluqsiyta qallarinqaku.

7 Llapanku huñunakunankupaqmi ichaqa mana tipi-tipitachu waqachinanku.+ 8 Cornetillakunataqa pukunanku sacerdote Aaronpa mirayninkunallam.+ Aaronpa mirayninkunalla pukunankupaq kamachikuyqa una-unaypaqmi kanqa.

9 Yachasqaykichikman* huklaw nacionniyuq runakuna wañuchisunaykichikpaq hamuptinqa, cornetillakunatam peleanapaq hina pukunaykichik.+ Hinaptinmi ñuqa Jehova Diosqa chiqnisuqnikichik runakunamanta harkaykusqaykichik.

10 Cornetillataqa pukunaykichiktaqmi kusirikunaykichik hatun huñunakuykunapipas, sapa killapa qallariyninpipas,+ kañanapaq animalta quspaykichikpas+ hinaspa ñuqawan hawkalla kasqaykichikrayku animalta quspaykichikpas.+ Chaynapim mana qunqasqaykichikchu. Ñuqaqa Jehova Diosnikichikmi kani”,+ nispa.

11 Chaymantam iskay kaq watapa iskay kaq killanpi hinaspa chay killapa 20 kaq punchawninpi,+ sayanpa puyuqa Diospa kamachikuyninkunata waqaychana carpapa* hawanmanta huqarikuyta qallaykurqa.+ 12 Chaymi Israelpa mirayninkunaqa imayna lluqsinankuman hina Sinai chunniqmanta riyta qallaykurqaku,+ hinaptinmi puyuqa sayarurqa Paran sutiyuq chunniqpi.+ 13 Chaynatam wamaqllaraq lluqsirqaku Moisesman Jehova Diospa kamachisqanman hina.+

14 Puntatam lluqsirqa Juda ayllu hinaspa paywan kaq iskay ayllukuna. Juda ayllupi kamachiqmi karqa Aminadabpa churin Nason.+ 15 Isacar ayllupi+ kamachiqmi karqa Zuarpa churin Natanael. 16 Zabulon ayllupi+ kamachiqñataqmi karqa Helonpa churin Eliab.

17 Diospa carpanta paskaruptinkum+ Guersonpa hinaspa Meraripa mirayninkuna+ chay carpata apaspanku lluqsirqaku.

18 Chaymantam lluqsirqa Ruben ayllu hinaspa paywan kaq iskay ayllukuna. Ruben ayllupi kamachiqmi karqa Sedeurpa churin Elizur.+ 19 Simeon ayllupi+ kamachiqmi karqa Zurisadaipa churin Selumiel. 20 Gad ayllupi+ kamachiqñataqmi karqa Deuelpa churin Eliasaf.

21 Paykunapa qipanmanmi lluqsirqaku Koatpa mirayninkuna,+ paykunam qipirqaku carpapi kaq tukuy imakunata. Paykuna chayanankupaqqa carpaqa ñam sayachisqaña kanan karqa.

22 Chaymantañataqmi lluqsirqa Efrain ayllu hinaspa paywan kaq iskay ayllukuna. Efrain ayllupi kamachiqmi karqa Amiudpa churin Elisama.+ 23 Manases ayllupi+ kamachiqmi karqa Pedazurpa churin Gamaliel. 24 Benjamin ayllupi+ kamachiqñataqmi karqa Guideonipa churin Abidan.

25 Paykunapa qipanmanñataqmi lluqsirqa Dan ayllu hinaspa paywan kaq iskay ayllukuna, paykunam llapankumanta qipata lluqsirqaku. Dan ayllupi kamachiqmi karqa Amisadaipa churin Ayezer.+ 26 Aser ayllupi+ kamachiqmi karqa Ocranpa churin Paguiel. 27 Neftaliy ayllupi+ kamachiqñataqmi karqa Enanpa churin Aira. 28 Chaynatam Israelpa mirayninkunaqa lluqsiqku sapa astakusqankupi.+

29 Chaymantam Moisesqa suedron Reuelpa*+ churin Hobabta nirqa: “Jehova Diospa quwananku allpamanmi+ richkaniku, ñuqaykuwanyá riy.+ Ñuqaykuwan rispaykiqa allinllam kanki, Jehova Diosmi niwarqaku yanapawanankumanta”, nispa.+ 30 Chaymi Hobabqa nirqa: “Manam riymanchu, llaqtaypi aylluykunapa kasqanmanmi kutisaq”, nispa. 31 Hinaptinmi Moisesqa nirqa: “Amayá saqillawaykuchu, qamqa allintam riqsinki chunniqpi maypi samanaykutapas. Qamyá pusallawayku. 32 Ñuqaykuwan riptikiqa+ Jehova Diospa imapas quwasqankutam qanmanpas qusqaykiku”, nispa.

33 Chaynapim Israelpa mirayninkunaqa Jehova Diospa urqunmanta+ lluqsirqaku, chaymanta lluqsispankum kimsa punchaw rirqaku Jehova Diospa baulninta*+ apaspanku. Rirqakuqa samanankupaq sitiota tarinankukamam.+ 34 Chay samasqankumanta riyta qallaykuptinkum Jehova Diospa puyunqa+ paykunata pusarqa.

35 Diospa baulninta sapa kuti lluqsichiptinkum Moisesqa niq: “Jehova Dioslláy, hatarimuyá,+ chiqnisuqnikikunaqa chiqichisqayá kachunku, qanmantayá ayqikuchunku”, nispa. 36 Samachiptinkuñataqmi Moisesqa niq: “Jehova Dioslláy, mana yupay atina Israelpa mirayninkunataqa amayá saqirullawaykuchu*”, nispa.+

11 Chayna kachkaptinmi Israelpa mirayninkunaqa Jehova Diospaq piñakuspa rimayta qallaykurqaku. Chaytam Jehova Dios uyarirurqa, hinaspanmi llumpayta piñakuspan Jehova Diosqa ninata paykunaman kachaykurqa, hinaptinmi ruparurqa lluqsichkaqña wakin runakunata. 2 Chaymi runakunaqa qaparispanku Moisesta qayakurqaku yanapaykunanpaq. Moisesñataqmi Jehova Diosta mañakurqa,+ hinaptinmi ninaqa chinkarurqa. 3 Chayraykum chay kasqankuta suticharqaku Taberawan*. Chaynataqa suticharqaku paykunapa kasqanman ninata Jehova Dios kachaykamusqanraykum.+

4 Chaypi kaq huklaw llaqtayuq runakunam+ munasqallanku mikuyta munarqaku.+ Chaymi Israelpa mirayninkunapas waqaspa nirqaku: “¡Piraq aychata quykuwachwan mikunanchikpaq!+ 5 ¡Maypiraq Egiptopi mana qullqillapaq mikusqanchik challwakuna! ¡Maypiraq pepinokuna, sandillakuna, cebollakuna hinaspa ajoskuna!+ 6 Kunanqa manaña kallpayuqmi kachkanchikpas. Diospa quwasqanchik kay ‘maná’ sutiyuq mikuyllatañam kaypiqa tarinchikpas”, nispa.+

7 Diospa qusqan “maná” sutiyuq mikuyqa+ rikchakurqa culandropa mugunmanmi,+ hinaspapas karqa miski asnaq sachapa wiqin kaqllam. 8 Chay mikuyta huñuspankum Israelpa mirayninkunaqa maraypi utaq muchkapi kutaqku. Hinaspankum timpuchiqku utaq ruyru tantata ruwaqku.+ Chay tantaqa karqa aceitewan ruwasqa llaspa tanta hina miskillañam. 9 Tutan sullamuptinmi Diospa qusqan “maná” sutiyuq mikuyqa sullapa hawanman wichimuq.+

10 Chaymantam Moises yacharurqa carpankupa punkunpi sapa ayllukunapa waqasqanta. Chaywanmi Jehova Diosqa llumpayta piñakurqa,+ Moisespas chayna ruwasqankuwanmi llumpayta hukmanyarurqa. 11 Chaymi Jehova Diosta nirqa: “¿Imanasqataq ñakarichillawachkanki? ¿Imanasqataq ñuqawan piñakurunki? ¿Imatataq ruwaruni llapallan runakunapa sasachakuyninta saqiykuwanaykipaqqa?+ 12 ¿Ñuqaqa kay runakunapa taytanchu karqani? ¿Ñuqapaqa churiykunachu karqa, chaynapi wawata uywaq runa hina qunayki allpaman marqayniypi apanaypaq?+ 13 ¿Maymantataq kaynaña runapaqqa aychata hurqumusaq? Paykunaqa waqastinmi ñuqaman hamunku: ‘¡Aychata quwayku mikunaykupaq!’, nispanku. 14 Manam sapallayqa atiymanchu kay runakuna pusaytaqa. Kayqa llumpay sasam ñuqapaqqa.+ 15 Sapallay tukuy chayta ruwanay kaptinqa wañurachillawayñayá.+ Yanapawanayki kaptinqa amañataqyá ñakarichiwaychu”, nispa.

16 Hinaptinmi Jehova Diosqa Moisesta nirqa: “Israelpa mirayninkunapi punta apaqkunamantayá+ 70 qarikunata akllaruy. Hinaspayá paykunawan kuska carpayman riy. 17 Chaypim hamuspay+ qanwan rimasaq.+ Hinaspaymi qanman hina paykunamanpas atiyta qusaq.+ Chaynapim paykuna yanapasunki amaña sapallayki ñakarinaykipaq.+ 18 Chaynaqa, runakunatayá niy: ‘Paqarinmi aychata mikunkichik, chaypaqyá chuyanchakuychik.+ Ñuqa Jehova Diosmi waqasqaykichikta hinaspa “¡piraq aychata quykuwachwan mikunanchikpaq! Egiptopiqa allinmi karqanchik”+ nisqaykichikta uyariruni.+ Chaymi ñuqa Jehova Diosqa aychata qusqaykichik mikunaykichikpaq.+ 19 Aychataqa mikunkichik manam huk punchawllachu, iskay punchawllachu, pichqa punchawllachu, chunka punchawllachu nitaq 20 punchawllachu. 20 Aswanqa huk killapunim aminaykichikkama hinaspa millakunaykichikkama mikunkichik.+ Chaynam kanqa qamkunawan kachkaptiy ñuqa Jehova Diosta qipanchawasqaykichikrayku. Qamkunaqa waqaspaykichikraqmi nirqankichik: “¡Imapaqraq Egipto nacionmanta lluqsimurqanchik!”’”, nispa.+

21 Chaymi Moisesñataq nirqa: “Qanmi nichkanki: ‘¡Killapunim aychata mikunqaku!’, nispa. Ichaqa yuyayniyuq qarikunallaraqtaq kaypiqa 600.000+ kachkanku. 22 ¿Maypitaq tariyman achkallay-achka ovejakunatawan vacakunata kaynaña runaman mikuchinaypaq? Lamar quchamanta llapallan challwakunata hapiramuspaypas manachá kaynaña runamanqa haypachiymanchu”, nispa.

23 Hinaptinmi Jehova Diosñataq Moisesta nirqa: “¿Imataq ñuqa Jehova Diospaq mana ruway atinay kanman?+ Kunanmi yachanki nisqaykuna chayna utaq mana chayna kasqanta”, nispa.

24 Chaymantam Moisesqa Jehova Diospa lliw nisqanta runakunaman willarqa. Hinaspapas 70 punta apaqkunata huñuruspanmi Diospa carpanpa muyuriqninpi sayachirqa.+ 25 Hinaptinmi Jehova Diosqa puyumanta Moisesta rimapayamurqa,+ hinaspanmi Moisesman hina atiyta qurqa+ 70 punta apaqkunamanpas. Chaymi paykunaqa Diosmanta willakuqkuna* hinaña rimayta qallaykurqaku,+ ichaqa chay kutillapim chaynataqa rimarqaku.

26 Moisespa akllasqan punta apaqkunamantam Eldad hinaspa Medad sutiyuq runakuna Diospa carpanman mana rirqakuchu. Ichaqa Dios atiyta quykuptinmi paykunapas Diosmanta willakuqkuna hinaña rimayta qallaykurqaku. 27 Hinaptinmi Moisesman kallpaykuspan huk musu nirqa: “¡Eldadwan Medadmi Diosmanta willakuqkuna hinaña rimachkanku!”, nispa. 28 Hinaptinmi Nunpa churin Josuey+ Moisesta nirqa: “¡Taytáy Moises, amayá wakna rimanankutaqa saqiychu!”, nispa.+ Josueyqa musu kasqanmantapacham Moisespa yanapaqnin karqa. 29 Chaynata niptinmi Moisesñataq nirqa: “¿Imanasqataq ñuqamanta llakikunki? Ñuqaqa munaymanmi llapallan runakunaman Jehova Dios atiyta quykuptin Jehova Diosmanta willakuqkunaña kanankuta”, nispa. 30 Hinaspanmi Moisesqa Israelpa mirayninkunapi punta apaqkunapiwan runakunapa kasqanman kutirqaku.

31 Chaymantam Jehova Diosqa nisyu wayrawan aparachimurqa lamar qucha lawmanta achkallay-achka taksa yutuchakunata*. Hinaptinmi chayaramurqa samasqankupa muyuriqninman.+ Chay yutuchakunaqa muyuriqninkupim kakurqa huk punchaw puriykama pampatapas yaqa huk metro* sayayta tapaykuq. 32 Chaymi Israelpa mirayninkunaqa chay punchaw tutantin hinaspa paqarinnintin punchawpas huñurqaku chay yutuchakunata. Sapa runam huñurqa chunka saco huntata*. Hinaspankum chakichirqaku carpankupa muyuriqninpi. 33 Chaymi Jehova Diosqa chay aychata manaraqpas mikuyta tukuchkaptinku llumpayta piñakururqa. Hinaspanmi Jehova Diosqa Israelpa mirayninkunata achkallataña wañurachirqa.+

34 Chaypim mikuylla munaq runakunata pamparqaku,+ chayraykum chayta suticharqaku Kibrot-hataavawan*.+ 35 Chaymantam Israelpa mirayninkunaqa Kibrot-hataava lawmanta lluqsirqaku Hazerot lawman, hinaspankum chaypi samarqaku.+

12 Chaymantam Mirianwan Aaronqa Moisesmanta mana allinta rimarqaku Cus kasta warmiwan casarakusqanrayku.+ 2 Paykunam nirqaku: “¿Moisesllawanchu Jehova Diosqa imatapas willachiwanchik? ¿Manachu ñuqanchikwanpas Diosqa willachirqa?”, nispa.+ Chayna rimasqankutam Jehova Diosqa uyarichkarqa.+ 3 Moisesqa pi runamantapas aswan llampu sunqum karqa.+

4 Chayna rimachkaptinkum Jehova Diosqa Moisesta, Aaronta hinaspa Miriamta nirqa: “Kimsaykichik carpayman hamuychik”, nispa. Hinaptinmi kimsanku rirqaku. 5 Chaymi Jehova Diosqa carpanpa punkunman sayanpa puyupi uraykamuspan+ Aarontawan Miriamta qayarqa. Hinaptinmi paykunaqa asuykurqaku. 6 Chaypim Dios nirqa: “Kay nisqaytayá uyariwaychik. Qamkunamanta pipas ñuqa Jehova Diosmanta willakuq* kaptinqa paymanmi pim kasqayta musquypi hina* riqsichikuyman,+ sueñoyninpitaqmi rimapayaymanpas.+ 7 Yupaychaqniy Moiseswanmi ichaqa mana chaynatachu rimani. Lliw runaykunata* nanachikunanpaqmi paytaqa akllaruni.+ 8 Kikinwanpunim Moiseswanqa rimani.+ Mana pakaspam paymanqa lliwta willani. Paypa qayllanpipas ñuqa Jehova Diosqa rikurinim. Hinaptinqa, ¿imanasqataq qamkunaqa mana manchakuspa Moisesmanta mana allinkunata rimarqankichik?”, nispa.

9 Chaynata nispanmi Jehova Diosqa piñasqallaña pasakurqa. 10 Puyupas carpapa hawanmantam huqarikururqa... Hinaptinmi riti hina yuraqllaña lepra unquy Miriampa cuerponpi rikurirurqa.+ Chayna kasqantam Aaron rikururqa,+ 11 hinaspanmi Moisesta nirqa: “¡Taytalláy, amayá chay rimasqaykumantaqa ñakarichillawaykuchu! Muspaypi hinam rimarullarqaniku. 12 ¡Amayá Miriamtaqa saqiruychu ismurichkaq aychayuq wañusqa naceq wawata hinaqa!”, nispa. 13 Hinaptinmi Moisesqa Jehova Diosta qayakuspa nirqa: “¡Diosnilláy, ama hina kaspayá hampiykullay!”, nispa.+

14 Chaymi Jehova Diosqa Moisesta nirqa: “Sichum taytan uyanpipuni tuqaykuptinqa, ¿manachu qanchis punchaw pinqaypi kanman? Chaynaqa, qanchis punchawyá huklawman sapaqchasqa kachun.+ Chaymantañayá qamkunaman hukllawakamuchun”, nispa. 15 Chaynapimá Miriamqa samasqankumanta huklawpi qanchis punchaw karqa.+ Miriam kutimunankamam runakunaqa hinallapi karqaku. 16 Chaymantañam Israelpa mirayninkunaqa Hazerot lawmanta lluqsispanku+ Paran chunniqpi samarqaku.+

13 Jehova Diosmi Moisesta nirqa: 2 “Israelpa mirayninkunatayá kamachiy Canaan allpata qawamunankupaq, chay allpatam qamkunaman qusqaykichik. Sapa ayllumantam rinqa riqsisqa kaq runa”,+ nispa.

3 Chaymi Moisesqa Jehova Diospa nisqanman hina samasqanku Paran chunniqmanta runakunata kacharqa.+ Llapankum karqaku Israelpa mirayninkunapi riqsisqa kaq runakuna. 4 Chay kachasqan runakunam karqa: Ruben ayllumanta Zacurpa churin Samua, 5 Simeon ayllumanta Horipa churin Safat, 6 Juda ayllumanta Jefuneypa churin Caleb,+ 7 Isacar ayllumanta Joseypa churin Igal, 8 Efrain ayllumanta Nunpa churin Hosea,+ 9 Benjamin ayllumanta Rafupa churin Palti, 10 Zabulon ayllumanta Sodipa churin Gadiel, 11 Joseypa miraynin+ Manases ayllumanta+ Susipa churin Gadi, 12 Dan ayllumanta Guemalipa churin Amiel, 13 Aser ayllumanta Miguelpa churin Setur, 14 Neftaliy ayllumanta Vofsipa churin Nabi, 15 Gad ayllumantañataq Makipa churin Gueuel. 16 Paykunatam Moises kacharqa Canaan allpata qawaq rinankupaq. Nunpa churin Hoseatam Moisesqa suticharqa Josueywan*.+

17 Canaan allpata qawamunankupaq riq runakunatam Moises nirqa: “Kaymantam rinkichik Negueb qichwaman, chaymantañataqmi urquntakama rinkichik.+ 18 Hinaspam allpa imayna kasqanta sumaqta qawamunkichik.+ Yachamunkichikmá chaypi yachaq* runakuna kallpasapa kasqanta utaq mana kallpasapa kasqanta, achka kasqanta utaq aslla kasqanta, 19 chay yachasqanku allpa imayna kasqanta, llaqtakuna murallasqa kasqanta utaq mana murallasqa kasqanta, 20 chaypi allpakuna kawsaypa qispinan kasqanta utaq mana qispinan kasqanta,+ sachakuna kasqanta utaq mana kasqantapas. Chaymantapas, ama manchakuspamá+ apamunkichik chaypi imapas wiñaqta”, nispa. Chay risqanku punchawkunaqa karqa uvaspa puquyta qallarisqan tiempom.+

21 Chaymi Moisespa kachasqan runakunaqa allpata qawamurqaku Zin chunniqmanta+ Reob llaqtakama,+ chayqa karqa Lebo-hamatpa* hichpanmi.+ 22 Negueb qichwaman rispankum chayarurqaku Hebron llaqtaman.+ Chaypim yacharqaku Anacpa+ churin Aiman, Sesai hinaspa Talmai.+ Chay Hebron llaqtaqa rikurirqa Egiptopi Zoan llaqtapa rikurisqan qanchis wata ñawpaqtaraqmi. 23 Allpa qawaq riqkunaqa Escol wayquman chayaruspankum+ uvasta sartantinta pallarurqaku. Chaytam kaspiman warkuykuspanku iskay runakuna hombromurqaku. Apamurqakutaqmi granadakunatapas chaynataq higoskunatapas.+ 24 Uvasta pallasqankuraykum chay wayquta suticharqaku Escol* wayquwan.+

25 Allpata qawamuqkunaqa 40 punchawmantam+ kutimurqaku. 26 Hinaspankum Cades lawpi+ Paran sutiyuq chunniqpi Moisespa, Aaronpa hinaspa Israelpa mirayninkunapa kasqanman chayaramuspanku lliwta willakurqaku, qawachirqakutaqmi apamusqankutapas. 27 Chaymantam Moisesman willarqaku: “Niwasqaykiku allpamanmi chayarurqaniku. Chay allpaqa kasqa tukuy imapa kanan allpam*,+ kayqaya apamusqaykupas.+ 28 Chaypi yachaqkunam ichaqa kallpasapakuna kasqaku, murallasqa llaqtakunapas hatu-hatunmi kasqa. Chaypitaqmi rikumurqaniku Anac runakunatapas.+ 29 Negueb qichwapim+ Amalec runakuna+ yachasqaku. Urqu lawpiñataqmi yachasqaku Het runakuna, Jebus runakuna+ hinaspa Amorreo runakuna.+ Lamar quchapa waqtanpi+ hinaspa Jordan mayupa patanpiñataqmi yachasqaku Canaan runakuna”,+ nispa.

