¡Mayna allinmi Diosmanta Yachachinapaq Escuelapi kasqaykiqa!
ALLPANTINPIM iskay pachak masnin nacionkunapi wara-waranqantin runakuna Diosmanta Yachachinapaq Escuelapi sapa semana yachachkanku. Wakinqa chayllaraqmi chay escuelapi kachkanku, wakinñataqmi unay watakunaña. Maypiña yachaspaykipas otaq tiyaspaykipas, chay escuelawanqa yanapachikuwaqmi. Yuyayniyoqpas, warmakunapas hinaspa maylawmanta kaqkunapas debaldellam Diosmanta chay escuelapi yachachkanku.
Kay escuelaqa Jehova Diospa llaqtanpim 1943 kaq watapi qallarirqa. Rurakurqaqa: “Diospa Palabranta uyariruspanku llapallan iñiqkuna allin yachachisqa kanankupaqmi, chaynapi hukkunata sumaqta yachachinankupaq [. . .] hinaspa suyakuyninkumantapas allinta willakunankupaq” (Course in Theocratic Ministry [Curso en el Ministerio Teocrático], pág. 4). Kunanpas kay escuelaqa chayna yanapawananchikpaqmi.
¿Imaynatam allinta servichikuchwan rimayninchikta? Bibliam niwanchik: ‘[Lliw] kawsaqkuna Tayta Diostayá alabaychik’, nispa (Sal. 150:6). Alabaspanchikmi hanaq pachapi Taytanchikta kusichinchik hinaspa tukuy ima qowasqanchikmanta kuyawasqanchikmanta agradecekunchik. Chaymi cristianokunaqa kallpanchasqa kanchik ‘kañasqa ofrendata qochkaq hina sutinmanta willakuspa [. . .] Diosta alabananchikpaq’ (Heb. 13:15). Rimasqaykiwan Jehova Diosta aswan allintaraq alabanaykipaqmi Diosmanta Yachachinapaq Escuelapi kusikuywan chaskiykiku.
Kay escuelaqa yanapasunkim runakunapa qayllanpi, leenaykipaq, rimanaykipaq hinaspa yachachinaykipaqpas, ichaqa manamá chayllachu. Yanapasunkitaqmi allinta leenaykipaq, mana qonqarunaykipaq, uyarinaykipaq, estudianaykipaq, qellqakunapi yachachikuykunata maskanaykipaq, preparakunaykipaq, tanteanaykipaq, hukkunawan rimanaykipaq, tapukuykunata kutichinaykipaq chaynataq cartakunata qellqanaykipaqpas. Bibliatawan qellqanchikkunatam servichikusun kay huñunakuypi estudianapaq, yachachinapaq hinaspa rimarinapaqpas. Bibliamanta entiendespaykim Diospa piensasqanman hina astawan piensanki, chaynapim kawsakuynikipas sumaq kanqa. Bibliapa yachachikuynin allinninchikpaq kasqanmantam ancha reqsisqa profesor kaynata nirqa: “Bibliamanta allin yachaqkunaqa allin educacionniyoqmi kanku. [. . .] Piensasqayman hinaqa universidadman mana rispapas Bibliamanta yachaymi aswan allinqa, universidadpi estudiachkaspa Bibliamanta mana yachaymantaqa”, nispa.
Allintapuni yanapachikuy
Diosmanta Yachachinapaq Escuelapi allinta yachanaykipaqqa kikikim kallpanchakunayki. Apostol Pablom iñiqmasin Timoteota kaynata kallpancharqa: “Chaytaqa sonqoykipiyá allinta takyachiy, chaynapim llapallanku qawanqaku imaynam aswan-aswan ñawpaqman risqaykita”, nispa (1 Tim. 4:15). ¿Imakunata ruraspam Pablopa nisqanta kasukuwaq?
Kallpanchakuy escuelaman sapa semana rinaykipaq. Chaymantapas Diosmanta Yachachinapaq Escuelawan Yanapachikuy niq libroykita allinta servichikuy. Libroykipa qallariyninpi sutikita qellqay, chaymantapas escuelaman sapa semana apay. Kay librotaqa servichikuwaqtaqmi qellqanaykipaqpas. Leespaqa señalay servichikunaykipaq kaqkunata, chaymantapas yachasqaykikunamanta libroykipa patankunapi qellqay.
Huñunakuypaq preparakuspaqa ama qonqaychu Biblia servichikuyta. Bibliata sapa semana leenapaq rakisqa kaqkunata leey. Yanapasunkitaqmi chay semanapaq kaq yachachikuykunata tiempowan estudiasqaykipas.
Kallpanchakuy escuelapi rimarinaykipaq hinaspa iñiqmasinchikkunapa rimarisqankuta uyarinaykipaqpas, chayna rurayqa allinmi uyarisqaykikunata yuyanaykipaq hinaspa kasukunaykipaqpas.
Wakinkuna hinam escuelapiqa hukkunapa qayllanpi discursota qonayki otaq demostracionta ruranayki kanqa. Chayna kaptinqa kallpanchakuy nisusqaykiman hina allinta ruranaykipaq. Ñawparinaykipaqmi consejokunata chaskinki, chaymi kallpanchaykiku sonqoykimanta kasukunaykipaq. Libroykipi qellqay consejokuna chaskisqaykita. Imayna kasqanchikmanta kikinchik cuentata qokuyqa sasam, chaymi escuelapi unay wataña kaptikipas Bibliapa nisqanman hina consejokuna chaskisqaykiqa iñiynikipi ñawparinaykipaq yanapasunki (Prov. 1:5).
¿Astawan ñawpariytachu munanki? Chayna kaptinqa kallpanchakuy sapa semanapaq yachachikuykunata tiempowan allinta preparakunaykipaq. Chaynapim escuelapi discurso qoqkuna mana hamuptinqa listoña kanki rantinpi ruranaykipaq, hinaspam aswan experienciayoq kanki. Chaymantapas imayna yachachisqankuta allinta qaway, llapanchikmi hukkunata qawaspa yachanchik.
Hinaspapas kallpanchakuy kay librota estudianaykipaq. Puntata estudiay qallariyninpi 15 yachachikuyninkunata, chaymantañataq qaway “Allin yachachiq hinaspa allin rimaq kanapaq” yachachikuykunata, chayqa qallarichkan 78 paginamantam. Chay paginapa qatiqninpi tarikuq sapa yachachikuykunata allinta estudiay hinaspa practicanapaq kaqtapas ruray, chaymantañataq yachasqaykikunata predicacionpi servichikuy. Chaynata ruraspam allin rimayta yachanki hinaspa Bibliamantapas allinta yachachinki.
Diosmanta Yachachinapaq Escuelam allinta yanapasunki Jehova Diosta alabanaykipaq. Pay munaptinmi kawsanchik, chaymi vidanchikqa kanan tukuy sonqonchikwan servinanchikpaq (Apoc. 4:11). Chaypaqmi kay escuelaqa yanapawasunchik. Yachachiwasunmi allinta piensanapaq, allin tanteowan imatapas ruranapaq hinaspa Bibliamantapas allinta yachachinapaq.