¿Imanasqataq mañakuyta tukuruspaqa ninanchik “Jesuspa sutinpim mañakuykiku” nispa?

JESUSQA runakunamanmi sapa kuti yachachiq imaynata Diosta mañakunankupaq. Chay tiempopi judiokunapa punta apaqninkunaqa ‘hatun callekunapa esquinankunapi sayaykuspam’ Diosta mañakuqku. ¿Imananqataq chaynata ruwaqku? Chaynataqa mañakuqku runakuna qawanallanpaqmi. Paykunaqa Diosman sunqu kasqankuta runakuna piensanankuta munaspankum Diosta una-unay mañakuqku kuti-kutirispa. Chaynataqa ruwaqku Dios uyarinanta piensaspankum (Mateo 6:5-8). Chaymi Jesusqa nirqa chayna mañakusqankuqa yanqapaq kasqanmanta hinaspam yachachirqa Diosta imaynata mañakunankupaq.

Jesusqa yachachirqa kaykunamanta mañakunapaqmi: Diospa sutin chuyanchasqa kananpaq, munaychakuynin hamunanpaq hinaspa munaynin kay pachapi ruwakunanpaq. Chaymantapas yachachirqam imatapas necesitaspaqa Diosta mañakunapaq (Mateo 6:9-13; Lucas 11:2-4). Jesusqa yachachirqataqmi rikchanachiykunata servichikuspan Jehova Dios uyariwananchikpaq imaynata mañakunapaq, chaypaqqa tukuy sunquwanmi mañakunanchik sapa kuti hinaspa mana hatun tukuspa (Lucas 11:5-13; 18:1-14). Jesuspas yachachisqanman hinam taytanta mañakurqa (Mateo 14:23; Marcos 1:35).

Imaynata mañakunankupaq Jesuspa yachachisqanmi qatiqninkunata allinta yanaparqa Diosta tukuy sunqunkuwan mañakunankupaq. Jesusqa wañukunan punchaw hichpaykamuptinpas hinallam yachachirqa paypa sutinpi taytanta mañakunankupaq.

“Jesusqa yachachirqam paypa sutinpi Diosta mañakunapaq”

Wañukunanpaq huk tutallaña faltachkaptinmi Jesusqa qatiqninkunata kallpancharqa, nirqam: “Ñuqam kani ñan, chiqap kaq chaynataq kawsay quqpas. Ñuqantakamallam pipas taytaymanqa asuykun”, nispa. Nirqataqmi: “Ñuqapa sutiypi imatapas mañakuptikichikqa ruwasaqmi, chaynapi churintakama taytay hatunchasqa kananpaq. Ñuqapa sutiypi imatapas mañakuptikichikqa ruwasaqmi”, nispa. Tukuykunanpaqñataqmi nirqa: “Kunankamaqa manaraqmi imatapas sutiypiqa mañakurqankichikchu. Mañakuychik hinaspaqa chaskinkichikmi, chaynapi anchata kusikunaykichikpaq”, nispa (Juan 14:6, 13, 14; 16:24).

Mayna sumaqmi Jesuspa chayna yachachisqanqa. Jesusqa chaynata yachachisqanwanqa manam paytaña mañakunapaqchu yachachichkarqa, aswanqa paynintakama Jehova Diosman asuykunapaqmi.

Diosqa uyariqpunim serviqninkunapa mañakusqankutaqa (1 Samuel 1:9-19; Salmos 65:2a). Israelpa miraynin runakunatam Diosqa akllarqa llaqtan kananpaq. Chaymi chay tiempomantapacha pipas Diosta mañakuspanqa riqsikunan karqa Israelpa mirayninkuna Diospa akllasqan runankuna kasqanta. Salomonpa tiemponpiñataqmi ofrendankuta Dios chaskinanpaqqa kamachisqanman hina temploman rinanku karqa (Deuteronomio 9:29; 2 Cronicas 6:32, 33). Ichaqa chaykunaqa manam wiñaypaqchu kanan karqa, apostol Pablopa nisqanman hinam ofrendakuna quyqa hinaspa ‘Moisespa leyninqa hamuq allin kaqpa llantuynin hinallam’ karqa (Hebreos 10:1, 2). Chay llantuqa Cristom karqa (Colosenses 2:17). Chaymi 33 watamantapacha Jehova Diosman asuykunanchikpaqqa manaña Moisespa tiemponpi leypa nisqanman hinañachu imatapas ruwananchik. Aswanqa Jesucristopa kamachiwasqanchiktañam kasukunanchik (Juan 15:14-16; Galatas 3:24, 25).