30 Calebñataqmi runakunata nirqa: “Ama manchakuychikchu, rispanchikyá chay allpakunata hapikamusunchik, chaypi yachaq runakunataqa munaychakusunchikmi”, nispa.+ 31 Hinaptinmi paywan riq runakunañataq nirqaku: “Manam richwanchu, chaypi yachaq runakunaqa ñuqanchikmantapas aswan kallpasapakunam kasqaku”, nispa.+ 32 Paykunaqa Israelpa mirayninkuna manchakunankupaqmi kaynataraq nirqaku:+ “Chay allpakunapi yachaqkunaqa hatunkaray runakunam hinaspa llaqtamasinkuta wañuchiq runakunam kasqaku.+ 33 Chaypim rikumurqaniku Anacpa churin+ manchakuypaq runakunata. Paykunaqa kanku hatunkaray runakunapa* mirayninkunam. Chay runakunapa qayllanpiqa chilliku sayayllam karqaniku”, nispa.

14 Hinaptinmi Israelpa mirayninkunaqa qaparispa tukuy tuta waqarqaku.+ 2 Hinaspam Moisesmantawan Aaronmanta mana allinta rimaspanku nirqaku:+ “¡Amalaya Egiptopi wañukamuchwan karqa! ¡Amalaya chunniqpipas wañukamuchwan karqa! 3 ¿Imapaqtaq Jehova Diosqa kay allpaman pusamuwarqanchik? ¿Wañunanchikpaqchu?+ Churinchikkunatawan warminchiktam chiqniwaqninchik runakuna pusakunqaku.+ ¡Kaypiqa manam allinchu kanchik, kutikusun Egipto nacionman!”,+ nispa. 4 Kaynataraqmi ninakurqaku: “¡Kamachiwaqninchikta huktaña akllaspayá Egiptoman kutikusun!”, nispa.+

5 Chaynata niptinkum Moiseswan Aaronqa runakunapa ñawpaqninpi qunqurakuspa pampaman kumuykurqaku. 6 Hinaptinmi allpata qawaq riq Josueywan+ Caleb+ pachankuta llikikurqaku. Josueyqa karqa Nunpa churinmi, Calebñataqmi Jefuneypa churin. 7 Paykunam llapallankuta nirqaku: “Chay qawamusqayku allpaqa allin allpam.+ 8 Jehova Diosqa ñuqanchikwan kasqanraykum chay allpataqa quwasunchik. Chay allpaqa tukuy imapa kanan allpam*.+ 9 Chaynaqa, amayá Jehova Diosmantaqa yanqakunata rimaychikchu. Amataqyá chay runakunataqa manchakuychikchu,+ paykunataqa chayllam wañurachisunchik*. Paykunataqa manam pipas yanapanqachu, ñuqanchiktam ichaqa Jehova Dios yanapawasun.+ Chaynaqa, amayá manchakuychikchu”, nispa.

10 Chaywanpas runakunaqa Josueytawan Calebtam rumiwan chuqaparuyta munarqaku.+ Hinaptinmi Jehova Diospa kanchaynin carpapa hawanpi rikuriykurqa.+

11 Chaymantam Jehova Diosqa Moisesta nirqa: “¿Haykapikamataq kay runakunaqa mana kasuwanqachu?+ ¿Haykapikamataq iskayrayanqaku paykunapaq milagrokunata ruwachkaptiypas?+ 12 Paykunatam manchakuypaq unquywan wañuchisaq, hinaspam qanmanta hatun nacionta rikurichisaq”, nispa.+

13 Hinaptinmi Moisesqa Jehova Diosta nirqa: “Egiptomanta atiynikiwan hurqumusqayki runaykikunata chaynata ruwaptikiqa Egipto runakunam yacharunqaku.+ 14 Hinaspankum Canaan allpapi runakunaman willaykunqaku. Jehova Dioslláy, paykunaqa yachankum ñuqaykuwan kasqaykita+ hinaspa kikiykuwan rimasqaykita.+ Qanmi Jehova Diosniyku kanki, puyuykipas ñuqaykuwanmi kachkan. Qamtaqmi punchawpi pusawankiku sayanpa puyuwan, tutanñataqmi pusawankiku achkiq sayanpa ninawan.+ 15 Sichu llapallan runakunata wañurachiptikiqa huklaw nacionmanta runakunachá ninqaku: 16 ‘Qunan allpaman mana pusayta atisqanraykum Jehova Diosqa chunniqpi llapallanta wañurachin’,+ nispa. 17 Chaynaqa Jehova Dioslláy, nisqaykiman hinayá tukuy atiyniyuq kasqaykita riqsichikuy. Qamqa nirqankim: 18 ‘Ñuqa Jehova Diosqa kani mana chaylla piñakuqmi, imaña kaptinpas ancha kuyakuqmi,+ mana allin ruwaqta pampachaykuqmi. Mana kasukuqtam ichaqa mana pampachanichu, chaynataqmi taytanpa huchanmanta churinkunata, willkankunata hinaspa paykunapa churinkutapas mana pampachasaqchu’, nispa.+ 19 Chaynaqa, imaña kaptinpas hinalla kuyakuq kasqaykiraykuyá pampachaykullawayku Egiptopi kasqaykumanta kunankama pampachawasqaykikuman hina”, nispa.+

20 Chaymi Jehova Diosqa nirqa: “Mañakuwasqaykiman hinam ñuqaqa pampachasqaykichik.+ 21 Hinaspapas sutiypim nikichik ñuqa Jehova Dios kasqayta tukuy kay pachapi yachanankumanta.+ 22 Ichaqa Egiptopiwan chunniqpi tukuy atiyniyta hinaspa milagrokuna ruwasqayta qawaspaykichikpas+ achka kutitam* mana kasuwarqankichikchu,+ 23 Chaymi abueloykichikman qunaypaq nisqay allpataqa mana rikuyllapas-rikunkichikchu. Manamá rikunkichikchu.+ 24 Yupaychawaqniy Calebtam+ ichaqa nisqay allpaman pusasaq, mirayninkunapas chay allpapim yachanqaku*.+ Calebqa tukuy sunqunwanmi nisqaykunata kasukurqa. Payqa manam wakinkuna hinachu karqa. 25 Kunanqa Amalec runakunam hinaspa Canaan runakunam+ chay qichwapiqa yachachkanku. Chaynaqa paqarinyá chunniqman kutiychik Puka lamar quchaman riq ñanninta”,+ nispa.

26 Chaymantam Jehova Diosqa Moisestawan Aaronta nirqa: 27 “¿Haykapikamataq Israelpa mirayninkunaqa ñuqamanta mana allinta rimanqaku?+ Mana allinkuna rimasqankutam uyariruni.+ 28 Paykunatayá niy: ‘Ñuqa Jehova Diospunim nikichik, rimasqaykichikmi kikillaykichikman chayasunkichik.+ 29 Kay chunniqpim wañunkichik+ 20 wataykichikmanta hanayman haykam yupasqa kaqkuna.+ Wañunkichikmá haykam mana allinkunata rimaqkuna. 30 Qamkunaqa manam yaykunkichikchu qunay allpamanqa. Calebwan Josueymi ichaqa chay allpaman yaykunqaku.+

31 Qamkunam nirqankichik: “Chiqniwaqninchik runakunam churinchikkunata apakunqaku”, nispa.+ Ichaqa churikichikkunam chay wischupakusqaykichik allpapiqa yachanqaku.+ 32 Qamkunañataqmi hina kay chunniqpi wañunkichik. 33 Churikichikpas 40 watam chunniqpi michiqkuna kanqaku,+ michiqkunaqa kanqaku qamkuna mana kasukuspa qipanchawasqaykichikraykum. Chaynam kanqa qamkuna wañunaykichikkama.+ 34 Chaynaqa, allpata qawaq 40 punchaw+ risqaykichikman hinam, mana kasukusqaykichikmanta 40 wata sasachakuypi kankichik. Huk punchawmi huk watawan tupan.+ Chaynapim yachankichik mana kasukusqaykichikqa mana allin kasqanta.

35 Ñuqa Jehova Diosmi chaynata nini. Ñuqamanta mana allinta rimasqaykichikraykum kay chunniqpi wañuspa tukunkichik.+ 36 Wañunqakutaqmi allpa qawaq riqkunamanta mana allinta willakuqkunapas, chayna willakusqankuraykum runakunaqa Moisesmanta rimayta qallaykurqaku.+ 37 Chaynapim ñuqa Jehova Dios qawachkaptiy chay mana allinta willakuq runakunaqa wañunqaku.+ 38 Chay allpa qawamuq runakunamantam ichaqa mana wañunqakuchu Nunpa churin Josueywan Jefuneypa churin Caleb’”, nispa.+

39 Chaynata Moises niptinmi Israelpa mirayninkunaqa llumpay llakisqa karqaku. 40 Chaymantam tutapayta hatarispanku urquman qispinankupaq ninakurqaku: “Huchallikurunchikmi, ichaqa kayqaya kaypi kachkanchik Jehova Diospa quwananchik allpaman rinanchikpaq”, nispa.+ 41 Moisesñataqmi chay runakunata nirqa: “¿Imanasqataq Jehova Diospa kamachisqantaqa mana kasukunkichikchu? Kayqa manam allinchu. 42 Ama riychikchu, Jehova Diosqa manam chiqnisuqnikichik runakunamantaqa harkasunkichikchu.+ 43 Chaypiqa Amalec runakuna hinaspa Canaan runakunam suyasuchkankichik wañuchisunaykichikpaq.+ Jehova Diosta qipanchasqaykichikraykum Jehova Diosqa mana yanapasunkichikchu”,+ nispa.

44 Chaywanpas paykunaqa mana uyarikuspankum urquman hinalla qispirqaku.+ Moisesmi ichaqa mana rirqachu, Jehova Diospa baulninpas* hinallapim karqa.+ 45 Chay urquman riqkunamanta wakintam Amalec runakunawan Canaan runakuna wañurachimurqaku, wakintañataqmi qatirurqaku Horma lawkama.+

15 Jehova Diosmi kaqmanta Moisesta nirqa: 2 “Israelpa mirayninkunatayá niy: ‘Yachanaykichikpaq* qunay allpaman yaykuspaykichikmi+ 3 ñuqa Jehova Diospaq miskillaña asnananpaq+ torota, ovejata utaq cabrata kañapuwankichik. Chaykunaqa kanmanmi ñuqa Jehova Diospaq kañasqa kananpaq qusqaykichikpas,+ kikikichikmanta tantiakuspa qusqaykichikpas, sunqumanta qusqaykichikpas+ utaq hatun huñunakuykunapi qusqaykichikpas.+ 4 Chaykunata ñuqa Jehova Diospaq quspaykichikqa, quwanaykichiktaqmi yaqa huk litro* aceitewan chapusqa iskay mati* harinatapas.+ 5 Quwanaykichiktaqmi yaqa huk litro vinotapas, chaytaqa quwanaykichik kañanapaq malta carnerotawan kuskatam.+ 6 Carnerota quwaspaykichikqa quwanaykichikmi litro masnin* aceitewan chapusqa tawa mati masnin* harinatapas. 7 Chaywan kuskatataqmi quwanaykichik litro masnin vinotapas, chayqa ñuqa Jehova Diospaqmi miskillaña asnaq kanqa.

8 Ichaqa ñuqa Jehova Diospaq kikikichikmanta tantiakusqaykichikta+ utaq hawkalla kasqaykichikmanta+ huk torota kañapuwanaykichikpaq quwaspaykichikqa,+ 9 chaywan kuskatam quwanaykichik yaqa iskay litro* aceitewan chapusqa yaqa qanchis mati* harinatapas.+ 10 Quwanaykichiktaqmi yaqa iskay litro vinotapas,+ chayqa ñuqa Jehova Diospaqmi miskillaña asnaq kanqa. 11 Chaynatam quwanaykichik sapa torota, sapa carnerota, sapa malta carnerota hinaspa sapa chivota. 12 Hayka animaltaña quwaspaykichikpas sapa animalmantam chaynata quwankichik. 13 Chaynatam Israelpa mirayninkunaqa quwanaykichik miskillataña asnananpaq ñuqa Jehova Diospaq animalta kañaspaykichikqa.

14 Qamkunawan yachaq huklaw llaqtayuq runakunapas utaq paykunapa mirayninkunapas ñuqa Jehova Diospaq animalta kañayta munaspankuqa hina chaynallatam ruwananku.+ Chay quwasqankuqa miskillataña asnaqmi. 15 Qamkunapaqpas chaynataq qamkunawan yachaq huklaw llaqtayuq runakunapaqpas hina chaynallam kamachikuyniyqa kanan. Chay kamachikuyqa una-unaypaqmi kanqa qamkunapaq hinaspa miraynikichikkunapaqpas. Qamkunapas hinaspa huklaw llaqtayuq runakunapas ñuqa Jehova Diospaqqa chaynallam kankichik.+ 16 Qamkunapaqpas chaynataq qamkunawan yachaq huklaw llaqtayuq runakunapaqpas kamachikuyniyqa chaynallam kanan, chaynallataqmi kanan ima sasachakuyta allichanaykichik kaptinpas’”, nispa.

17 Jehova Diosqa Moisestaqa nirqaraqmi: 18 “Israelpa mirayninkunatayá niy: ‘Yachanaykichikpaq qunay allpaman yaykuspaykichikmi 19 chay allpapi wiñaq kawsaykuna mikusqaykichikmanta+ ñuqa Jehova Diospaq wakinta quwankichik. 20 Quwanaykichikqa punta kaq ruru+ kutasqaykichikmanta ruwasqa uchkuyuq tantatam, chayqa kanan irapi cosechaspaykichik imayna quwasqaykichikman hinam. 21 Punta kaq ruru kutasqaykichikmanta qusqaykichiktaqa ñuqa Jehova Diospaqmi miraynikichikkunapas qunan.

22 Ichapas wakinpiqa ñuqa Jehova Diospa qusqay kamachikuykunata kasukuypi pantaruwaqchik. 23 Chay kamachikuykunataqa ñuqa Jehova Diosmi qamkunapaqpas hinaspa miraynikichikkunapaqpas kamachirqaykichik, chaykunataqa ñuqa Jehova Diosmi qallariymantapuni kamachirqaykichik. 24 Sichu pantaruspa qipataña chayraq yacharuspaykichikqa, llapallaykichikmi ñuqa Jehova Diospaq malta torota miskillaña asnananpaq kañapuwanaykichik. Chaytaqa kawsaytawan hinaspa vinotawan kuskatam quwanaykichik sapa kuti ruwakusqanman hina.+ Quwanaykichiktaqmi hucharayku huk chivochatapas.+ 25 Hinaptinmi sacerdoteqa pantarusqaykichikmanta pampachasqa kanaykichikpaq ruwasqanwan yanapasunkichik.+ Payqa yanapasunkichik ñuqa Jehova Diospaq kañasqa kananpaq quwasqaykichik ofrendawanmi hinaspa ñuqa Jehova Diospaq hucharayku quwasqaykichik ofrendawanmi. 26 Chaynapim pantasqaykichikrayku qamkunapas hinaspa qamkunawan yachaq huklaw llaqtayuq runakunapas pampachasqa kankichik.

27 Pipas mana yachastin pantaruspanqa manaraq watayuq cabrachatam quwanan. Chayqa kanan huchamanta quwasqan ofrendam.+ 28 Hinaptinmi chay pantaruq runapa huchan pampachasqa kananpaq ñuqa Jehova Diosman chay animalta sacerdote quwanqa.+ 29 Chaynaqa, mana yachastin pantaruptikichikqa, qamkunapaqpas chaynataq qamkunawan yachaq huklaw llaqtayuq runakunapaqpas kamachikuyqa hina chaynallam kanan.+

30 Ichaqa, Israelpa miraynin utaq huklaw llaqtayuq kaspapas yachachkastin huchallikuqqa+ wañuchisqam kanan. Wañuchisqaqa kanan ñuqa Jehova Diosta mana kasuwasqanraykum. 31 Ñuqa Jehova Diospa kamachisqayta mana kasukusqanraykum chay runaqa wañuchisqa kanan,+ kikinmi huchayuq wañunanpaqqa’”,+ nispa.

32 Chaymantam Israelpa mirayninkuna chunniqpi kachkaspanku huk runata tarirurqaku samana punchawpi* yanta huñukuchkaqta.+ 33 Hinaspam chay runata pusarurqaku Moisespa, Aaronpa hinaspa llapallan runakunapa kasqanman. 34 Chaymi chay runata wichqarurqaku+ paywan ima ruwaytapas mana yachaspanku.

35 Hinaptinmi Jehova Dios Moisesta nirqa: “Chay runaqa wañunanpunim,+ llapallaykichikmi karuman pusaspa rumiwan chuqapanaykichik”,+ nispa. 36 Chaymi llapallanku karuman pusaruspanku rumiwan chuqapaspa wañurachirqaku. Chaynataqa ruwarqaku Moisesta Jehova Diospa kamachisqanman hinam.

37 Jehova Diosqa Moisestaqa nirqaraqmi: 38 “Israelpa mirayninkunatayá niy: ‘Pachaykichikpa uray patanmi chillpi-chillpi kanan, hanayninñataqmi azul qaytuwan muyuriqninpi sirasqa kanan.+ Chaynam miraynikichikkunapapas kanan. 39 Chayta qawaspaykichikmi ñuqa Jehova Diospa kamachisqaykunata yuyarispa kasukunkichik.+ Amam sunquykichikpa nitaq ñawikichikpa munapayasqantaqa ruwankichikchu, chaynapi mana qipancharuwanaykichikpaq*.+ 40 Pachaykichikpi chay chillpi-chillpita qawaspaykichikmá kamachisqaykunata yuyarispa kasukunkichik, chaynapim ñuqapaq sapaqchasqa* runakuna kankichik.+ 41 Ñuqaqa Jehova Diosnikichikmi kani.+ Egipto nacionmanta hurqumusuqnikichik Jehova Diosnikichikmi kani’”,+ nispa.

16 Coreymi+ karqa Leviy ayllumanta+ Koatpa willkan+ hinaspa Izarpa+ churin. Coreymi Eliabpa churin+ Datanman, Abiranman hinaspa Pelezpa churin On sutiyuq runaman hukllawakururqa, paykunaqa Ruben ayllumantam+ karqaku. 2 Paykunam 250 riqsisqa kamachiqkunapiwan Moisesmanta mana allinta rimarqaku. Chay kamachiqkunaqa Israelpa mirayninkunamanta akllasqa runakunam karqaku. 3 Paykunam Moisestawan Aaronta nirqaku:+ “¡Qamkunataqa ñam amiruykikuña! Llapallanchikmi Diospa akllasqanqa kanchik,+ llapanchikwantaqmi Jehova Diosqa kachkan.+ Chaynaqa, ¿imanasqamá qamkunallaqa kamachinkichik Jehova Diospa runankunataqa?”, nispa.

4 Hinaptinmi Moisesqa qunqurakuspa pampakama kumuykurqa. 5 Chaymantam Moisesqa Coreyta hinaspa paywan kaqkunata nirqa: “Paqarinmi Jehova Dios akllanqa pim yupaychaqnin kasqanta+ hinaspa pim paypaq sapaqchasqa kasqanta,+ hinaptinmi chay akllasqan runa+ payman asuykunqa. 6 Chaynaqa, paqarinmi sansa apanaykichikman+ 7 sansata hinankichik, chaypa hawanmanñataqmi Jehova Dios qawachkaptin inciensota* tallinkichik. Hinaptinmi Jehova Diospa akllasqan runa+ paypaq sapaqchasqa kanqa. ¡Leviypa mirayninkuna, llumpayñam qamkunaqa kankichik!”,+ nispa.

8 Moisesqa Coreytam nirqaraq: “Uyariykullawaychik Leviypa mirayninkuna. 9 Qamkunatam Israelpa mirayninkunamanta Jehova Dios sapaqchasurqankichik+ carpanpi yanapakunaykichikpaq hinaspa lliw runakunata yanapanaykichikpaq. ¿Chaytachu qamkunaqa yanqapaq hapinkichik?+ 10 Corey, qamtaqa aylluykikunatawanmi Dios akllasurqankichik, ¿chaytachu qamkunaqa yanqapaq hapinkichik? ¿Hinaspachu sacerdote kaytaraq munachkankichik?+ 11 ¿Imatataq Aaronqa ruwarurqa paymanta mana allinta rimanaykichikpaqqa?+ Qamkunaqa Jehova Diostam qipanchachkankichik”, nispa.

