Agama animalchapa chupan

KAY agama sutiyoq animalchaqa mana sasachakuspallam pampamanta perqakama pawan. Pawanan pampa lluchka kaptinqa sasachakunmi pawaspan, ichaqa atinmi perqapi laqakuytaqa. ¿Imataq yanapan? Chupanmi.

Kaypi yuyaymanay: Qachqa pampamantaqa mana sasachakuspallam perqaman pawan, chaynapim chupanpas urayllaman wayurayan. Ichaqa lluchka pampamanta pawaptinmi cuerpon huklawman aysan, chaymi mana allintachu pawan. Chaynata pawachkaspanpas manaraq perqaman laqakuchkaspanmi chupanta altoman hoqarispan cuerponta takyachin. Chay ruwayqa sasam. Californiapi Berkeley Universidadmanta huk willakuymi nin: “Cuerpon takyananpaq maykama chupanta hoqarinanmantam allinta tanteanan”, nispa. Pawanan pampa llumpay lluchka kasqanman hinam chupanta astawan hoqarin, chaynapi perqapi allinta laqakunanpaq.

Kay agama sutiyoq animalchapa chupanmi ingenierokunata yanapanman chayman rikchakuq robotkunata ruwanankupaq, chaynapi ima desgraciapas pasaptin chaypi kawsaqkunata maskanankupaq. Yachaysapa Thomas Libby runam nin: “Robotkunapa ruwasqankutaqa manam tupachichwanchu animalkunapa ruwasqankuwanqa, chaymi animalkunata qawaspa robotkunataqa ruwana”, nispa.

¿Imatam piensanki? ¿Kikillanchu rikurirqa icha unanchasqachu karqa agama animalchapa chupanqa?