Diospa churinpa sutinqa lliw sutimantapas sumaq sutim

Jesusqa Diosman asuykunanchikpaqmi yanapawanchik. Paynintakamam mañakusqanchikta Dios uyariwanchik, ¿imaynanpi?

Nacesqanchikmantapacha huchayuq hinaspa pantaq kasqanchikraykum. Kikillanchikmantaqa imataña ruwaspapas Diosman asuykuytaqa manam atichwanchu, payqa chuyay-chuyay Diosmi (Romanos 3:20, 24; Hebreos 1:3, 4). Runakunapa huchan pampachasqa kananpaqmi señorninchik Jesucristoqa mana huchayuq kachkaspan wañukurqa (Romanos 5:12, 18, 19). Chayraykum Diospa qayllanpiqa huchanchikmanta pampachasqa kanchik hinaspa tukuy sunqunchikmanta mañakuyta atinchik. Mañakusqanchikta Jehova Dios uyariykuwananchikpaqqa Jesucristopa wañukusqanpim iñinanchik hinaspa paypa sutinpi mañakunanchik (Efesios 3:11, 12).

Jesuspa sutinpi Jehova Diosta mañakuspanchikqa, riqsikunchikmi 1) Jesucristoqa Diospa malta carneron kasqanta, paymi ñuqanchikrayku wañurqa huchanchikmanta pampachasqa kananchikpaq. 2) Riqsikunchiktaqmi sacerdotekunapa jefen kasqantapas. 3) Chaymantapas riqsikunchikmi Jesucristoqa “ñan” kasqanta. Payllam yanapawanchik mañakusqanchikta Jehova Dios uyariykuwananchikpaq (Juan 1:29; 14:6; Hebreos 4:14, 15).

Jehova Diosta Jesuspa sutinpi mañakuspaqa paytapas hatunchachkanchik. Chaytam Jehova Diospas munan, munanmi ‘Jesuspa sutinpi hanaq pachapi kaqkunapas hinaspa kay pachapi kaqkunapas chaynataq allpa ukupi kaqkunapas qunqurakunankuta. Chaynallataq Jesucristo señor kasqanta llapallan runakuna sutillata rimanankuta, chaynataqa rimanqaku Dios tayta hatunchasqa kananpaqmi’ (Filipenses 2:10, 11). Chaymantapas Diosta Jesuspa sutinpi mañakuspanchikqa Jehova Diostam hatunchachkanchik ñuqanchikrayku churinta kachamusqanmanta (Juan 3:16).

Bibliapim tarinchik Jesustaqa huk sutikunawanraq sutichasqanta, chaywanmi yachanchik Jesusqa tukuy imata ñuqanchikpaq ruwasqanmanta hinaspa hamuq tiempopipas ruwananmanta. (Qaway “Jesusta kay sutikunawan sutichasqanku” niq yachachikuyta ). Jesusmi lliw sutimantapas aswan sumaq sutita chaskirqa hanaq pachapipas hinaspa kay pachapipas kamachinanpaq atiyta chaskisqanrayku (Filipenses 2:9; Mateo 28:18).

Jesuspa sutinpi mañakuspanchikqa manam hawa sunqullachu rimananchik

Yachamusqanchikman hinam Jehova Dios uyariwananchikpaqqa mañakunanchik Jesuspa sutinpi (Juan 14:13, 14). Ichaqa manam munanchikchu “Jesuspa sutinpim mañakamuykiku” nisqanchik hawa sunqullamanta kanantaqa. ¿Imanasqa?

Kaypi piensarisun. Pipas imatapas rantikuwaspanchikqa “gracias” niwanchikmi. Ichaqa chaytaqa manam sunqumantachu ninku. “Jesuspa sutinpim mañakuykiku” nispanchikqa sunqumantam ninanchik manam rantikuq runakuna hinallachu. Bibliam kallpanchawanchik Diosta tukuy tiempo mañakunanchikpaq, Jesuspa sutinpi mañakuspanchikpas sunqunchikmantam rimananchik (1 Tesalonicenses 5:17; Salmos 119:145).

¿Imatam ruwachwan “Jesuspa sutinpim mañakamuyki” nisqanchik sunqumanta kananpaq? Chaypaqqa piensarinanchikmi Jesus imayna kasqanpi, imakuna ruwasqanpi hinaspa ñuqanchikpaq imakuna ruway munasqanpi. Chaymantapas Jehova Diosta mañakuspam agradecekunanchik churinta ñuqanchikrayku kachamusqanwan payman asuykuy atisqanchikmanta. Chayta ruwaspaqa manam iskayrayasunchu Jesuspa nisqanmanta. Paymi nirqa: “Imatapas taytayta mañakuptikichikqa sutiypim qusunkichik”, nispa (Juan 16:23).