12 Chaymantam Moisesqa Datantawan Abiramta qayachirqa.+ Paykunam ichaqa nirqaku: “¡Manam risaqkuchu! 13 ¿Tukuy imapa kanan allpamanta pusaramuwaspankuchu kay chunniqpi wañunaykuta munachkan?+ ¿Hinaspachu kamachiqniyku kaytaraq munachkan? 14 ¿Maytaq chay tukuy imapa kanan allpaqa?+ ¿Maytaq quwanankupaq niwasqanku chakrakunaqa hinaspa uvas huertakunaqa? ¿Ñawsakunata hinachu pusaykachawanqaku? ¡Manamá risaqkuchu!”, nispa.

15 Chayta yacharuspanmi Moisesqa llumpayta piñakurqa, hinaspam Jehova Diosta nirqa: “Amayá chaskiychu kawsaykunamanta qusqanku ofrentaqa. Manam ñuqaqa asnollankutapas qichurqanichu, manataqmi paykunataqa imanarqanipaschu”,+ nispa.

16 Chaymantam Moisesqa Coreyta nirqa: “Paqarinmi qam hinaspa qanwan kaqkuna Jehova Diospa carpanpa kasqanman huñunakunkichik, chaypitaqmi Aaronpas kanqa. 17 Sapakamam sansa apananman inciensota tallispan Jehova Diosman qunqa. Llapallan sansa apanakunam kanan 250. Aaronpas hinaspa qampas sansa apanataqa apanaykichikmi”, nispa. 18 Chaymi sapakama sansa apanankuman sansata hinaspanku hawanman inciensota tallirqaku, hinaspam llapallanku carpapa ñawpaqninpi sayarqaku. Paykunawantaqmi karqa Moiseswan Aaronpas. 19 Moisesmanta hinaspa Aaronmanta mana allinta rimaq runakunata carpapa ñawpaqninman Corey huñuruptinmi,+ Jehova Diospa kanchaynin llapallan runakunaman rikuriykurqa.+

20 Hinaptinmi Jehova Diosqa Moisestawan Aaronta nirqa: 21 “Asurikuychik kay runakunamanta, kunallanmi wañurachisaq”, nispa.+ 22 Chaymi paykunañataq qunqurakuspa pampakama kumuykuspanku nirqaku: “Runakunata kawsachiq Diosllayku,+ ¿chullalla runapa huchanmantachu lliw runakunapaq piñakurunki?”,+ nispa.

23 Jehova Diosñataqmi Moisesta nirqa: 24 “Runakunatayá niy: ‘¡Coreypa, Datanpa hinaspa Abirampa carpanmantayá asurikuychik!’”,+ nispa.

25 Chaymantam Moisesqa Israelpa mirayninkunapi punta apaqkunawan+ Datanpa hinaspa Abirampa kasqanman rirqa. 26 Hinaspanmi chaypi kaq runakunata nirqa: “Kay mana allin runakunapa carpanmantayá asurikullaychik, amataqyá imankutapas hapiychikchu. Yanqañataq paykunapa huchanrayku wañuruwaqchik”, nispa. 27 Hinaptinmi chaypi kaq runakunaqa Coreypa, Datanpa chaynataq Abirampa carpanmanta asurikurqaku. Datanwan Abiramqa carpankupa punkunpim sayarqaku warminkupiwan hinaspa lliw churinkupiwan.

28 Chaymantam Moises nirqa: “Kunanmi yachankichik Jehova Dios kachamuwaptin kaykuna ruwasqayta. Manam kikillaymantachu kaykunataqa ruwani. 29 Sichu kay runakuna lliw runakuna hina yuyaqyayninkupiña wañukunqaku hinaptinqa yachankichikmi Jehova Dios mana kachamuwasqanta.+ 30 Ichaqa sichum mancharikuypaq kaqta Jehova Dios ruwaptinqa hinaspa allpa kicharikuruspan kawsachkaqllata tukuy imantinta millpuruptinqa*, yachankichikpunim paykunaqa Jehova Diosta qipancharusqankuta”, nispa.

31 Chaynata Moises rimayta tukuruptillanmi chay runakunapa sayasqanku allpa kicharikururqa.+ 32 Chaymi chay runakunata aylluntinta chaynataq Coreyman llapallan sayapakuqkunata tukuy imantinta allpa millpururqa.+ 33 Chaynapim kawsachkaqllata allpa millpuruptin llapanku wañururqaku*.+ 34 Chaymi paykunapa qaparisqanta uyarispanku chayta qawaqkunaqa ayqikuspa nirqaku: “¡Achachallaw, ñuqanchiktapas allpaqa millpuruwachwanmi!”, nispa. 35 Chaymantañataqmi Jehova Diosmanta nina uraykamuspan+ ruparurqa 250 runakunata, paykunaqa inciensotam quntichichkarqaku.+

36 Chaymantam Jehova Diosqa Moisesta nirqa: 37 “Sacerdote Aaronpa churin Eleazartayá nimuy wañuqkunapa sansa apanankuta ninamanta hurqumunanpaq,+ chaykunaqa ñuqapaq sapaqchasqam. Nimuytaqyá nina sansantapas karuniqman wischumunanpaq. 38 Huchallikuspa wañuq runakunapa sansa apanankuqa ñuqapaq sapaqchasqam rikurirun ñuqa Jehova Diospaq apamusqankurayku. Chaymi chay sansa apanakunataqa llaspayachispa altarman laqanaykichik.+ Chayqa Israelpa mirayninkuna yuyarinanpaqmi kanqa”,+ nispa. 39 Chaynapim Eleazarqa chay broncemanta sansa apanakunata martillowan takaspa llaspayachirqa, chaytaqa ruwarqa altarman laqanankupaqmi 40 Moisesta Jehova Diospa kamachisqanman hina. Chayna laqasqa kasqanta qawaspankum Israelpa mirayninkunaqa yuyarirqaku Aaronpa miraynillan Jehova Diospaq quntichinankuta.+ Yuyarirqakutaqmi Corey hina hinaspa payman sayapakuq runakuna hina mana kanankutapas.+

41 Chaymantam paqarintinta Israelpa mirayninkunaqa piñakuspanku Moisestawan Aaronta nirqaku:+ “¡Qamkunam Jehova Diospa runankunataqa wañurachinkichik!”, nispanku. 42 Chaynata rimaq runakunam Moisespa hinaspa Aaronpa kasqanman huñunakururqaku. Chaymantam carpata qawariykuspanku rikururqaku carpata puyu tapaykusqanta, hinaptinmi Jehova Diospa kanchayninpas rikurirqa.+

43 Chaymantam Moiseswan Aaronqa carpaman asuykurqaku.+ 44 Hinaptinmi Jehova Diosqa Moisesta nirqa: 45 “Iskaynikichikyá kay runakunapa kasqanmanta asurikuychik, chaynapi kunallan wañurachinaypaq”, nispa.+ Chaynata niptinmi paykunaqa qunqurakuykuspanku pampakama kumuykurqaku.+ 46 Chaymantam Moisesqa Aaronta nirqa: “Jehova Diosmi llumpayta piñakurun. Chaynaqa, altarpi sansatayá sansa apanaman hinaramuy,+ hawanmanñataqyá inciensota tallimuy. Hinaspayá runakunapa kasqanman kallpaspayki* huchankumanta pampachasqa kanankupaq quntichimuy.+ ¡Runakunaqa manchakuypaq unquywanmi wañuyta qallaykunku!”, nispa. 47 Moisespa nisqanman hinam Aaronqa runakunapa kasqanman kallparqa. Ñamá runakunaqa chay manchakuypaq unquywan wañuytaña qallaykurqaku. Chaymi Aaronqa sansa apanaman inciensota talliykuspan runakunapa huchanmanta quntichirqa. 48 Wañusqakunapa hinaspa kawsaqkunapa chawpinpi Aaron kaptinmi unquyqa chayraq samarurqa. 49 Chay manchakuypaq unquywan wañuqkunaqa karqa 14.700 runakunam, Coreywan wañuqkunaqa sapaqmi karqa. 50 Moisespa kasqanman Aaron kutiruptinñataqmi unquyqa chinkarusqaña. Moisesqa kachkarqa Diospa carpan punkupim.

17 Chaymantam Jehova Diosqa Moisesta nirqa: 2 “Israelpa mirayninkunatayá niy sapa ayllupi kamachiqkuna+ tawnankuta apamunankupaq. Hinaptinmi tawnakunaqa kanqa 12. Chay tawnakunapim sapakamapa sutinta qillqanki. 3 Leviy ayllumanta apamusqanku tawnapiñataqmi Aaronpa sutinta qillqanki, chaynapi sapa ayllumanta huk tawnalla kananpaq. 4 Hinaspayá chay tawnakunataqa churay qamkunata rimapayanay carpaypi+ kaq baulniypa ñawpaqninman.+ 5 Hinaptinmi akllasqay runapa tawnanta+ ikllichisaq*, chaynapim Israelpa mirayninkunaqa manaña ñuqamantapas nitaq qamkunamantapas mana allintaqa rimanqakuchu”,+ nispa.

6 Chaymi Israelpa mirayninkunapi kaq sapa ayllupi kamachiqkunaqa Moisesman tawnankuta qurqaku. Aaronpa tawnanpas chaypim karqa, chaymi llapan tawnakunaqa karqa 12. 7 Hinaptinmi Moisesqa chay tawnakunata churaykurqa Jehova Diospa kamachikuyninkunata waqaychana carpaman*.

8 Paqarintinñataqmi Moisesqa Diospa kamachikuyninkuna waqaychana carpaman yaykurqa, hinaptinmi Leviy ayllumanta kaq Aaronpa tawnanqa ikllirusqa, waytarusqa hinaspa puqusqa almendraskunata rururusqa. 9 Chaymi Moisesqa Jehova Dios qawachkaptin chay tawnakunata hurqumurqa, hinaspam llapallan runakunaman qawachirqa. Runakunañataqmi qawaykuspa sapakama tawnankuta huqarirqaku.

10 Chaymantam Jehova Diosqa Moisesta nirqa: “Aaronpa tawnantayá+ carpaypi kaq baulpa ñawpaqninman kutichiy+ Israelpa mana kasukuq mirayninkuna yuyarinankupaq.+ Chaynapi ñuqamanta mana allinta rimasqankurayku mana wañunankupaq”, nispa. 11 Hinaptinmi Moisesqa Jehova Diospa kamachisqanman hina ruwarqa.

12 Chaymantam Moises uyarichkaptin Israelpa mirayninkunaqa ninakurqaku: “¡Imapiraq rikukullanchik! ¡Kunanqa wañurusunchiki! ¡Lliwchiki tukurusun! 13 ¡Jehova Diospa carpanman asuykusqanchikraykuch wañusun!”, nispa.+

18 Jehova Diosmi Aaronta nirqa: “Qanmi churikikunapiwan hinaspa miraynikikunapiwan huchayuq kankichik carpaypi imapas karuptinqa.+ Qanwan churikikunataqmi huchayuq kankichik ima mana allintapas ruwaruspaykichikqa.+ 2 Chaymantapas kamachikuyniykunata waqaychana carpaypi*+ qamtawan+ churikikunata yanapasunaykichikpaqyá Leviy ayllumanta kaqkunata niy, paykunaqa ayllumasillaykichikmi kanku. 3 Paykunam yanapasunki carpaypi imapas ruwanankuta ruwaspanku.+ Ichaqa amam asuykunqakuchu chaypi serviciokunamanqa nitaq altarmanqa. Chaynapi qamkunapas chaynataq paykunapas mana wañurunaykichikpaq.+ 4 Paykunaqa tukuy ima kamachisqaykita kasukuspankum carpaypi imam ruwanankuta ruwanqaku. Pipas mana sacerdote kaspanqa amam asuykamusunkichikchu.+ 5 Qamkunallam carpaypi+ hinaspa altarpi+ imapas ruwaykunataqa ruwankichik. Chaynapim Israelpa mirayninkunapaqqa manaña piñakusaqchu.+ 6 Ñuqa Jehova Diosmi Israelpa mirayninkunamanta Leviy aylluta akllarqani regalota hina qamkunaman qunaypaq.+ Leviy ayllutamá akllarqani carpaypi yanapakunankupaq.+ 7 Altarpi hinaspa Chuyay-chuyay sutiyuq cuartopi imapas ruwaykunataqa qanwan churikikunallam ruwankichik.+ Qamkunatam akllarqaykichik sacerdotekuna kanaykichikpaq.+ Pipas Leviy ayllumanta mana kachkaspan carpayman asuykuqqa wañunqapunim”,+ nispa.

8 Jehova Diosqa Aarontaqa nirqataqmi: “Ñuqam churarqayki Israelpa mirayninkunapa tukuy ima apamuwasqankumanta cuentallikunaykipaq.+ Ñuqapaq qusqankumanta wakinmi kanqa qampaqwan churikikunapaq. Kayqa kanqa una-unaypaq kamachikuymi.+ 9 Kañapuwanankupaq kaqkunamantam qampaq kanqa kawsaykunamanta apamuwasqanku.+ Qampaqtaqmi kanqa hucharayku+ hinaspa pantarusqankurayku apamuwasqankupas.+ Chaykunaqa qampaq hinaspa churikikunapaqmi sapaqchasqa kanqa. 10 Chaykunataqa lliw qarikunam mikunkichik sapaqchasqa lawpi.+ Chay mikunaykichikqa ñuqapaq sapaqchasqa kaqmi.+ 11 Qampaqtaqmi kanqa Israelpa mirayninkunapa sunqumanta apamuwasqankupas+ chaynataq ñawpaqman qipaman kuyuchispa quwasqankupas.+ Chaykunaqa kanqa qampaq hinaspa qari churikikunapaqwan warmi churikikunapaqmi.+ Aylluykipi llapallan ñuqapaq chuya kaqkunam chaytaqa mikunkichik.+

12 Qampaqtaqmi kanqa+ ñuqa Jehova Diosman quwanankupaq Israelpa mirayninkunapa chayllaraq hurqusqanku+ aceitewan vinopas hinaspa kawsaykunapas. 13 Cosechaspanku punta kaq rurunta ñuqa Jehova Diospaq apamusqankupas qampaqmi kanqa.+ Aylluykipi ñuqapaq chuya kaqkunallam chaytaqa mikunkichik.

14 Ñuqapaq imapas sapaqchasqankuqa* qampaqmi kanqa.+

15 Runamanta utaq animalmanta punta naceqta+ ñuqa Jehova Diosman apamuwasqankuqa qampaqmi kanqa. Ichaqa piwi* churinkupa rantinpim qullqita apamunanku.+ Mana mikuna animalpa rantinpiñataqmi huk animalta apamunanku.+ 16 Huk killayuqmanta hanayman punta naceqkunapa rantinpim apamunanku 57 gramo* qullqita,+ chayqa llasanan carpaypi tantiasqa llasayman hinam. Carpaypi tantiasqa llasayqa 11 gramo masninmi*. 17 Punta naceq torowan, carnerowan chivom ichaqa ñuqapaq sapaqchasqa kanqa.+ Chay animalpa yawarnintam altarman challanki.+ Wirantañataqmi kañaspa qusnichinki.+ Chayqa ñuqa Jehova Diospaqmi miskillataña asnarinqa. 18 Aychanñataqmi qampaq kanqa. Qampaqtaqmi kanqa ñawpaqman qipaman kuyuchispa quwasqanku animalpa qasqunpas chaynataq alliq* piernanpas.+ 19 Israelpa mirayninkunapa ñuqa Jehova Diosman quwasqankuqa+ kanqa qampaq, qari churikikunapaq hinaspa warmi churikikunapaqmi.+ Kaymi kanqa qanwan hinaspa miraynikikunawan una-unaypaq ñuqa Jehova Diospa contrato* ruwasqay”, nispa.

20 Jehova Diosqa Aarontaqa nirqataqmi: “Israelpa mirayninkunapa allpanpiqa manam ima allpatapas chaskinkichu.+ Ñuqam qamkunapa chaskinaykichik herenciaqa kasaq, ñuqam qamkunapaq kasaq.+

21 Israelpa mirayninkunapa lliw apamusqankum+ Leviy ayllupaq kanqa. Chaytaqa chaskinkichik carpaypi yanapakusqaykichikmantam. 22 Leviy ayllumanta mana kaqkunaqa amam carpaymanqa asuykamunqakuchu, asuykamuspankuqa wañurunmankum. 23 Leviy ayllumanta kaqkunallam carpaypiqa yanapakunqaku. Pantaruspankuqa kikinkum huchayuq kanqaku.+ Kayqa kanqa una-unaypaq kamachikuymi mirayninkupaqpas. Israelpa mirayninkunapa allpanpiqa manam paykunapa allpanqa kanqachu.+ 24 Israelpa mirayninkunapa ñuqa Jehova Diospaq lliw apamuwasqankum Leviy ayllupaq kanqa. Chaymi nirqani: ‘Israelpa mirayninkunapa allpanpiqa manam paykunapa allpanqa kanqachu’”, nispa.+

25 Chaymantam Jehova Diosqa Moisesta nirqa: 26 “Leviy ayllukunatayá kaynata niy: ‘Chunkamanta hukninta* Israelpa mirayninkunapa apamusqankum qamkunapaq kanqa,+ chay apamusqankumantam chunkamanta hukninta ñuqa Jehova Diosman quwankichik.+ 27 Chayqa kanqa Israelpa mirayninkuna irapi cosechasqanku kawsaymanta,+ hurqusqanku vinomanta hinaspa aceitemanta qusqanku hinam. 28 Chaynaqa, Israelpa mirayninkunapa apamusqankumantam wakinta ñuqa Jehova Diosman quwankichik. Sacerdote Aaronman quptikichikmi kanqa ñuqa Jehova Diospaq. 29 Chaskisqaykichikmanta ñuqa Jehova Diosman quwanaykichikqa allinnin kaqmi kanan, chayqa ñuqapaq sapaqchasqam kanqa’,+ nispa.

30 Leviy ayllutaqa ninkitaqmi: ‘Diosmi nin: “Chaynaqa Leviy ayllukuna, allinnin kaqta ñuqapaq qusqaykichikmanta puchuqqa qamkunapaqñam kanqa. Chayqa kapusunkichik cosechasqaykichik kawsaykuna hinañam utaq hurqusqaykichik vinowan aceite hinañam. 31 Chaytaqa maypiña kaspaykichikpas aylluykichikwan kuskam mikuwaqchik. Chayqa carpaypi yanapakusqaykichikmanta chaskisqaykichikmi.+ 32 Allinnin kaqta mana quspaykichikqa huchallikunkichikmi. Israelpa mirayninkunapa ñuqapaq qusqankutaqa amayá mana kaqpaqta hinaqa hapiychikchu, manachayqa wañunkichikmi”’”, nispa.+

19 Jehova Diosmi Moisestawan Aaronta nirqa: 2 “Ñuqa Jehova Diosmi nini: ‘Israelpa mirayninkunatayá niychik allinnin puka vacata apamunankupaq,+ chay vacaqa mana haykapipas yuguwan watasqam kanan. 3 Chaytam sacerdote Eleazarman qunqaku. Payñataqmi samasqaykichikmanta huklawman pusaspan qayllanpi nakachimunqa. 4 Chaymantam Eleazarqa chay vacapa yawarninman dedonta challpuykuspan carpaypa punkun lawman qanchis kutikama challanqa.+ 5 Chaymantam Eleazarpa qayllanpi chay vacaqa kañasqa kanqa. Kañasqataqmi kanqa qaranpas, aychanpas, yawarninpas chaynataq akanpas.+ 6 Eleazarñataqmi vacapa rupasqanman wischuykunqa cedro kaspita, challanapaq qurata*+ hinaspa puka qaytuta. 7 Chaymantañataqmi Eleazarqa pachanta taqsakuspan bañakunqa. Hinaspanñam samasqaykichikman kutinqa. Chaywanpas payqa inti siqaykuykamam ñuqapaqqa manaraq chuyachu* kanqa.

8 Vacata kañaqqa pachanta taqsakuspanmi bañakunqa. Payqa inti siqaykuykamam ñuqapaqqa manaraq chuyachu kanqa.

9 Chay kañasqanku vacapa uchpantaqa akllasqa runam huqarinqa,+ hinaspanmi apanqa uchpa wischunankuman*. Chay uchpatam Israelpa mirayninkunaqa sumaqta waqaychananku, chaynapi yakuman hinaspanku chay yakuwan chuyanchakunankupaq.+ Chayqa hucharayku kañasqankum kanqa. 10 Kañasqanku vacapa uchpanta huqariqqa pachantam taqsakunqa, hinaspapas inti siqaykuykamam ñuqapaqqa manaraq chuyachu kanqa.

Chayqa kanqa una-unaypaq kamachikuymi Israelpa mirayninkunapaq hinaspa paykunawan yachaq* huklaw llaqtayuq runakunapaqpas.+ 11 Pipas wañusqa runata llachparuqqa qanchis punchawmi ñuqapaqqa millakuypaq kanqa.+ 12 Payqa mincha kaq punchawmi yakuwan chuyanchakunqa, hinaspanmi qanchis kaq punchawpiqa chuyaña kanqa. Mincha kaq punchawta mana chuyanchakuspanmi ichaqa qanchis kaq punchawpiqa mana chuyachu kanqa. 13 Pipas wañusqa runata llachparuspan mana chuyanchakuqqa, ñuqa Jehova Diospa carpaytam qachacharun.+ Chay runaqa wañuchisqam kanqa.+ Wañuchisqaqa kanqa chuyanchakuna yakuwan+ mana challachikusqanraykum.

