Haran llaqtaman Jacob risqanmanta

¿YACHANKICHU pikunawantaq Jacobqa parlachkan? Achka punchawta illaruspanmi, Jacobqa pozopa hichpanpi ovejan michiqkunata tarirurqa. Chaymi Jacobqa michiqkunata tapurqa: ‘¿Maylawmantam kankichik?’ nispa.

Paykunañataqmi nirqaku: ‘Haran llaqtamantam kaniku’, nispa.

Hinaptinmi Jacob paykunata tapurqa: ‘¿Reqsinkichikchu Labanta?’

Paykunañataqmi nirqaku: ‘Reqsinikum. Waqaya churin Raquel hamuchkan ovejankunawan’ nispa. ¿Raquel asuykamuqta qawachkankichu?

Jacobmi rikururqa Raquelta tion Labanpa ovejankunawan hamuchkaqta hinaspam pozoman asuykuspa rumita tikrarurqa pozomanta ovejakuna yaku tomananpaq. Hinaptinmi Jacobqa Raquelta muchaykuspam willarqa pi kasqanta. Chaymi Raquelqa llumpayta kusirikurqa hinaspa wasinman kallpaspa taytan Labanman willarqa.

Labanmi llumpayllataña kusikurqa Jacob wasinpi qepakusqanmanta. Raquelwan casarakuyta munasqanta Jacob niptinmi, Labanqa kusikurqa. Ichaqa Raquelwan casarakunanpaqmi rimanakurqaku qanchis watata wasinpi servinanpaq. Raquelta llumpayta kuyaspam Jacobqa chayta rurarqa. ¿Yachankichu imataq pasarqa casarakunanpaq tiempo cumplikuruptin?

Raquelpa rantinpi Lea sutiyoq mayor kaq warmi churinwanmi Jacobta casarachirqa. Jacobmi qanchis watatawan Labanta servinanpaq rimanakurqaku, chaymantañam Labanqa Raquelta qorqa. Chay tiempopiqa, Jehová Diosqa manam harkakurqachu qarikuna iskay kimsa warmiwan casarakunankutapas. Kunanñataqmi ichaqa, Bibliapa nisqanman hina chulla warmillawanña casarakunanku.