¿Llapallan allin runakunachu hanaq pachaman rinku?
WAÑUKUNANPAQ ñawpaqnin tutatam, Jesusqa apostolninkunawan santa cenata rurarqa. Chaypim nirqa: “Taytapa kasqanpiqa achkam kachkan lugarkuna yachakunapaq, mana chayna kaptinqa manam rimariyllapas-rimariymanchu. Chaynaqa risaqmi qamkunapaq lugar allichamuq”, nispa (Juan 14:2). Kay nisqanwanmi Jesucristoqa prometechkarqa hanaq pachaman rinankupaq. ¿Imapaqtaq rinmanku?
Chay tutapim, Jesusqa apostolninkunata sumaq llamkayniyoq kanankumanta nirqa: “Sasachakuypi kaptiypas qamkunaqa ñoqawanmi karqankichik. Munaychakunaykichikpaqmi derechota qoykichik imaynam ñoqamanpas Taytay qowasqanman hina”, nispa (Lucas 22:28, 29). Ñawpaqtaraqmi Diosqa Jesusta prometerqa Rey kananpaq. Chaymi Rey kaspanqa runakunapa aswan necesitasqanta qonqa: suma-sumaq gobiernota, kay gobiernom allin runakunapa ñakariynintawan ñakarichiqninkunata chinkachinqa. Chay Gobierno “kay pachapa cantonkama” munaychakuspanpas, hanaq pachamantam kamachimunqa (Salmo 72:4, 8; Daniel 7:13, 14).
Ichaqa manam sapallanchu kamachimunqa, aswanmi apostolninkunawan kuska. Paykunam puntata akllasqa karqaku ‘kay pachata gobiernamunankupaq’ (Apocalipsis 5:10).
Hinaptinqa, ¿hayka runakunataq hanaq pachamanqa rinqaku? Aschallam. Diospa gobiernonpi aslla kaspankupas, kay pachapi wakin gobiernokuna hinam achkallaña runakunata kamachinqa. Jesusmi paykunata nirqa: “Amayá manchakuychikchu, aslla kaptikichikpas Dios Taytaykichikmi munaychakusqanta qoykusunkichik”, nispa (Lucas 12:32). Chay “aslla” runakunaqa 144.000 runakunam kanku, kay Pachapi wiñaypaq kawsakuyta suyaq millonnintin runakunawan tupachispaqa aschallam kanku (Apocalipsis 14:1; 21:4).
Chaynaqa, manamá llapallan allin runakunachu hanaq pachamanqa rinku. Chayna kasqantam apostol Pedro qawachirqa, nirqam rey David ‘cieloman mana hoqarisqa kasqanmanta’ (Hechos 2:34-35). Bautizaq Juanpas allin runam karqa, ichaqa Jesusmi nirqa paypas hanaq pachamanta mana kamachimunanta, nirqam: “Warmimanta naceqqa manam pipas hoqarisqachu karqa Bautizaq Juanmanta mayorqa, aswanmi hanaq pachamanta kamachiqkunapa sullka kaqmi Juanmanta aswan mayorqa”, nispa (Mateo 11:11, NM).
Allin runakunapaq bendicionkuna
Yachamusqanchikman hinaqa, yaqa llapallan runakunam kay Pachapi wiñaypaq kawsakunqaku. ¿Imatam rurananchik chay bendicionta chaskinapaq? Jesusmi nin: “Diosqa ancha-anchatam kuyarqa runakunata, chaymi sapallan Churinta qomurqa pipas paypi iñiqqa manaña puchukaspa wiñaypaqña kawsananpaq”, nispa (Juan 3:16). Arí, Diosqa anchatam kuyawanchik, chaymi wiñay kawsanapaq suyakuytapas qowanchik. Chaytamá chaskinqaku Jesuspi iñiqkunalla.
Ichaqa chay iñiyninchikqa Bibliapa cheqap yachachisqanman hinam kanan (Juan 17:3). Hinaptinqa, allinmi kanman Diospa munayninmanta hinalla yachayninchikqa hinaspa Bibliapa yachachisqanman hina kawsayninchikpas. Chaynapim Jehová Diosqa wiñay kawsaywan bendeciwasun.
[15 kaq paginapi recuadro]
Bibliapa yachachisqan
Runakunam ninku:
Pipas wañuptinqa almanqa hinallam kawsachkan, nispa.
Bibliam yachachin:
“Manam imatapas yachanchu wañuqkunaqa”, nispa (ECLESIASTES 9:5).
Runakunam ninku:
Wañuqkunaqa manam kawsarimunqakuchu, nispa.
Bibliam yachachin:
“[Jesuspa] qayasqanta uyarispanku[m] llapallan wañuqkuna kawsarimunqaku”, nispa (JUAN 5:28, 29).
Runakunam ninku:
Llapallan allin runakunam hanaq pachaman rinku, nispa.
Bibliam yachachin:
“Allin ruraq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku”, nispa (SALMO 37:29).