14 Pipas carpanpi wañuruptinqa, chay carpapi kaqkuna hinaspa chay carpaman yaykuqkunam qanchis punchaw ñuqapaqqa millakuypaq kanqaku. 15 Mana allin tapasqa mankakunapas mana servichikunañam kanqa.+ 16 Chaymantapas espadawan wañuchisqa runata, ayata, wañusqa runapa tullunta utaq wañukuqpa pampakusqan sepulturata maypiña kaspapas llachparuqqa qanchis punchawmi ñuqapaqqa millakuypaq kanqa.+ 17 Chaykunata llachparuq runapaqmi hucharayku kañasqa vacapa uchpanta mankaman asllata huqarinqaku, hinaspankum hawanman chayraq wisimusqa yakuta tallinqaku. 18 Chaymantam chuyanchasqa runa+ uchpayuq yakuman challanapaq qurata+ challpuspan yakuta challanqa chay wañuq runapa carpanman, chaypi kaq runakunaman hinaspa mankakunaman. Chaymantapas wañuchisqa runata, wañusqa runapa tullunta, ayata utaq wañuqpa pampakusqanta llachparuqmanpas challanqam. 19 Chuyanchasqa runaqa mincha kaq punchawta hinaspa qanchis kaq punchawtam ñuqapaq qachachasqa hina runata yakuwan challanqa chuyanchasqa kananpaq.+ Chaymantam qachachasqa hina runaqa pachanta taqsakuspan bañakunqa, hinaspam inti siqaykuytaqa chuyanchasqaña kanqa.

20 Ichaqa ñuqapaq qachachasqa hina kachkaspan mana chuyanchakuq runaqa wañuchisqam kanqa.+ Wañuchisqaqa kanqa ñuqa Jehova Diospa carpayta qachachasqanraykum hinaspa uchpayuq yakuwan mana challachikusqanraykum.

21 Kayqa una-unaypaq kamachikuymi kanqa. Uchpayuq yakuwan+ challaq runaqa pachantam taqsakunan. Uchpayuq yakuta llachpaqpas inti siqaykuykamam ñuqapaq qachachasqa hina kanqa. 22 Chayna qachachasqa hina runapa imapas llachpasqanqa mana llachpanañam kanqa. Chay runata llachpaqpas inti siqaykuykamam ñuqapaq qachachasqa hina kanqa’”, nispa.+

20 Punta kaq killapim Israelpa mirayninkunaqa Zin sutiyuq chunniqpi kaq Cades lawman chayarurqaku.+ Chaypim Miriam wañukurqa, hinaptinmi pamparurqaku.+

2 Chaypiqa manam yakuqa karqachu,+ hinaptinmi Israelpa mirayninkunaqa huñunakuruspanku Moisesmantawan Aaronmanta mana allinkunata rimarqaku. 3 Chaymi piñakuspanku Moisesta nirqaku:+ “¡Allinchá kanman karqa Jehova Diospa wañuchisqan runakunawan kuska wañukamuptiykuqa! 4 ¿Imapaqtaq Jehova Diospa runankunataqa kay chunniqman pusaramuwankiku? ¿Ñuqaykupas hinaspa animalniykupas wañunaykupaqchu?+ 5 ¿Imapaqtaq Egipto nacionmanta kay mana imapa kanan allpaman pusaramuwankiku?+ Kaypiqa manam tarpunapaqpas allinchu. Manataqmi kanchu higospas, uvaspas, granadapas nitaq tomanapaq yakupas”,+ nispa. 6 Chaymi Moiseswan Aaronqa runakunapa kasqanmanta rirqaku Diospa carpanpa punkunman, hinaspankum qunqurakuykuspa pampakama kumuykurqaku. Hinaptinmi Jehova Diospa kanchaynin paykunaman rikuriykurqa.+

7 Chaypim Moisesta Jehova Dios nirqa: 8 “Tawnaykita hapiy, hinaspayá wawqiki Aaronpiwan lliw runakunata huñuychik. Hinaspayá runakuna qawachkaptin hatun rumita rimapayaychik yaku pawamunanpaq. Chay yakutam tomanqaku runakunapas chaynataq animalkunapas”, nispa.+

9 Chaymi Jehova Diospa nisqanman hina Moisesqa tawnanta hapirqa.+ 10 Hinaspanmi Aaronwan kuska llapallan runakunata huñururqa hatun rumipa kasqanman, chaypim Moises nirqa: “¡Yaw mana kasukuq runakuna uyariychik! ¿Kay rumimanta yakuta hurqupunaykutachu munachkankichik?”,+ nispa. 11 Chaynata nispanmi Moisesqa iskay kutikama rumita waqtarurqa, hinaptinmi achkallay-achka yaku pawaramurqa. Chaymi runakunapas chaynataq animalkunapas yakuta tomarqaku.+

12 Chaymanta qipatam Jehova Diosqa Moisestawan Aaronta nirqa: “Ñuqapi mana hapipakuspa Israelpa mirayninkunapa qayllanpi mana hatunchawasqaykichikraykum paykunaman qunay allpamanqa manaña yaykunkichikchu”, nispa.+ 13 Chay yakupa tuqyasqantam suticharqaku Meribawan*.+ Chaypim Israelpa mirayninkuna Jehova Diosmanta mana allinkunata rimarqaku. Chaypitaqmi payqa hatunchana kasqanta riqsichikurqa.

14 Chaymantam Moisesqa Cades lawmanta kacharqa willakuqkunata Edom runakunapa kamachiqninta kaynata nimunankupaq:+ “Israelpa miraynin aylluykikunam+ kaynata nimusunki: ‘Qamqa yachankim sasachakuykuna pasasqaykuta. 15 Egiptoman ñawpaq abueloyku risqankuraykum+ unay wata chaypi yacharqaniku.+ Hinaptinmi chaypi runakuna abueloykutapas hinaspa ñuqaykutapas ñakarichiwarqaku.+ 16 Chaynapi tarikuspaykum Jehova Diosta qayakurqaniku yanapaykuwanankupaq.+ Chaymi uyariykuwaspanku angelninta kachamuspan+ Egiptomanta hurquykamuwarqaku. Kunanqa allpaykipa linderonwan tupaq Cades lawpiñam kachkaniku. 17 Allpaykipa chawpintayá pasarullasaqku. Manam tarpusqa ukuntachu nitaq uvas huertantachu risaqkuqa. Manataqmi pozoykipi yakuykitapas tomasaqkuchu. Ñuqaykuqa allpaykipa hatun ñanllantam* risaqku, manam maylawmanpas muyusaqkuchu pasarunaykukama’”, nispa.+

18 Edom runakunapa kamachiqninñataqmi nirqa: “Manam allpaymanqa yaykumuwaqchikchu, yaykumuptikichikqa wañurachisqaykikum”, nispa. 19 Hinaptinmi willakuqkunañataq nirqaku: “Hatun ñanllantam risaqkuqa. Sichum yakuykita ñuqayku utaq animalniykupas tomaruspaykuqa pagapusqaykikum.+ Pasaruyllatam munaniku”,+ nispa. 20 Edom runakunapa kamachiqninñataqmi nirqa: “¡Manamá kaynintaqa pasawaqchikchu!”, nispa.+ Hinaspanmi achkallaña tropankunawan Israelpa mirayninkunapa kasqanman rirqa. 21 Allpan chawpinta pasanankuta mana munaptinmi Israelpa mirayninkunaqa huklawnintaña rirqaku.+

22 Israelpa mirayninkunaqa Cades lawmanta rispankum Hor sutiyuq urqupa kasqanman chayarurqaku.+ 23 Chay urquqa karqa Edom runakunapa allpanpa linderonwan tupaqpim. Chaypim Moisestawan Aaronta Jehova Dios nirqa: 24 “Aaronqa wañukunqañam,+ chaymi mana chayanqañachu Israelpa mirayninkunaman qunay allpamanqa. Qamkunaqa Meriba lawpi+ kamachisqaytam mana kasukurqankichikchu. 25 Chaynaqa, Aaronwan hinaspa churin Eleazarwan kuskayá Hor sutiyuq urquman riy. 26 Chaypim Aaronpa pachanta hurquspayki+ churin Eleazarta chaywan pachachinki”,+ nispa.

27 Moisesqa Jehova Diospa nisqanman hinam ruwarqa. Israelpa mirayninkuna qawachkaptinmi kimsanku Hor sutiyuq urquman rirqaku. 28 Chaypim Moisesqa Aaronpa pachanta hurquspan churin Eleazartaña chaywan pachachirqa. Chay urqupim Aaronqa wañukurqa.+ Moiseswan Eleazarñataqmi urqumanta kutimurqaku. 29 Aaronpa wañukusqanta yacharuspankum Israelpa mirayninkunaqa 30 punchaw waqarqaku.+

21 Canaan allpapi kaq Arad llaqtata kamachiqmi+ Negueb qichwapi yacharqa*. Paymi yacharurqa Israelpa mirayninkuna Atarim sutiyuq ñanninta risqankuta, hinaspanmi paykunawan peleaspan wakinta presocharurqa. 2 Chaymi Israelpa mirayninkunaqa Jehova Diosta nirqaku: “Kay runakunata wañuchinaykupaq yanapaykuwaptikikuqa llaqtankutapas chinkachisaqkum”, nispa. 3 Chayna nisqankuta Jehova Dios uyariykuspanmi yanapaykurqa, hinaptinmi Israelpa mirayninkunaqa chay runakunata wañurachispanku llaqtankutapas tuñirachirqaku. Chayraykum chayta suticharqaku Hormawan.+

4 Hinaspam Hor sutiyuq urqumanta+ rispanku Puka lamar quchaman riq ñanninta Edom allpata muyurqaku.+ Hinaptinmi Israelpa mirayninkunaqa risqankupi llumpayta pisiparurqaku. 5 Hinaspam Diosmantawan Moisesmanta kaqlla mana allinta rimarqaku.+ Ninakurqakum: “¿Imapaqtaq Egiptomanta hurqumuwarqanchik? ¿Kay chunniqpi wañunanchikpaqchu? Kaypiqa manam mikuypas nitaq yakupas kanchu.+ Amirunchikñam quwasqanchik kay mikuytapas”,+ nispa. 6 Chaymi Jehova Diosqa manchakuypaq culebrakunata rikurirachirqa. Hinaptinmi chay culebrakuna runakunata kachuptin achkaq wañururqaku.+

7 Chaymi Israelpa mirayninkunaqa Moisespa kasqanman rirqaku, hinaspam nirqaku: “Jehova Diosmantawan qanmanta mana allinta rimaspaykum huchallikuruniku.+ Jehova Diostayá mañapullawayku kay culebrakunata chinkachinanpaq”, nispa. Chaymi Moisesqa paykunapaq Diosta mañakurqa.+ 8 Hinaptinmi Jehova Diosqa Moisesta nirqa: “Manchakuypaq culebrata ruwaruspaykiyá qiruman churay. Chaynapi culebrapa kachusqan runakuna chayta qawaspanku mana wañunankupaq”, nispa. 9 Hinaptinmi Moisesqa broncemanta culebrata ruwaruspan+ qiruman churarqa.+ Chaymi culebrapa kachusqan runakunaqa chayta qawaspanku manaña wañurqakuchu.+

10 Chaymantam Israelpa mirayninkunaqa hinalla rispanku Obotman chayarurqaku.+ 11 Obotmanta rispankuñataqmi chayarurqaku Iye-abarim chunniqman,+ chayqa kachkan Moabpa chimpan intipa qispimunan lawpim. 12 Iye-abarinmanta rispankuñataqmi Zered wayquman+ chayarurqaku. 13 Chay wayqumanta rispankum Arnon wayquman+ chayarurqaku. Chay wayquqa Amorreo runakunapa allpanpa hinaspa Moabpa linderonmi, hinaspapas chunniqmi. 14 Chayraykum Jehova Diospa peleasqankunamanta willakuq libropi nichkan: “Sufa lawpim kachkan Vaeb hinaspa Arnon wayqukuna 15 chaynataq Ar lawman riq wayqukunapas. Ar llaqtaqa Moabpa linderonpa chimpanpim kachkan”, nispa.

16 Chaymantam Israelpa mirayninkunaqa Beer lawman rirqaku, chaypim pozomanta yakuta qunanpaq Jehova Diosqa Moisesta nirqa: “Runakunatayá huñuy yakuta qunaypaq”, nispa.

17 Chaypim Israelpa mirayninkunaqa kaynata takirqaku:

“¡Pozomantayá yaku lluqsimuchun! ¡Qamkunapas takiychikyá!

Chaymantam Matanaman rirqaku, 19 Matana lawmantañataqmi rirqaku Naalielman, Naaliel lawmantañataqmi rirqaku Bamotman.+ 20 Bamot lawmantañataqmi rirqaku Moab wayquman.+ Chaypa hanayninpim kachkan Pisga sutiyuq muqu,+ chayqa kachkan Jesimonpa*+ hichpanpim.

21 Chaymantam Israelpa mirayninkunaqa willakuqkunata kamachirqaku Amorreo runakunapa kamachiqnin Seonta kaynata nimunankupaq:+ 22 “Allpaykipa chawpintayá pasarullasaqku. Manam tarpusqa ukuntachu nitaq uvas huertantachu risaqkuqa. Manataqmi pozopi yakuykitapas tomasaqkuchu. Ñuqaykuqa allpaykipa hatun ñanllantam* risaqku pasarunaykukama”, nispa.+ 23 Kamachiq Seonmi ichaqa mana munarqachu. Aswanqa tropankunata huñuruspanmi Israelpa mirayninkunawan peleaq rirqa. Hinaspanmi Jaaz lawpi paykunawan pelearqa.+ 24 Israelpa mirayninkunam ichaqa wañurachispanku+ allpankuta hapikuykurqaku+ Arnon wayqumanta+ Ammon runakunapa allpanpa hichpan Jaboc wayqukama.+ Ammon runakunapa+ allpanpa linderonpim kachkan Jazer llaqta.+

25 Chaynapim Israelpa mirayninkunaqa Amorreo runakunapa Hesbon llaqtankutawan hichpanpi llaqtakunata hapikuykurqaku, hinaspam chaypi yacharqaku.+ 26 Hesbonqa karqa Amorreo runakunapa kamachiqnin Seonpa yachanan llaqtam. Paymi Moab nacionta kamachiqwan peleaspan allpanta qichururqa Arnon wayqukama. 27 Chayraykum asikunapaq hina kayna rimay karqa:

“Hesbon llaqtamanyá hamuychik.

Seonpa llaqtanyá hatarichisqa kachun, hinaspapas unaypaqyá takyachun.

28 Hesbon llaqtamantam nina lluqsirqa, Seonpa llaqtanmantam linwachkaq nina lluqsirqa.

Moabpi Ar llaqtatam ruparurqa, Arnon wayqupa hanayninpi yachaq runakunatam ruparurqa.

29 ¡Moab llaqtapi yachaqkuna! ¡Kemos sutiyuq taytachapa runankuna! ¡Chinkachisqamá kankichik!+

Kemos sutiyuq taytacham qari churikichikta lluptirachin, warmi churikichiktañataqmi presocharachin Amorreo runakunapa kamachiqnin Seonwan.

30 Paykunatayá wañuchisun.

Hesbon llaqtam Dibon llaqtakama+ chinkachisqa kanqa.

31 Chaynapim Israelpa mirayninkunaqa Amorreo runakunapa llaqtankupi yacharqaku. 32 Chaymantam runakunata Moises kamachirqa Jazer llaqtata+ qawamunankupaq. Chaymi Israelpa mirayninkunaqa hichpanpi llaqtakunatawan hapikuykuspanku chaypi yachaq Amorreo runakunata qarqururqaku. 33 Chaymantam muyurqaku Basan lawman. Hinaptinmi Basan lawta kamachiq Og+ sutiyuq runa tropankunawan lluqsiramurqa, lluqsimurqaqa Israelpa mirayninkunawan Edrei llaqtapi peleananpaqmi.+ 34 Hinaptinmi Jehova Diosqa Moisesta nirqa: “Ama manchakuychu,+ kamachiq Ogtaqa makikimanmi churasaq, makikimantaqmi churasaq runankunatapas chaynataq allpankunatapas.+ Hesbon llaqtapi yachaq Amorreo runakunapa kamachiqnin Seonta hinam paytapas ruwanki”,+ nispa. 35 Chaynapimá kamachiq Ogta, churinkunata hinaspa llapallan runankunata wañurachirqaku. Manam pitapas puchurqakuchu,+ hinaspam allpankutapas hapikuykurqaku.+

22 Chaymantam Israelpa mirayninkunaqa chayarurqaku Moab chunniq pampaman, chayqa kachkan Jordan mayupa waqtanpim hinaspa Jerico llaqtapa chimpanpim.+ 2 Ziporpa churin Balacmi+ yacharurqa Israelpa mirayninkuna Amorreo runakunata tukuy ima ruwarusqankuta. 3 Chaymi Moab runakunapas Israelpa mirayninkuna achkallay-achka kasqankurayku llumpa-llumpay mancharisqallaña karqaku.+ 4 Chaymi Moab runakunaqa Madianpi punta apaqkunata nirqaku:+ “Pastota toro mikuchkaq hinachá kay runakunaqa muyuriqninchikpi tukuy imanchiktapas tukurunqaku”, nispanku.

Chay tiempopiqa Ziporpa churin Balacmi Moab runakunapa kamachiqnin karqa. 5 Paymi willakuqkunata kacharqa Beorpa churin Balaam sutiyuq runaman, Balaamqa yacharqa* Eufrates mayupa hichpan Petorpim.+ Payman nimunankupaqmi willakuqkunata Balac nirqa: “Egiptomanta nana-nanaq runakuna lluqsiramuspankum chimpallaypiña kachkanku.+ 6 Hamuspaykiyá kay runakunata ñakapuway+ mana wañuchiwanankupaq, paykunaqa kallpasapa runakunam kanku. Ichapas ñakaykuptikiqa kay llaqtamanta qarquruyman. Qampa ñakasqayki runaqariki ñakasqam, bendecisqaykiñataqmi bendecisqa”, nispa.

7 Hinaptinmi Moabpi hinaspa Madianpi punta apaqkunaqa Balaampa kasqanman rirqaku,+ rirqakuqa ima nisqanmanta paganankupaq qullqita aparikuspam. Chaymi chayaruspanku Balacpa nisqanta willarqaku. 8 Balaamñataqmi nirqa: “Kunan tutaqa kaypiyá samakuychik, Jehova Diospa imapas niwasqantaqa willasqaykichikmi”, nispa. Chaynapim chay runakunaqa Balaampa wasinpi samarqaku.

9 Diosñataqmi Balaamta nirqa:+ “¿Pikunataq kay samapakuq runakunaqa?”, nispa. 10 Balaamñataqmi Diosta nirqa: “Moab runakunapa kamachiqnin Balacmi kaynata willachimuwasqa: 11 ‘Egiptomantam nana-nanaq runakuna lluqsiramunku. Hamuspaykiyá ñakaykapuway.+ Ichapas paykuna qarquruyta atiyman’”, nispa. 12 Diosñataqmi nirqa: “Ama paykunawanqa riychu, amataqyá Egiptomanta lluqsimuq runakunataqa ñakamuychu. Paykunataqa ñuqam yanapachkani”, nispa.+

13 Chaymantam Balaamqa paqarinnintin hatarispan Balacpa kachamusqan runakunata nirqa: “Llaqtaykichikman kutikuychik, Jehova Diosmi mana munanchu qamkunawan rinayta”, nispa. 14 Hinaptinmi chay runakunaqa kutikuspanku kamachiq Balacta nirqaku: “Balaamqa manam hamuyta munanchu”, nispa.

15 Balacmi ichaqa kaqmanta kacharqa ancha riqsisqa achka runakunataña. 16 Paykunam Balaampa kasqanman chayaruspanku nirqaku: “Ziporpa churin Balacmi nisunki: ‘Ama hina kaspayá chaylla pasamuy, 17 ñuqaqa ancha riqsisqa kanaykipaqmi yanapasqayki, hinaspapas imam mañawasqaykitam qusqayki. Chaynaqa, hamuspaykiyá kay runakunata ñakaykapuway’”, nispa. 18 Balaamñataqmi paykunata nirqa: “Wasin huntataña quri-qullqita Balac quwaptinpas Jehova Diosniypa niwasqanmanta huktaqa manam imatapas rimasaqchu.+ 19 Chaywanpas kay tutaqa hinapiyá samakuychik, chaynapi imatawanraq Jehova Dios niwasqanta yachanaypaq”, nispa.+

20 Chay tutam Balaamta Dios nirqa: “Pusasunaykipaq hamuq runakunawanqa riyá. Ichaqa imapas nisqallaytam rimanki”, nispa.+ 21 Chaymi paqarinnintin achikyaqta Balaamqa china asnonta karunaykuspan chay runakunawan kuska rirqa.+

22 Jehova Diosñataqmi Balaampa risqanwan piñakurqa. Chaymi Diospa angelnin ñawpaqninpi sayaruspan harkarurqa. Balaamqa asnonpim richkarqa, paywan kuskataqmi iskay yanapaqninkunapas rirqa. 23 Balaampa asnonmi Jehova Diospa angelninta ñanpi rikururqa espadayuq sayachkaqta, chaymi ñanmanta huklawman muyururqa. Balaanmi ichaqa ñanman kutinanpaq asnonta maqarqa. 24 Jehova Diospa angelninñataqmi rumi pirqayuq kichki ñanpiña sayarurqa, chay ñanpa sapa lawninpiqa uvas chakram karqa. 25 Chaymi asnoqa Jehova Diospa angelninta kaqmanta rikuruspan pirqa kuchuman qimikurqa, hinaspanmi Balaampa chakinta pirqaman qimirurqa. Chaymi Balaamqa kaqmanta asnonta maqarqa.

