Pirqapi maki qillqasqanmanta

Babiloniapiqa Belsasar sutiyuq runañam kamachirqa. Huk kutipim payqa allin riqsisqa waranqa runakunapaq convidota ruwarqa. Chay tutam qurimanta vasokunapi tomaspanku taytacha-mamachakunata hatuncharqaku. Chay vasokunaqa karqa Jehova Diospa wasinmanta Nabucodonosorpa apamusqanmi. Hinaptinmi qunqayllamanta pirqapi maki rikuriruspan mana riqsisqanku letrakunata qillqayta qallaykurqa.

Belsasarmi llumpayta mancharikuspan layqa runakunata qayachispan nirqa: “Pipas wak qillqapa ima ninan kasqanta willawaqniyqa Babilonia nacionpi kimsa kaq kamachiqmi kanqa”, nispa. Ichaqa manam pipas willayta atirqachu, chaymi Belsasarpa maman chayaramuspan nirqa: “Kachkanmi Daniel sutiyuq runa. Paymi Nabucodonosorman sueñoyninkunapa ima ninan kasqanta willarqa. Qanmanpas willasunkim chay qillqakunapa ima ninan kasqantaqa”, nispa.

Chaymi Danieltaqa kamachiq Belsasarman pusarqaku, hinaptinmi Danielta Belsasar nirqa: “Sichu qillqapa ima ninan kasqanta niykuwaptikiqa qurimanta collarwanmi wallqachisqayki. Chaymantapas Babilonia nacionpi kimsa kaq kamachiqmi kanki”, nispa. Danielmi nirqa: “Manam imatapas munanichu. Ichaqa willasqaykim ima ninan kasqanta. Taytayki Nabucodonosor hatuntukuq kaptinmi Jehova Diosqa pinqayman churarqa. Chaykunamanta yachachkaspapas qamqa Jehova Diostaqa manam manchakurqankichu, hinaspam paypa wasinmanta apachimusqanku kaq vasokunapiraq vinota tomachkanki. Chaymi Diosqa qillqachirqa: ‘MENE, MENE, TEKEL, UPARSIN’, nispa. Chay rimaykunaqa Media nacionniyuq hinaspa Persia nacionniyuq runakuna Babilonia nacionta munaychakunanmantam nichkan. Qampas manañam kamachiqñachu kanki”, nispa.

Babilonia nacionqa muyuriqninpi alli-allin pirqayuq hinaspa hatun mayupa harkasqanmi karqa. Chayna kaptinpas chay tutallam Media nacionniyuq hinaspa Persia nacionniyuq runakuna yaykururqaku. Persia nacionta kamachiq Cirom mayuta huklawman muyurachispan soldadonkunawan yaykururqa, chay llaqtapaqa punkunpas kicharayasqam karqa. Belsasarta wañurachiptinkum Ciroña Babiloniatapas kamachirqa.

Chaymantam kamachiq Ciro nirqa: “Jehova Diosmi kamachiwarqa Jerusalen llaqtapi wasinta hatarichipunaypaq. Pipas chay llaqtayuq yanapakuyta munaqqa richun”, nispa. Chaymi Jehova Diospa rimasqanman hina 70 watamanta Jerusalenman kutirqaku. Kamachiq Ciroqa Nabucodonosorpa apakusqan qurimanta vasokunatawan platokunatam Diospa wasinman kutichirqa. Jehova Diosqa Cirowanmi llaqtanta yanaparqa.