Hatu-hatun sachaman rikchakuq gobiernomanta

Kamachiq Nabucodonosormi kaqmanta sueñokururqa, sueñokurusqanwanmi mancharisqallaña karqa, chaymi yachaysapakunata qayachispan sueñoynin ima ninan kasqanta tapurqa. Ichaqa manam mayqanpas atirqachu, chaymi Danielwanña rimarqa.

Nabucodonosormi Danielta nirqa: “Sueñoyniypim hanaq pachakama chayaq hatu-hatun sachata rikurqani. Maymantañapas chay sachaqa sutillam qawakurqa. Rurunpas, llaqinpas chaynataq kallmanpas sumaqllaña kaptinmi alton pawaqkunapas chaypi qisachakurqaku. Animalkunapas chaypim llantukurqaku. Rikurqanitaqmi hanaq pachamanta uraykamuq angeltapas, paymi qaparispan nirqa: ‘¡Kuchuspaykichik kallmankunata qururuychik! Sapiyuqraq kullunta ichaqa saqiruspa muyuriqninta waskawan hina fierrowan hinaspa broncewan wataruychik. Qanchis watapunim animal hinaña kanqa. Chaymantañam yachanqaku Dioslla llapallan kamachiq kasqanta, payqa pitapas munasqantam churan kamachiq kananpaqqa’”, nispa.

Jehova Diosmi Danielman willarqa chay sueñoypa ima ninan kasqanta. Chayta yacharuspanmi Danielqa mancharikurqa, hinaspanmi Nabucodonosorta nirqa: “Señorlláy, sueñoynikipi rikusqayki kuchusqa sachaqa qanmi kanki. Manañam kamachiqñachu kanki, aswanqa purun animalkuna hinam qurataña mikunki. Ichaqa angelmi nirqa sapiyuq kullunta saqinanpaq, chaywanqa nichkarqa kaqmanta kamachiq kanaykimantam”, nispa.

Huk wata pasaytam Nabucodonosorqa wasinpa hawanpi purichkaspan nirqa: “¡Mayna hatunmi kay Babilonia llaqta ruwasqayqa! ¡Manam ñuqa hinaqa pipas kanchu!”, nispa. Chaynata nichkaptinmi hanaq pachamanta nimurqa: “¡Nabucodonosor! Manañam kamachiqñachu kanki”, nispa.

Chayllam Nabucodonosorqa locoyaruspan purun animal hinaña purunpi yacharqa, kamachiq kasqanmantapas qarqurachikurqam. Chukchanmi ankapa purun hina hatu-hatunta wiñarurqa, sillunkunapas pawaq animalkunapa hinañam karqa.

Qanchis watamantam Nabucodonosorpa yuyayninqa kutirurqa. Hinaptinmi Jehova Diosqa kaqmanta churarqa Babilonia nacionta kamachinanpaq. Chaymi Nabucodonosorqa nirqa: “Hanaq pachapi kaq Jehova Diostam hatunchani. Payqa hatuntukuqkunatam pinqayman churan. Tukuy ima kamachiqtaqmi, chaymi pitapas akllan kamachiq kananpaq”, nispa.