26 Chaymantam Jehova Diospa angelninqa ñawparuspan mana muyuriypas atina aswan kichki ñanpiña sayarurqa. 27 Hinaptinmi Jehova Diospa angelninta rikuruspan asnoqa pampapi puñukuykurqa. Chaymi Balaamqa llumpayta piñakuruspan tawnanwan asnonta astawan maqarqa. 28 Hinaptinmi Jehova Diosqa asnota rimarachirqa,+ chaymi asnoqa Balaamta nirqa: “¿Imanarqaykitaq kimsakamaña maqawanaykipaq?”,+ nispa. 29 Balaamñataqmi asnonta nirqa: “Mana kasuwasqaykiraykum maqayki. Makillaypi espaday kaptinqa kunallanmi wañurachikiman”, nispa. 30 Chaymi asnonñataq Balaamta nirqa: “¿Manachu ñuqaqa sapa kuti sillakunayki asnoyki kani? Ñuqaqa lliwpitaq kasukuyki, ¿icha manachu?”, nispa. Hinaptinmi Balaamñataq nirqa: “¡Arí, chaynam!”, nispa. 31 Chaymantam Jehova Diosqa Balaampa ñawinta kichaykurqa mana rikuy atisqanta rikunanpaq.+ Hinaptinmi Balaamqa Jehova Diospa angelninta ñanpi rikururqa espadayuq sayachkaqta. Chaymi Balaamqa qunqurakuykuspan pampakama kumuykurqa.

32 Hinaptinmi Jehova Diospa angelnin nirqa: “¿Imanasqataq kimsakamaña asnoykita maqaparunki? Ñuqam qamtaqa harkarqayki mana allinta ruway munasqaykirayku.+ 33 Asnoykiqa rikuruwaspanmi kimsa kutikama ñawpaqniymanta muyururqa.+ Mana muyuruptinqa wañurachikimanñam karqa, asnoykitam ichaqa mana wañuchiymanchu karqa”, nispa. 34 Hinaptinmi Balaamqa Jehova Diospa angelninta nirqa: “Huchallikurunim, manam ñuqaqa yacharqanichu ñanpi kasqaykitaqa. Sichum risqay mana allin kaptinqa kutikusaqyá”, nispa. 35 Chaymi Jehova Diospa angelninqa Balaamta nirqa: “Hinatayá chay hamuq runakunawan riy. Ichaqa ñuqapa imam nisqallaytam rimanki”, nispa. Chaymi Balaamqa kamachiq Balacpa runankunawan hinalla rirqa.

36 Kamachiq Balacñataqmi Balaampa chayaramusqanta yacharuspan taripaq rirqa Moab nacionpa linderonpi kaq llaqtakama. Chayqa kachkan Arnon wayqupa hichpanpim. 37 Hinaspanmi kamachiq Balacqa Balaamta nirqa: “¿Manachu kikiypuni qayachimurqayki? ¿Imanasqataq manaqa hamuyta munarqankichu? ¿Manachu ñuqaqa ancha riqsisqa kanaykipaq yanapaykiman?”, nispa.+ 38 Chaymi Balaamñataq nirqa: “Kayqaya kaypiña kachkani. Ichaqa manachusmi munasqaytaqa rimasaqchu, aswanqa Diospa niwasqallantam”, nispa.+

39 Hinaspanmi Balaamqa kamachiq Balacwan rispan chayarurqa Kiryat-uzotman. 40 Chaypim Balacqa vacakunatawan ovejakunata nakarqa, hinaspam Balaanman chaynataq ancha riqsisqa runakunaman wakinta qurqa. 41 Paqarintinmi kamachiq Balacqa Balaamta pusarqa Bamot-baal llaqtaman. Chay llaqtamantaqa Israelpa llapallan mirayninkunam sutilla rikukurqa.+

23 Chaymantam Balaamqa kamachiq Balacta nirqa: “Altartayá qanchista kaypi ruwapuway,+ hinaspayá qanchis torota hinaspa qanchis carnerota pusamuy”, nispa. 2 Hinaptinmi Balacqa chaylla ruwarqa. Chaymantam iskayninku sapa altarpi huk torota hinaspa huk carnerota kañarqaku.+ 3 Chaymantañataqmi Balaamqa kamachiq Balacta nirqa: “Kayllapiyá kachkay, ñuqañataq Jehova Dioswan rimaq rirusaq, icha imatapas nimuwanman. Imatapas nimuwaptinqa willasqaykim”, nispa. Hinaspam Balaamqa muquman rirqa.

4 Chay muqupim Diosqa Balaamta rimapayarqa,+ hinaptimi Balaamqa Diosta nirqa: “Altartam qanchista qati-qatillata ruwarachini, hinaspam sapa altarpi huk torota hinaspa huk carnerota nakaspa kañarachimuni”, nispa. 5 Chaymi Jehova Diosqa Balaamta ima rimananpaq yacharachispan nirqa:+ “Kutispayá Balacta nimuy yachachisqayman hina”, nispa. 6 Kutiruptinñataqmi Moabta kamachiq Balacqa yanapaqninkunapiwan kañasqankupa kasqanpi sayachkasqaku. 7 Hinaptinmi Balaamqa sumaq rimaykunawan nirqa:+

‘Hamuspayá Jacobpa mirayninkunata ñakapuway.

Hamuspayá Israelpa mirayninkunata ñakapuway’,+ nispa.

 8 ¿Imaynamá ñakayman Diospa mana ñakasqan runakunataqa?

¿Imaynamá ñakayman Jehova Diospa mana ñakasqan runakunataqa?+

10 ¿Pitaq Jacobpa mirayninkunata yupayta atinman?+

¿Pitaq Israelpa mirayninkunata wakillantapas yupayta atinman?

11 Hinaptinmi kamachiq Balacqa Balaamta nirqa: “¿Imatataq rimarunki? Chiqnisqay runakunata ñakanaykipaqmi qayachimurqaykiqa, manam paykuna allinlla kanankumanta rimanaykipaqchu”, nispa.+ 12 Balaamñataqmi nirqa: “¿Manachu nirqayki Jehova Diospa niwasqallanta rimanaypaq?”, nispa.+

13 Balacñataqmi nirqa: “Hakuyá huk muqumanña, chaymanta Israelpa mirayninkunata wakillantapas qawaspayki ñakapuwanaykipaq”, nispa.+ 14 Chaynata nispanmi Balacqa Zofim lawpi Pisga sutiyuq muquman pusarurqa.+ Chaypim altarta qanchista ruwarqa, hinaspam sapa altarpi huk torota hinaspa huk carnerota kañarqa.+ 15 Balaamñataqmi kamachiq Balacta nirqa: “Kayllapiyá kachkay, ñuqañataq Dioswan rimaq rirusaq”, nispa. 16 Jehova Diosñataqmi Balaamta ima rimananpaq yachachispan nirqa:+ “Kutispayá Balacta nimuy yachachisqayman hina”, nispa. 17 Chaymi Balacpa kasqanman kutirqa, Balacñataqmi kañasqan animalpa kasqanpi yanapaqninkunapiwan sayachkasqa. Hinaptinmi kamachiq Balacqa Balaamta nirqa: “¿Imatataq Jehova Dios niykamusunki?”, nispa. 18 Balaamñataqmi sumaq rimaykunawan nirqa:+

“Hatarispaykiyá uyariykuway.

Uyariykuwayá Ziporpa churin Balac.

Imatapas nispanqa ruwanpunim.

Imatapas rimaspanqa chayman hinam ruwan.+

20 Allin kaqkunata rimanaypaqmi pusamuwasqanki.

Diosmi bendecirqa,+ manam huktaqa rimaymanchu.+

22 Diosmi Egiptomanta paykunata pusamuchkan.+

Diosmi paykunataqa harkachkan piña toro hina.+

Kunanqa paykunamantam nichwan:

‘¡Diospa imayna yanapasqantayá qawaychik!’, nispa.

25 Hinaptinmi kamachiq Balacqa Balaamta nirqa: “Paykunata ñakayta mana atispaqa amataqyá bendeciypaschu”, nispa. 26 Balaamñataqmi nirqa: “¿Manachu Jehova Diospa niwasqallanta ninayqa karqa?”, nispa.+

27 Hinaptinmi Balacqa nirqa: “Hakuyá huklawmanña. Ichapas huklawmanta ñakapuwayniki Diospaqqa allin kanman”, nispa.+ 28 Hinaspam Balacqa Peor sutiyuq muquman pusarqa. Chay muqumantaqa rikukunmi Jesimonpas*.+ 29 Hinaptinmi Balaamqa kamachiq Balacta nirqa: “Altartayá qanchista kaypi ruwapuway, hinaspayá qanchis torota hinaspa qanchis carnerota pusamuy”, nispa.+ 30 Chaymi Balacqa kamachisqanta kasukuspan sapa altarpi huk torota hinaspa huk carnerota kañarqa.

24 Balaamqa cuentatam qukururqa Jehova Diosqa Israelpa mirayninkuna allinlla kananku munasqanta, chaymi Israelpa mirayninkuna ñakaytaqa mana munarqachu.+ Hinaspam chunniq lawta qawarispan 2 rikururqa Israelpa mirayninkuna tropa-tropa samasqankuta.+ Chaypim Diospa atiynin Balaanman huntaykurqa,+ 3 hinaptinmi Israelpa mirayninkunamanta sumaq rimaykunawan nirqa:+

 5 ¡Mayna sumaqmi Jacobpa mirayninkunapa yachanan* carpankuqa!

¡Mayna kuyayllapaqmi Israelpa mirayninkunapa samanan carpankuqa!+

 9 Israelpa mirayninkunaqa leon hinam siriykuspa waqtapanku.

¿Yaqachu pipas leonta rikchachiyta atinman?

10 Hinaptinmi kamachiq Balacqa Balaampaq piñakururqa. Chaymi llumpayta piñakurusqanrayku taqllakuspanraq Balaamta nirqa: “Chiqnisqay runakunata ñakanaykipaqmi qayachimurqaykiqa,+ manam kimsakamaña allinlla kanankumanta rimanaykipaqchu. 11 Chaynaqa wasikiman kutikuy, ñuqaqa ancha riqsisqa kanaykipaqmi yanapanay karqa.+ Ichaqa Jehova Diosmi mana munanchu yanapanayta”, nispa.

12 Balaamñataqmi nirqa: “Kachamuwasqayki runakunataqa nimurqanim: 13 ‘Wasin huntataña quri-qullqita Balac quwaptinpas Jehova Diospa niwasqanmanta huktaqa manam imatapas rimasaqchu’, nispay. Nimurqanitaqmi Jehova Diospa imapas niwasqallanta rimanaymantapas.+ 14 Chaynaqa llaqtaymanyá kutikusaq. Ichaqa manaraq kutikuchkaspayá nisqayki chay runakuna llaqtaykita ima ruwananmanta”, nispa. 15 Chaynata niruspanmi Balaamqa sumaq rimaykunawan nirqa:+

17 Qawasaqmi, ichaqa manam kunallanchu.

Rikusaqmi, ichaqa manam chayllachu.

Israelpa mirayninkunaqa mana manchakuspam tukuyta ruwanqaku.

20 Balaamqa Amalec runakunata qawaspanpas mana qunqanapaq hinam nirqa:

21 Balaamqa Ken runakunata qawaspanpas+ mana qunqanapaq hinam nirqa:

“Taqra rumipa hawanpi wasiki kasqanraykum hawka yachachkanki.

22 Ichaqa kañasqam kankichik.

¿Haykapiraq Asiria runakuna presochasunki?”, nispa.

23 Balaamqa mana qunqanapaq hinataqmi nirqa:

“¡Way! ¿Piraq kawsanman Dios chayta ruwaptinqa?

Ñakarichinqataqmi Eber lawpi runakunatapas.

Chaymantam kikinpas qalaypaqta chinkanqa”, nispa.

25 Chayta niruspanmi Balaamqa+ llaqtanman kutikurqa. Kamachiq Balacpas hina hamusqallantam kutikurqa.

25 Israelpa mirayninkunaqa Sitim lawpim samachkarqaku,+ chaypi kachkaspankum Moab lawmanta warmikunawan kakurqaku.+ 2 Chay warmikunam paykunata nipayaqku taytachankupaq ima qusqankutapas mikunankupaq hinaspa yupaychanankupaq,+ hinaptinmi Israelpa mirayninkunaqa chaykunata ruwarqaku.+ 3 Israelpa mirayninkunaqa Peor sutiyuq muqupim Baal taytachata yupaycharqaku,+ hinaptinmi Jehova Diosqa paykunapaq piñakurqa. 4 Chaymi Jehova Diosqa Moisesta nirqa: “Ñuqa Jehova Dios qawachkaptiyyá kay runakunapa umachaqninkunata wañuchiychik hinaspa warkuychik, warkunkichikqa lliw runakuna qawananpaqmi. Chaynapim ñuqa Jehova Diosqa manaña Israelpa mirayninkunapaqqa piñakusaqchu”, nispa. 5 Moisesñataqmi Israelpa mirayninpi juezkunata nirqa:+ “Peor muqupi kaq Baal taytachata yupaychaqkunatayá sapakama wañuchiychik”, nispa.+

6 Hinaptinmi Diospa carpanpa punkunpi Moises hinaspa Israelpa mirayninkuna waqachkaptinku, lliwpa rikusqanta Israelpa mirayninmanta kaq runa Madian warmita carpanman pusaykurqa.+ 7 Chayta rikuspanmi sacerdote Aaronpa willkan Fineas+ lanzata hapiykurqa. 8 Hinaspam paykunata carpaman qatiykuspan lanzawan iskayninta wiksapurata qari kayninpiwan warmi kayninpi tuksirurqa. Chayñam Israelpa mirayninkunaqa unquywanqa manaña wañurqakuchu.+ 9 Chay kutipi unquywan wañuqkunam karqa 24.000 runakuna.+

10 Chaymantam Jehova Diosqa Moisesta nirqa: 11 “Aaronpa willkan Eleazarpa churin Fineasmi+ piñakusqaymanta hawkayaykachiwan. Payqa ñuqalla yupaychasqa kanayta munaspanmi mana munarqachu taytachakunata yupaychanankutaqa.+ Chaymi Israelpa mirayninkunataqa mana tukururqanichu, ñuqallata yupaychawanankutam ñuqaqa munani.+ 12 Chaynaqa Fineastayá niy allinlla kanaypaq paywan contrato ruwasqaymanta*. 13 Fineaspas hinaspa mirayninkunapas sacerdotekunam una-unaypaq kanqaku.+ Payqariki ñuqalla yupaychasqa kanaytam munarqa,+ hinaspapas Israelpa mirayninkunata pampachanaypaqmi yanapakurqa”, nispa.

14 Chay warmiwan kuska wañuchisqa qaripa sutinmi karqa Zimri, payqa Simeon ayllupi kamachiq Salupa churinmi karqa. 15 Madian kasta wañuchisqa warmipa sutinñataqmi karqa Cozbi, payqa+ Madian runakunapi kamachiq Zurpa churinmi karqa.+

16 Chaymantañataqmi Jehova Diosqa Moisesta nirqa: 17 “Madian runakunata wañuchiqyá riychik,+ 18 paykunaqa sakrillawanñam Peor lawpi+ huchallichisuspaykichik ñakarichisurqankichik. Madianpi kamachiqpa churin Cozbim huchapakunaykichikpaq hinaspa taytachanku yupaychanaykichikpaq umachasurqankichik, chaymi payqa wañuchisqa karqa+ unquypa rikurisqan punchawpi, chay unquyqa rikurirqa Peor sutiyuq muqupi Baal taytachata yupaychasqaykichikraykum”,+ nispa.

26 Israelpa mirayninkuna huchallikusqankurayku unquywan ñakarisqanku qipatam+ Jehova Diosqa Moisesta hinaspa Aaronpa churin Eleazarta nirqa: 2 “Israelpa mirayninkuna pikuna hinaspa hayka kasqankutayá yupaspa listaychik, listankichikqa 20 watayuqmanta hanaymanmi ayllunkupi kamachiqkunaman hina hinaspa peleay atiq kasqankuman hina”, nispa.+ 3 Chaymi Moiseswan Eleazarqa+ Israelpa mirayninkunawan rimarqaku Moab chunniq pampapi,+ chayqa kachkan Jordan mayupa waqtanpim hinaspa Jerico llaqtapa chimpanpim.+ Paykunam nirqaku: 4 “Hayka hinaspa pikuna kasqankuman hinayá listaychik 20 watanmanta hanayman kaqkunata, listankichikqa Moisesta Jehova Diospa kamachisqanman hinam”,+ nispa.

Egiptomanta lluqsimuq Israelpa mirayninkunam kaykuna: 5 Israelpa piwi* churinmi karqa Ruben.+ Rubenpa churinkunam+ karqa Hanok hinaspa mirayninkuna, Palu hinaspa mirayninkuna, 6 Hezron hinaspa mirayninkuna chaynataq Carmi hinaspa mirayninkuna. 7 Hinaptinmi Ruben ayllumanta listasqanku runakuna karqa 43.730.+

8 Palupa churinmi karqa Eliab. 9 Eliabpa churinkunam karqa: Nemuel, Datan hinaspa Abiram. Datanwan Abiramqa Coreyman sayapakuqkunawan kuskam mana allinkunata rimarqaku Moisesmanta,+ Aaronmanta+ hinaspa Jehova Diosmanta.+

10 Paykunatam allpa kicharikuruspan millpururqa. Coreyñataqmi nina ruparuptin wañururqa 250 runankunapiwan.+ Chaywanmi hukkunapas yacharqaku paykunapa ruwasqanqa mana haykapipas ruwanapaq kasqanta.+ 11 Coreypa churinkunam ichaqa mana wañurqakuchu.+

12 Simeonpa churinkunam karqa:+ Nemuel hinaspa mirayninkuna, Jamin hinaspa mirayninkuna, Jakin hinaspa mirayninkuna, 13 Zera hinaspa mirayninkuna chaynataq Saul hinaspa mirayninkuna. 14 Hinaptinmi Simeon ayllumanta yupasqanku runakuna karqa 22.200.+

15 Gadpa churinkunam karqa:+ Zefon hinaspa mirayninkuna, Hagui hinaspa mirayninkuna, Suni hinaspa mirayninkuna, 16 Ozni hinaspa mirayninkuna, Eri hinaspa mirayninkuna, 17 Arod hinaspa mirayninkuna chaynataq Areli hinaspa mirayninkuna. 18 Hinaptinmi Gad ayllumanta yupasqanku runakuna karqa 40.500.+

19 Judapa churinkunam karqa:+ Er hinaspa Onan,+ paykunaqa ñawpaqtaraqmi Canaan lawpi wañururqaku.+ 20 Chaymantapas Sela hinaspa mirayninkuna,+ Perez hinaspa mirayninkuna+ chaynataq Zera hinaspa mirayninkuna.+ 21 Perezpa churinkunañataqmi karqa: Hezron hinaspa mirayninkuna+ chaynataq Hamul hinaspa mirayninkuna.+ 22 Hinaptinmi Juda ayllumanta yupasqanku runakuna karqa 76.500.+

23 Isacarpa churinkunam karqa:+ Tola hinaspa mirayninkuna,+ Puva hinaspa mirayninkuna, 24 Jasub hinaspa mirayninkuna chaynataq Simron hinaspa mirayninkuna. 25 Hinaptinmi Isacar ayllumanta yupasqanku runakuna karqa 64.300.+

26 Zabulonpa churinkunam karqa:+ Sered hinaspa mirayninkuna, Elon hinaspa mirayninkuna chaynataq Jaleel hinaspa mirayninkuna. 27 Hinaptinmi Zabulon ayllumanta yupasqanku runakuna karqa 60.500.+

28 Joseypa churinkunam karqa:+ Manases hinaspa Efrain.+ 29 Manasespa+ churinmi karqa Makir hinaspa mirayninkuna.+ Makirpa churinñataqmi karqa Galaad hinaspa mirayninkuna.+ 30 Galaadpa churinkunañataqmi karqa: Yezer hinaspa mirayninkuna, Helek hinaspa mirayninkuna, 31 Asriel hinaspa mirayninkuna, Sichem* hinaspa mirayninkuna, 32 Semida hinaspa mirayninkuna chaynataq Hefer hinaspa mirayninkuna. 33 Heferpa churin Zelofeadpaqa warmikunallam churinkunaqa karqa,+ paykunapa sutinmi karqa:+ Maala, Noa, Hogla, Milca hinaspa Tirza. 34 Hinaptinmi Manases ayllumanta yupasqanku runakuna karqa 52.700.+

35 Efrainpa churinkunam karqa:+ Sutela hinaspa mirayninkuna,+ Beker hinaspa mirayninkuna chaynataq Taan hinaspa mirayninkuna. 36 Sutelapa churinñataqmi karqa Eran hinaspa mirayninkuna. 37 Hinaptinmi Efrain ayllumanta yupasqanku runakuna karqa 32.500.+ Paykunam karqa Joseypa mirayninkuna.

