¿Sasachakuykunapi kawsananchiktachu Dios munarqa?

¿IMA noticiakunatataq periodicopi leenki, televisionpi qawanki hinaspa radiopipas uyarinki? ¡Willakuykunaqa mana allinkunallamantañam, guerrakunallamantañam hinaspa terrorismo nisqallamantañam! Piensariytaq sasachakuykunapi tarikusqaykipipas. Yaqapaschá onqoypas chaynataq kuyasqa amistadnikipa otaq aylluykipa wañukusqanpas llumpayta llakichisuchkanki. Allin ruraq Job hinapaschá tarikunki, paymi nirqa: “Ñakarispaymi sinka hinaña kallachkani”, nispa (Job 10:15).

Tapukunkipaschá:

• ¿Kaytachu Dios munarqa ñoqapaq hinaspa lliw runakunapaqpas?

• ¿Maypitaq yanapakuyta tariyman sasachakuyniykunata atipanaypaq?

• ¿Haykallapipas kay Allpa pachapi hawkayay kanmanchu?

Bibliam kay tapukuykunamanta sumaqta kutichiwanchik.

BIBLIAM YACHACHIN KAYKUNATA DIOS RURANANMANTA.

“Diosmi pichanqa paykunapa weqenta, manañam kanqachu wañuypas, lutokuypas, waqaypas nitaq nanaypas.” (Apocalipsis 21:4)

“Wistukunam luwichu hinaraq pawaykachanqaku.” (Isaias 35:6)

“Ñawsakunam qawarikunqa.” (Isaias 35:5)

‘Wañuqkunam kawsarimunqaku.’ (Juan 5:28, 29)

‘Manañam mayqanninchikpas nisunñachu: “Onqochkanim” nispaqa.’ (Isaias 33:24)

‘Kay pachapim achka-achka kawsaykuna qespinqa.’ (Salmo 72:16)

BIBLIAPA YACHACHISQANWAN YANAPACHIKUY

Amayá niychu chay promesakunaqa mosqoyllam nispaqa. Diospunim prometewanchik hinaspam Palabranpi willawanchik imayna cumplinanmantapas.

Ichaqa manamá chayllachu. Bibliaqa yachachiwanchikmi kunanpunipas kusisqapuni imayna kawsakunamanta. Llakikuynikipipas sasachakuynikipipas piensariy. Ichapas llakichisuchkanki qollqe mana haypasusqayki, onqosqayki hinaspa kuyasqa amistadnikipa otaq aylluykipa wañukusqanpas. Bibliam yanapawanchik chayna sasachakuykunata atipananchikpaq chaynataq sonqonchiktapas tiyachin kayna tapukuykunata kutichiwaspanchik:

• ¿Imanasqataq ñakarinchik?

• ¿Imaynatam sasachakuykunata atipachwan?

• ¿Imatam rurachwan ayllunchikpi kusisqa kawsanapaq?

• ¿Imataq pasawanchik wañukuptinchik?

• ¿Haykallapipas tupachwanraqchu kuyasqanchik wañukuqkunawan?

• ¿Imanasqataq seguropuni kachwan promesankunata Dios cumplinanmanta?

Kaypi nisqanmanta leesqaykim Bibliapa yachachisqanmanta yachay munasqaykita qawachin. Kay librom yanapasunki Bibliapa imam yachachisqanta yachanaykipaq. Qawariy imaynam sapa parrafo nisqapa uray patanpi tapukuykuna kasqanta. Wara-waranqantin runakunatam gustan tapukuykunapiwan kutichikuykunawan Jehová Diospa testigonkuna Bibliamanta yachachisqanku, qampas chayna estudianaykitam munaniku. Jehová Diosyá bendecisunki imatapuni Bibliapa yachachisqanmanta yachaypi kallpanchakuynikita.