¿‘Fiesta punchawkunapi’ hinachu tarikunki?

¿IMA ninantaq chayqa? Chayqa rimachkan sonqonchikpi imayna tarikusqanchikmantam. “Ñakariq” otaq llakisqa runaqa ima ruwasqanmantapas mana allin kasqanpaqmi piensan, chaymi sapa ‘punchaw’ hukmanyasqa tarikun. “Kusisqa sonqoyoq” runam ichaqa imamantapas otaq ima ruwasqanmantapas allinta piensan, chaymi yanapan ‘fiestapipas’ hina tarikunanpaq.

Llapallanchikmi imawanpas sasachakunchik, chaymi llakisqata tarichiwanchik. Ichaqa imaña pasawaptinchikpas atichwanmi sonqonchikpi kusisqa kaytaqa. Qawasunyá Bibliapa ima nisqanmanta.

• Paqarin ima pasananpiqa ama llumpayta piensaychu. Jesucristom nirqa: “Amayá afanakuychikchu hamuq punchawmantaqa. [. . .] Sapa punchawpaq sasachakuykunaqa amañayá hatunyachunchu”, nispa (Mateo 6:34).

• Allin kaqkuna pasasusqaykimanta listapi qellqay. Hukmanyasqa tarikuspaykiqa chayta leespa yuyaymanay. Amataq pantasqaykikunapiqa llumpayta piensaychu. Carrota manejaqqa manam espejontakama qepaman qawarayaspanchu manejan aswanqa wakin kutillapim chaynintaqa qawarin. Qampas ñawpaqman qawachkaq hina hinalla kallpanchakuy. Yuyaytaq ima huchamantapas Diosqa pampachakuq kasqanta (Salmo 130:4).

• Imamantapas llumpayta preocupakuspaqa llakisqa sonqom rikuriruwaq, chaymi Biblia nin: ‘Kuyakuywan palabrakunaqa sonqontam kusirichin’, nispa (Proverbios 12:25). ‘Kuyakuy’ palabrawanqa kallpanchasunkimanmi kusisqa sonqoyoq kaq familiayki otaq amistadniki. Chaymi ima llakikimantapas paykunaman willakuynikiqa allin kanman (Proverbios 17:17).

Achka runakunatam Bibliapi consejokuna yanapachkan sasachakuypi kaspankupas kusisqa sonqo kawsanankupaq. Qamtapas chay consejokuna yanapasunaykitam munaniku.