38 Benjaminpa churinkunam karqa:+ Bela hinaspa mirayninkuna,+ Asbel hinaspa mirayninkuna, Airam hinaspa mirayninkuna, 39 Sefufam hinaspa mirayninkuna chaynataq Hufam hinaspa mirayninkuna. 40 Belapa churinkunañataqmi karqa: Ardi hinaspa mirayninkuna chaynataq Naaman hinaspa mirayninkuna.+ 41 Hinaptinmi Efrain ayllumanta yupasqanku runakuna karqa 45.600.+

42 Danpa churinmi karqa+ Suam hinaspa mirayninkuna. Paykunam karqa Danpa mirayninkuna. 43 Hinaptinmi Suampa mirayninta yupasqanku runakuna karqa 64.400.+

44 Aserpa churinkunam karqa:+ Imnaa hinaspa mirayninkuna, Isvi hinaspa mirayninkuna chaynataq Berias hinaspa mirayninkuna. 45 Beriaspa churinkunañataqmi karqa: Heber hinaspa mirayninkuna chaynataq Malkiel hinaspa mirayninkuna. 46 Aserpa warmi churinñataqmi karqa Sera. 47 Hinaptinmi Aserpa mirayninta yupasqanku runakuna karqa 53.400.+

48 Neftaliypa churinkunam karqa:+ Jazeel hinaspa mirayninkuna, Guni hinaspa mirayninkuna, 49 Jezer hinaspa mirayninkuna chaynataq Silem hinaspa mirayninkuna. 50 Hinaptinmi Neftaliypa mirayninta yupasqanku runakuna karqa 45.400.+

51 Israelpa llapallan mirayninkunam karqa 601.730.+

52 Chaymantam Jehova Diosqa Moisesta nirqa: 53 “Qunay allpaqa hayka kasqankuman hinam qusqa kanan.+ 54 Achka kaqkunamanqa hatuntam qunki, aslla kaqkunamanñataqmi taksallata qunki.+ Hayka kasqankuman hinam allpataqa qunayki. 55 Ichaqa sorteanankum.+ Allpataqa chaskinanku Israelpa mirayninpi kaq ayllukunapa sutinman hinam. 56 Allpakunataqa mana akllaspam chaskikunanku hayka kasqankuman hina”, nispa.

57 Leviypa churinkunam karqa:+ Guerson hinaspa mirayninkuna, Koat hinaspa mirayninkuna+ chaynataq Merari hinaspa mirayninkuna. 58 Leviypa churinkunamanta miraqkunañataqmi karqa: Libni hinaspa mirayninkuna,+ Hebron hinaspa mirayninkuna,+ Mali hinaspa mirayninkuna,+ Musi hinaspa mirayninkuna+ chaynataq Corey hinaspa mirayninkuna.+

Koatpa churinmi karqa Amram.+ 59 Amrampa warminmi karqa Jokebed,+ paypim churinkuna karqa: Aaron, Moises hinaspa Miriam.+ Jokebedqa karqa Egiptopi naceq Leviypa warmi churinmi. 60 Aaronpa churinkunam karqa: Nadab, Abiu, Eleazar hinaspa Itamar.+ 61 Ichaqa Nadabwan Abiuqa wañururqakum Jehova Diospaq qunanku kaqta* paypa kamachisqanman hina mana quntichisqankurayku.+

62 Hinaptinmi Leviypa mirayninta huk killayuqmanta hanayman yupasqanku qarikunaqa karqa 23.000.+ Paykunaqa manam Israelpa wakin mirayninkuna hinachu allpataqa chaskinanku karqa,+ chaymi mana kuskachu yupasqa karqaku.+

63 Paykunam Israelpa mirayninkunamanta pikuna hinaspa hayka kasqankuman hina Moisespawan Eleazarpa listasqan karqaku. Listarqakuqa Moab chunniq pampapim, chayqa kachkan Jordan mayupa waqtan Jerico llaqtapa chimpanpim. 64 Ichaqa ñawpaqta Sinai chunniqpi Moisespawan Aaronpa yupaspa listasqanku Israelpa mirayninkunaqa manam mayqinpas kawsarqañachu.+ 65 Paykunamantaqa Jehova Diosmi nirqaña: “Chunniqpim wañunkichik”, nispa.+ Chaymi chay runakunamantaqa manaña pipas puchurqachu, puchurqakuqa Jefuneypa churin Calebwan Nunpa churin Josueyllañam.+

27 Joseypa churinmi karqa Manases, Manasespa churinmi karqa Makir, Makirpa churinmi karqa Galaad, Galaadpa churinmi karqa Hefer, Heferpa churinmi karqa Zelofead, Zelofeadpa churinkunañataqmi warmikunalla karqa. Paykunam karqa:+ Maala, Noa, Hogla, Milca hinaspa Tirza. 2 Paykunam Diospa carpanpa ñawpaqninman rirqaku Moisespa, Eleazarpa, kamachiqkunapa+ hinaspa lliw runakunapa kasqanman. Hinaspam nirqaku: 3 “Taytaykuqa chunniqpim wañukurqa, ichaqa manam Jehova Diosta mana kasukuq Coreyman sayapakuspachu.+ Payqa wañukurqa yuyaqña kaspam, ichaqa manam qari churinkunaqa karqachu. 4 Hinaptinqa, amayá taytaykupa sutinqa chinkachunchu qari churin mana kasqanraykullaqa. Tioykuman hinayá taytaykupa sutinpi ñuqaykumanpas allpata quykuwayku”, nispa. 5 Hinaptinmi Moisesqa Jehova Diosta tapukurqa.+

6 Jehova Diosñataqmi Moisesta nirqa: 7 “Allinllatam Zelofeadpa churinkunaqa nichkanku. Tionkuman hinayá paykunamanpas taytankuman tupaq allpata quykuy.+ 8 Hinaspayá Israelpa mirayninkunata niy: ‘Pi qaripas mana qari churiyuq kachkaspan wañukuptinqa, warmi churinmanmi tupaqnin allpataqa qunaykichik. 9 Mana warmi churinkunapas kaptinqa wawqinkunamanmi qunaykichik. 10 Mana wawqinkuna kaptinqa taytanpa wawqinkunamanmi qunaykichik. 11 Taytanpa wawqinkuna mana kaptinñataqmi hichpa ayllunmanña qunaykichik. Hinaptinmi chay allpaqa paypaqña kanqa. Chayqa Israelpa mirayninkunapaq ñuqa Jehova Diospa kamachisqaymi’”, nispa.

12 Chaymantam Jehova Diosqa Moisesta nirqa: “Abarim lawpi urquman riy,+ chaymantam qawachisqayki Israelpa mirayninkunaman qunay allpata.+ 13 Qawaykuspaykiñam wañukunki+ wawqiki Aaron hina.+ 14 Qamkunaqa ñuqata qipanchawaspaykichikmi Israelpa mirayninkunapa qayllanpi mana hatunchawarqankichikchu.+ Zin sutiyuq chunniqpi+ Cades+ lawpi kaq Meribapiqa+ ñuqam yakutaqa qurqaykichik”, nispa.

15 Moisesñataqmi Jehova Diosta nirqa: 16 “Kawsakuy* quwaqniyku Jehova Dioslláy, qamyá runaykikunata pusananpaq pitapas akllay. 17 Chay akllasqayki runayá Israelpa mirayninkunata pusachun. Amayá Jehova Dioslláy runaykikunaqa mana michiqniyuq ovejakuna hinaqa kachunchu”, nispa. 18 Chaymi Jehova Diosqa Moisesta nirqa: “Nunpa churin Josueytayá akllay makikita umanman churaykuspayki, payqa runakunata kamachinanpaq allin yuyayniyuq runam.+ 19 Hinaspayá sacerdote Eleazarpa hinaspa lliw runakunapa qayllanpi akllay pusaqninku kananpaq.+ 20 Paypas qam hina kananpaqyá Israelpa mirayninkunaman riqsichiy,+ chaynapi paytapas kasukunankupaq.+ 21 Eleazarman Josuey asuykuptinmi Eleazarqa ñuqa Jehova Diosta tapuwanqa Urim* sutiyuq rumiwan+ ima nisqayta yachananpaq. Chaynapim paypa kamachisqanta lliwta kasukunqaku”, nispa.

22 Chaymi Moisesqa Jehova Diospa kamachisqanman hina ruwarqa. Josueyta akllaspanmi Eleazarpa hinaspa lliw runakunapa qayllanman pusarqa. 23 Hinaspam Josueypa umanman makinta churaykuspan akllarqa payña runakunata pusananpaq,+ chaytaqa ruwarqa Jehova Diospa kamachisqanman hinam.+

28 Chaymantam Jehova Diosqa Moisesta nirqa: 2 “Israelpa mirayninkunatayá kaynata niy: ‘Amamá qunqankichikchu kañasqa kananpaq quwanaykichik kaqkunataqa, chayqa mikuy hinam ñuqapaqqa. Kañasqa kananpaq quwanaykichiktaqa tupasqan punchawkunapim quwankichik,+ chaykunaqa miskillaña asnaqmi ñuqapaqqa’, nispa.

3 Ninkitaqmi: ‘Ñuqa Jehova Diospaqmi kañaspa sapa punchaw quwankichik huk watayuq allinnin kaq sano iskay malta carnerota.+ 4 Huknin malta carnerotam inti qispimuyta kañapuwankichik, huknintañataqmi inti siqaykuyta.+ 5 Chaytaqa quwankichik iskay mati* harinayuqtam, chay harinaqa+ chapusqam kanan aceitunasmanta hurqusqa yaqa huk litro* aceitewan*. 6 Chaytaqa Sinai chunniq urqupim kamachirqaniña ñuqa Jehova Diosman miskillataña asnariqta kañaspa+ sapa punchaw quwanaykichikpaq. 7 Sapa malta carnerotam quwankichik yaqa huk litro* vinoyuqta.+ Hina chaypitaqmi vinotapas ñuqa Jehova Diospaq tallinkichik. 8 Huknin malta carnerotañataqmi kañapuwankichik inti siqaykuyta. Chaytaqa inti qispimuyta quwasqaykichik carnerota hinam quwankichik aceitewan chapusqa harinayuqta hinaspa vinoyuqta, chayqa miskillaña asnariqmi ñuqa Jehova Diospaq kanqa.+

9 Samana punchawmi*+ ichaqa huk watayuq iskay malta allinnin kaq sano carnerota quwankichik, quwankichiktaqmi aceitewan chapusqa tawa mati masnin* harinatapas hinaspa vinotapas. 10 Chaynatam samana punchawpi quwankichik, ichaqa amam qunqankichikchu sapa punchaw quwanaykichiktaqa hinaspa vinontapas.+

11 Sapa killa qallariytapas ñuqa Jehova Diospaqmi kañapuwankichik iskay malta torota, huk carnerota hinaspa huk watayuq allinnin kaq sano qanchis malta carnerota.+ 12 Sapa torotam quwankichik aceitewan chapusqa yaqa qanchis mati* harinayuqta,+ carnerotam quwankichik aceitewan chapusqa tawa mati masnin harinayuqta,+ 13 sapa malta carnerotañataqmi quwankichik aceitewan chapusqa iskay mati harinayuqta. Chaykunata kañapuwasqaykichikqa ñuqa Jehova Diospaqmi miskillataña asnarinqa.+ 14 Sapa toro quwasqaykichikqa yaqa iskay litro* vinoyuqmi kanan,+ carnero quwasqaykichikqa litro masnin* vinoyuqmi kanan,+ sapa malta carnero quwasqaykichikñataqmi yaqa huk litro vinoyuq kanan.+ Chaykunatam sapa killa quwankichik, 15 quwankichiktaqmi ñuqa Jehova Diospaq hucharayku kañapuwanaykichik huk chivochatapas. Ichaqa amam qunqankichikchu sapa punchaw quwanaykichiktaqa nitaq vinontapas.

16 Punta kaq killapa 14 kaq punchawninpim ñuqa Jehova Diospaq pascua punchawta yuyarinkichik.+ 17 Hina chay killapa 15 kaq punchawninpiñataqmi hatun huñunakuy kanqa, qanchis punchawmi mana levadurawan ruwasqa tantata mikunkichik.+ 18 Punta kaq punchawpim ñuqata yupaychawanaykichikpaq hatun huñunakuyta ruwankichik. Chay punchawqa manam imapipas llamkanaykichikchu. 19 Chay punchawkunaqa allinnin kaq sanotam+ ñuqa Jehova Diospaq kañapuwankichik iskay malta torota, huk carnerota hinaspa huk watayuq qanchis malta carnerota. 20 Sapa torotam quwankichik aceitewan chapusqa yaqa qanchis mati harinayuqta,+ carnerotam quwankichik aceitewan chapusqa tawa mati masnin harinayuqta, 21 sapa malta carnerotañataqmi quwankichik aceitewan chapusqa iskay mati harinayuqta. 22 Chaymantapas hucharaykum kañapuwankichik huk chivota, chaynapi huchaykichik pampachasqa kananpaq. 23 Tukuy chaykunata kañapuwaspapas quwankichiktaqmi inti qispimuyta kañapuwanaykichik kaqtapas. 24 Tukuy chaytaqa qanchis punchawpunim chaynallata sapa punchaw quwankichik, chay quwasqaykichikqa mikuy hinam kanqa. Chaykunaqa ñuqa Jehova Diospaqmi miskillaña asnariq kanqa. Ichaqa amam qunqankichikchu sapa punchaw quwanaykichiktaqa nitaq vinontapas. 25 Qanchis kaq punchawpim ñuqata yupaychawanaykichikpaq hatun huñunakuyta ruwankichik.+ Chay punchawqa manam imapipas llamkanaykichikchu.+

26 Cosecha qallariy hatun punchawpim*+ kawsaykunamanta punta kaq rurunta ñuqa Jehova Diosman quwaspaykichik+ hatun huñunakuyta ruwankichik. Chay punchawqa manam imapipas llamkanaykichikchu.+ 27 Chay punchawmi ñuqa Jehova Diospaq kañapuwankichik iskay malta torota, huk carnerota hinaspa huk watayuq qanchis malta carnerota.+ Chaykunaqa ñuqapaqmi miskillaña asnariq kanqa. 28 Sapa torotam quwankichik aceitewan chapusqa yaqa qanchis mati harinayuqta, carnerotam quwankichik aceitewan chapusqa tawa mati masnin harinayuqta, 29 sapa malta carnerotañataqmi quwankichik aceitewan chapusqa iskay mati harinayuqta. 30 Chaymantapas kañapuwankichikmi huk chivochata, chaynapi huchaykichik pampachasqa kananpaq.+ 31 Tukuy chaykunata kañapuwaspapas amam qunqankichikchu sapa punchaw quwanaykichik ofrendataqa nitaq kawsaykunamanta quwanaykichik ofrendatapas. Chay punchawkunaqa allinnin kaq sano animaltam+ vinontinta quwankichik’, nispa.

29 Israelpa mirayninkunataqa ninkitaqmi: ‘Diosmi nin: “Qanchis kaq killapa punta kaq punchawninpim yupaychawanaykichikpaq hatun huñunakuyta ruwankichik. Chay punchawqa amam imapipas llamkankichikchu,+ aswanqa ñuqata yupaychawanaykichikpaqmi cornetillata tocaspa+ ñuqapaq kaqta kañapuwankichik. 2 Miskillataña asnarinanpaqmi allinnin kaq sanota ñuqa Jehova Diospaq kañapuwankichik huk malta torota, huk carnerota hinaspa huk watayuq qanchis malta carnerota. 3 Sapa torotam quwankichik aceitewan chapusqa yaqa qanchis mati* harinayuqta, carnerotam quwankichik aceitewan chapusqa tawa mati* masnin harinayuqta, 4 sapa malta carnerotañataqmi quwankichik aceitewan chapusqa iskay mati* harinayuqta. 5 Chaymantapas kañapuwankichikmi huk chivochata, chaynapi huchaykichik pampachasqa kananpaq. 6 Ichaqa amam qunqankichikchu sapa punchaw hinaspa sapa killa quwanaykichik ofrendataqa. Chaykunataqa kañapuwankichik kamachisqayman hinam kawsaykunamanta ofrendatawan+ hinaspa vinotawan kuskata.+ Chayqa miskillaña asnariqmi ñuqa Jehova Diospaq kanqa.

7 Qanchis kaq killapa chunka kaq punchawninpim hatun huñunakuyta ruwankichik,+ hinaspam huchasapa kasqaykichikmanta llakisqallaña* kankichik, amataqmi chay punchawqa imapipas llamkankichikchu.+ 8 Miskillataña asnarinanpaqmi allinnin kaq sanota+ ñuqa Jehova Diospaq kañapuwankichik huk malta torota, huk carnerota hinaspa huk watayuq qanchis malta carnerota. 9 Sapa torotam quwankichik aceitewan chapusqa yaqa qanchis mati harinayuqta, carnerotapas quwankichik aceitewan chapusqa tawa mati masnin harinayuqtam, 10 sapa malta carnerotañataqmi quwankichik aceitewan chapusqa iskay mati harinayuqta. 11 Chaymantapas hucharaykum kañapuwankichik huk chivochata. Ichaqa amam qunqankichikchu huchaykichikmanta pampachasqa kanaykichik punchawpi quwanaykichik ofrendataqa+ chaynataq sapa punchaw kañapuwanaykichik ofrendatapas. Chaykunataqa kañapuwankichik imayna kamachisqayman hinam kawsaykunamanta ofrendatawan hinaspa vinotawan kuskata.

12 Qanchis kaq killapa 15 kaq punchawninpim hatun huñunakuyta ruwankichik. Amam chay punchawqa imapipas llamkankichikchu, aswanqa ñuqa Jehova Diospaqmi qanchis punchawpuni hatun huñunakuyta ruwankichik.+ 13 Miskillataña asnarinanpaqmi allinnin kaq sanota+ ñuqa Jehova Diospaq kañapuwankichik+ 13 malta torota, iskay carnerota hinaspa 14 malta carnerota huk watayuqtakama. 14 Sapa torotam quwankichik aceitewan chapusqa yaqa qanchis mati harinayuqta, sapa carnerotam quwankichik aceitewan chapusqa tawa mati masnin harinayuqta, 15 sapa malta carnerotañataqmi quwankichik aceitewan chapusqa iskay mati harinayuqta. 16 Chaymantapas hucharaykum kañapuwankichik huk chivochata. Ichaqa amam qunqankichikchu sapa punchaw quwanaykichik ofrendataqa, chaykunataqa kañapuwankichik kawsaykunamanta ofrendatawan hinaspa vinotawan kuskatam.+

17 Iskay kaq punchawpim quwankichik allinnin kaq sano+ 12 malta torota, iskay carnerota hinaspa 14 malta carnerota huk watayuqtakama. 18 Sapa torota, sapa carnerota hinaspa sapa malta carnerotam quwankichik aceitewan chapusqa harinayuqta hinaspa vinoyuqta. Chaykunataqa quwankichik imayna kamachisqayman hinam. 19 Chaymantapas hucharaykum kañapuwankichik huk chivochata. Ichaqa amam qunqankichikchu sapa punchaw quwanaykichik ofrendataqa, chaykunataqa kañapuwankichik kawsaykunamanta ofrendatawan hinaspa vinotawan kuskatam.+

20 Kimsa kaq punchawpim quwankichik allinnin kaq sano+ 11 malta torota, iskay carnerota hinaspa 14 malta carnerota huk watayuqtakama. 21 Sapa torota, sapa carnerota hinaspa sapa malta carnerotam quwankichik aceitewan chapusqa harinayuqta hinaspa vinoyuqta. Chaykunataqa quwankichik imayna kamachisqayman hinam. 22 Chaymantapas hucharaykum kañapuwankichik huk chivota. Ichaqa amam qunqankichikchu sapa punchaw quwanaykichik ofrendataqa, chaykunataqa kañapuwankichik kawsaykunamanta ofrendatawan hinaspa vinotawan kuskatam.+

23 Tawa kaq punchawpim quwankichik allinnin kaq sano+ chunka malta torota, iskay carnerota hinaspa 14 malta carnerota huk watayuqtakama. 24 Sapa torota, sapa carnerota hinaspa sapa malta carnerotam quwankichik aceitewan chapusqa harinayuqta hinaspa vinoyuqta. Chaykunataqa quwankichik imayna kamachisqayman hinam. 25 Chaymantapas hucharaykum kañapuwankichik huk chivochata. Ichaqa amam qunqankichikchu sapa punchaw quwanaykichik ofrendataqa, chaykunataqa kañapuwankichik kawsaykunamanta ofrendatawan hinaspa vinotawan kuskatam.+

