Saulota Jesus akllasqanmanta

Saulo sutiyuq runam Roma nacionniyuq karqa. Payqa Tarso llaqtapim nacerqa, hinaspapas judiokunapa yachachikuyninkunata alli-allinta riqsiq fariseo runam karqa. Jesuspa qatiqninkunatam ichaqa chiqniq. Chiqnispanmi wasikunaman yaykuspan qaritapas warmitapas pampanta aysaspa hurqumuq, hinaspam presochachiq. Jesuspa qatiqnin Estebanta rumiwan chuqaparuspa wañuchiptinkupas allinpaq hapispanmi qawaylla-qawakurqa.

Chaymantapas Sauloqa sacerdotekunapa kamachiqnintam mañakurqa Damasco llaqtaman rispapas Jesuspa qatiqninkunata ñakarichinanpaq. Chay llaqtaman chayaykuchkaptinmi qunqayllamanta muyuriqninta achki kanchaykurqa, hinaptinmi Sauloqa pampaman wichiykuspan uyarirqa: “Saulo, ¿imanasqataq qatikachawanki?”, niqta. Sauloñataqmi tapurqa: “¿Pitaq kanki?”, nispa. Hinaptinmi nimurqa: “Jesusmi kani. Hatarispaykiyá Damasco llaqtaman yaykuy, chaypim imam ruwanaykipaq nisunki”, nispa. Hinaptinmi Sauloqa ñawsayarurqa, chaymi aysaspaña llaqtaman chayachirqaku.

Damasco llaqtapim Ananias sutiyuq Jesuspa qatiqnin yacharqa. Paytam musquyninpi hina Jesus nirqa: “Judaspa wasinman rispayki Saulota maskamuy”, nispa. Hinaptinmi Ananias nirqa: “Uyarirqanim qatiqnikikunata chay Saulo ñakarichisqanmanta”, nispa. Chaymi Jesus nirqa: “Riy, paytam akllaruni achka nacionkunapi Diosmanta willakunanpaq”, nispa.

Sauloman chayaruspanmi Ananias nirqa: “Wawqilláy, Jesusmi kachamuwarqa kaqmanta qawarikunaykipaq”, nispa. Hinaptinmi chaylla Sauloqa qawarikururqa, hinaspapas Jesusmanta yacharuspanmi bautizakururqa. Chaymantam iñiqmasinkunawan kuskaña huñunakuna wasikunapi willakurqa. Chayta qawaspankum judiokunaqa tapunakurqaku: “¿Manachu kay runaqa Jesuspa qatiqninkunata ñakarichiq?”, nispa.

Chay Damasco llaqtapim Sauloqa kimsa wata willakurqa. Judiokunañataqmi chiqniruspanku wañuchinankupaq tantiarurqaku. Iñiqmasinkunam ichaqa llaqtapa muyuriqnin pirqapa ventananta Saulota canastapi uraykachirqaku mana wañurachinankupaq.

Chaymantam Sauloqa Jerusalenman rirqa, chaypi kaq iñiqkunam ichaqa payta manchakuqku. Jesuspa qatiqnin Bernabeyñataqmi apostolkunaman Saulota pusarurqa, hinaspam suma-sumaqta willarqa Sauloqa manaña ñawpaqpi hina kasqanmanta. Chaymi Sauloqa paykunawan kuskaña kusikuyllawanña Diosmanta Jerusalenpi willakurqa. Tiempopa risqanman hinam Saulotaqa Pablowanña suticharurqaku.