26 Pichqa kaq punchawpim quwankichik allinnin kaq sano+ isqun malta torota, iskay carnerota hinaspa 14 malta carnerota huk watayuqtakama. 27 Sapa torota, sapa carnerota hinaspa sapa malta carnerotam quwankichik aceitewan chapusqa harinayuqta hinaspa vinoyuqta. Chaykunataqa quwankichik imayna kamachisqayman hinam. 28 Chaymantapas hucharaykum kañapuwankichik huk chivota. Ichaqa amam qunqankichikchu sapa punchaw quwanaykichik ofrendataqa, chaykunataqa kañapuwankichik kawsaykunamanta ofrendatawan hinaspa vinotawan kuskatam.+

29 Suqta kaq punchawpim qunkichik allinnin kaq sano+ pusaq malta torota, iskay carnerota hinaspa 14 malta carnerota huk watayuqtakama. 30 Sapa torota, sapa carnerota hinaspa sapa malta carnerotam quwankichik aceitewan chapusqa harinayuqta hinaspa vinoyuqta. Chaykunataqa quwankichik imayna kamachisqayman hinam. 31 Chaymantapas hucharaykum kañapuwankichik huk chivota. Ichaqa amam qunqankichikchu sapa punchaw quwanaykichik ofrendataqa, chaykunataqa kañapuwankichik kawsaykunamanta ofrendatawan hinaspa vinotawan kuskatam.+

32 Qanchis kaq punchawpim qunkichik allinnin kaq sano+ qanchis malta torota, iskay carnerota hinaspa 14 malta carnerota huk watayuqtakama. 33 Sapa torota, sapa carnerota hinaspa sapa malta carnerotam quwankichik aceitewan chapusqa harinayuqta hinaspa vinoyuqta. Chaykunataqa quwankichik imayna kamachisqayman hinam. 34 Chaymantapas hucharaykum kañapuwankichik huk chivota. Ichaqa amam qunqankichikchu sapa punchaw quwanaykichik ofrendataqa, chaykunataqa kañapuwankichik kawsaykunamanta ofrendatawan hinaspa vinotawan kuskatam.+

35 Pusaq kaq punchawpim mana qunqanapaq hina hatun huñunakuyta ruwankichik. Chay punchawqa amam imapipas llamkankichikchu.+ 36 Miskillataña asnarinanpaqmi allinnin kaq sanota+ ñuqa Jehova Diospaq kañapuwankichik huk malta torota, huk carnerota hinaspa huk watayuq qanchis malta carnerota. 37 Sapa torota, sapa carnerota hinaspa sapa malta carnerotam quwankichik aceitewan chapusqa harinayuqta hinaspa vinoyuqta. Chaykunataqa quwankichik imayna kamachisqayman hinam. 38 Chaymantapas hucharaykum kañapuwankichik huk chivota. Ichaqa amam qunqankichikchu sapa punchaw quwanaykichik ofrendataqa, chaykunataqa kañapuwankichik kawsaykunamanta ofrendatawan hinaspa vinotawan kuskatam.+

39 Tukuy chaykunatam quwankichik ñuqa Jehova Diospaq hatun huñunakuykunapi.+ Ichaqa amam qunqankichikchu imatapas ruwanaykichikpaq nisqaykichikrayku quwanaykichiktaqa,+ kikikichikmanta quwayta munasqaykichiktaqa,+ kañasqa kananpaq quwanaykichiktaqa,+ kawsaykunamanta kaqta quwanaykichiktaqa,+ vinotaqa+ nitaq ñuqawan hawkalla kasqaykichikrayku quwanaykichik ofrendatapas”’”,+ nispa. 40 Hinaptinmi Moisesqa Jehova Diospa tukuy chay nisqankunata Israelpa mirayninkunaman willarqa.

30 Chaymantam Moisesqa Jehova Diospa kamachisqanta Israelpa mirayninkunata kamachiqkunaman+ nirqa: 2 “Pi qaripas Jehova Diospaq imatapas ruwananpaq nispanqa+ utaq juraspanraq imatapas ruwananpaq nispanqa+ lliwtam ruwanan,+ chaynallatataqmi ruwanan imatapas mana ruwananpaq nispanpas.

3 Pi sipaspas taytanpa wasinpi yachachkaspan* Jehova Diospaq imatapas ruwananpaq ninman utaq imatapas mana ruwananpaq ninman 4 hinaspa taytanpas yacharuspan mana imatapas ninmanchu hinaptinqa, rimasqanman hinam ruwanan. 5 Taytan yacharuspan harkakuptinñataqmi sipasqa manaña imapas nisqantaqa ruwananchu. Chay sipastaqa Jehova Diosmi pampachanqa taytan harkakurusqanrayku.+

6 Ichaqa, imatapas ruwananpaq nisqan qipata utaq mana sumaqta tantiaspan imatapas ruwananpaq nisqan qipata chay sipas casarakuruptinqa 7 hinaspa qusan yacharuspan mana imatapas niptinqa, rimasqanman hinam cumplinan. 8 Qusan yacharuspan harkakuruptinmi ichaqa imapas nisqantaqa manaña ruwananchu.+ Paytaqa Jehova Diosmi pampachanqa.

9 Pi viudapas utaq papelwan rakinakuq pi warmipas Diospaq imatapas ruwananpaq nispanqa, rimasqanman hinam ruwanan.

10 Chaymantapas pi warmipas casarasqa kachkaspan Diospaq imatapas ruwananpaq ninman utaq imatapas mana ruwananpaq ninman, 11 qusanpas chayta yacharuspan mana imatapas ninmanchu hinaptinqa, rimasqanman hinam ruwanan. 12 Yacharusqan punchawpi qusan harkakuruptinñataqmi warmiqa manaña imapas nisqanta ruwananchu.+ Chay warmitaqa Jehova Diosmi pampachanqa qusan harkakurusqanrayku. 13 Chayna kananpaqqa qusanmi willakunan warminpa imatapas ruwananpaq utaq mana ruwananpaq nisqanta harkakusqanmanta. 14 Yacharusqan punchawmanta mana imatapas nispanmi ichaqa warminpa imapas tantiakusqanta allinpaq hapichkan. 15 Yacharusqanmanta achka punchaw qipataña chayraq harkakuspanqa kikinñam huchayuq kanqa warminpa tantiasqan mana cumplikusqanmanta.+

16 Chaykunatam Jehova Diosqa kamachiwarqa casarasqa qaripaq hinaspa warminpaq chaynataq taytapaq hinaspa taytanpa wasinpiraq yachaq sipaspaq”, nispa.

31 Chaymantam Jehova Diosqa Moisesta nirqa: 2 “Israelpa mirayninkunata huchallichisqanmantayá+ Madian runakunata wañuchiy,+ hinaspañam wañukunki”,+ nispa.

3 Chaymi Moisesqa Israelpa mirayninkunata nirqa: “Runaykichikmantayá akllaychik Jehova Diospa nisqanman hina Madian runakunata wañuchimunankupaq. 4 Israelpa mirayninpi sapa ayllumantayá 1.000 qarikunata akllaychik”, nispa. 5 Chaymi Israelpa llapallan mirayninmanta+ akllarqaku 12.000 qarikunata. Sapa ayllumantam 1.000 qarikunata akllarqaku.

6 Hinaptinmi Moisesqa sapa ayllumanta 1.000 qarikunata kamachirqa Madian runakunata wañuchiq rinankupaq, paykunawanmi rirqa sacerdote Eleazarpa churin Fineaspas.+ Fineasqa Diospa carpanpi serviciokunatam aparqa, aparqataqmi waqachinapaq cornetillakunatapas.+ 7 Paykunam Jehova Diospa kamachisqanman hina Madian runakunata wañuchiq rirqaku, hinaspam llapa qarikunata wañurachirqaku. 8 Wañuchirqakutaqmi Madianpi pichqa kamachiqkunatapas. Paykunam karqa: Evi, Rekem, Zur, Hur hinaspa Reba. Chaypitaqmi wañurachirqaku Beorpa churin Balaamtapas.+ 9 Warmakunatawan warmikunatañataqmi pusakurqaku, apakurqakutaqmi llapa animalninkutapas hinaspa tukuy imankutapas. 10 Hinaspam Madian runakunapa yachasqanku* llaqtakunata hinaspa samasqanku carpakunata kañaykurqaku. 11 Chaynatam Israelpa mirayninkunaqa runakunata, animalkunata hinaspa tukuy imata apakurqaku. 12 Hinaspam tukuy chaykunawan kutirqaku Moisespa, Eleazarpa hinaspa Israelpa mirayninkunapa kasqanman. Israelpa mirayninkunaqa kachkarqaku Moab chunniq pampapim,+ chayqa kachkan Jordan mayupa waklawninpi hinaspa Jerico llaqtapa chimpanpim.

13 Hinaptinmi Moiseswan Eleazarqa hinaspa kamachiqkunaqa peleaq riqkunata tariparqaku. 14 Moisesñataqmi llumpayta piñakurqa 1.000 runakunata kamachiqkunapaq hinaspa 100 runakunata kamachiqkunapaq. 15 Chaymi paykunata nirqa: “¿Imanasqataq warmikunataqa mana wañuchimurqankichikchu? 16 Paykunaqa Balaampa nisqanta kasukuspankum Israelpa mirayninkunawan kakuspa Jehova Diosta qipanchachirqaku.+ Chaytam Peor lawpi+ ruwarqaku, hinaptinmi Jehova Diosqa qipanchaqninkunata wañuchirqa.+ 17 Chaynaqa, wañuchiychikyá qariwan puñuq warmikunata hinaspa qari warmakunatapas. 18 Ichaqa amam wañuchinkichikchu qariwan manaraq puñuq sipaskunataqa.+ 19 Hinaspam qamkunaqa kay samasqanchikmanta karupi qanchis punchaw kanaykichik. Pipas runata wañurachimuqqa utaq wañusqata llachparamuqqa+ mincha kaq punchawpi hinaspa qanchis kaq punchawpim chuyanchakunan*.+ Chaytam ruwananku pusamusqaykichik sipaskunapas. 20 Chaymantapas chuyanchananmi pachanta, qaramanta utaq cabrapa pelonmanta imapas ruwasqa kaqkunata hinaspa kullumanta ruwasqa kaqkunatapas”, nispa.

21 Sacerdote Eleazarñataqmi peleaq riqkunata nirqa: “Moisestam Jehova Diosqa kamachirqa 22 qurita, qullqita, bronceta, fierrota, estañota hinaspa titita 23 ninapi kañaspa chuyanchanaykichikpaq. Hinaspapas nirqam chuyanchana yakuwan+ chuyanchanaykichikpaq, ruparuq kaqtañataq chay yakuwan mayllanaykichikpaq. 24 Qanchis punchawmantañataqmi pachaykichikta taqsaspa Diospaq allinña kankichik, hinaspañam samasqaykichikman kutinkichik”, nispa.+

25 Chaymantam Jehova Diosqa Moisesta nirqa: 26 “Tukuy ima apamusqankutayá yupaspa listay, hayka runakuna hinaspa hayka animalkuna kasqantayá qillqay. Chaytaqa Eleazarwan hinaspa ayllukunapi kamachiqkunawanmi ruwanki. 27 Hinaspam lliw yupasqaykichikta iskayman rakinkichik. Huknin rakisqaykichikmi kanqa peleaq riqkunapaq, hukninñataqmi Israelpa wakin mirayninkunapaq.+ 28 Peleaq riqkunapa apakamusqankumantam ñuqa Jehova Diospaq rakinkichik sapa 500 runamanta utaq animalmanta hukta, chaynatam rakinkichik runakunata, vacakunata, asnokunata, cabrakunata hinaspa ovejakunata. 29 Peleaq riqkunapaq rakisqaykichik chay animalkunamantam ñuqa Jehova Diospaq rakispa Eleazarman qunkichik.+ 30 Israelpa wakin mirayninkunapaq rakisqaykichikmantañataqmi Leviy aylluman qunkichik+ sapa 50 runamanta utaq animalmanta hukta. Chaynatam rakinkichik runakunata, vacakunata, asnokunata, cabrakunata hinaspa ovejakunata chaynataq ima animaltapas. Leviy aylluqa ñuqa Jehova Diospa carpaypim yanapakunku”,+ nispa.

31 Hinaptinmi Moiseswan Eleazarqa Jehova Diospa kamachisqanman hina kasukurqaku. 32 Peleaq riqkunapa lliw apakamusqankum karqa 675.000 cabrakunawan ovejakuna, 33 72.000 vacakuna, 34 61.000 asnokuna hinaspa 35 qariwan+ manaraq puñuq 32.000 sipaskuna. 36 Peleaq riqkunapaq rakisqanku cabrakunawan ovejakunam karqa 337.500. 37 Jehova Diospaq rakisqanku cabrakunawan ovejakunañataqmi karqa 675. 38 Peleaq riqkunapaq rakisqanku vacakunam karqa 36.000, Jehova Diospaq rakisqanku vacakunañataqmi karqa 72. 39 Peleaq riqkunaman tupaq asnokunam karqa 30.500, Jehova Diospaq rakisqanku asnokunañataqmi karqa 61. 40 Peleaq riqkunapaq rakisqanku sipaskunam karqa 16.000, Jehova Diospaq rakisqanku sipaskunañataqmi karqa 32. 41 Chaymi Moisesqa Jehova Diospa kamachisqanman hina sacerdote Eleazarman qurqa+ Jehova Diospaq rakisqanta.

42 Peleaq riqkunapa apamusqankumanta Israelpa mirayninkunapaq Moisespa rakisqanñataqmi karqa: 43 337.500 cabrakunawan ovejakuna, 44 36.000 vacakuna, 45 30.500 asnokuna, 46 16.000 sipaskuna. 47 Israelpa wakin mirayninkunapaq rakisqankumantañataqmi Moisesqa sapa 50 runamanta hinaspa 50 animalmanta Leviy ayllupaq hukta rakirqa.+ Hinaspam Jehova Diospa carpanpi yanapakuq Leviy aylluman qurqa,+ chaykunataqa rakirqa Jehova Diospa kamachisqanman hinam.

48 Chaymantam Moisesman rirqaku 1.000 runakunata kamachiqkuna+ hinaspa 100 runakunata kamachiqkuna, 49 hinaspam Moisesta nirqaku: “Sapakamam yuparqaniku peleaq riq runaykuta, hinaptinmi mana chullapas faltanchu.+ 50 Chaynaqa, sapakamapa huchayku pampachasqa kananpaqmi Jehova Diospaq qurimanta alaqakunata quyta munaniku. Chakipaq hinaspa makipaq pulserakunata, sellana anillokunata, aritukunata hinaspa hukkunata. Chaykunataqa Jehova Diospaqmi qusaqku”, nispa.

51 Hinaptinmi Moiseswan Eleazarqa qurimanta alaqakuna apamusqankuta lliwta chaskirqaku. 52 Jehova Diospaq chay apamusqanku quriqa karqa yaqa 191 kilom*, chaytaqa apamurqaku 1.000 runakunata kamachiqkuna hinaspa 100 runakunata kamachiqkunam. 53 Sapakamam peleaq riq runakunaqa tukuy imata apakamurqaku. 54 Hinaptinmi Moiseswan Eleazarqa kamachiqkunapa tukuy rikchaq alaqa apamusqankuta chaskispanku Jehova Diospa carpanman aparqaku, chaynapi Israelpa mirayninkuna yuyarinankupaq.

32 Rubenpa+ hinaspa Gadpa+ mirayninkunaqa achkallaña animalniyuqmi karqaku, chaymi animalninkuta michinankupaq Jazer+ hinaspa Galaad allpakuna sumaqllaña kasqanta qawarqaku. 2 Chayraykum Gadpa hinaspa Rubenpa mirayninkunaqa Moisesman, Eleazarman hinaspa kamachiqkunaman asuykuspa nirqaku: 3 “Sumaqllaña allpam Atarotqa, Dibonqa, Jazerqa, Nimraqa, Hesbonqa,+ Elealeqa, Sebamqa, Neboqa+ hinaspa Beonqa.+ 4 Chay allpakunaqa animalkuna uywanapaqmi sumaqllaña kachkan. Chay allpakunatam Jehova Dios ñuqanchikpaq qichururqa.+ Ñuqaykuqa achkallaña animalniyuqmi kaniku”,+ nispa. 5 Nirqakutaqmi: “‘Arí’ niykuwaptikikuqa kay allpakunayá ñuqaykupaq kallachun, amañayá Jordan mayutaqa chimpachillawaykuchu”, nispa.

6 Hinaptinmi Moisesqa Gadpa hinaspa Rubenpa mirayninkunata nirqa: “¿Kaypi qipakuptikichikchu wakin wawqillaykichik peleaq rinqaku? 7 Amayá hukmanyachiychikchu Jehova Diospa qusqan allpaman wawqikichik rinankutaqa. 8 Chaytam taytaykichikpas ruwarqaku allpata qawamunankupaq Cades-barneamanta kachaptiy.+ 9 Jehova Diospa quwananchik allpata+ Escol wayqumanta+ qawaramuspankum Israelpa mirayninkunata hukmanyachirqaku chay allpaman mana rinankupaq. 10 Hinaptinmi Jehova Diosqa llumpayta piñakuspan nirqa:+ 11 ‘Abrahanman, Isaacman hinaspa Jacobman+ qunay allpamanqa manam yaykunqakuchu 20 watayuqmanta hanayman+ Egiptomanta lluqsimuq lliw qarikunaqa. 12 Kenazpa mirayninmanta Jefuneypa churin Calebwan+ Nunpa churin Josueyllam+ yaykunqaku Jehova Diosta tukuy sunqunkuwan kasukusqankurayku’,+ nispa. 13 Chaymi Israelpa mirayninkunapaq Jehova Dios piñakurqa, hinaspam 40 wata+ chunniqpi purichirqa Jehova Diosta mana kasukuqkuna wañunankukama.+ 14 Qamkunapas taytaykichik hinam mana kasukuspa Jehova Diosta astawan piñachichkankichik. 15 Qamkunapas mana kasukuptikichikqa Diosmi chunniqpi saqisunkichik, hinaptinmi Israelpa llapallan mirayninkuna huchaykichikpi wañunqaku”, nispa.

16 Chaymantam paykunaqa kaqmanta Moisesman asuykuspa nirqaku: “Taytáy, kaypiyá animalniykupaq kanchata rumiwan pirqakurusaqku, churiykupaqpas llaqtakunatayá hatarirachisaqku. 17 Chaywanpas hinallam wawqiykupa ñawpaqninta peleaq risaqku+ Diospa qunan allpata chaskinankukama. Chaykamachiki churiykuñataq murallasqa llaqtakunapi kachkanqaku, chaynapi huk runakuna mana imanananpaq. 18 Manam wasiykumanqa kutimusaqkuchu Israelpa mirayninkuna tupaqnin allpankuta chaskinankukama.+ 19 Ñuqaykuqa kaylawpi allpata chaskisqaykuraykum Jordan mayuta chimpaspaqa manaña chaskisaqkuchu”, nispa.+

20 Moisesñataqmi nirqa: “Nisqaykichikman hina Jehova Diospaq peleaq riptikichik+ 21 hinaspa Jordan mayuta peleanaykichikpaq chimpaptikichik chaynataq chiqniqnin runakunata Jehova Dios qarquruptin+ 22 Jehova Diospa makinpiña allpa kaptin+ kutimuptikichikqa+ chayraqmi kay allpaqa Jehova Diospa yachasqanta qamkunapaq kanqa,+ hinaspapas Jehova Diospaqwan Israelpa mirayninkunapaqmi mana huchayuq kankichik. 23 Chaynata mana ruwaspaykichikqa Jehova Diospaqmi huchayuq kankichik, hinaptinmi huchaykichikpiña imapas pasasunkichik. 24 Chaynaqa churikichikpaqyá llaqtakunata hatarichiychik, animalnikichikpaqpas kanchakunatayá pirqaychik.+ Ichaqa amam qunqankichikchu nisqaykichik ruwaytaqa”, nispa.

25 Gadpa hinaspa Rubenpa mirayninkunañataqmi Moisesta nirqaku: “Nisqaykiman hinam ruwallasaqku taytáy. 26 Galaad allpapim+ churiyku, warmiyku, vacayku hinaspa llapan animalniyku kanqa. 27 Ñuqaykuñataqmi taytáy kamachiwasqaykikuman hina chimpallasaqku Jehova Diospaq+ peleanaykupaq”, nispa.

28 Chaymi Moisesqa Eleazarta, Nunpa churin Josueyta hinaspa kamachiqkunata nirqa: 29 “Sichu Gadpa hinaspa Rubenpa mirayninkuna Jehova Diospaq peleanankupaq qamkunawan kuska Jordan mayuta chimpaptinkuqa hinaspa chaskinaykichik allpa makikichikpiña kananpaq yanapasuptikichikqa Galaad allpam paykunapaq kanqa.+ 30 Paykuna mana peleaq riptinkuñataqmi Canaan allpapi qamkunawan yachanankupaq* allpata qunkichik”, nispa.

31 Hinaptinmi Gadpa hinaspa Rubenpa mirayninkunaqa nirqaku: “Jehova Diospa nisqanman hinayá kachun. 32 Jehova Diospaq peleaq rinaykupaqmi Canaan allpaman+ chimpasaqku, allpaykum ichaqa kaylaw chimpallapi kanqa”, nispa. 33 Chaymi Moisesqa Gadpawan Rubenpa mirayninkunaman+ allpata qurqa, qurqataqmi Joseypa churin Manasespa wakin mirayninkunamanpas.+ Chay qusqan allpam karqa Seonpa+ kamachisqan Amorreo runakunapa lliw allpan hinaspa Ogpa+ kamachisqan lliw Basan allpa.

34 Chaymi Gadpa mirayninkunaqa Dibon,+ Atarot,+ Aroer,+ 35 Atrot-sofan, Jazer,+ Jogbea,+ 36 Bet-nimra+ hinaspa Bet-haran+ llaqtakunata hatun murallayuqta hatarichirqaku, animalninkupaqpas kanchakunatam rumiwan pirqarqaku. 37 Rubenpa mirayninkunañataqmi Hesbon,+ Eleale,+ Kiryataim,+ 38 Nebo,+ Baal-meon+ hinaspa Sibma llaqtakunata hatarichirqaku, chay hatarichisqanku wakin llaqtakunamanqa huk sutitañam churarqaku.

39 Chaymantam Manasespa churin Makirpa mirayninkuna+ Galaad lawman rirqaku, hinaspam chaypi yachaq Amorreo runakunata qarqurqaku. 40 Chaymi Moisesqa Manasespa churin Makirman Galaad allpata qurqa, hinaptinmi chaypi yacharqaku.+ 41 Manasespa churin Jairñataqmi Amorreo runakunapa yachasqanku carpankuman rirqa, hinaspam qarquspan chayta suticharqa Havot-jairwan*.+ 42 Nobañataqmi hapikurqa Kenat llaqtata hinaspa muyuriqninpi llaqtachakunata, hinaspam kikinpa sutinwan suticharqa “Noba” nispa.

33 Moiseswan Aaronmi+ Israelpa mirayninkunataqa Egipto nacionmanta+ pusamurqaku, paykunaqa tropa-tropam+ lluqsimurqaku. 2 Mayninkuna pusamusqankutam Moisesqa Jehova Diospa kamachisqanman hina qillqarqa.+ 3 Puntatam Ramesesmanta+ lluqsimurqaku punta kaq killapa 15 kaq punchawninpi.+ Israelpa mirayninkunaqa pascua pasayllatam+ Egipto runakunata mana manchakuspa kusisqallaña lluqsimurqaku. 4 Egipto runakunañataqmi Jehova Diospa wañuchisqan piwi* churinkuta pampachkarqaku.+ Jehova Diosqa pinqaymanmi churarqa taytacha-mamachankuta.+

5 Chaymantam Ramesesmanta Sucot lawman rirqaku.+ 6 Sucotmantañataqmi chunniqpa qallarisqan Ezam lawman rirqaku.+ 7 Ezanmanta kutirispañataqmi Piayrot lawman rirqaku, hinaspam Migdolpa hichpanpi samarqaku.+ Piayrotmantaqa Baal-zefonqa+ rikukurqam. 8 Piayrotmantañataqmi lamar quchapa chawpinta+ chunniq lawman+ rirqaku, Ezam chunniqninta+ kimsa punchaw rispankuñataqmi Mara lawman+ chayarqaku.

9 Maramantañataqmi Elim sitioman rirqaku.+ Chaypiqa 12 pukyukunam karqa, karqataqmi 70 palmera sachakunapas. 10 Elinmantañataqmi Puka lamar quchapa patanman chayarurqaku. 11 Puka lamar quchamantañataqmi Sin sutiyuq chunniq qichwaman rirqaku.+ 12 Sin chunniqmantañataqmi Dofca lawman rirqaku. 13 Dofcamantañataqmi Alus lawman rirqaku. 14 Alusmantañataqmi Refidim lawman rirqaku,+ chaypim Israelpa mirayninkunapaq yaku mana karqachu. 15 Refidinmantañataqmi Sinai chunniq qichwaman rirqaku.+

16 Sinai chunniqmantañataqmi Kibrot-hataava lawman rirqaku.+ 17 Kibrot-hataavamantañataqmi Hazerot lawman rirqaku.+ 18 Hazerotmantañataqmi Ritma lawman rirqaku. 19 Ritmamantañataqmi Rimon-perez lawman rirqaku. 20 Rimon-perezmantañataqmi Libna lawman rirqaku. 21 Libnamantañataqmi Risa lawman rirqaku. 22 Risamantañataqmi Kehelata lawman rirqaku. 23 Kehelatamantañataqmi Sefer urquman rirqaku.

24 Sefer urqumantañataqmi Harada lawman rirqaku. 25 Haradamantañataqmi Makelot lawman rirqaku. 26 Makelotmantañataqmi+ Taat lawman rirqaku. 27 Taatmantañataqmi Tarey lawman rirqaku. 28 Tareymantañataqmi Mitka lawman rirqaku. 29 Mitkamantañataqmi Hasmona lawman rirqaku. 30 Hasmonamantañataqmi Moserot lawman rirqaku. 31 Moserotmantañataqmi Bene-jaakan lawman rirqaku.+ 32 Bene-jaakanmantañataqmi Hor-aguidgad lawman rirqaku. 33 Hor-aguidgadmantañataqmi Jotbata lawman rirqaku.+ 34 Jotbatamantañataqmi Abrona lawman rirqaku. 35 Abronamantañataqmi Ezion-gueber lawman rirqaku.+ 36 Ezion-guebermantañataqmi Cades lawman chayarurqaku, chayqa kachkan Zin sutiyuq chunniqpim.+

37 Cadesmantañataqmi Hor sutiyuq urquman+ rirqaku, chayqa kachkan Edom runakunapa allpanpa linderonwan tupaqpim. 38 Chay urqumanmi sacerdote Aaronqa Jehova Dios kamachiptin rirqa, hinaspam chaypi wañukurqa. Chayqa karqa Egiptomanta lluqsimusqanku 40 wata qipatañam pichqa kaq killapa punta kaq punchawninpi.+ 39 Aaronqa 123 watanpim Hor sutiyuq urqupi wañukurqa.

40 Chaymantam Canaan allpapi kaq Arad llaqtata kamachiq+ yacharurqa Israelpa mirayninkuna hichpallanpiña kasqanta, chay kamachiqqa Negueb qichwapim yacharqa*.

41 Chaymanta qipakunatam Israelpa mirayninkunaqa Hor sutiyuq urqu+ lawmanta Zalmona lawman rirqaku. 42 Zalmonamantañataqmi Punon lawman rirqaku. 43 Punonmantañataqmi Obot lawman rirqaku.+ 44 Obotmantañataqmi Moabpa linderon+ Iye-abarim lawman rirqaku. 45 Iyinmantañataqmi Dibon-gad lawman rirqaku.+ 46 Dibon-gadmantañataqmi Almon-diblataim lawman rirqaku. 47 Almon-diblatainmantañataqmi Nebopa chimpan+ Abarim urqu+ lawman rirqaku. 48 Abarim urqu lawmantañataqmi Moab chunniq pampaman chayarurqaku, chayqa kachkan Jordan mayupa waklawninpi hinaspa Jerico llaqtapa chimpanpim.+ 49 Moab chunniq pampapim Jordan mayupa patanpi Bet-jesimot lawmanta Abel-sitimkama+ carpankuta sayachirqaku.

50 Jehova Diosqa Moisestam Jordan mayupa waklawninpi hinaspa Jerico llaqtapa chimpanpi kaq Moab chunniq pampapi kaynata nirqa: 51 “Israelpa mirayninkunatayá niy: ‘Jordan mayuta chimpaspam Canaan allpaman yaykunkichik.+ 52 Hinaspam chay allpapi yachaqkunata qarqunkichik, ñutupankichiktaqmi rumimanta+ hinaspa chulluchisqa fierromanta+ ruwasqa taytachankutapas, chaymantapas chinkachinkichikmi taytacha-mamachanku yupaychanankupaq ima ruwasqankutapas*.+ 53 Hinaspam chaypi yachankichik, chay allpataqa qamkunamanmi qusqaykichik.+ 54 Chay allpataqa manam munasqaykichiktachu akllakunkichik,+ aswanqa sorteopi tupasusqaykichikman hinam llapallaykichik chaskinkichik. Achka kaqkunamanqa hatuntam qunkichik, aslla kaqkunamanñataqmi taksallata qunkichik.+ Allpataqa ima ayllumanta kasqaykichikman hinam chaskinkichik.+

55 Chay allpapi yachaqkunata mana qarquptikichikqa+ ñawikichikpi qupakuna hina hinaspa waqtaykichikpi kichkakuna hinam kanqaku, hinaspankum mana allinman aysasuspaykichik huchallichisunkichik.+ 56 Hinaptinmi ñuqañataq paykunata imam ruwanayta hina qamkunataña ruwasqaykichik’”, nispa.+

34 Jehova Diosmi kaqmanta Moisesta nirqa: 2 “Israelpa mirayninkunatayá niy: ‘Canaan allpaman chayaptikichikqa+ chay allpam kuchun-kuchun+ qamkunapaq kanqa.

3 Uray lawman* patanmi kanqa Edom lawpi kaq Zin sutiyuq chunniqkama. Chay uray lawpi patanqa qallarinqa Kachi quchamantam*.+ 4 Kachi quchamantam rinqa Acrabim wichayninta,+ chaymantam Zin chunniqninta Cades-barnea lawman+ chayanqa, chaymantañataqmi Hazar-addar lawninta+ Azmon lawkama chayanqa. 5 Azmon lawmantañataqmi Egipto wayqunta Hatun lamar quchaman* chayanqa.+

6 Intipa siqaykunan lawman patanmi kanqa lliw Hatun lamar quchapa kasqankama.+

7 Hanay lawman* patanmi kanqa Hatun lamar quchapa patanmanta Hor sutiyuq urqukama. 8 Hor urqumantañataqmi Lebo-hamat* lawkama, Lebo-hamat lawmantañataqmi+ Zedad lawkama.+ 9 Zedad lawmantañataqmi Zifron lawkama, Zifron lawmantañataqmi Hazar-enan lawkama.+ Chaymi kanqa hanay lawman patankuna.

10 Intipa qispimunan lawman patanmi kanqa Hazar-enan lawmanta Sefam lawkama. 11 Sefam lawmantañataqmi Ribla lawkama, Riblaqa kachkan Ainpa inti qispimunan lawninpim. Chaymantam urayman rinqa Kineret* quchapa+ patanta 12 Jordan mayukama, Jordan mayumantañataqmi Kachi quchakama chayanqa.+ Tukuy chaynintam muyurinqa allpaykichik’”,+ nispa.

13 Chaymantam Moisesqa Israelpa mirayninkunata nirqa: “Kay allpatam isqun ayllukuna hinaspa Manases ayllumanta wakin runakuna rakinakunkichik+ Jehova Diospa kamachisqanman hina. 14 Ruben aylluwan Gad aylluqa chaynataq Manases ayllumanta wakinqa ñam allpankutaqa chaskirunkuña.+ 15 Paykunaqa Jerico llaqtapa chimpanpim allpataqa chaskirqakuña, chayqa kachkan Jordan mayupa inti qispimunan lawninpim”, nispa.+

16 Jehova Diosqa Moisestaqa nirqataqmi: 17 “Chaskinaykichik allpata rakiypim yanapakunqaku sacerdote Eleazarwan+ Nunpa churin Josuey.+ 18 Chaymantapas allpata rakiypi yanapakunankupaqmi sapa ayllupi kamachiqta huñunkichik.+ 19 Juda ayllumantam+ kanqa Jefuneypa churin Caleb,+ 20 Simeon ayllumantam+ kanqa Amiudpa churin Semuel, 21 Benjamin ayllumantam+ kanqa Kislonpa churin Elidad, 22 Dan ayllumantam+ kanqa Joglipa churin Buki, 23 Joseypa churin+ Manases ayllumantam+ kanqa Efodpa churin Haniel, 24 Joseypa churin Efrain ayllumantañataqmi+ kanqa Siftanpa churin Kemuel, 25 Zabulon ayllumantam+ kanqa Parnacpa churin Elizafan, 26 Isacar ayllumantam+ kanqa Azanpa churin Paltiel, 27 Aser ayllumantam+ kanqa Selomipa churin Ayud, 28 Neftaliy ayllumantañataqmi+ kanqa Amiudpa churin Pedael”, nispa. 29 Paykunatam Jehova Diosqa akllarqa Israelpa mirayninkunapaq Canaan allpata rakiypi yanapakunankupaq.+

35 Jordan mayupa+ waklawninpi hinaspa Jerico llaqtapa chimpanpi kaq Moab chunniq pampapim Jehova Diosqa Moisesta nirqa: 2 “Allpa chaskisqankumantayá Israelpa mirayninkunaqa Leviy aylluman quchunku llaqtakunata chaypi yachanankupaq*.+ Quchunkutaqyá chay llaqtapa muyuriqninpi pastoyuq allpatapas.+ 3 Leviy ayllupa mirayninkunam chay llaqtapiqa yachanqaku, pastoyuq allpañataqmi kanqa animalninkupaq hinaspa imankupaqpas. 4 Leviy ayllupa pastoyuq allpankuqa llaqtapa pirqanmanta hawamanmi 445 metro* kanan, chayna sayayniyuqmi lliw muyuriqnin kanan. 5 Chaynapim intipa qispimunan lawman lliwña kanan 890 metro*, sur lawmanpas lliwñam kanan 890 metro, intipa siqaykunan lawmanpas lliwñam kanan 890 metro, chaynataqmi norte lawmanpas lliwña kanan 890 metro. Chaynam kanqa pastoyuq lliw allpankuqa, llaqtañataqmi chawpipi kanqa.

6 Leviy aylluman qusqanku llaqtakunamantam suqta llaqtakuna akllasqa kanqa amparakuna llaqta kananpaq,+ chaymanmi runa wañuchiqqa pakakuq ayqikunan.+ Chay suqta llaqtakunamanta sapaqmi 42 llaqtakuna Leviy ayllupaq kanqa. 7 Leviy aylluman qunanku llaqtakunaqa 48 llaqtakunam kanan, sapakamam pastoyuqkama kanan.+ 8 Chaykunataqa Israelpa mirayninkunaman qunay llaqtakunamantam qunanku.+ Achka kaqkunam achkata qunanku, aslla kaqkunañataqmi asllata qunanku.+ Chaskisqankuman hinam Leviy ayllumanqa achkatapas utaq asllatapas qunanku”, nispa.

9 Jehova Diosqa Moisestam hinalla nirqa: 10 “Israelpa mirayninkunatayá niy: ‘Jordan mayuta chimpaspam Canaan allpaman yaykunkichik.+ 11 Chaypim utqaylla chayana llaqtakunata akllankichik amparakuna llaqtakuna kananpaq, chaynapi imatapas ruwachkaspan qunqaymanta runamasinta wañuchiq chayman ayqikunanpaq.+ 12 Chay llaqtakunaqa kanqa wañukuqpa ayllun wañuchinanpaq maskaptin ayqikunanpaqmi,+ chaypim kanqa ima ruwasqan juezkunawan* allichasqa kanankama.+ 13 Chaypaqmi kanqa chay qusqaykichik amparakuna suqta llaqtakunaqa. 14 Amparakuna llaqtakuna kananpaqmi qunaykichik Jordan mayupa+ kaylaw waqtanpi kimsa llaqtata, Canaan allpapiñataq kimsa llaqtata.+ 15 Chay suqta llaqtakunam kanqa pipas imatapas ruwachkaspan qunqaymanta runamasinta wañurachispan ayqikunanpaq.+ Chay llaqtakunamanqa ayqikunmanmi Israelpa mirayninkuna, qamkunawan yachaq forasterokuna+ chaynataq qamkunawanña yachaq huklaw llaqtayuqkunapas.

16 Sichu pipas ima fierrowanpas waqtaspan runamasinta wañurachiptinqa, runata wañurachisqanraykum chay runaqa wañuchisqapuni kanan.+ 17 Rumiwan wañurachispanpas wañuchisqapunim kanan. 18 Kulluwan utaq kaspiwan wañurachispanpas wañuchisqapunim kanan.

19 Runamasin wañuchiqtaqa wañukuqpa ayllunmi wañuchinan maypi tariruspanpas. 20 Sichu pipas chiqnisqanrayku runamasinta wañurachinman tanqaykuspan, imatapas llullanta chuqaykuspan,+ 21 utaq sikuspan hinaptinqa runa wañuchisqanraykum chay runaqa wañuchisqapuni kanan. Chay wañuchiq runataqa wañukuqpa ayllunmi wañuchinan maypi tariruspanpas.

22 Sichu pipas runamasinta mana chiqnichkaspa tanqaykuspan, imatapas chuqaykuspan,+ 23 utaq qunqaymanta rumiwan hapirachispan wañurachinman hinaptinqa, 24 juezkunam kamachikuyman hina allichanan wañukuqpa ayllun mana wañuchinanpaq.+ 25 Hinaspam juezkunaqa runamasin wañuchiqta amparakuna llaqtaman kutichinanku. Hinaptinmi chay llaqtapi yachanan sacerdotekunata kamachiq wañukunankama, chay kamachiqqa chuya aceitewan akllasqam karqa.+

26 Runamasinta wañuchiq chay runa amparakuna llaqtamanta lluqsiruptin 27 wañukuqpa ayllun wañurachiptinqa mana huchayuqmi wañuchiqninqa kanqa. 28 Chaynam kanqa amparakuna llaqtamanta sacerdotekunapa kamachiqnin manaraq wañuchkaptin lluqsirusqanrayku. Sacerdotekunapa kamachiqnin wañukusqan qipatam ichaqa maymi yachasqanman hawkaña chay wañuchiq runaqa kutikunman.+ 29 Chay kamachikuykunaman hinam imatapas allichankichik qamkunapas hinaspa miraynikichikkunapas, chay kamachikuyqa una-unaypaqmi kanqa.

30 Pipas runamasinta wañurachiqqa kikinpas wañuchisqam kanan+ rikuqninkuna kaptinqa,+ rikuqnin chullalla kaptinmi ichaqa mana wañuchisqachu kanan. 31 Wañuchinaykichik runapa rantinpiqa amam imatapas chaskinkichikchu, payqa wañuchisqapunim kanan.+ 32 Sacerdotekunata kamachiq manaraq wañukuchkaptin amparakuna llaqtamanta lluqsikuy munaqmantapas amam imatapas chaskinkichikchu.

33 Amam yachasqaykichik allpataqa qachachankichikchu runata wañuchispaqa.+ Chay runapa huchantaqa manam imapas pampachanqachu, aswanqa kikinpa wañuchisqa kayllanmi.+ 34 Amam allpataqa qachachankichikchu chaypi yachasqaykichikrayku chaynataq ñuqa Jehova Diospas qamkunawan kasqayrayku’”, nispa.+

36 Joseypa churinmi karqa Manases, Manasespa churinmi karqa Makir,+ Makirpa churinñataqmi karqa Galaad. Galaadpa mirayninmanta kaq kamachiqkunam rirqaku Moisespa hinaspa Israelpa mirayninkunata kamachiqkunapa kasqanman. 2 Hinaspam nirqaku: “Taytáy, Jehova Diosqa nisurqanki allpataqa tupasqanman hina pimanpas qunaykipaqmi,+ Jehova Diosqa nisurqankitaqmi wawqiyku Zelofeadpa warmi churinkunaman allpata qunaykipaqpas.+ 3 Ichaqa paykuna huk ayllumanta kaqkunawan casarakuptinkuqa, huk ayllupaqñachiki tupaqnin allpankupas kanqa. Hinaptinchiki allpaqa manaña aylluykupañachu kanqa. 4 Kusikunapaq wata+ chayamuptinpas qusankupa ayllunpaqñachiki allpaqa kanqa. Hinaptinqa manañachiki chay allpaqa Manases aylluykupa allpanñachu kanqa”, nispa.

5 Chaymi Moisesqa Jehova Diospa kamachisqanman hina Israelpa mirayninkunata nirqa: “Joseypa mirayninkunapa nisqankuqa allinmi. 6 Zelofeadpa warmi churinkunamantam Jehova Diosqa nin: ‘Paykunaqa casarakunmanku Manases ayllunmanta kaqkunallawanmi. 7 Israelpa mirayninkunapa chaskisqanku allpaqa manam huk ayllumanqa qusqachu kanan. 8 Pi warmipas allpata chaskispanqa ñawpaq abuelonpa ayllunmanta kaqllawanmi casarakunan,+ chaynapi ayllunkuman tupasqan allpaqa hina paykunallapaq kananpaq. 9 Manam mayqin ayllupa allpanpas huk ayllumanqa qusqachu kanan, sapa ayllum hina tupaqnin allpapi qipakunan’”, nispa.

10 Hinaptinmi Zelofeadpa churinkunaqa Jehova Diospa kamachisqanta kasukurqaku.+ 11 Chaymi Maala, Tirza, Hogla, Milca hinaspa Noaqa taytanku+ Zelofeadpa wawqinkunapa churinkunawan casarakurqaku. 12 Paykunaqa Joseypa churin Manasespa mirayninkunamanta kaq qarikunawanmi casarakurqaku, chaynapi taytankupa allpanqa hina Manases ayllullapi qipananpaq.

13 Chaykunam karqa Israelpa mirayninkunaman ninanpaq Moisesta Jehova Diospa kamachisqankuna, chaytaqa kamachirqa Moab chunniq pampapim. Chayqa kachkan Jordan mayupa waqtanpim hinaspa Jerico llaqtapa chimpanpim.+